I Jọn 4 - Edo Bible (E Baibol Ẹdo) Version 1996

Orhiọn Ẹmwata Kevbe Ọghe Ohoghe

¹ Wa ne ọse mwẹ ni ghaan, wa ghẹ gha ya iran hia ni kha ighẹ iran mwẹ nene Orhiọn yi, sokpan wa ghi ka danmwẹ ọẹn ghe nẹ ne uwa miẹn ehe na rẹn a deghẹ obọ Osanobua ọre nene orhiọn ne iran mwẹ ke rre. Rhunmwuda avbe akhasẹ ohoghe ni bun wa vẹ gba ehe hia.

² Vbene uwa gha ya rẹn hẹ a deghẹ Orhiọn Osanobua nọ ọre ọna khin: Ọmwaikọmwa ne ọ sẹtin kha wẹ Jesu Kristi do khian ọmwa ne ọ sẹtin wu, ọ mwẹ Orhiọn ne ọ ke obọ Osanobua ree.

³ Ọmwa ne ọ rhirhi kha ighẹ ohoghe ọna khin vbe ekpa ọghe Jesu, ẹ i mwẹ orhiọn ne ọ ke obọ Osanobua rre, Orhiọn nii, obọ Oghian Jesu ọre ọ ke rre, wa ka họn nẹ wẹ, ọ gha rre, wanwanna nian, ọ rre emwa na nẹ vbe agbọn na.

⁴ Sokpan, wa ne ivbi mwẹ, ọ ghe Osanobua ọre uwa khin, wa vbe munọ avbe akhasẹ ohoghe gbe otọ nẹ, rhunmwuda Orhiọn ne ọ rre uwu uwa wo vbe egbe sẹ orhiọn ne ọ rre uwu iran ni re ọ ghe agbọn na.

⁵ Ẹmwẹ emwi agbọn na ọre iran ta, emwa ne agbọn ghi vbe gha rhie ẹmwẹ iran ye ehọ, rhunmwuda, ọghe agbọn na ọ re iran khin.

⁶ Sokpan ọghe Osanobua ọre ima khin. Ọmwaikọmwa ne ọ rẹn Osanobua ghi vbe gha rhie ẹmwẹ ima ye ehọ. Ọmwaikọmwa ne ẹ i re ọghe Osanobua, ẹ i vbe rhie ẹmwẹ ima ye ehọ. Rhunmwuda ọnii, vbe nian, ọre ima gha ya rẹn alughaẹn ne ọ rre Orhiọn ne ọre ọghe ẹmwata, kevbe orhiọn ne ọ re ọghe ebiebi.

Ahoẹmwọmwa Ọre Osanobua Khin

⁷ Ọse mwẹ ni ghaan, wa gie ima gha ho ẹmwẹ egbe rhunmwuda obọ Osanobua ọre aho ẹmwẹ ọmwa ke rre. Ọmwaikọmwa ne ọ mwẹ aho ẹmwẹ ọmwa, ovbi Osanobua nọ, ọ vbe rẹn Osanobua.

⁸ Ọmwaikọmwa ne ẹ i mwẹ aho ẹmwẹ ọmwa, ọ ma rẹn Osanobua rhunmwuda aho ẹmwẹ ọmwa ọre Osanobua khin.

⁹ Vbenian ọre Osanobua ya rhie ma vbene irẹn ho ẹmwẹ mwa hẹ: ọ keghi gie Ovbi ẹre ukpọmọkpa gha die agbọn ne ima sẹtin la ekpa ẹre gha mwẹ arrọọ.

¹⁰ Emwi ne aho ẹmwẹ ọmwa khin ọre ọ na khin, ẹ i re wẹ, ma ka hoẹmwẹ Osanobua nẹ, sokpan wẹ, rẹn ọre ọ hoẹmwẹ mwa, ọ keghi gie Ovbi ẹre ne ọ do gha re emwi ne a gha la ekpa ẹre ya orukhọ mwa bọ mwa.

¹¹ Ọse mwẹ ni ghaan, a deghẹ Osanobua ho ẹmwẹ mwa vbenian, ọ vbe kei khekherriọ ne ima gha ho ẹmwẹ egbe.

¹² Ọmwa ọkpa ne ọ he miẹn Osanobua aro ẹdẹ, ẹ i rrọọ, a deghẹ ma ho ẹmwẹ egbe, Osanobua rre uwu ima, a keghi vbe ya aho ẹmwẹ ọmwa rẹn khian ne ọ gbae vbe uwu ima.

¹³ Ọnọna ọre ọ ye aro ima dae wẹ ma rre uwu Osanobua kevbe wẹ rẹn vbe rre uwu ima, ọ rhie Orhiọn ẹnrẹn ne ima.

¹⁴ Ma miẹn ọẹn nẹ, ma keghi vbe tama emwa ọvbehe wẹ, Evbavba gie Ovbi ẹre gha dee ne ọ do gha re Ọmiọnmwafan agbọn.

¹⁵ Ọmwaikọmwa ne ọ khare ighẹ Ovbi Osanobua ọre Jesu khin, Osanobua rre uwu ẹre, rẹn keghi vbe re uwu Osanobua.

¹⁶ Ma tobọ mwa rẹnrẹn, ma keghi vbe yae yi ighẹ aho ẹmwẹ ọmwa ne Osanobua mwẹ ghe mwa. Aho ẹmwẹ ọmwa ọre Osanobua khin, ọmwaikọmwa ne ọ rre uwu aho ẹmwẹ ọmwa ọ rre uwu Osanobua, Osanobua vbe rre uwu irẹn.

¹⁷ Ọnọna ọrọre otọe ne a na ya aho ẹmwẹ ọmwa khian ne ọ gbae vbe uwu ima, ọnii nọ wẹẹ, ne afianma ghẹ fian mwẹ, vbe Ẹdẹ Ibuohiẹn, rhunmwuda vbene ẹdẹ agbọn Kristi ye vbe agbọn na ọre ọghomwa vbe ye.

¹⁸ Ohan i rre aho ẹmwẹ ọmwa, aho ẹmwẹ ọmwa ne ọ gbae, te ọ khu ohan hia kua. Rhunmwuda ọnii, ọmwa ne afianma fian, aho ẹmwẹ ọmwa rẹn, a ma he ya ẹe khian ne ọ gbae, rhunmwuda, ọnii a gha rri ọmwa oya ọre ọ mu ohan khian.

¹⁹ Ma mwẹ aho ẹmwẹ ọmwa, rhunmwuda Osanobua ọre ọ ka ho ẹmwẹ mwa.

²⁰ Adeghẹ ọmwa ọkpa khare wẹ, “Mẹ ho ẹmwẹ Osanobua,” ọ na gha khuiwu ọtiọnrẹn, ọhọn ohoghe nọ, rhunmwuda adeghẹ ọ ma ho ẹmwẹ ọtiọnrẹn ne ọ dẹghe, ẹ i ra sẹtin ho ẹmwẹ Osanobua ne irẹn i dẹghe.

²¹ Rhunmwuda ọnii nian, iyi ne Kristi yi ne ima ọ na khin ọmwa ne ọ ho ẹmwẹ Osanobua, wẹ ne ovbe gha ho ẹmwẹ ọtiọnrẹn.