I Kọrinti 15 - Edo Bible (E Baibol Ẹdo) Version 1996

Arhiọkpaegbe Kristi

¹ Etẹn mwẹ, I ho ni dọlegbe ye uwa ẹre rre ighẹ Iyẹn Ne ọ maa ne I kpe orhu ẹre ma uwa, ne uwa vbe rhan obọ miẹn nẹ, kevbe ne iyayi uwa mudia yan gbain.

² Ọnii nọ wẹ iyẹn ne ọ maa, ẹmwẹ ne I kpe orhu ẹre ma uwa. Iyẹn Ne ọ maa na ọre a ya miẹn uwa fan, a deghẹ wa daeyi gbangbaangban, sokpan a ma gha kha ighẹ te uwa yayi kua kẹkan.

³ Emwi ne imẹ miẹn rhie ọre I vbe na rhie sẹ uwa obọ, emwi ne ọ wa vbe re emwi kpataki ẹsẹse wẹ Kristi wu ba ẹmwẹ orukhọ mwa zẹ vbene a gbẹn ọẹn ye Ebe.

⁴ Wẹ a re ẹre, a keghi vbe dọlọ huẹn ọnrẹn kpaegbe vbe ikpẹdẹ ne ogieha zẹ vbene a gbẹn ọẹn ye Ebe.

⁵ Wẹ ọ rhie egbe ma Pita, vbe iyeke ọnii, ọ keghi vbe rhie egbe ma avbe iran ne ukọ iweva hia.

⁶ Iyeke ọnii, ọ rhie egbe ma iran ne ọ yan iyisẹn isẹn vbe uwu iran ni lele ẹe khian vbe ẹghẹ ọkpa nii, ni bun sẹẹ vbe uwu iran ye rre agbọn, a gha rhe miẹn wẹ eso wulo nẹ vbọ.

⁷ Vbe iyeke ọnii, ọ keghi rhie egbe ma Jems, vbe iyeke ọnii, ọ rhie egbe ma iran ne ukọ hia.

⁸ Vbe okiekie ehia, ọ keghi rhie egbe ma imẹ, a gha rhe miẹn ighẹ te I yevbe ọmọ ne ubiẹmwẹ ọnrẹn ma gu ọghe emwa ọvbehe ro.

⁹ Rhunmwuda mẹ ọre ọ ghi re ne ọ kanmwa sẹ vbe uwu avbe ukọ hia, sẹrriọ wẹẹ, ọ ma te khẹke ne a gha tie mwẹ ukọ, rhunmwuda, te imẹ gha zẹ esọsi Osanobua kpokpo.

¹⁰ Sokpan vbe ekpa ẹsọhẹ Osanobua ọre I na re emwi ne I khin na, ẹsọhẹ ne ọ rhie mẹ, a ma vbe muẹn rhia. Vbe ẹmwata, mẹ kakabọ winna sẹ avbe ukọ nekpa hia, a gha rhe miẹn wẹ ẹ i re ẹtin obọ mwẹ vbe ẹ i re ẹsọhẹ Osanobua ne ọ yaba mwẹ winna.

¹¹ Rhunmwuda ọnii nian, a deghẹ obọ mwẹ ọre ọ la rre ra ọghe iran nọ, emwi ne ima hia kpe orhu ẹre ọre ọna khin, ọna ọre uwa vbe yayi.

Arhiọkpaegbe Mwa

¹² Banbanna nian, ugbẹn vbe a miẹn wẹ emwi ne ima kpe orhu ẹre ma uwa ọrọre wẹ, a huẹn Jesu kpaegbe vbe idin nẹ, vbe eso vbe uwu uwa a ghi na vbe kha hẹ wẹ, a i ra huẹn avbe orinmwi kpaegbe?

¹³ Deghẹ ẹmwata ọre ọnii khin, ọnii rhie maa wẹ, a ma huẹn Kristi kpaegbe vbe orinmwi.

¹⁴ A deghẹ a ma huẹn Kristi kpaegbe vbe orinmwi, ma i mwẹ emwi ne ima gha kpe orhu ẹre, wa i vbe mwẹ emwi rhọkpa ne uwa gha yayi.

