I Krọnikol 22 - Edo Bible (E Baibol Ẹdo) Version 1996

¹ Ẹre Devid na kha wẹẹ, “Emwana ọ re Ọgua Osa e Nọyaẹnmwa Osanobua ra gha ye, eke ne emwa Izrẹl gha na gha zọ ese na giẹn uan.”

Imuegbeye Otọ Ọghe Ọgua Osa Ne A Bọ

² E Devid ne Ọba keghi gie wẹ ne avbe orhunmwuyẹn hia ni rre otọe Izrẹl si koko, ọ na viọ iwinna ne iran. Eso vbe uwu iran kegha giagia okuta ne a gha ya bọ Ọgua Osa.

³ Ọ keghi viọ ematọn nibun rre ne a ya ru ise kevbe olode ye ẹkhu erhan onurho ne a la larọ, deba oze ne ọ bun sẹvberriọ wẹ a i miẹn ọmwa ne ọ gha sẹtin mwa rẹn vbene ọ khua sẹhẹ.

⁴ Ọ kevbe gu emwa Taia kevbe Saidọn tae ne iran viọ ike igẹdu isida nibun gie irẹn.

⁵ E Devid keghi rorẹe wẹẹ, “Ọgua Osa ne Solomọn ne ovbi mwẹ gha bọ, ọ kere ne ọ gha re ne ọ mose kevbe ne ọ gha titi gba otọ agbọn hia. Sokpan, ọvbokhan ọ re irẹn khin, ọ ma he rẹn emwi rhọkpa, rhunmwuda ọnii, ọ kere ne I mu egbe ẹre ye otọ.” Ọ re Devid na mwamwa emwi ọrhẹnrhẹn ye otọ ọ te wu.

⁶ Ọ keghi gie ne a tie Solomọn ne ovbi ẹre, ọ na tama rẹn wẹ ne ọ bọ Ọgua Osa ne Nọyaẹnmwa ne Osanobua Izrẹl.

⁷ E Devid keghi tama rẹn wẹẹ, “Ovbi mwẹ, I te zẹẹ ọe vbe iro ne I bọ Ọgua Osa ya ya ọghọ ne Nọyaẹnmwa Osanobua mwẹ.

⁸ Sokpan e Nọyaẹnmwa keghi tama mwẹ wẹ emwa ne I gbele ua bun gbe, I keghi vbe khọn okuo ni bun gbe, rhunmwuda ọnii vbene a na miẹn wẹ esagiẹn ne I gbe ye otọ busẹ vberriọ, rẹn I ra kue ne I bọ Ọgua Osa ne irẹn.

⁹ Vbene ọ rhirhi a gha ye hẹ, ọ ye yan ma mwẹ. Ọ wẹẹ, ‘U gha biẹ ọmọ okpia ọkpa ne ọ gha khaemwisẹ vbe ọfumwegbe, rhunmwuda, I gha rhie ọfumwegbe ne ẹẹn vbe obọ avbe eghian rẹn hia. Eni ẹnrẹn ọ re ọ gha re Solomọn, rhunmwuda I gha rhie ọfumwegbe kevbe ọrọkhọrhọ ne ivbi Izrẹl vbe ẹghẹ ọre.

¹⁰ Rẹn ọ re ọ gha bọ Ọgua Osa mẹ. Rẹn ghi gha re ovbi mwẹ, mẹ ghi gha re erha ẹe. Ẹgbẹe uniẹn ọba ẹre ọ re ọ ra gha rriọba vbe Izrẹl ẹdẹdẹmwẹdẹ.’ ”

¹¹ E Devid keghi rhie te ẹe wẹẹ, “Banbanna nian, ovbi mwẹ, te Nọyaẹnmwa ne Osanobua ruẹ gha deba ruẹ, ne ọ vbe mu eyan rẹn sẹ ne ọ gie Ọgua Osa ne a ra bọ ne ẹẹn mwẹ ruẹn uhunmwu.

¹² Te Nọyaẹnmwa ne Osanobua ruẹ gha rhie irẹnmwi kevbe ẹwaẹn ne uẹn ne u miẹn ehe na gha khaemwisẹ yan ivbi Izrẹl vbe odẹ ne ọ gua Uhi ẹre ro.

¹³ A dẹghe u ya uhi hia ne Nọyaẹnmwa viọ ne Mosis ne ọ viọ ne ivbi Izrẹl gha ru emwi, u gha ru ne a gban. Mu egbe ne u gie ekhọe ruẹ sotọ, ghẹ vbe gie emwi rhọkpa ye afianma fian an.

¹⁴ Zẹ vbe ọ ghe Ọgua Osa, mẹ ziga ya si uwan nọkhua ọghe igoru ne ọ te ra sẹ arriaisẹn enẹ koko nẹ, (4,000) deba uwan nọkhua ne ọ te ra sẹ arriaisẹn enẹ ọghe esiliva (4,000) ne a ya bọ ẹe. Ye vbe sẹ ọnii oze kevbe ematọn rrọọ ne a i sẹtin lo fo ne a gha hẹ rre. I vbe mwamwa erhan kevbe okuta ye otọ nẹ, sokpan, u ghi ye gualọ viọ ba ẹre.

¹⁵ Emwa iwinna nibun rrọọ. Ikpia rrọọ ni gha winna vbe ehe ne a na gbe okuta: avbe ni bọ owa rrọọ kevbe owinna deba emwa ni fu ẹro iwinna ughughan nibun,

¹⁶ ni gha sẹtin ya igoru ruemwi kevbe esiliva kevbe oze kevbe ematọn. Banbanna nian, suẹn iwinna nii, te Nọyaẹnmwa gha yaba ru ẹe.”

¹⁷ E Devid keghi tama avbe ọkaolotu Izrẹl hia ne iran ru iyobọ ne Solomọn.

¹⁸ Ọ wẹẹ, “E Nọyaẹnmwa ne Osanobua u wa, gha rrọọ yaba uwa, ọ keghi rhie ọfumwegbe ne uwa vbe igienenẹ. Ọ rhie ẹtin mẹ ne I ya khọn emwa ni te ka rre otọ ẹvbo na, banbanna nian ọguọmwadia uwa kevbe ọghe Nọyaẹnmwa ọ re iran ghi khin.

¹⁹ Banbanna nian, wa ya ẹtin uwa kevbe orhiọn uwa hia ga e Nọyaẹnmwa. Wa suẹn gha bọ Ọgua Osa ne uwa miẹn ehe na mu Ẹkpẹti Ile ọghe Nọyaẹnmwa ye uwu ẹre deba avbe emwi nihuanrẹn ni dekẹe hia ne a ya ga ẹe.”