Iwinna 22 - Edo Bible (E Baibol Ẹdo) Version 1996

¹ “Ikpia, etẹn ne ikpia kevbe avbe erha mwa, wa danmwehọ mwẹ ne I zẹ ene unu mwẹ ma uwa!”

² Ugbẹn vbe iran ghi họn vbe ọ zẹ Hibru gu iran guan, ehia keghi dọlegbe gbẹdọ, ọre Pọl na gha guan:

³ “Ovbi e Ju ọre I khin, Tasọs ne ọ rre Silisia ọre a na biẹ mwẹ, sokpan Jerusalẹm na ọ re I na wan vbe ehe ne I na gha ruẹ ebe vbe obọ Gamaliẹl. Te a wa mobọ ma mwẹ emwi dinmwi vbe Uhi avbe erha mwa odede. Mẹ keghi vbe rhie egbe ye ẹmwẹ ugamwẹ Osanobua ẹsẹse zẹ vbene uwa ni rre emwa na ẹrẹna vbe ye.

⁴ I kegha lọghọ iran, I na gha gbele iran ighẹ avbe emwa ni lele odẹ na. I na gha munọ ikpia kevbe ikhuo hẹ ku ẹwẹdọ.

⁵ Ogie Ohẹn kevbe iran ne emwa iko gha rẹn ighẹ ẹmwata ọre I ta. Iran ọre I miẹn ẹre ebe ne a rhie gie avbe Ju ne etẹn mwa ni rre Damaskọs, ọre I na gha khian ne I ya munọ emwa na, ne I ya eghan gbalọ iran hẹ gha die Jerusalẹm ne a do rri iran oya.

Pọl Na Iyẹn Vbene A Ya Fi Irẹn Werriẹ Hẹ

⁶ “Ehe ne I na khian nii vbe I ghi sikẹ Damaskọs nẹ vbe ọ ghi bu ẹghẹ ogiavan, awanwan keghi wa wan ke odukhunmwu rre lẹga mwẹ.

⁷ I keghi wa de gbe otọ, I keghi họn urhu ọkpa ne ọ tama mwẹ wẹẹ, ‘Sọl, Sọl vbọzẹ ne u na zọ mwẹ owẹ?’

⁸ Mẹ keghi nọ wẹẹ, ‘Gha nọ yi Nọyaẹnmwa?’ Rẹn wanniẹn tama mwẹ, ‘Mẹ Jesu ne ovbi Nazarẹt ne u zọ ọre owẹ nọ.’

⁹ Emwa ne I ma gba rre evba, miẹn awanwan ni sokpan iran ma họn urhu ọmwa ne ọ gun mwẹ guan.

¹⁰ Mẹ keghi nọ wẹẹ, ‘Vbe i a gha ru yi Nọyaẹnmwa?’ Nọyaẹnmwa keghi tama mwẹ wẹ, ‘Kpaegbe ne u gha rrie Damaskọs, odọ nii a gha na tama ruẹn emwi ne Nọyaẹnmwa mwamwa ye otọ khẹ ruẹ ne u gha ru.’

¹¹ I keghi rhu aro rhunmwuda awanwan nii, rhunmwuda ọnii, avbe iho mwa keghi rhie mwẹ obọ, iran na rhie mwẹ gha rrie Damaskọs.

¹² “Okpia ọkpa ne a tie eni ẹnrẹn Ananaias keghi rrọọ, ọmwa ne ọ mwẹ ekhọe ne a ya ga ẹsẹse, ọ kevbe ya Uhi ima ru emwi, ọ keghi vbe gha re ne ivbi e Ju hia ni rre Damaskọs ya ọghọ na ẹsẹse.

¹³ Rẹn keghi bu mwẹ gha dee, ọ keghi mudia ke mwẹ, ọ wẹẹ, ‘Sọl ne ọtẹn mwẹ, dọlegbe gha bẹghe,’ vbe ọwarọkpa nii, I keghi dọlegbe gha bẹghe, I na tọn aro mu ghe ẹre.

¹⁴ Rẹn keghi kha wẹẹ, ‘Osanobua avbe erha mwa odede ọre ọ hannọ uwẹ zẹ ne u do rẹn emwi ne irẹn ho, ne u bẹghe Ọguọmwadia ẹmwata ẹre kevbe ne u vbe họn vbe ọ ya urhu ẹre guan.

¹⁵ Rhunmwuda osẹe oghẹ ẹe ọre u khian gha khin ne u ya tama emwa hia emwi ne u miẹn kevbe ne u họẹn.

