I Krọnikol 29 - Edo Bible (E Baibol Ẹdo) Version 1996

Izọhẹ Emwi Ne A Ya Bọ Ọgua Osa

¹ E Devid ne ọba keghi tama emwa ni si koko ye evba wẹẹ, “E Solomọn ne ovbi mwẹ ọrọre ọmwa ne Osanobua zẹe, sokpan, ọvbokhan he ye nọ, ọ ma vbe rẹn emwi rhọkpa. Iwinna ne a ra winna, ọrhẹnrhẹn nọ, rhunmwuda, ọna i re ẹguae ọghe ọmwa kẹkan sokpan Ọgua Osa ọghe Nọyaẹnmwa ne Osanobua.

² I hia re ẹsẹse ne a mu egbe emwi hia ye otọ khẹ nene Ọgua Osa na, avbe igoru, esiliva, oze, ematọn, igẹdu, okuta ighobioye kevbe ikpẹrọnmwọ, okuta na a gha gbẹnnẹ kevbe avbe okuta ne ghẹinghẹin ọrhẹnrhẹn.

³ Yevbe deyan ena hia ne a mu egbe ẹre ye otọ na, I kevbe viọ avbe igoru kevbe esiliva ọghe obọ mwẹ ladian rhunmwuda vbene iho ẹmwẹ Ọgua Osa ọghe Osanobua hẹ.

⁴ I viọ etọni igoru isẹn irrọvbe iyehan (115) ye otọ nẹ kevbe etọni esiliva isẹn yan iyeha yan uri (265). Ọ gberra uwan nọkhua iyisẹn ọghe igoru ne ọ maa ne a ya zẹ ose ye egbekẹn ọghe Ọgua Osa nii.

⁵ Kevbe ne avbe emwi hia ne a vbe owinna gha ye obọ ru. Banbanna nian, de ọmwa ọvbehe ne ọ ho ne ọ zẹ ọhẹ ne a i na kokobọ rre ne Nọyaẹnmwa?”

⁶ Ẹre avbe ọkaẹgbẹe dọmwadẹ uniẹn, iran ni rre asẹ vbe dọmwadẹ ẹwae, avbe ọkaokuo nekhua avbe ivbiyokuo kevbe iran ni gbearoghe ẹfe ọba na ya ekhọe obọ iran we iran gha viọ re.

⁷ Avbe emwi na rre ne a ya winna vbe Ọgua Osa. Etọni igoru igbe irrọvbe uri (190), etọni esiliva ugie irrọvbe uri eva (380), etọni oze isẹn irrọvbe iyenẹ yan uri eha (675), etọni ematọn ekigbe siyeha irrọvbe arria enẹ yan arriaisẹn eha (3,750).

⁸ Iran ni mwẹ okuta ighobioye keghi viọ iran ye aza Ọgua Osa ne ọ gbe aro ghe ighẹ Jẹhiẹl ne ovbi uniẹn e Gẹsiọn ne Livai.

⁹ Emwa nii keghi ya ekhọe obọ iran viọ emwi gie Nọyaẹnmwa, iran keghi ghọghọ wẹ emwi ne a viọ rre bun sẹ vberriọ. Ẹko keghi kakabọ rhiẹnrhiẹn e Devid ne ọba tobọ ẹre.

E Devid Rho Osanobua

¹⁰ Vbe odaro emwa ni si koko vbe evba nii hia, e Devid keghi rho Osanobua, ọ na wẹẹ, “E Nọyaẹnmwa ne Osanobua ọghe Jekọb ne erha mwa odede, te a gha rho ruẹ ẹdẹ kevbe ẹdẹdẹmwẹdẹ!

¹¹ U kpọlọ ẹsẹse, u kevbe mwẹ ẹtin ne ọ vuọn ne ose kevbe orrirri. Wẹ ọ re ọ yan emwi hia ni rre ẹrinmwi kevbe agbọn wẹ ọrọre ọba, ogie nọkhua ne ọ kha yan emwi hia.

¹² Obọ ruẹ ọ re ẹfe kevbe uwa hia ke rre, ẹtin kevbe iwegbe ruẹ ọre u ya kha yan emwi hia. Wẹ sẹtin ye ọmwaikọmwa khian nọkhua kevbe nọ wegbe.

¹³ Banbanna nian, Osanobua mwa, ma rhie ekpọnmwẹ ne uẹn, ma kevbe rho eni ruẹn ne ọ mwẹ uyi.

¹⁴ “Sokpan, levba sevba, mẹ kevbe emwa mwẹ i sẹtin gele rhie emwi kemwi nuẹn, rhunmwuda, emwi hia, wẹ ọ re ọ ya ẹe ru ọmwa ẹse, ọnii nọ wẹ emwi ne ọ re ọwuẹ nẹ ọre ima vbe dọlegbe viọ ne uẹn.

¹⁵ E Nọyaẹnmwa, wẹ rẹnrẹn wẹ te ima la agbọn na gberra vbe emwa ni rrie iwe kevbe ekhẹn vbene avbe enikaro vbe ru. Te ẹdẹ agbọn mwa yevbe aghọnghọn ni rhie gberra khian, ma i sẹtin lẹ uwu fe.

