Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

I Krọnikol 28 - Edo Bible (E Baibol Ẹdo) Version 1996


Vbene Devid Wẹ Ne A Ru Ọgua Osa Hẹ

1 E Devid ne ọba keghi wẹ ne avbe iran ni rre asẹ vbe otọ Izrẹl hia gha die Jerusalẹm. Rhunmwuda ọnii, iran ni rre asẹ vbe dọmwadẹ ẹwae, iran ni rre asẹ ni gbearoghe iwinna otọ arriọba nii, avbe ọkaolotu uniẹn, iran ni gbearoghe emwi ne ọba mwẹ kevbe emwirri ẹre kevbe avbe ivbi ẹre, ne a wa kha wẹ iran ni rre asẹ vbe ẹguae hia, avbe ivbiyokuo ni hin usi kevbe emwa kpataki hia na si koko vbe Jerusalẹm.

2 E Devid keghi mudia ye odaro iran, ọ na gu iran guan wẹẹ, “Wa ne ivbi ẹvbo mwẹ, wa danmwehọ mwẹ. Ọ te gha rrọ mwẹ ekhọe ne I bọ owa etẹbitẹ ne Ẹkpẹti Ile, ne ọ re ẹkpẹti ne Nọyaẹnmwa ne Osanobua mwa viọ owẹ yan. I mu egbe ẹre ye otọ nẹ ne I bọ Ọgua Osa ya yọghọ nẹẹn.

3 Sokpan, ọ wẹ ne I ghẹ ru ẹe. Rhunmwuda ighẹ ovbiyokuo ọ re I khin, esagiẹn ne I he gbe kua bun gbe.

4 E Nọyaẹnmwa ne ọ re Osanobua Izrẹl keghi zẹ mwẹ kevbe ivbi uniẹn mwẹ ne a gha khaemwisẹ yan Izrẹl ẹdẹdẹmwẹdẹ, ọ keghi zẹ ẹwae Juda ne iran gha rhie ọkaolotu ladian rre, ọ keghi zẹ ẹgbẹe erha mwẹ vbe Juda. Ọ kevbe ye ọre ne ọ zẹ mwẹ vbe uwu ẹgbẹe ni hia ne ọ ya mwẹ rriọba Izrẹl hia.

5 Ọ vbe viọ emọ ikpia ni bun mẹ biẹlẹ, vbe uwu iran hia, ọ kevbe zẹ Solomọn ne ọ rriọba Izrẹl ne ọ re otọe arriọba e Nọyaẹnmwa.

6 “E Nọyaẹnmwa keghi tama mwẹ wẹẹ, ‘E Solomọn ne ovbi uẹ ọre ọ gha bọ Ọgua Osa mẹ. I zẹẹ ọe nẹ ne ọ gha re ovbi mwẹ, mẹ gha vbe gha re erha ẹe.

7 I gha ye arriọba ẹre gha sun khian vbe otọ ẹdẹdẹmwẹdẹ a dẹghe ọ rhie uhi mwẹ kevbe iyi mwẹ mwẹ zẹ vbene ọ ru nian.’

8 “Rhunmwuda ọnii nian wa ne emwa mwẹ, vbe odaro Osanobua mwa kevbe asi koko ọghe ivbi Izrẹl hia na, I yan tae ma uwa nian ne uwa gha rhie owẹ lele emwi hia ne Nọyaẹnmwa ne Osanobua mwa yi ẹre iyi ne ima, ne otọe ne ọ maa na miẹn ehe na gha re ọghe uwa khian, ne uwa vbe fiẹe ye orre ni gha rri ukhu uwa otọ rhinrin ẹdẹ.”

