Iwinna 9 - Edo Bible (E Baibol Ẹdo) Version 1996

A Fi Sọl Ekhọe Werriẹ

¹ Vbe uwu ẹghẹ ne a kha na, e Sọl keghi wa gha yan dunmwu ẹgun vbe ne irẹn gha gbele avbe erhuanegbe Nọyaẹnmwa hẹ. Ọ keghi bu Ogie Ohẹn gha khian.

² Ọ na ya miẹn ẹre ebe ọghe rẹn ọna khin, ne ọ rhie mwẹ gha rrie Ọgua ediọn avbe Ju ni rre Damaskọs wẹ, rẹn gha miẹn emwa ni lele odẹ ọghe Nọyaẹnmwa vbe odọ, ne ọ sẹtin munọ ehia, ikpia kevbe ikhuo nọ viọ iran gha di e Jerusalẹm.

³ Vbene ọ wa rrie Damaskọs nii, ugbẹn vbe ọ ghi sikẹ ore ẹvbo nẹ, uwanmwẹ ne ọ ke odukhunmwu re keghi wa wan lẹga ẹre vbe udomwurri.

⁴ Rẹn keghi de gbe otọ, ọ keghi họn vbe urhu ọkpa tama rẹn wẹẹ, “Sọl, Sọl, vbọzẹ ne u na zọ mwẹ owẹ?”

⁵ Rẹn keghi nọọn wẹ, “Gha nọ yi Nọyaẹnmwa?” Urhu nii keghi wanniẹn wẹẹ, “Mẹ ne Jesu ne u zọ ẹre owẹ nọ.

⁶ Sokpan kpaegbe ne u gha rrie adesẹ ore ẹvbo, a gha tama ruẹn emwi ne u gha ru.”

⁷ Iran ni lele Sọl khian keghi mudia, iran ma guan, iran họn Urhu ne ọ guan sokpan iran ma bẹghe ọmwa rhọkpa.

⁸ Sọl keghi kpaegbe vbe otọ, ọ na rhan aro a, sokpan ọ ma bẹghe emwi rhọkpa. Rhunmwuda ọnii, iran keghi rhie ẹre obọ, iran na rhie ẹre la Damaskọs.

⁹ Vbe ikpedẹ eha vbọ ọ ma sẹtin bẹghe, vbe uwu ẹghẹ nii, ọ ma re ọ ma da.

¹⁰ Ọrhuanegbe ọkpa ne a tie ẹre Ananaias keghi re Damaskọs ugbẹn vbe ọ ghi miẹn umian, Nọyaẹnmwa tama rẹ wẹẹ, “Ananaias!” Rẹn keghi wanniẹn wẹẹ, “Ghe mwẹ Nọyaẹnmwa.”

¹¹ Nọyaẹnmwa keghi tama rẹn wẹẹ, “Mu egbe ne u gha rrie Idunmwu Nọdiae, u gha ghi sẹ owa Judas, u ghi nọ ẹmwẹ ovbi e Tasọs ọkpa ne a tie eni ẹnrẹn Sọl ọ gha na erhunmwu.

¹² Rẹn ghi rre aro umian, ọ keghi miẹn okpia ọkpa ne a tie eni ẹnrẹn Ananaias vbe ọ la owa do viọ obọ ẹre yan irẹn ne aro ẹre miẹn ehe na rhan, ne ọ dọlegbe gha bẹghe.”

¹³ Ananaias keghi wanniẹn wẹẹ, “Ẹ i re avbiẹ ẹvbo ọ he ta ẹmwẹ ọmwa na ma mwẹ, uza ne ọ he zẹ vbe egbe emwa ruẹn ni rre Jerusalẹm.

¹⁴ Ogie Ohẹn ọre ọ vbe gbẹn ebe ya rhie asẹ nẹẹn ne ọ gha die Damaskọs ne ọ do munọ emwa ne ọ ghi da tie eni ruẹn.”

¹⁵ Nọyaẹnmwa tama rẹn wẹẹ, “Gha khian rhunmwuda mẹ zẹ ọe nẹ ne ọ gha re ọguọmwadia mwẹ, ne ọ ya eni mwẹ khian ne a rẹnrẹn ne avbe iran ne ẹ i re Ju kevbe avbe ọba kevbe emwa Izrẹl.