¹⁵ Yevbe sẹ ọnii, ma keghi khian emwa ni ba Osanobua ohoghe, rhunmwuda, ma ta ẹe wẹ ọ huẹn Kristi kpao vbe idin, vberriọ ọ ma zẹdẹ huẹn ọnrẹn kpao a deghẹ ẹmwata nọ wẹ a i huẹn avbe ni wulo kpao vbe idin.

¹⁶ Rhunmwuda, a deghẹ a i huẹn iran ni wulo kpaegbe, a ma vbe huẹn Kristi kpaegbe khekherriọ.

¹⁷ A deghẹ a ma huẹn Kristi kpaegbe, iyayi uwa ọghe akuọkan nọ, te uwa ye wiri ua ye uwu orukhọ uwa.

¹⁸ Ọnii vbe rhie maa wẹ iran ni wulo nẹ vbe uwu iran ni ya Kristi yi, wiri ua.

¹⁹ A deghẹ agbọn na ọkpa ọre idaehọ ne ima mwẹ vbe Kristi na mwẹ esa, ighẹ ọ ma vbe gberra evba, emwa ne a gha gbe ọsọre na ma khin, sẹ emwa ni rre agbọn na hia.

²⁰ Sokpan ẹmwata ne ọ rrọọ ọrọre wẹ, a huẹn Kristi kpao vbe idin nẹ, ne aro miẹn ehe na da ẹe wẹ, avbe emwa ni wulo, a gha huẹn iran kpaegbe.

²¹ Rhunmwuda zẹ vbe ne a miẹn wẹ, obọ arhiọnkpa ọre uwu la rre, erriọ zẹẹ ọre arhiọkpaegbe vbe la obọ arhiọnkpa rre.

²² Rhunmwuda, zẹ vbene emwa hia wulo rhunmwuda ighẹ iran vbe Adam gba re ọkpa, erriọ ọre a gha vbe huẹn emwa hia kpaegbe rhunmwuda ighẹ iran re ọkpa ba Kristi.

²³ Sokpan, dọmwadẹ ọghọe vbe ehe ne ọ na sẹ ọre egbe, Kristi, ne ọ re ne okaro vbe uwu ehia, vbe iyeke ọnii, iran ni re ọghe Kristi vbe ẹghẹ ne ọ gha ya rre.

²⁴ Vbe iyeke ọnii, ufomwẹ ghi do rre. Kristi ghi khọnmiotọ vbe uhunmwu ẹtin orhiọn hia ni rre asẹ, avbe ọdakha kevbe ẹtin, ọ ghi mu Arriọba nii ne Osanobua ne Evbavba.

²⁵ Rhunmwuda, ẹ i mwẹ Kristi ma gha khaemwisẹ rhinrin Osanobua te do khọn miotọ vbe uhunmwu eghian hia, ọ ghi vbe viọ ehia ye ototọ owẹ ọre.

²⁶ Oghian ne okiekie ne a gha fuẹn ruan ọrọre uwu.

²⁷ Rhunmwuda, ebe kha re wẹ, “Osanobua viọ emwi hia ye ototọ owẹ ọre.” Agbọn hia rẹnrẹn wẹ, a rhe kha wẹ “emwi hia,” a ma ka Osanobua tobọ ẹre ba ẹre, ọmwa ne ọ viọ emwi hia ye ototọ owẹ Kristi.

²⁸ Sokpan, a ghẹ ghi viọ emwi hia ye ototọ ọdakha ọghe Kristi nẹ, ẹghẹ ni, rẹn tobọ ẹre ighẹ Ọmọ, ghi rhie egbe ẹre ye ototọ Osanobua ne ọ viọ emwi hia ye ototọ irẹn. Osanobua ghi wa gha khaemwisẹ yan ehia fo fẹẹrẹ.

²⁹ Avbe iran ne a ghi sa amẹ na ne ni wulo nẹ vbo? De emwi ne iran mwẹ idanmwehọ ẹre wẹ iran gha sẹtin la ẹe miẹn? A deghẹ ẹmwata nọ, vbe ne iran tae khian na ighẹ a i huẹn eniwulo kpaegbe vbe idin, vbe a ghi na sa amẹ ne iran ni wulo nẹ hẹ?

