I Krọnikol 24 - Edo Bible (E Baibol Ẹdo) Version 1996

Iwinna Ne A Wa Ne Avbe Ohẹn

¹ Otu ne ivbi uniẹn Errọn gha ye ọ re ena khin. Emọ ikpia enẹ ọre Errọn biẹlẹ, ena kegha re Nadab, Abihu, Eliaza kevbe Itama.

² E Nadab kevbe Abihu ọ re ọ ka wu khẹ erha iran, iran ma vbe biẹlẹ, ọ re etẹn iran ighẹ Eliaza kevbe Itama na gha re ohẹn.

³ E Devid ne ọba keghi ghae ivbi uniẹn Errọn ye otu otu, ọ na vbe wa iwinna ne iran. E Zadọk ne ovbi uniẹn Eliaza kevbe Ahimẹlẹk ne ovbi uniẹn Itama kegha yi ọre obọ vbe iwinna na.

⁴ A keghi ghae ivbi uniẹn Eliaza ye oka enẹirrọvbugie, a keghi ghae ivbi Itama ye oka erẹnrẹn, ọna kegha ye vberriọ rhunmwuda, ivbi uniẹn Eliaza ọ re avbe ọkaẹgbẹe ni ikpia na bun sẹe.

⁵ A ghi miẹn wẹ emwa ni rre asẹ vbe uwu Ọgua Osa kevbe avbe ọkaolotu ẹmwẹ orhiọn wa bun vbe ivbi uniẹn Eliaza kevbe Itama a keghi yan uta yọ ya wa iwinna ne iran.

⁶ Ivbi uniẹn Eliaza kevbe Itama ọ re ọ gba gha yan uta vbene ọ ya sẹ iran egbe. Ẹre Siemaia ne ovbi e Netanẹl ne akowe Livai, na gbẹnnẹ eni iran ye ebe. Ọba, kevbe avbe emwa ni rre ukpo vbe ototọ ẹre, avbe ohẹn ighẹ Zadọk kevbe Ahimẹlẹk ne ovbi Abiata deba avbe ọkaẹgbẹe ẹgbẹe avbe ohẹn, kevbe ogha avbe Livai, ehia kegha re osẹe.

^7-18 Vbene a ya wa iwinna ne dọmwadẹ ẹgbẹe enẹyan ugie ni ọre ọna khin: 1. Jehoiarib 13. Hupa 2. Jedaia 14. Jesebeab 3. Harim 15. Bilga 4. Seorim 16. Ima 5. Malkija 17. Hezẹ 6. Mijamin 18. Hapizez 7. Hakọz 19. Pitahaia 8. Abija 20. Jehezkẹl 9. Jesua 21. Jakin 10. Siekanaia 22. Gamul 11. Eliasib 23. Delaia 12. Jakim 24. Maazaia

¹⁹ A keghi gbẹnnẹ eni emwa na ye ebe zẹ vbe iwinna ne a wa ne dọmwadẹ ọghọe vbe ẹghẹ ne iran ya yo Ọgua Osa, ne iran ya winna iwinna ne a wa ne iran zẹ vbene Errọn ne erha iran odede mu ẹẹn gbọọ, zẹ vbene Nọyaẹnmwa ne Osanobua Izrẹl gie.

Eni Avbe Livai

²⁰ Avbe ọkaẹgbẹe ivbi uniẹn Livai ni dekẹe ọ re ena khin. E Jedaia vbe obọ ọghe Amram vbe uviẹn ọghe Siebuẹl;

²¹ Isiaia, ovbi uniẹn Rehabaia;

²² E Jahat, ovbi uniẹn Izia vbe obọ ọghe Sielomit;

²³ E Jeria, Amaraia, e Jehaziẹl kevbe Jekameam, ivbi e Hibrọn zẹ vbene a ya biẹlẹ iran lele egbe.

²⁴ E Siama, ovbi uniẹn Uziẹl vbe obọ ọghe Mika.

²⁵ E Zẹkaraia, ovbi uniẹn Uziẹl vbe obọ ọghe Isiaia ne ọtẹn Mika ne okpia;

²⁶ E Mali, e Musi kevbe Jaazia ne ivbi uniẹn e Merari.

²⁷ E Jaazia kegha mwẹ emọ ikpia eha, ena ọ re Sioham, e Zakọ kevbe Ibri.

^28-29 E Mali keghi mwẹ emọ ikpia eva, ena ọre Eliaza kevbe Kis, Eliaza ma biẹ ọmọ okpia, sokpan Kis kegha mwẹ ọkpa ne a tie ẹre Jeramil.

³⁰ E Musi gha mwẹ emọ ikpia eha, ena ọre Mali, Edẹ kevbe Jeremọt. Ena ọrọre ẹgbẹe avbe Livai.

³¹ Dọmwadẹ ọkaẹgbẹe ghi wẹ ne ọtiọnrẹn ne ọ kotọ ọkpa ya yan uta ya zẹ iwinna ne a gha wa ne iran, zẹ vbene etẹn iran ighẹ avbe ohẹn ni re ivbi uniẹn Errọn ka vbe ru. E Devid ne ọba, e Zadọk, Ahimẹlẹk kevbe avbe ọkaẹgbẹe avbe ẹgbẹe ohẹn kevbe Livai, kegha re osẹe.