I Kọrinti 13 - Edo Bible (E Baibol Ẹdo) Version 1996

Aho Ẹmwẹ Ọmwa

¹ Ọ gha khọn rẹn ne I gua ra gha zẹ ẹvbo ne emwa ne agbọn zẹ kevbe ne avbe odibosa zẹ, a deghẹ mẹ i mwẹ aho ẹmwẹ ọmwa, ẹmwẹ ne unu mwẹ ma maa sẹ ẹgogo ne ọ kpe gbẹin ra ighẹnghẹn ne ọ tu gbanghanghanghan.

² Ọ gha khọn rẹn ne a ya we mwẹ wẹ I gha gu emwa guan, ọ ghi hin ehia uhunmwu, ọ gha khọn rẹn ne I rẹn emwi hia kevbe ne I rẹn otọ oro hia, ọ gha khọn rẹn ne I gha mwẹ iyayi hia ne ọ gha sẹ ọmwa ya vu oke mu fua, a deghẹ mẹ i mwẹ aho ẹmwẹ ọmwa, kẹkan ọre I khin.

³ Ọ gha khọn rẹn ne I ya emwi ne I mwẹ hia ru ẹse, uhin ya sẹ egbe ikinnegbe mwẹ ne aregbe, wẹ ne a giẹn uan vbe erhẹn, a deghẹ mẹ i mwẹ aho ẹmwẹ ọmwa, ere ọkpa ẹ i rrọọ mẹ.

⁴ Te aho ẹmwẹ ọmwa ziengbe emwi, ọ vbe mwẹ itohan, oya ọmwa i da ẹe, aho ẹmwẹ ọmwa, ẹ i ye obọ rra ẹwẹe ra ne ọ gha tọn egbe mu.

⁵ Aho ẹmwẹ ọmwa ẹ i yin uyinmwẹ ọrhiae, emwi i da ẹe, egbe i kan ẹn, aho ẹmwẹ ọmwa i vin ọgbọ emwi abakuru.

⁶ Ẹko aho ẹmwẹ ọmwa i rhiẹnrhiẹn ye ọkhọ, sokpan emwi ẹmwata ọre ọ sẹ ọre ọyẹnmwẹ.

⁷ Ẹtin i fo aho ẹmwẹ ọmwa ne ọ zobọ iyayi, idaehọ kevbe i ziengbe ẹre i fi raa.

⁸ Aho ẹmwẹ ọmwa, etẹbitẹghori nọ, ẹmwẹ ne a guan ne ọ la ọmwa uhunmwu rrọọ, sokpan ẹghẹ kherhe ọre ọ ya vbe otọ. A vbe ya ẹmwẹ ne a guan we ọmwa sokpan, ọ gha vbe dobọ yi, irẹnmwi rrọọ sokpan, ọ gha ru ọghọe gberra.

⁹ Rhunmwuda irẹnmwi ne a ya we mwa, kevbe ẹmwẹ ikporhu ne ọ gua orhiọn kpao ne ima mwẹ, ukhiọnmwu khiọnmwẹ ehia khin.

¹⁰ Sokpan, emwi ohoho ne ọ gbae gha ghi rre, a ghi ho ne ọ re ukhiọnmwẹ bẹkun.

¹¹ Ẹghẹ ne I na gha re ọvbokhan, ẹmwẹ ne unu mwẹ, obọ ne ọ zẹ mwẹ kevbe iro ne I roro keghi vbe gha re ọ ghe ọvbokhan, sokpan, ugbẹn vbe I ghi khian ẹghele nẹ nian, I i ghi ru emwi ọvbokhan ọvbehe.

¹² Emwi ne ima ghe ama rẹn vbirrivbirri zẹ vbe uwu ughegbe na, ẹghẹ nii, a gha bẹghe ehia vbe ghe aro mwẹ ghe aro uẹ. Emwi ne I rẹnrẹn nian, ukhiọnmwẹ nọ, ẹghẹ nii, I gha rẹn ọnrẹn fo zẹ vbe ne Osanobua rẹn mwẹ fo.

¹³ Wanwanna, iran eha ọre ọ rrọọ, iyayi, idaehọ, kevbe aho ẹmwẹ ọmwa, ne ọ sẹ re vbe uwu iran eha na ọrọre aho ẹmwẹ ọmwa.