¹⁶ Wanwanna nian, de emwi ne u ghi ye mudia khẹ? Kpaegbe ne a sa amẹ nuẹn ne a miẹn ehe na kpe orukhọ ruẹ kua vbe ekpa ne u na datie eni ẹnrẹn.’

A Tie Pọl Ne Ọ Ya Kpe Orhu Ma Iran Ni I Re Ju

¹⁷ “I keghi dọlegbe gha rrie Jerusalẹm, ugbẹn vbe I ghi na erhunmwu vbe uwu Ọgua Osa, I keghi miẹn umian.

¹⁸ Vbe uwu ẹre, I keghi bẹghe Nọyaẹnmwa ne ọ tama mwẹ wẹẹ, ‘Zẹgiẹ kpao hin Jerusalẹm rre rhunmwuda iran ni rre emwa i ra rhan obọ miẹn osẹe ne u gha sẹ mẹ.’

¹⁹ Mẹ keghi wanniẹn wẹ, ‘Nọyaẹnmwa, iran rẹnrẹn wẹ te imẹ la uwu Ọgua ediọn ya gha munọ emwa ni ya uwẹ yi, I ghi vbe gbele iran uan.

²⁰ Ẹghẹ ne a na gbe ẹe rua ighẹ Stivin ne osẹe ruẹ, mẹ tobọ mwẹ rre evba, I keghi ye obọ ye uwu ẹre, mẹ ọre ọ gha gbe aro ghe ẹwu iran ni ya gbe ẹe rua.’

²¹ Nọyaẹnmwa keghi tama mwẹ wẹ, ‘Gha khian, rhunmwuda mẹ gha gie uwẹ gha rrie odẹ ne ọ rrei, bu avbe iran ne ẹ i re Ju.’ ”

²² Vbe Pọl te do ta ẹmwẹ na, emwa nii kegha danmwehọ ẹre, sokpan ẹghẹ na nian, iran keghi wa gha go kha wẹẹ, “Wa mu ẹn fua mwa! Gbe ẹe rua! Ọ ma kei ne ọ di agbọn ya!”

²³ Iran keghi gha go, iran na gha bọnmwẹ ukpọn iran, iran na gha kpolo ebubẹ zẹ fi ghe odukhunmwu.

²⁴ Ọkaokuo e Rom nii keghi wẹ ne emwa rẹn rhie Pọl la uwu owa ne gbain, ne iran gbe ẹre asan ne a miẹn ehe na rẹn emwi ne ọ zẹe ne avbe Ju na wa go yan rẹn vbe nian na.

²⁵ Sokpan ugbẹn vbe iran ghi gba ẹe nẹ ne iran gbe ẹre asan, Pọl keghi tama ọmwa ne ọ rre asẹ ne ọ mudia ke ẹe wẹẹ, “Wa sie mwẹ asẹ ne a ya gbe ovbi e Rom asan vbe a ma he gu ẹ gui ẹzọ a ba emwi ku ru rhọkpa ra?”

²⁶ Ugbẹn vbe ne ọ rre asẹ nii ghi họn ẹmwẹ na, ọ keghi rhulẹ bu ọkaokuo gha khian, ọ nọ rẹn wẹ, “Vbe u a ru na yi? Ovbi e Rom okpia nii khin!”

²⁷ Ọkaokuo ni keghi bu Pọl gha khian, ọ nọ rẹn wẹẹ, “Tama mwẹ, ovbi e Rom u gele khin ra?” Pọl keghi wanniẹn wẹ, “Ẹn.”

²⁸ Ọkaokuo ni keghi kha wẹẹ, “Igho ọrhẹnrhẹn ọre I zẹe ya dẹ egbe la rọ.” Pọl keghi wanniẹn wẹ, “Sokpan, ovbi eseserese mẹ khin.”

²⁹ Vbe ọwarọkpa nii, iran ni te ra nọ Pọl ọta keghi si ro, afianma kegha fian ọkaokuo ni vbe ọ miẹn wẹ ovbi e Rom ọre Pọl khin kevbe wẹ rẹn guọ eghan ye ọre egbe.

Pọl Vbe Adesẹ Iko

³⁰ Ọkaokuo nii keghi ho ne irẹn rẹn ẹzọ emwi ne avbe Ju mobọ gu Pọl gui. Rhunmwuda ọnii, ẹdẹ ghi gbe, ọna wẹ ne a rhan eghan hin e Pọl egbe rre, ọ na wẹ ne avbe igie ohẹn kevbe iran ni do Iko gha die iko, ọ na do rhie Pọl mudia ye odaro iran.