I Ọba 1 - Edo Bible (E Baibol Ẹdo) Version 1996

E Devid Vbe Ọ Khian Ọmaẹn Nẹ

¹ Te Devid ne ọba ghi khian ọmaẹn ẹsẹse, egbe ẹre i ghi sẹtin mwẹ ọghae, a gha rhe wẹ te a ya ye ukpọn ni mwẹ imi hin ẹnrẹn egbe.

² Avbe emwa rẹn keghi tama rẹn wẹẹ, “Umogun, gie ima gualọ uvbi ọkpa ne ọ gha guẹ dia, ne ọ vbe gha gbearoghe ruẹ. Ọ ghi gha lovbiẹ sikẹ ruẹ ne ọ ya egbe ruẹ gha mwẹ ọghae.”

³ Iran keghi gualọ uvbi ne ọ mose la otọ Izrẹl, hia, iran keghi miẹn Abisiag vbe Siunẹm, iran keghi rhie ẹre bu ọba gha dee.

⁴ A gha rhe miẹn we ọ wa mose ẹsẹse, kevbe wẹ rẹn ọ re ọ koko ọba. Ọ na vbe gha gbearoghe ẹre, ọ ma guẹ ruẹ emwi rhọkpa.

Adonaija Mu Ẹkete

^5-6 Ugbẹn vbe Absalọm ghi wu nẹ, Adonaija ne ovbi e Devid kevbe Hagit, keghi do gha re ọdiọn vbe emọ ni ghi ke ẹe. Rẹn kegha re ọmwa ne ọ mose ẹsẹse, ọ keghi wa vbe rhie aro yọ wẹ rẹn gha rriọba. E Devid ma he vbe zẹ okan guẹ ẹe gui ye emwirhọkpa ẹdẹ. Ọ keghi dẹlẹ ikẹkẹ okuo kevbe ẹsin ne egbe ẹre, deba arhin ekigbe siyeha ni lele ẹe khian.

⁷ Ọ keghi gu e Joab guan (ne a tie iye ẹe Zeruaia) kevbe Abiata ne ohẹn, iran keghi kue yọ wẹ iran viọ obọ ye ọre iyeke vbe emwi ne ọ khian ru.

⁸ Sokpan, e Zadọk ne ohẹn, e Benaia ne ovbi Jehoaida, e Natan ne akhasẹ, e Simẹi, e Rei kevbe emwa ne Devid ya khẹ egbe, ma yobọ ye Adonaija re.

⁹ Ọ ghi se ẹdẹ ọkpa, Adonaija keghi ya avbe ohuan, ẹmila kevbe ẹkhuia abẹgbe zọ ese vbe Okuta ẹyẹn ne ọ rre ọkpẹn ẹzẹ ne a tie ẹre Ẹnrogẹl, ọ keghi gie ne a tie ivbi e Devid nekpa hia kevbe emwa ni rre oga ọba ni ke Juda rre, gha die izọese na,

¹⁰ sokpan ọ ma tie Solomọn ne ovbi erha ẹe kevbe Natan ne akhasẹ ra Benaia ra avbe emwa ne ọba ya khẹ egbe.

A Ma Solomọn Ọba

¹¹ Ẹre Natan na bu Batsiẹba ne Iye Solomọn, ọ keghi nọ rẹn wẹẹ, “U ma he họn ra ighẹ Adonaija ne ovbi e Hagit ma egbe ẹre ọba? Kevbe wẹ e Devid ne ọba ma zẹdẹ rẹn vbe ekpa ẹre!

¹² A Deghẹ u ho ne u sinmwi uhunmwu uwẹ kevbe ọghe Solomọn ne ovbi uẹ ye agbọn, emwi ne I gha tama ruẹn ne u ru ọ re ọna khin.

¹³ Wa bu e Devid ne ọba gha khian nian ne u ya tama rẹn wẹẹ, ‘Umogun, ẹre te u yan ma mwẹ wẹẹ e Solomọn ne ovbi mwẹ ọ re ọ gha rriọba lele uẹ? Vbe ọ ghi zẹ nian ne Adonaija na rriọba?’ ”

¹⁴ E Natan na rhie te ẹe wẹẹ, “Wẹ ghẹ ghi wa gha ye guan nii, mẹ ghi la owa do kha wẹ ẹmwata ọre u ta.”

¹⁵ Ẹre Batsiẹba na wa bu ọba la uwu ughugha ẹre, ọ wa khian ọmaẹn nẹ ẹsẹse. Abisiag ne ovbi e Siunẹm ọ re ọ ghi gbearoghe ẹre.

¹⁶ E Batsiẹba keghi vbokho egbe rriotọ vbe odaro ọba, ọba na nọ rẹn wẹẹ, “Vbu a ho?”

