I Krọnikol 17 - Edo Bible (E Baibol Ẹdo) Version 1996

A Gie Natan Uhunmwu Gie Devid

¹ Ẹguae ẹre ọ re Devid gha ye vbe ẹghẹ na. Ọ ghi sẹ ẹdẹ ọkpa, o keghi gie ne a tama e Natan wẹẹ, “Ghe nian, owa sida mẹ ye vbe emwa na, sokpan Ẹkpẹti Ile Nọyaẹnmwa rre Owa Ukpọn.”

² E Natan keghi wanniẹn wẹẹ, “Ru emwi ne uwẹ a rhirhi mwamwa vbe ekhọe ruẹ rhunmwuda, Osanobua rrọọ yaba ruẹ.”

³ Sokpan, asọn ni e Nọyaẹnmwa tama e Natan wẹẹ,

⁴ “Gha khian ya tama e Devid ne ọguọmwadia mwẹ wẹ I tama rẹn wẹẹ, ‘Ẹ i re uwẹ ọ gha bọ Ọgua Osa mẹ ne I gha dia.

⁵ Ke ẹghẹ ne I ya fan Izrẹl vbe irri gha dee do sẹ ẹdẹnẹrẹ na, I ma he di Ọgua Osa ya, uwu owa ukpọn ọre I gha dia, I ghi vbe gha si ke ihe ọkpa la ọvbehe.

⁶ Vbe uwu okhian ne I he lele ivbi Izrẹl khian, I ma he nọ ọmwa rhọkpa vbe uwu avbe olotu ne I zẹe wẹ vbọzẹ ne iran ma na he ya sida bọ Ọgua Osa mẹ.’

⁷ “Rhunmwuda ọnii, tama e Devid ne ọguọmwadia mwẹ wẹ mẹ ne Nọyaẹnmwa ne Oghodua, ọ re ọ tama rẹn wẹẹ, ‘I rhie ruẹ ke ehe ne u na su ohuan vbe oha ladian, I na ya ru enọkhaemwisẹ yan Izrẹl ne emwa mwẹ.

⁸ I mudia kuẹ vbe ehe ne u he la hia, I kevbe gha khọn avbe eghian ruẹn muotọ zẹ vbene u ya nana sikẹ odaro. I gha ya uwẹ hin usi zẹ vbe avbe ọkaolotu ne ọ he kpọlọ sẹẹ vbe agbọn na.

^9-10 I zẹ ihe ọkpa ne Izrẹl ne emwa mwẹ nẹ, I vbe gbe iran ẹkun sẹ otọ nẹ vbe evba, ehe ne iran ra gha ye vbene a i ghi na vbe zẹ iran kpokpo ọvbehe. Ke ne iran ya la otọ na gha dee, ọ re emwa ni khọn ke ya gha gu iran gbinna, sokpan, egbọre i ghi ra dọlegbe sunu ọvbehe. I yan rẹn ighẹ I gha khọn avbe eghian ruẹn hia muotọ, I gha vbe viọ emọ nuẹn.

¹¹ Wẹ ghẹ ghi wu nẹ, a na vbe re ruẹ ba avbe erha a odede, I gha ya ọkpa vbe uwu ivbuẹ rriọba. I ghi ya arriọba ẹre owẹ muotọ ne ọ wegbe.

¹² Rẹn ọ re ọ gha bọ Ọgua Osa mẹ, I gha ru ẹe ne a miẹn wẹ uniẹn ni rriọba ọghe ọe ghi gha khian rhinrin ẹdẹ.

¹³ Mẹ ghi gha re erha ẹe, rẹn ghi vbe gha re ovbi mwẹ, mẹ i ra rhie obọ hin ẹre iyeke rre vbene I ru e Sọl ne I rhie hin evba rre, ne uwẹ miẹn ehe na do rriọba.