¹⁶ Mẹ gha tobọ mwẹ rhie ma rẹn oya ne ọ gha re rhunmwuda mwẹ.”

¹⁷ Rhunmwuda ọnii Ananaias kegha khian, ọ keghi la owa, ọ na viọ obọ yan rẹn, ọ keghi kha wẹẹ, “Sọl ne ọtẹn mwẹ, Nọyaẹnmwa Jesu Kristi ọmwa ne u miẹn vbe odẹ vbe ẹghẹ ne u na gha dee ọre ọ tobọ ẹre gie mwẹ gha dee, ne u miẹn ehe na dọlegbe gha dẹghe, kevbe ne u vbe vuọn ne Orhiọn Ne Ọ Huanrẹn.”

¹⁸ Vbe ọwarọkpa nii, emwi eso ne Ọ yevbe erhuan ehẹn keghi dele hiẹn aro e Sọl rre, ọ keghi dọlegbe gha dẹghe. Ọ keghi kpaegbe, a na sa amẹ nẹẹn.

¹⁹ Ọ ghi rri evbare nẹ, orhiọn keghi do la ẹre iwu. Sọl keghi gu avbe erhuanegbe tota vbe evba la ikpẹdẹ eso vbe Damaskọs.

Sọl Kpe Orhu Vbe Damaskọs

²⁰ Ọ keghi wa gha lele Ọgua ediọn iran khian, ọ na gha kpe orhu Jesu, ọ wẹẹ, “Rẹn ọrọre Ovbi Osanobua.”

²¹ Unu keghi yan emwa ni họn ẹn hia, iran kegha nọ wẹẹ, “Ọ na i re oko nii ne ọ gbele emwa ni ya eni na yi vbe Jerusalẹm? Ẹ i re ne ọ do munọ iran, ne ọ vbe viọ iran bu avbe igie ohẹn ọre ọ yae gha die edinran?”

²² Sokpan orhu ne Sọl kpe keghi wa dọlegbe gha mu otọ sẹ ayọ. Ẹmwẹ ne ọ ta ya rhan otọ ẹre ighẹ Jesu ọrọre nene Mẹzaia keghi la ehọ sẹrriọ wẹẹ a ma miẹn Ju ọkpa ne ọ sẹtin guee muan ẹnrẹn vbe Damaskọs.

²³ Ikpẹdẹ ni bun ghi gberra nẹ, avbe Ju keghi do iko si uma wẹ ne iran gbe Sọl rua.

²⁴ Sokpan emwa eso keghi do ya ẹmwẹ ha ẹre ehọ we ghe uma ne iran si. Iran kegha khẹ odẹ ne a la la ẹvbo ni asọn kevbe avan ne iran miẹn ehe na gbe ẹe rua.

²⁵ Sokpan ọ ghi sẹ asọn ọkpa, iran ni lele Sọl khian keghi muẹn ye okhuae, iran na muẹn la uvun ekẹn ladian.

Sọl Vbe Jerusalẹm

²⁶ Sọl kegha rrie Jerusalẹm, ọ keghi te gha ho ne ọ ya egbe ba avbe erhuanegbe. Sokpan iran ma yayi wẹ ọrhuanegbe nọ, ohan rẹn kegha mu iran hia.

²⁷ Ẹghẹ nii ọre Banabas na rre ọ keghi rhie ẹre bu avbe ukọ ọ keghi rhan otọ vbene Sọl miẹn Nọyaẹnmwa hẹ vbe odẹ kevbe wẹ Nọyaẹnmwa gu ẹe guan. Ọ keghi vbe tama iran vbe ne Sọl wa gha kpe orhu eni Jesu hẹ vbe Damaskọs vbe ne a i na fian afianma.

²⁸ Sọl keghi gu iran tota, ọ na gha kpe orhu Nọyaẹnmwa lele Jerusalẹm hia vbe ne a i na fian afianma.

