I Kọrinti 14 - Edo Bible (E Baibol Ẹdo) Version 1996

Ẹmwẹ Emwi Ne Orhiọn Ya We Ọmwa Ye Nọ

¹ Rhunmwuda ọnii, aho ẹmwẹ ọmwa ọrọre emwi ne uwa gha gbinna ho khekherriọ. Wa gie aro uwa gha wu ye emwi ne orhiọn ya we ọmwa, kpataki ọghe ne a ya kpe orhu Osanobua.

² Ọmwa ne ọ ya urhu ne a ma rẹn guan, ẹ i re emwa ne agbọn ọre ọ gu guan vbe ẹ i re Osanobua, rhunmwuda ọmwa ne ọ rẹn emwi ne ọ ya ẹmwẹ ne ọ guan kha, ẹ i rrọọ. Rẹn ghi gha ya ẹtin Orhiọn ta oro ẹmwata ladian.

³ Sokpan, ọmwa ne ọ kpe orhu Osanobua, emwa ne agbọn ọre ọ gu guan, ọ ghi gha rhie iyobọ, igiẹdu kevbe ifuẹko ne iran.

⁴ Ọmwa ne ọ ye urhu ne a ma rẹn guan, egbe ẹre ọkpa ọre ọ ru iyobọ na, sokpan ọmwa ne ọ kpe orhu Osanobua ghi ru iyobọ ne esọsi hia.

⁵ Ne ọ gha wa yẹ mwẹ sẹ ọrọre ne a ya ẹmwẹ ikporhu Osanobua we uwa hia. Rhunmwuda, ọmwa ne ọ kpe orhu ẹmwẹ Osanobua ọre ọ maa sẹ ne ọ ya urhu ne a ma rẹn guan, sokpan a ma wẹ, ọmwa ne ọ gha zẹ edu rre evba, ne ọ miẹn ehe na ru iyobọ ne esọsi hia.

⁶ Rhunmwuda ọnii, I gha rre do tuẹ uwa etẹn mwẹ, I na gha ya urhu ne a ma rẹn guan, de esa ne ọ khin ne uwa? Hiehiere, sokpan a ma wẹ, te I rhan otọ ẹmwẹ ne Osanobua tae ma uwa, ra irẹnmwi eso, ra ẹmwẹ ne orhiọn rhie ye ọmwa unu ra iruẹmwi.

⁷ Uhin ya sẹ egbe avbe emwi ne a kpee ne ẹ i mwẹ orhiọn nii, zẹ vbe ne ẹrere ra akpata ye, vbe ọmwa gha na rẹn ihuan ne ọ so hẹ adeghẹ ẹ i re te a kpe ulamwẹ ọnrẹn ne a họen ẹse?

⁸ Adeghẹ ọmwa ne ọ si orhu ma si ẹe ẹse de ọmwa ne ọ gha mu egbe okuo?

⁹ Erriọ vbe nọ, vbe ọmwa gha na rẹn emwi ne u kha hẹ, a deghẹ a ma rẹn otọ urhu ne a ma rẹn ne u ya guan. Ẹmwẹ ne u guan ghi ya ba ẹhoho hoho ua.

¹⁰ Ẹvbo ne a zẹ ughughan ni bun ọre ọ rre agbọn na, se evba, ọkpa i rrọọ ne ẹ i mwẹ emwi ne a ya ẹe kha.

¹¹ Sokpan, a deghẹ mẹ i họn ẹvbo ne ọmwa zẹ, ọmwa ne ọ zẹ ọe ghi gha re eghọnmighọn ne imẹ, mẹ ghi vbe gha re eghọnmighọn ne irẹn.

¹² Sokpan, vbene ẹmwẹ avbe emwi ne Orhiọn Osanobua ya we ọmwa ghi na bọbọ uwa egbe, wa ghi gie a miẹn ke odaro emwi hia wẹ ne ọ gha ru iyobọ ne esọsi ọre uwa mobọ lo sẹ vbọ.