¹⁴ I gha viọ emwa mwẹ ye ọre obọ deba arriọba mwẹ ẹdẹdẹmwẹdẹ. Uniẹn ni rriọba ọghe ọe, ẹ i ra fo ẹdẹ.’ ”

¹⁵ E Natan keghi na iyẹn emwi hia ne Osanobua rhie ma rẹn ma e Devid.

Erhunmwu Ekpọnmwẹ Ọghe Devid

¹⁶ Ẹre Devid ne ọba na la uwu owa ukpọn ne a ya rẹn ighẹ e Nọyaẹnmwa rre evba, ọ keghi tota, ọ na na erhunmwu wẹẹ, “E Nọyaẹnmwa Osanobua, emwi hia ne u he ru mẹ ma zẹdẹ khẹ ke mwẹ ra ẹgbẹe mwẹ.

¹⁷ Levba sevba, te u ye ru yan. U yan ye otọ vbe ekpa ivbi uniẹn mwẹ vbe ọghe ẹdẹ nakhuẹ, kevbe wanwanna nian e Nọyaẹnmwa ne Osanobua, obọ ne a ya mu ọmwa ne ọ kpọlọ ọ re u ya mu mwẹ.

¹⁸ De emwi ne I ghẹ ghi ye tama ruẹn nian. U wa rẹn mwẹ ẹsẹse, sevba, u keghi rhie ọghọ mẹ, mẹ ne ọguọmwadia ruẹ.

¹⁹ Te ọ yẹ ruẹ u na zẹẹ ọe vbe iro ne u ru emwi na mẹ wẹ ne u rhie vbene I gha kpọlọ hẹ vbe ẹdẹ nakhuẹ ma mwẹ.

²⁰ Nọyaẹnmwa, ọmwa ne ọ yevbe uwẹ i rrọọ. Ma wa rẹn ke otọe gha dee ighẹ wẹ ọkpa ọrọre Osanobua.

²¹ Ẹvbo ọvbehe ne ọ yevbe Izrẹl i rre agbọn na, emwa ne uwẹ viọ hin ọviẹn rre ne u miẹn ehe na ya iran ru emwa ruẹn. Emwi nekhua kevbe ni yan ọmwa unu uan ne u ru ne iran, ye otiti ruẹ gba otọe agbọn hia. U fan emwa ruẹn vbe irri vbe Igipt, u kegha khulo agbọn ẹvbo ọvbehe ladian vbene iran ya nana ghe odaro.

²² U ya Izrẹl khian emwa ruẹn nẹ ẹdẹdẹmwẹdẹ, wẹ ne Nọyaẹnmwa keghi khian Osanobua iran.

²³ “Banbanna nian, e Nọyaẹnmwa, eyan nu u yan rẹn vbe ekpa mwẹ kevbe uniẹn mwẹ, U ghi mu ẹẹn sẹ rhinrin ẹdẹ, ne u ru vbene u tae ighẹ u gha ru.

²⁴ Otiti ruẹ gha kpolo, emwa hia ghi vbe gha kha rhinrin ẹdẹ wẹẹ, ‘E Nọyaẹnmwa ne Oghodua ọrọre Osanobua iran ne ivbi Izrẹl.’ We gha vbe rhie uniẹn ọba mwẹ lẹre rhinrin ẹdẹ.

²⁵ I mwẹ udinmwẹ ne I na erhunmwu na ghe ruẹ, Osanobua mwẹ rhunmwuda, u rhie avbe emwi na hia ma mwẹ, mẹ ne ọguọmwadia ruẹ, u kevbe tama mwẹ wẹ u gha ye avbe ivbi uniẹn mwẹ ma ọba.

²⁶ Wẹ ne Nọyaẹnmwa ọrọre Osanobua, u kevbe yan eyan ọyunnuan vbenian ma mwẹ.

²⁷ Te I rinmwian wẹ ne u fiangbe ivbi uniẹn mwẹ, ne iran miẹn ehe na gha miẹn aro ne ọ maa ruẹn. Wẹ Nọyaẹnmwa fiangbe iran nẹ, afiangbe ruẹ gha rhuẹ yan iran ẹdẹdẹmwẹdẹ.”