Iwinna 23 - Edo Bible (E Baibol Ẹdo) Version 1996

¹ Pọl keghi ziẹn aro ye emwa iko ni aro, ọ wẹẹ, “Etẹn mwẹ, orhiọn mwẹ ma bu abe gbe mwẹ hiehiere vbene uyinmwẹ mwẹ ye hẹ vbe odaro Osanobua do sẹ ẹdẹnẹrẹ na.”

² Ananias ne Ogie Ohẹn keghi wẹ ne iran ni mudia ke Pọl gbe ubi ye ọre unu.

³ E Pọl tama ẹn wẹẹ, “Osanobua ọ ra fi uẹ emwi wẹ ne egbekẹn ne a gbe orhue yi. U tota ye evba gha bu ohiẹn mwẹ zẹ vbene Uhi khare, levba sevba, u na vbe gha rra uhi vbe uwu ne u na wẹ ne iran fi mwẹ emwi!”

⁴ Iran ni mudia ke Pọl tama rẹn wẹẹ, “Te u tie ihẹn ne Ogie Ohẹn Osanobua!”

⁵ Pọl wanniẹn wẹ, “Etẹn, I ma rẹn ighẹ Ogie Ohẹn nọ. Rhunmwuda Ebe tae nẹ wẹ, ‘Ohan igie uwẹ ye unu sakan ọmwa ne ọ khaemwisẹ yan emwa ruẹn.’ ”

⁶ Ugbẹn vbe Pọl ghi miẹn wẹ eso vbe uwu emwa ni rre evba re Sadusi, eso vbọ keghi vbe re Farisi, ọ davan vbe adesẹ iko ni wẹẹ, “Etẹn mwẹ, e Farisi ọre I mẹ khin, ovbi Farisi ọre I khin. Emwi ne a gu bu ohiẹn mwẹ na ọrọre wẹ mẹ mwẹ idaehọ wẹ a gha huẹn avbe ni wulo kpaegbe.”

⁷ Ugbẹn vbe ọ ghi wa ta ẹmwẹ na nẹ, avbe Farisi kevbe avbe Sadusi keghi suẹn gha gu egbe gui, iwannegbe keghi la ẹkpo emwa nii.

⁸ (Rhunmwuda avbe Sadusi khare ighẹ a i ra huẹn emwa kpao vbe orinmwi kevbe wẹ avbe odibosa ra avbe orhiọn i rrọọ, sokpan avbe Farisi wa ya eha na yi.)

⁹ Uvannọmwẹ kegha hin odukhunmwu. Eso vbe uwu iran ni ma emwa Uhi ni vbe rre otu avbe Farisi keghi gua kpaegbe, iran tua unu muẹn wẹ, “Ma ma miẹn abe rhọkpa vbe obọ okpia na, ughaghe odibo Osa ra orhiọn ọre ọ gele gu ẹe guan!”

¹⁰ Imuan ẹmwẹ na keghi wa wegbe sẹrriọ ne afianma na gha fian ọkaokuo wẹ iran gha yanghan Pọl rua. Rhunmwuda ọnii, ọ na wẹ ne ivbiyokuo la uwu ẹbu iran ne iran rhie Pọl ladian vbe evba, ne iran rhie ẹre gha rrie owa ne gbain.

¹¹ Vbe asọn ne ọ lele ẹe, e Nọyaẹnmwa keghi gu e Pọl mudia, ọ tama rẹn wẹ, “Ghẹ fian afianma! U sẹ osẹe mẹ ne vbe Jerusalẹm vbe emwa na, u gha vbe ru vberriọ vbe Rom.”

Iran Khuan Khẹ Pọl

¹² Vbe owiẹ ikpẹdẹ ne ọ lele ẹe, iran keghi si uma. Iran keghi vẹn ihẹn wẹ iran i ra re iran i ra da rhinrin iran te do gbe Pọl rua.

¹³ Iran ni si uma na yan arhin iyeva.

¹⁴ Iran keghi bu avbe igie ohẹn gha khian, iran tama iran wẹẹ, “Ma vẹn ihẹn ne ọ wo vbe egbe wẹ ma i ra ye evbare kan unu, ma te gbe Pọl rua.

¹⁵ Rhunmwuda ọnii nian, wa kevbe Iko gie uhunmwu gie Ọkaokuo e Rom wẹ ne ọ rhie Pọl bu uwa gha dee, wa ghi ba kha ighẹ wa ra dọlegbe gualọ otọ ẹzọ ẹre ẹse. Sokpan ma mu egbe ne a gbe ẹe rua ọ te sẹ edinran.”

¹⁶ Sokpan ovbi ovbiye Pọl, ne ọre ọvbokhan okpia keghi họn uma ne iran si na, rhunmwuda ọnii, rẹn keghi la uwu owa ne gbain ni, ọ na ya tama Pọl.

¹⁷ Rhunmwuda ọnii, Pọl keghi tie ọkpa vbe uwu iran ni rre asẹ vbe evba, ọ tama rẹn wẹ, “Rhie ọvbokhan okpia na bu ọkaokuo gha khian, ọ mwẹ ẹmwẹ ne ọ ra tama rẹn.”