¹⁶ E Nọyaẹnmwa Osanobua mwa ma viọ emwi na hia rre ne a do ya bọ Ọgua Osa ya rhie ọghọ ne eni ruẹn ne ọ huanrẹn, sokpan, obọ ruẹ ọre ehia ke rre, ọwuẹ ọ re iran vbe khin.

¹⁷ Mẹ rẹnrẹn wẹ te uwẹ danmwẹ ekhọe edọmwadẹ ọghọe ghe, ẹko ruẹ vbe rhiẹnrhiẹn emwa ne ekhọe ne ọ huanrẹn kevbe ne ọ re ọghe ẹmwata. Ẹko ẹmwata ọre I ya ye ekhọe obọ mwẹ viọ emwi na hia guẹ. Ọ vbe miẹn vbene emwa ni si koko ye emwa na vbe ya ẹko ọyẹnmwẹ viọ emwi ihaoko guẹ.

¹⁸ E Nọyaẹnmwa ne Osanobua avbe erha mwa odede, Ebraham, Aizik kevbe Jekọb, gie ekhọe ne a ya ga vberriọ gha digiẹ yọ vbe uwu emwa ruẹn rhinrin, ne u gie ekhọe iran gha la ghe ọwuẹ vbe ẹghẹ hia.

¹⁹ Rhie ekhọe ne ọ mu egbe vbe ẹghẹ hia ne ọ ya ru vbene iyi ruẹ khare ne Solomọn ne ovbi mwẹ, ne ọ bọ Ọgua Osa na ne I rhọ emwi ẹnrẹn ye otọ na.”

²⁰ Ẹre Devid ghi na tama emwa ni hia wẹẹ, “Wa rho e Nọyaẹnmwa Osanobua uwa!” Emwa ni hia ni si koko ye evba keghi wa rho e Nọyaẹnmwa ne Osanobua avbe erha iran odede. Iran keghi ye uhunmwu rhanmwẹ otọ iran na ya ọghọ ne Nọyaẹnmwa kevbe ne ọba.

²¹ Vbe ẹdẹ ne ọ lele ẹe, iran keghi gbele aranmwẹ kevbe emwi izọese, iran keghi ya ehia fi ohan ne Nọyaẹnmwa, iran na viọ ne emwa ne iran rri ọe. Iran kevbe gbele ẹkhuia ẹmila arriaisẹn ya zọ ese, kevbe ogho arriaisẹn kevbe oteghe ohuan arriaisẹn, ne iran wa giẹn ọnrẹn ohoho vbe uhunmwu Ogiukpo. Iran keghi vbe viọ ayọn rre do ya mu ohan.

²² Erriọ ọre ọ gha ye wẹ vbe ẹdẹ ne ẹdẹrriọ ẹko kegha rhiẹnrhiẹn iran hia vbe iran re, iran vbe da, vbe odaro e Nọyaẹnmwa. Iran keghi dọlegbe ma e Solomọn ọba ukpogieva. Iran na sa ori ye ọre uhunmwu zẹ vbe ọba iran vbe eni e Nọyaẹnmwa, Iran kevbe ma Zadọk ohẹn.

²³ Ẹre Solomọn na ghi rriọba lele Devid ne erha ẹe vbe ẹkete ne Nọyaẹnmwa mu gbọọ. Ọba ne ọ dunna na ọre nọ, emwa Izrẹl hia kegha họn ẹmwẹ ne ẹẹn.

²⁴ Iran ni rre asẹ hia kevbe avbe ivbiyokuo, uhin ya sẹ egbe ivbi e Devid nekpa, keghi yan wẹ iran gha ye ekhọe ga e Solomọn zẹ vbe ọba.

²⁵ E Nọyaẹnmwa keghi ru ẹe ne ohan e Solomọn gha mu otọe ẹvbo hia, ọ keghi ya ẹe mwẹ uyi sẹẹ avbe ọba hia ne ọ he rriọba vbe Jerusalẹm.

Arriọba E Devid Vbe Ifiẹmwẹ Tuai

²⁶ E Devid ne ovbi e Jese keghi ya,

²⁷ ukpo iyeva vbe ẹkete Izrẹl ọ na ya ukpo ihinrọn vbe ẹkete vbe Hibrọn kevbe eha yan ọgban vbe ẹkete vbe Jerusalẹm.

²⁸ Ọ khian ọmaẹn ẹsẹse ọ keghi do wu, ọ fe, emwa hia kevbe gha yọghọ ne ẹẹn, e Solomọn ne ovbi ẹre keghi rri ọba lele ẹe.

²⁹ A gbẹn okha arriọba e Devid, ke omuhẹn ya sẹ ufomwẹ ọnrẹn ye avbe ebe eha, e Samuẹl, e Natan kevbe Gad.

³⁰ Emwi ne a gbẹnnẹ na rhie maa vbene ọ khaemwisẹ hẹ, vbene ọ mwẹ ẹtin sẹ, kevbe emwi ni sunu vbe egbe ẹre hia, Izrẹl kevbe otọ arriọba ni lẹga ẹre.