²⁹ Ọ keghi vbe gu emwa Ju ne a biẹ ye ẹvbo Grik guan, ọ keghi vbe gu iran gha muan ẹmwẹ, sokpan iran te ra gbe ẹe rua.

³⁰ Ugbẹn vbe emwi na ghi vẹ ne avbe etẹn rẹn, iran keghi rhie Sọl gha rrie Sisaria, iran na ke evba rhie ẹre gha rrie Tasọs.

³¹ Ẹghẹ nii ọre egbe ghi na do rọkhọ esọsi ni rre Judia hia, kevbe Galili kevbe ni rre Sameria. Ọ kegha de igiẹ, ọ na gha muan yọ vbe ekpa iyobọ Orhiọn Ne Ọ Huanrẹn, ọ kegha rrọọ vbene ọ na ye uyinmwẹ ọnrẹn ya ọghọ ne Nọyaẹnmwa.

Pita Vbe Lida Kevbe Jopa

³² Pita keghi wa gha khian lele ehe hia, ẹghẹ ọkpa, ọ keghi ya tuẹ emwa Nọyaẹnmwa ni rre Lida.

³³ Evba ọre ọ na do vba okpia ọkpa ne a tie ẹre Aeneas ne arọ kinmwi, ne ọ ma he sẹtin kpaegbe vbe ukpo erẹnrẹn gha dee.

³⁴ Pita keghi khama rẹn wẹẹ, “Aeneas, Jesu Kristi muẹn egbe rran. Kpaegbe ne u dọlọ ukpo ruẹ yi.” Ọwarọkpa nii, Aeneas keghi guakpao.

³⁵ Emwa hia ni rre Lida kevbe Siarọn ghi miẹn ọẹn, iran keghi do ya Nọyaẹnmwa yi.

³⁶ Okhuo ọkpa ne a tie ẹre Tabita keghi rre Jopa, ọmwa iyayi nọ. (Dọkas ọre a tie ẹre vbe Grik, emwi ne a ya ọnii kha ọrọre ẹrhuẹ.) Ọ lo ẹghẹ ẹre ye iwinna ne ọ maa kevbe ne ọ gha ye avbe ivbiogue obọ.

³⁷ Ẹghẹ nii, uhunmwu ova keghi dekun ẹnrẹn, ọ na wu. Iran ghi khuẹ ikun ẹnrẹn nẹ, iran keghi muẹn ye ughugha ọkpa vbe egedege.

³⁸ Jopa ma rrei gbe vbe Lida. Avbe erhuanegbe ni rre Jopa ghi họn ighẹ Pita rre Lida, iran keghi gie arhunmwu eva bu ẹre wẹẹ, “Zẹgiẹ bu ima gha dee.”

³⁹ Rhunmwuda ọnii, Pita mu egbe ọ keghi lele iran gha khian. Ọ ghi sẹ evba, iran keghi rhie ẹre gha rrie nene ughugha vbe egedege. Avbe ẹgbẹe hia keghi mama rhuẹe, iran gha viẹ, iran kegha viọ ẹwu ọkotọ kevbe ọkodukhunmwu ne a sele vbe ẹghẹ ne ọ na rre agbọn ma emwa.

⁴⁰ Pita keghi viọ iran hia ladian vbe ughugha nii, ọ keghi diguẹ, ọ na na erhunmwu, ọ mu aro da ikun ẹnrẹn nii, ọ wẹẹ, “Tabita, kpaegbe!” Rẹn keghi rhan aro ua, ọ ghi bẹghe Pita, ọ keghi kpaegbe tota.

⁴¹ Pita keghi nien obọ ya ru iyobọ nẹ ne ọ kpaegbe, ọ keghi tie emwa iyayi nii, kevbe avbe ẹgbẹe, ọ keghi rhie ẹre ne iran ke ẹe kevbe ẹmwẹ ne unu.

⁴² Emwi na keghi wa gbigbi la Jopa hia, emwa ni bun keghi ya Nọyaẹnmwa yi.

⁴³ Pita keghi gbe ikpẹdẹ ni bun vbe Jopa vbe owa ọsohian ọkpa ne a tie ẹre Saimọn.