³⁰ Kevbe ima tobọ mwa, vbe ọ zẹ ne ima na rhie uhunmwu mwẹ atataobọ vbe ẹghẹ hia?

³¹ Etẹn mwẹ, ẹdẹgbegbe ọre I ya rhie uhunmwu da uwu. Ughanmwẹ, ne I ya uwa ghan vbe uwu ẹdẹ agbọn mwa vbe uwu Kristi Nọyaẹnmwa, ọre ọ ya mwẹ ta ẹmwẹ na.

³² A deghẹ, vbene ọ ye nii, ighẹ mẹ gu avbe “aranmwẹ oha,” gbinna vbe Ẹfisọs ba ẹmwẹ emwi agbọn na kẹkan, de ere ne ọ rrọọ mẹ? A deghẹ a i gele huẹn eniwulo nẹ kpao vbe idin, vbene emwa tae khian nii, “Wa gie a gha re ne a gha da, rhunmwuda, akhuẹ ma ra wulo.”

³³ Wa ghẹ gie emwa do uwa ọzuọ. “Otu dan ọre ọ mu uyinmwẹ esi rhia.”

³⁴ Wa dọlegbe rhie ẹwaẹn ye uhunmwu, ne uwa zobọ vbe orukhọ ne uwa ru. Te I ta ẹmwẹ na ne emwi ekhue uwa, eso vbe uwu uwa ma rẹn Osanobua.

Egbe Arhiọkpaegbe

³⁵ Emwa eso gha nọ ọta wẹẹ, “Vbe a ra sẹtin huẹn emwa ni wulo nẹ kpaegbe hẹ yi? De egbe ikinnegbe ne ọ ghẹ ghi gha gue iran?”

³⁶ Wẹ ne akpa: U gha kọ emwiokọ, ọ vbe zọ ra vbe ẹ i re te ọ wu nẹ?

³⁷ Emwiokọ kẹkan ọre u rhie kọ, zẹ vbe ne ikpẹ ọka ye ra emwiokọ ọvbehe, ẹ i re ikun erhan ọghe emwi ne ọ ra do wan ni.

³⁸ Osanobua ọre ọ rhie egbe ne emwiokọ nii, zẹ vbene ọ hoo, ọ ghi rhie ne dọmwadẹ emwiokọ ikinnegbe ne ọre ọghọe.

³⁹ Ẹ i re egbe efun egbe ọkpa ọre emwi hia mwẹ, emwa ne agbọn mwẹ efun egbe ọkpa, ọvbehe avbe aranmwẹ oha mwẹ, ọvbehe ọghe avbe ahianmwẹ khin, ọvbehe ọghe avbe ehẹn vbe khin.

⁴⁰ Egbe ẹrinmwi rrọọ, egbe agbọn na vbe rrọọ, egbe ẹrinmwi mwẹ umosemwẹ ọghọe, egbe umosemwẹ ọvbehe ọre egbe agbọn na vbe mwẹ.

⁴¹ Owẹn mwẹ ose ọghọe, uki, ose ọvbehe, avbe orhọnmwẹ, umosemwẹ ọvbehe, uhin ighẹ umosemwẹ avbe orhọnmwẹ vbe lughaẹn ne egbe.

⁴² Vberriọ ọre ọ khian gha ye vbe a gha huẹn eniwulo kpaegbe nẹ. Ẹghẹ ne a na tọnnọ ikinnegbe ye uwu otọ, emwi ne ọ sẹtin wu nọ, a ghẹ ghi huẹn ọnrẹn kpaegbe nẹ, ọ ghi do gha re emwi ne ẹ i wu.

⁴³ Ẹghẹ ne a na re ẹre, ọ keghi khọrhiọn, ọ ma vbe wo vbe egbe, a ghẹ ghi huẹn ọnrẹn kpaegbe nẹ, ọ ghi ye mose mose, ọ ghi vbe wo vbe egbe.