¹⁷ Okhuo ni keghi wanniẹn wẹẹ, “Enaẹmwẹ, te u yan ma mwẹ vbe eni e Nọyaẹnmwa ne Osanobua ruẹ wẹ e Solomọn ne ovbi mwẹ ọ re ọ gha rriọba lele uwẹ.

¹⁸ Sokpan, banbanna nian, Adonaija rriọba nẹ, wẹ ma vbe rẹn e ne a ye.

¹⁹ Ọ ya ye ẹmila ni bun kevbe avbe ohuan kevbe avbe ẹkhuia ẹmila abẹgbe zọ ese, ọ keghi tie avbe ivbi uẹ ni ikpia, kevbe Abiata ne ohẹn kevbe Joab ne ọkaokuo ivbi iyokuo ruẹ ye ehe ne iran na rri evbare nii, sokpan, ọ ma tie Solomọn ne ovbi uẹ.

²⁰ Umogun, emwa Izrẹl hia wa khẹ ruẹ ne u tama iran ọmwa ne ọ gha rriọba lele uẹ.

²¹ A deghẹ u ma ru ẹe, u ghẹ ghi wu nẹ, etẹ ọ re a ra ka mwẹ kevbe Solomọn ne ovbi uẹ ba.”

²² Te ọ he wa ye guan.

²³ Vbe a do tama ọba wẹ e Natan ne akhasẹ rre. E Natan keghi la owa, ọ na vbokho uhunmwu rre ne ọba.

²⁴ Ọ keghi kha wẹẹ, “Umogun, wẹ ọ re ọ ta ẹe ra ne Adonaija rriọba lele uẹ?

²⁵ Vbe ẹdẹ nẹrẹ na zẹẹ nian, ọ ya gbele avbe ẹmila, ohuan kevbe ẹkhuia abẹgbe ni bun ya zọ ese, ọ keghi gie ne a tie avbe ivbi uẹ hia, kevbe Joab ne ọkaokuo ivbi iyokuo ruẹ kevbe Abiata ne ohẹn. Wanwanna nian, iran wa re iran da, iran hia gha go kha wẹẹ, ‘Adonaija ne ọba gha tọ ẹ kpẹre!’

²⁶ Sokpan, ọ ma tie mwẹ, enọwanrẹn ra e Zadọk ne ohẹn ra Benaia ra e Solomọn.

²⁷ Umogun, wẹ ọ re ọ we ne a ru ẹe vberriọ ra, vbene ọ ma na vbe ya ha ivbi ẹwae ruẹ ehọ wẹ ghe ọmwa ne ọ gha rriọba lele uẹ?”

²⁸ E Devid ne ọba keghi kha wẹẹ, “Wa tama Batsiẹba ne ọ dọlegbe la owa” Rẹn keghi gha dee do mudia ye odaro ọba.

²⁹ Rẹn keghi tama rẹn wẹẹ, “Te i ya eni e Nọyaẹnmwa ne ọ rrọ, ọmwa ne ọ yuo mwẹ hin uwu ọlọghọmwa mwẹ hia rre,

³⁰ wẹ ẹdẹ nẹrẹ na I gha mu ẹẹn sẹ ighẹ eyan ne I ya eni e Nọyaẹnmwa ne Osanobua ọghe Izrẹl yan ma ruẹn wẹ e Solomọn ne ovbi uẹ ọ re ọ ra rriọba lele mwẹ.”

³¹ E Batsiẹba keghi vbokho uhunmwu rriotọ, ọ wẹẹ, “Enaẹmwẹ ne ọba gha tọ, ọ kpẹre.”

³² Ẹre Devid ne ọba na wẹẹ ne a tie Zadọk, e Natan kevbe Benaia rre. Iran ghi la owa,

³³ rẹn keghi tama iran wẹẹ, “Wa viọ avbe ukọ ne iwẹguae mwẹ ba egbe, wa mu ẹ Solomọn ne ovbi mwẹ yan ekẹtẹkẹtẹ mwẹ, ne ọ hin ẹnrẹn ne uwa lele ẹe gha rrie Ẹzẹ Gihọn,

³⁴ ne Zadọk kevbe Natan ma ẹre ọba Izrẹl vbe evba, iyeke ọnii, wa ghi kpe okpe ne uwa datu wẹẹ, ‘E Solomọn ne ọba gha tọ ọ kpẹre.’

³⁵ Wa ghi dọlegbe lele ẹe gha die emwana, ne ọ do tota ye ẹkete mwẹ. Rẹn ọ re ọ ra rriọba lele mwẹ rhunmwuda rẹn ọ re I zẹe ne ọ gha khaemwisẹ yan Izrẹl kevbe Juda.”

³⁶ E Benaia keghi kha wẹẹ, “Te a gha ru ẹe, te Nọyaẹnmwa ne Osanobua ruẹ gha vbe so igie yọ.