¹⁸ Nọ rre asẹ nii keghi rhie ẹre bu ọkaokuo, ọ tama rẹn wẹẹ, “Pọl ni oleghan ọre ọ tie mwẹ, ọ na wẹ ne I rhie ọvbokhan okpia na bu ruẹ gha dee, ighẹ ọ mwẹ ẹmwẹ ne ọ ra tama ruẹn.”

¹⁹ Ọkaokuo ni keghi rhie ẹre obọ, ọ na tobọ ẹre rhie ẹre gha rrie efẹn ọkpa, ọ nọ rẹn wẹ, “De ẹmwẹ ne u ra tama mwẹ yi?”

²⁰ Rẹn keghi wanniẹn wẹ, “Avbe Ju ta ẹe nẹ wẹ iran gha do tama ruẹn akhuẹ ne u rhie Pọl gha die Iko, iran ghi ba kha ighẹ te Iko ra dọlegbe gualọ otọ ẹmwẹ ọnrẹn ẹse.

²¹ Sokpan ghẹ zẹ ye iran ẹre rhunmwuda ọ yan arhin iyeva ni lẹre khẹ ọre vbe odẹ. Iran hia vẹn ihẹn nẹ wẹ iran i ra re, iran i ra da rhinrin iran te do gbe ẹe rua. Iran wa mu egbe ne iran gha ya ru vberriọ nian, vbe ne uwẹ kha hẹ ọre iran ghi mudia khẹ.”

²² Ọkaokuo keghi tama rẹn, “Ghẹ tama ọmwa rhọkpa ighẹ u ta ẹmwẹ na ma mwẹ.” Rẹn keghi zẹ igbama ni urrie.

A Rhie Pọl Gie Fẹlis Ne Ọ Khaemwisẹ

²³ Ọkaokuo keghi tie eva vbe uwu iran ni rre asẹ vbe ototọ ẹre, ọ tama iran wẹẹ, “Wa viọ ivbiyokuo ye otọ ne iran do gha rrie Sisaria. Deba arhin ekigbesiyenẹ ni hin ẹsin kevbe arhin uri ni fi asoro, wa ghi mu egbe ne uwa si okhian vbe ẹgogo ihinrin vbe asọn nẹ rẹ.

²⁴ Viọ ẹsin eso ne Pọl hin, ne u rhie ẹre gberra gha rrie ọghe Fẹlis vbe ne a i na mwẹ ẹbe.”

²⁵ Ne ọ khaemwisẹ keghi gbẹn ebe vbe nian rhie lele ẹe:

²⁶ “Klọdiọs Lisias ọre ọ gbẹn ebe na gie Evbavba ighẹ Fẹlis ne Ne ọ khaemwisẹ: I wẹ do.

²⁷ Avbe Ju ọre ọ mu okpia na, iran te ra wa gbe ẹe rua. I họẹn ighẹ ovbi e Rom nọ, ọre I na viọ ivbiyokuo gha khian, I na ya wọlọ ẹe hin iran obọ rre.

²⁸ Mẹ keghi te ho ne I rẹn egbe ẹzọ ne iran gu ẹe gui, I na rhie ẹre gha rrie Iko iran.

²⁹ I keghi do miẹn wẹ ọ ma ru emwi rhọkpa ne a gha rhunmwuda ẹre gbe ẹe rua ra ne a mu ẹn ye eghan, ẹzọ ne iran gu ẹe gui keghi re ẹmwẹ emwi ne ọ dekan uhi iran.

³⁰ A ghi ya ha mwẹ ehọ ighẹ avbe Ju khuan ye otọ khẹ ọre, I na wẹ ne I rhie ẹre bu ruẹ gha dee. I tama iran ni gu ẹe gui ne iran do gu ẹe gui vbe ehe ne u ye.”

³¹ Avbe ivbiyokuo keghi wa ru vbene a tama iran. Asọn nii, iran keghi rhie Pọl do sẹ Antipatris.

³² Ẹdẹ ne ọ lele ẹe, avbe ivbiyokuo ni ye owẹ khian, keghi werriegbe gha rrie owa ne gbain, iran na wẹ ne iran ni hin ẹsin lele ẹe gha khian.

³³ Iran keghi rhie ẹre gha rrie Sisaria, iran rhie ebe nii ne Ne ọ khaemwisẹ, iran keghi vbe rhie Pọl nẹẹn.

³⁴ Ne ọ khaemwisẹ ghi tie ebe ni, ọ keghi nọ Pọl agbọn ẹvbo ne ọ ke rre, ọ ghi tama rẹn nẹ ighẹ Silisia nọ.

³⁵ Rẹn tama rẹn wẹẹ, “I gha họn ene unu ẹn vbe iran ni guẹ gui a rre nẹ.” Ọ na ghi wẹ ne a rhie Pọl la ẹguae Hẹrọd ne a gha ba ẹe.