I Krọnikol 20 - Edo Bible (E Baibol Ẹdo) Version 1996

E Devid Khọnmu E Raba

¹ Ọ ghi bu ẹghẹ orhọ ne ọ lele ẹe, ẹghẹ ne avbe ọba na mobọ ho ne iran ya gbinna ukpukpo, e Joab keghi viọ ivbiyokuo ladian, ọ na mu igbinna gha rrie Amọn. Sokpan e Devid ma kpao vbe Jerusalẹm. Iran keghi dekun ẹvbo ne a tie ẹre Raba, iran khọn rẹn, iran na dunmwu ẹn ruan.

² E Milkọm ne ẹbọ Amọn keghi mwẹ ẹrhu ẹde igoru ne ukhuamwẹ ọnrẹn re omwa uwan isẹnirrọ vbe iyenẹ. Ikpẹrọnmwọ ọkpa kegha rrọ, e Devid keghi rhie ẹre ọ na rhie ẹre ye ẹde ọghe irẹn. Ọ kevbe fu emwi ni bun viọ vbe ẹvbo nii.

³ Ọ keghi viọ emwa ẹvbo nii, ọ na viọ ọsara, aho, kevbe ughanmwa, ye iran obọ ne iran gha winna. Erriọ ọre ọ vbe ru emwa ni rre otọ Amọn nekpa hia. Ẹghẹ nii, rẹn vbe emwa rẹn keghi werriegbe gha di e Jerusalẹm.

Okuo Ne Ọ Gu Avbe Arhuanran E Filistin Khọn

⁴ Vbe iyeke ọnii, okuo kevbe dọlegbe saa ne ivbi e Filistin vbe Gẹzẹ. Ẹghẹ na ọ re Sibekai ne ọ ke Husiai rre na gbe arhuanran ne a tie ẹre Sipai, obọ na ke ukhunmwu ne ivbi e Filistin.

⁵ Okuo ọvbehe ne iran gu ivbi e Filistin khọn ọ re Elhana ne ovbi e Jea na gbe Lami ne ọtẹn e Golaiat ne ovbi ẹvbo ne a tie ẹre Gat, ne ọ mwẹ asoro ne erhan rẹn yevbe ọkpọ ọghe ọduido.

⁶ Okuo ọvbehe ne iran ghi vbe khọn kegha re ne iran khọn rẹn vbe Gat ehe ne arhuanran ọkpa ne ọ mwẹ ikpinhianbọ ehan vbe obọ ọkpọkpa kevbe ikpinhianwẹ owẹ ehan vbe owẹ ọkpọkpa ye. Uniẹn avbe arhuanran nẹdẹ ọ re ọ gha khin.

⁷ Ọ keghi yagha ivbiyokuo Izrẹl ọ re Jonatan ne ovbi e Siama ne ọtẹn e Devid na gbe ẹe rua.

⁸ Iran eha na ne Devid kevbe emwa rẹn gbele ua, kegha re uniẹn avbe arhuanran ni rre Gat.