³⁷ Zẹ vbene Nọyaẹnmwa yaba ruẹ, Umogun, te ọ gha vbe yaba e Solomọn vberriọ, te arriọba ẹre gha re ọghe ọrọkhọrhọ sẹ ọ wuẹ na.”

³⁸ Ẹre Zadọk, e Natan, e Benaia kevbe otu ne ọba ya khẹ egbe, na mu e Solomọn hin ẹsin e Devid, iran na lele ẹe gha rrie Ẹzẹ e Gihọn.

³⁹ E Zadọk keghi mu emwi ne a sa ori oliv yi, ne ọ rhie ke Owa Ukpọn e Nọyaẹnmwa rre, ọ keghi sae yan e Solomọn. Iran keghi kpe okpe, emwa hia keghi datu wẹẹ, “E Solomọn ne ọba gha tọ ọ kpẹre.”

⁴⁰ Ẹre iran hia na dọlegbe lele ẹe gha dee, iran kegha we uwemwẹ oghọghọ, iran na gha kpe ẹrogbo, iran keghi wee sẹrriọ wẹ te otọ gha mu rueghe.

⁴¹ Adonaija kevbe emwa ne ọ tie re ghi wa da rri evbare fo, iran keghi họn uwemwẹ na. Ugbẹn vbe Joab ghi họn okpe, ọ keghi kha wẹẹ, “De emwi ne iran wee ba vbe ore ẹvbo yi?”

⁴² Ọ ma he guan fo vbe Jonatan ne ovbi Abiata ne ohẹn rre. Adonaija kevbe khama rẹn wẹẹ, “La owa gha dee, ọmọ esi u khin, iyẹn esi ọ re u ra do na.”

⁴³ E Jonatan keghi wanniẹn wẹẹ, “Mẹ ma yayi vberriọ. E Devid ne ọba ma e Solomọn ọba nẹ.

⁴⁴ Ọ keghi gie Zadọk, e Natan e Benaia kevbe otu ne ọba ya khẹ egbe lele ẹe. Iran keghi mu ẹẹn hin ekẹtẹkẹtẹ ọba.

⁴⁵ E Zadọk kevbe Natan keghi tue ori ye ọre uhunmwu vbe Ẹzẹ e Gihọn. Iran na gha rrie adesẹ ore, iran na gha we uwemwẹ oghọghọ, te emwa hia ghi wa we na bọọ. Ọnii ọrọre urhu owogho ne uwa họn ẹn.

⁴⁶ Ọba ọre Solomọn ghi khin na.

⁴⁷ Ye vbe sẹ ọnii, evba iwẹguae na niẹn obọ ne Devid ne ọba, iran keghi kha wẹẹ, ‘Te Osanobua gha gie Solomọn hin usi sẹ ruẹ, kevbe ne ẹghẹ ọre gha re ọghe ọwọrhọwọrhọ sẹ ọwuẹ.’ Ẹre Devid ne ọba na vbokho uhunmwu rre ọghe ugamwẹ vbe ukpo ne a vbiẹ ọghe ọe.

⁴⁸ Ọ keghi kha wẹẹ, ‘Wa gie ima rho e Nọyaẹnmwa ne Osanobua Izrẹl, ne ọ gie ọkpa vbe uwu ivbi mwẹ rhie ihe mwẹ vbe ẹkete ẹdẹnẹrẹ na, ọ keghi vbe gun mwẹ tọ ne aro mwẹ sẹ ọe.’ ”

⁴⁹ Ẹre ohan na mu emwa ne Adonaija tie sẹ owa, iran keghi gua kpao, edọmwadẹ ọghọe na lele odẹ ọre gha rrie.

⁵⁰ Ohan dan ọghe Solomọn keghi mu Adonaija ọ na rhulẹ la uwu Owa Ukpọn e Nọyaẹnmwa, ọ keghi ya sobọ mu ukpẹ erhan Ogiukpo.

⁵¹ Iran keghi do khama e Solomọn ne ọba wẹ ohan rẹn mu Adonaija, ọ vbe ya sobọ mu ukpẹ erhan Ogiukpo, ọ wẹẹ, “Okaro emwi hia, I ho ne ne Solomọn vẹn ihẹn ya yan ma mwẹ we rẹn i ra gbe mwẹ uan.”

⁵² E Solomọn keghi wanniẹn wẹẹ, “A deghẹ ọ ma sọtẹ, a i vbe ye obọ kan ẹre ukpeto ọkpa vbe uhunmwu, sokpan ọ gha sọtẹ, te ọ gha wu.”

⁵³ E Solomọn ne ọba keghi gie ne a tie Adonaija, ọ na we ne a ya rhie ẹre ke Ogiukpo gha dee, Adonaija keghi bu ọba gha khian, ọ na vbokho uhunmwu rre vbe odaro ẹre. Ọba keghi khama rẹn wẹẹ, “U sẹtin gha rrie owa.”