¹³ Rhunmwuda ọnii, ọmwa ne ọ ya urhu ne a ma rẹn guan, wẹ ne ọ sẹtin gha zẹ edu ẹmwẹ ne ọ guan.

¹⁴ Rhunmwuda, a deghẹ te I mẹ na erhunmwu vberriọ, vbe ẹmwata, orhiọn mwẹ na erhunmwu sokpan ekhọe mwẹ ma lele ẹe.

¹⁵ Vbe i a ghẹ ghi ru ẹe hẹ khekherriọ? I gha ya orhiọn mwẹ na erhunmwu, sokpan I gha vbe ya ekhọe mwẹ na erhunmwu, I gha ya orhiọn mwẹ so ihuan, sokpan I gha vbe ya ekhọe mwẹ so ihuan.

¹⁶ A deghẹ orhiọn ruẹn ọkpa ọre u ya kpọnmwẹ Osanobua, vbe ọmwa kẹkan ne ọ deba ruẹ rre ugamwẹ gha ghi na gbe Isẹ hẹ ye erhunmwu ra ekpọnmwẹ ruẹn? Vbene ọ ra ya rẹn otọ ẹmwẹ ne u guan ẹ i rrọọ.

¹⁷ Vberriọ, u gha ghe, erhunmwu ekpọnmwẹ ruẹn te wa maa, sokpan, ọ ma ya ọmwa nọkpa obọ hiehiere.

¹⁸ I kpọnmwẹ Osanobua wẹ mẹ ọre ọ ya urhu ne a ma rẹn guan sẹ ne ọ rhirhi gha khin vbe uwu uwa.

¹⁹ Sokpan, a gha ru ugamwẹ, I ta ifiẹmwẹ isẹn ne a rẹn otọ ẹre, ne I miẹn ehe na ma emwa ọvbehe emwi, ọre ọ maa sẹ ne I talọ ẹmwẹ arriaisẹn arriaisẹn vbe urhu ne a ma rẹn.

²⁰ Wa ghẹ gha yevbe ibiẹka vbe emwi ne uwa ro etẹn mwẹ, wa gha re ibiẹka vbe emwi dan ne a ru sokpan eniwanrẹn vbe iro ne a roro.

²¹ A gbẹn ọẹn ye uwu Ebe wẹẹ: “Nọyaẹnmwa khare wẹẹ: I gha gu avbe emwa na guan I gha gie emwa ne a i họn urhu ne ọ zẹ gu iran guan. Kevbe akhuarhamwunu eghọẹn, se evba, uhin ighẹ emwa mwẹ i ra ye danmwehọ mwẹ.”

²² Rhunmwuda ọnii khekherriọ, urhu ne a ma rẹn ne a ya we ọmwa, ama idagbo ne a rhie ne iran ni ma yayi nọ, ẹ i re ọ ghe iran ni yayi. vberriọ ikporhu ẹmwẹ Osanobua ne a ya we ọmwa, ama idagbo ọghe ne ọ yayi nọ ighẹ ẹ i re ọghe ne ọ ma yayi.

²³ A deghẹ esọsi ghi si egbe koko, agbọn hia na wa suẹn gha ya urhu ne a ma rẹn guan, a deghẹ ọmwa kẹkan ra eni ma yayi eso la owa, ẹ i re te ọ ra kha ighẹ te uwa hia mwẹmwẹ?

²⁴ Sokpan wa gha kpe orhu ẹmwẹ Osanobua, ọmwa ne ọ ma yayi ra ọmwa kẹkan gha la owa, ẹmwẹ ne ọ họẹn ghi ya ẹe miẹnkue ighẹ ọmwa orukhọ rẹn gele khin. Ẹmwẹ ne ọ họẹn hia ghi gha bu ohiẹn ọnrẹn.

²⁵ Iro ẹkhokho ne ọ zẹ vbe ekhọe ghi khian ne a rhie ladian azagba, ọ ghi vbẹ rre ye uhunmwu rhanmwẹ otọ ne Osanobua, ọ ghi miẹnkue wẹ, “Vbe ẹmwata, Osanobua gu uwa rre emwa na.”