⁴⁴ Ẹghẹ ne a na re ẹre, ikinnegbe agbọn na nọ, a ghẹ ghi huẹn ọnrẹn kpaegbe nẹ, egbe orhiọn ọre ọ ghi ra gha khin. Wa rẹnrẹn wẹ, ikinnegbe agbọn na rrọọ. ọre a na miẹn wẹ, te ikinnegbe orhiọn gha vbe gha rrọọ.

⁴⁵ Rhunmwuda, ebe kha re wẹ: “Adam ne okaro, te a yi ẹre emwi ne ọ rre agbọn,” sokpan Adam ne okiekie keghi re Orhiọn Osanobua ne ọ rhie arrọọ ne ọmwa.

⁴⁶ Ẹ i re ne ọre ọghe orhiọn ọre ọ ka rre, sokpan ne ọre ọghe egbe, vbe iyeke ọnii, emwi ne ọre ọghe orhiọn.

⁴⁷ Ekhae ne otọe ọre a ya yi Adam ne okaro, ẹrinmwi ọre Adam ne ogieva ke rre.

⁴⁸ Emwa ni re ọghe agbọn na keghi ye vbe ọnii ne a ya ekẹn ma, iran ni re ọghe ẹrinmwi keghi ye vbe ọnii ne ọ ke ẹrinmwi rre.

⁴⁹ Zẹ vbene ima te ka gha ye vbe ama ọghe ọnii ne a ya ekẹn ma, erriọ ma ghi mu akpa ọghe ọmwa ne ọ ke ẹrinmwi rre yọ.

⁵⁰ Emwi ne I yae kha ọre ọna khin etẹn mwẹ, wẹ emwi ne a ya efun kevbe esagiẹn ma, i sẹtin mwẹ oghae vbe Arriọba Osanobua, erriọ vbe nọ, emwi ne ọ re ne ọ sẹtin wu i sẹtin ya a i wu ẹde khian ọghọe.

⁵¹ Wa danmwehọ oro ọkpa: ma hia i ra wulo fo, sokpan, vbe udomwurri, a gha fi ima werriẹ.

⁵² Ẹgiẹgiẹ, vbe ifua aro ọkpa, ẹghẹ ne okpe ne okiekie gha na tu. Rhunmwuda, ọ gha ghi tu, a ghi huẹn iran ni wulo nẹ kpaegbe do gha re emwa ne ẹ i ghi wu ẹdẹ, a ghi vbe fi ima hia werriẹ.

⁵³ Rhunmwuda te emwi ne ọ sẹtin wu gha mu a i wu ẹdẹ yọ, emwi ne ọ wu, a mu emwi ne ẹ i sẹtin wu hin ẹre egbe nẹ.

⁵⁴ Ẹghẹ nii, a ghẹ ghi mu a i wu ẹdẹ yọ emwi ne ọ sẹtin wu nẹ, ighẹ a vbe mu emwi ne ẹ i sẹtin wu yọ emwi ne ọ gha te wu nẹ, ẹmwẹ ebe ghi do sẹ wẹ, “A fuẹn uwu a nẹ, Akhọnmiotọ i re ne a ru ghẹghẹ.”

⁵⁵ “Uwu, akhọnmiotọ ruẹ vboo? Uwu, obi ruẹ vboo?”

⁵⁶ Obọ orukhọ ọre uwu na miẹn ẹtin ne ọ ya kuan ọmwa rhie, obọ nene Uhi ọre orukhọ na miẹn rhie.

⁵⁷ Sokpan, a kpọnmwẹ Osanobua nọ la ekpa Jesu Kristi rhie akhọnmiotọ ne ima.

⁵⁸ Rhunmwuda ọnii nian, wa ne etẹn mwẹ, wa mudia gbain vbe ne a i na vbọ owẹ. Wa tua obọ ye iwinna ne uwa winna ne Nọyaẹnmwa, ugbẹn vbe uwa rẹn nẹ nian wẹ, iwinna ne uwa winna vbe uwu ugamwẹ Nọyaẹnmwa, ọkpa ne ẹ i mwẹ esa, ẹ i rrọọ.