I Krọnikol 27 - Edo Bible (E Baibol Ẹdo) Version 1996

Emwamwa Ivbiyokuo Kevbe Ewọe Arriọba

¹ Eni avbe ekaolotu Izrẹl ọ re ena khin zẹ vbe ọghe ẹgbẹe kevbe uniẹn kevbe emwa ni rre asẹ ni gha ye iwinna arriọba khian. Uki ọkpa ọ re a ya zẹ oka ughughan ne arhin arriaisẹn enẹyan ugie (24,000) ye ne iran gha winna vbe ototọ enọkhaemwisẹ vbe uki nii.

^2-15 Iran na ọ re ọ gha khaemwisẹ vbe uki ọkpọkpa, Uki ne okaro: e Jasiọbim ne ovbi e Zabdiẹl (ovbi uniẹn e Pẹrẹs ọ re nọ, ọkpa vbe ẹwae e Juda.) Uki ne ogieva: e Dodai ne ovbi uniẹn Ahohai (ọmwa ne ọ gha zẹ ke ẹe kegha re Miklọt) Uki ne ogieha: e Benaia ne ovbi e Jehoiada ne ohẹn, rẹn ọ re ọ gha re ọkaolotu “Iran ne Ọgban” (Amizabad ne ovbi ẹre ne okpia ọ re ọ rhie ihe ẹre zẹ vbe olotu oka na) Uki ne ogienẹ: Asahẹl ne ọtẹn e Joab (ovbi ẹre ne okpia ighẹ Zebadaia ọre ọ rhie ihe ẹre) Uki ne ogisẹn: e Siamhut ne ovbi uniẹn Izia Uki ne ogiehan: Ira ne ovbi Ikẹs ne ọ ke Tẹkoa rre Uki ne ogihinrọn: e Helẹz ovbi Ifreim ne ọ ke Pelọn rre Uki ne ogierẹnrẹn: e Sibekai ne ọ ke Husia rre (ovbi uniẹn e Zẹra nọ, ọkpa vbe ẹwae Juda) Uki ne ogihinrin: Abiẹzẹ ne ọ ke Anatọt rre vbe otọ ẹwae Bẹnjamin Uki ne ogigbe: e Maharai ne ọ ke Nẹtofa rre (ovbi uniẹn e Zẹra nọ) Uki ne ogiowọrọ: e Benaia ne ọ ke Piratọn rre vbe otọ ẹwae Ifreim Uki ne ogiweva: e Heldai ne ọ ke Nẹtofa rre (ovbi uniẹn Otniẹl ọre nọ).

Iwinna Eghaẹvbo Avbe Ẹwae Izrẹl

^16-22 Eni emwa ni gha gbearoghe ẹwae Izrẹl ọ re ena khin: Ẹwae Ukọ Ọsuẹvbo E Riubẹn Eliezẹ ne ovbi e Zikri E Simiọn Siefatia ne ovbi e Maaka E Livai Hasiabaia ne ovbi e Kemuẹl Errọn Zadọk E Juda Elihu, ọkpa vbe etẹn Devid ne ọba Isaka Ọmri ne ovbi Maikẹl E Zebulọn Ismaia ne ovbi Obedaia E Naftali Jeremọt ne ovbi Azriẹl Ifreim Hosia ne ovbi Azazaia E Manasẹ ne owẹn ota Joẹl ne ovbi e Pedaia E Manasẹ ne owẹn owiẹ Ido ne ovbi e Zẹkaraia E Bẹnjamin Jaasiẹl ne ovbi Abna E Dan Azarẹl ne ovbi e Jeroham.

Ẹwae Ukọ Ọsuẹvbo

²³ E Devid ne ọba ma ka emwa ni ma he sẹ ukpo ugie rhunmwuda ne Nọyaẹnmwa kha na nẹ wẹ rẹn gha ya ivbi Izrẹl muan yọ ne iran gha ye vbe avbe orhọnmwẹ ni rre iso.

²⁴ E Joab ne a tie iye ẹe e Zeruaia keghi suẹn gha ka ẹvbo sokpan, ọ ma kae fo. Osanobua keghi rri ivbi Izrẹl oya rhunmwuda, ikẹvbo na, rhunmwuda ọnii, a ma ghi gbẹn inu ne ọ khin ye ebe ọghe Devid ne ọba.

Emwa Ni Gbearoghe Emwi Ọba

^25-31 Eni emwa ni gha gbearoghe emwi ọba ọre ena khin: Aza ọghe ọba: Azmavẹt ne ovbi Adiẹl Aza ni rre dọmwadẹ ẹvbo: Jonatan ne ovbi Uzaia Iwinna ugbo: Ezri ne ovbi e Kiẹlub Ugbo emwiokọ: Simẹi ne ọ ke Rama rre Aza ayọn: e Zabdi ne ọ ke Siefam rre Erhan oliv kevbe sikamọ: (ni rre ototọ oke vbe owẹn ota) Bal Hana ne ọ ke Gede rre Ofigbọn oliv ne a dọlọ yi: e Joas Avbe ẹmila ni rre otọe ni rriẹe vbe Siarọn: Sitrai ne ọ ke Siarọn rre Ẹmila ni rre iya: e Siafat ne ovbi Adlai E kamẹl: Obil ne ọmwa Ismaẹl Ekẹtẹkẹtẹ: E Jedaia ọmwa Meronot Ohuan kevbe ẹwe: Jaziz ne ọmwa Hagrit.

Iran Ni Gu E Devid Zẹ Iro

³² E Jonatan ne ovbi iye erha Devid kegha re ọguọmwaziro ne ọ guẹe ẹsẹse kevbe ne ọ rẹn emwi. Rẹn kevbe Jẹhiẹl ne ovbi e Hakmọn ọ re a mu ẹmwẹ emwi ne a ma ivbi ọba re ye ọ re obọ.

³³ Ahitofẹl kegha re ne ọ gu ọba ziro, e Husiai ne ọmwa Aki kegha re ẹse ọba kevbe ne ọ gu ẹe zẹ iro.

³⁴ Ahitofẹl ghi wu nẹ, Abiata kevbe Jehoiada ne ovbi e Benaia keghi gha re ọguọmwaziro. E Joab kegha re ọkaokuo nọkhua ọghe ivbiyokuo ọba.