9 Rẹn keghi tama Solomọn wẹẹ, “Ovbi mwẹ, I yan tama ruẹn nian ne u rhan obọ miẹn Osanobua erha a, ne u gha ya ekhọe ẹmwata ga ẹe kevbe orhiọn ne ọ ho. Ọ rẹn iziro ekhọe mwa kevbe emwi ne ima gualọ. A dẹghe u bu ẹre gha khian, ọ gha miẹn ruẹn yi, sokpan a dẹghe u fi iyeke gbẹe, ọ gha suẹ rae rhinrin ẹdẹ.

10 U ghi rẹn wẹ te Nọyaẹnmwa zẹ uwẹ ne u bọ Ọgua Osa ẹre ne ọ huanrẹn. Banbanna nian, u ghi ru ẹe, u ghi wa mu aro yọ ne u ruẹe.”

11 E Devid keghi ru ama vbene a mwa nene Ọgua Osa hia hẹ ne Solomọn, avbe aza ni rrọọ kevbe avbe ugha ọvbehe ni rrọọ kevbe Ehe Nọhuansẹ Ehia, ehe ne a na ya orukhọ bọ ọmwa.

12 Ọ keghi vbe viọ ne ẹẹn ba ẹre ama emwamwa ọgua ni rrọọ zẹ vbene ọ rre irẹn ekhọe, kevbe avbe ugha ni lẹga iran, kevbe avbe aza ne a viọ emwi ne a lo vbe uwu Ọgua Osa yi deba aza emwi ne a ya fi ohan gie Nọyaẹnmwa.

13 E Devid keghi vbe mu emwamwa ọghe vbe ne ọ gha mwamwa avbe ohẹn hẹ nẹẹn, kevbe avbe Livai, ne iran gha winna iwinna iran, ne iran gha winna iwinna Ọgua Osa, kevbe ne iran gbearoghe avbe ọkpan ne a lo vbe Ọgua Osa hia.

14 Ọ kevbe ta inu igoru kevbe esiliva ne a gha lo ya ru avbe ọkpan nii.

15 Ne a gha ya ru ukpa kevbe avbe erhan ọmukpa.

16 Avbe e eteburu esiliva kevbe dọmwadẹ e eteburu igoru ne a viọ ebrẹd ne a ya yo imu ohan gie Osanobua yi.

17 Ọ kevbe ta inu igoru ne a gha ya ru ekuiyẹ, oha, avbe ọkpan nekhua kevbe avbe uru, inu esiliva kevbe igoru ne a gha ya ru avbe ọkpan negiẹrẹ,

18 kevbe igoru ne a ma gua ne a gha ya ru Ogiukpo ne a na giẹn eturari kevbe ikẹkẹ okuo ne a vbe emwi ni zẹ ifuẹn nii tan ifuẹn iran gue Ẹkpẹti Ile e Nọyaẹnmwa.

19 E Devid ne Ọba keghi kha wẹẹ, “Avbe emwi na hia rre ama ne a gbẹn zẹ vbene Nọyaẹnmwa tobọ ẹre tae ma mwẹ ne I ru ẹe.”

20 E Devid ne ọba keghi tama e Solomọn ne ovbi ẹre wẹẹ, “Gie ekhọe ruẹ sẹ otọ ne u vbe mu aro yọ, suẹn iwinna nii, ghẹ vbe gie emwikemwi da a obọ yi. E Nọyaẹnmwa ne Osanobua ne imẹ ga, gha yaba ruẹ. Ẹ i ra fi iyeke gbe uẹ, ọ gha mudia kuẹ u te do winna iwinna ne a gha winna na vbe Ọgua Osa.

21 A wa iwinna ne avbe ohẹn kevbe avbe Livai gha winna vbe Ọgua Osa ne iran nẹ. Emwa iwinna ni gue ona ughughan, mu egbe ne iran yuẹ obọ, avbe emwa nii hia kevbe avbe ekaolotu iran rre evba ne u lo iran vbene ọ khọn ruẹn.”

@ The Bible Society of Nigeria, 1996

United Bible Societies
ကြှနျုပျတို့နောကျလိုကျပါ:



ကြော်ငြာတွေ