Uhẹn Uhẹn Vbe Ugamwẹ

²⁶ Wa rẹn emwi ne I kha na ra etẹn mwẹ. Wa gha si koko ne a do ru ugamwẹ, orhiọnkpa mwẹ ihuan ne a gha so, ọmwa ọvbehe, emwi ne a ma emwa ẹre, ọmwa ọvbehe, emwi ne Osanobua ta ma rẹn. Ọmwa ọvbehe, ikporhu vbe ẹvbo ne a ma rẹn kevbe ọmwa ọvbehe, emwi ne a ya ẹmwẹ ni kha. Emwi hia ghi gha re ne ọ ya ọmwa ne ọ yo esọsi obọ.

²⁷ Deghẹ ọmwa ra ya urhu ne a ma rẹn guan, omwa arhin eva ra eha ọre ọ kere ne ọ gha guan lele egbe, ọmwa ọvbehe ghi gha zẹ edu ẹmwẹ ne a ta ẹe.

²⁸ Deghẹ ọmwa ne ọ ra zẹ edu i rre evba, a ghẹ zẹdẹ guan ladian vbe uwu ugamwẹ, wẹ ne ọ gu egbe ẹre kevbe Osanobua gha guan.

²⁹ Eva ra eha ne a rhie ẹmwẹ Osanobua nẹẹn ta, ghi gha guan, emwa nekpa ghi gha danmwehọ vbene ẹmwẹ ne iran ta ye hẹ.

³⁰ Sokpan deghẹ Osanobua gie uhunmwu gie ọkpa vbe uwu emwa ni tota vbe ugamwẹ, ọmwa ne ọ te ka guan ghi dobọyi.

³¹ Wa hia sẹtin kpe orhu Osanobua ọkpọkpa, ne emwa hia miẹn ehe na ruẹ emwi kevbe ne avbe rhie igiẹdu ne iran.

³² Ọ kere ne ọmwa ne a ya ikporhu ẹmwẹ Osanobua we daeyi ye uro ẹsẹse vbe ọ gha guan.

³³ Rhunmwuda, Osanobua ma tie ima ye uwu emwi otighi ne a ru vbe ẹ i re uwu emwi na ru ẹre ọghe ọfumwegbe. Zẹ vbene ọ ye vbe uwu esọsi Osanobua hia.

³⁴ Ọ kere ne ikhuo hunwan vbe uwu ugamwẹ vbe esọsi. A ma kue ne iran gha guan, zẹ vbe ne Uhi avbe Ju kha re, ọ ma kei ne a muẹn ye iran obọ.

³⁵ Deghẹ iran ho ne iran rẹn otọ emwi eso, wẹ ne iran nọ ọdọ iran vbe owa. Emwi ekhue nọ ne okhuo gha guan vbe uwu ugamwẹ vbe esọsi.

³⁶ Ra wa ọre ọ ya ẹmwẹ Osanobua rre? Ra wa ọkpa ọre ọ ta ẹe ma?

³⁷ Deghẹ ọmwaikọmwa ro ighẹ odibo Osanobua rẹn khin ra ighẹ a ya emwi ẹmwẹ orhiọn we irẹn, we ne a gi ẹe rẹn wẹ emwi ne I gbẹnnẹ na, iyi ọghe Nọyaẹnmwa tobọ ẹre nọ.

³⁸ A deghẹ rẹn ma zẹ ye avbe emwi na, wa ghẹ vbe zẹ ye irẹn re.

³⁹ Rhunmwuda ọnii nian wa ne etẹn mwẹ, wa rhie ekhọe ye ẹmwẹ ikporhu Osanobua, sokpan wa ghẹ gbe ukhu urhu na ma rẹn ne a ya guan rua.

⁴⁰ Wa ghi gha ru emwi hia ururo kevbe uhẹn uhẹn.