Iwinna 12 - Edo Bible (E Baibol Ẹdo) Version 1996

Ukpokpo Dọlegbe Tua

¹ Vbe odẹ ẹghẹ na ọre Hẹrọd ne Ọba na suẹn gha kpokpo eso vbe uwu emwa esọsi.

² Rẹn keghi ruẹe wẹ ne iran ya umozo gbe ẹe rua ighẹ Jems ne ọtiẹn Jọn.

³ Ọ ghi miẹn ighẹ emwi na rhiẹnrhiẹn avbe ju, ọ na vbe ya mu Pita. (Ẹghẹ Emwiukpo ebrẹd Ne ọ ma hue ọre emwi na na sunu.)

⁴ Iran ghi mu Pita nẹ, iran keghi mu ẹn fi uwu ẹwẹdọ, iran keghi zẹ oka enẹ ọghe ivbiyokuo, arhin enenẹ kevbe rre oka ọkpọkpa. Hẹrọd keghi te mwamwaẹn wẹ emwiukpo Alagberra ghẹ ghi fo nẹ, rẹn ghi do muẹn bu avbe Ju.

⁵ Iran keghi rhunmwuda ọnii khui e Pita ye uwu ẹwẹdọ sokpan ivbi e esọsi keghi wa kakabọ gha na erhunmwu ghe Osanobua nẹẹn.

A Zẹ Pita Hin Ẹwẹdọ Rre

⁶ Asọn ne ọ lele ẹdẹ ne Hẹrọd te ra rhie Pita gie avbe emwa, Pita kegha vbiẹ vbe adesẹneva ivbiyokuo eva. A keghi ya eghan eva rro ẹre, emwa eso keghi vbe gha khẹ odẹ vbe onurho ẹwẹdọ nii.

⁷ Vbe udomwurri, odibo e Nọyaẹnmwa ọkpa keghi mudia vbe evba, uwanmwẹ keghi wan ladian vbe uwu eghan nii. Odibosa nii keghi rueghe Pita izabọ, ọ na huẹn ọnrẹn, ọ tama rẹn wẹẹ, “Zẹgiẹgiẹ! Kpaegbe!” vbe ọwarọkpa nii, eghan ni keghi kuọ kua vbe obọ ẹre.

⁸ Odibosa nii keghi kha wẹẹ, “Tua ugbẹkun ruẹn ne u vbe gbalọ ibata ruẹ.” Pita keghi ru vberriọ, odibosa nii keghi kha wẹẹ, “Mu agbada ẹwu ruẹ yọ ne u lele mwẹ.”

⁹ Pita keghi lele ẹe ladian vbe uwu ẹwẹdọ sokpan ọ ma gi ẹe rẹn deghẹ ẹmwata ọre emwi ne odibosa ru khin, ọ keghi te gha ro ighẹ te irẹn miẹn umian.

¹⁰ Iran keghi gberra ehe ne iran ni khẹ odẹ ne okaro kevbe ne ogieva ye, iran keghi do sẹ onurho ematọn ne a bi la adesẹ ore. Ẹkhu ni keghi tobọ ẹre kie ye otọ ne iran, iran keghi ladian. Iran ghi khian la uwu idunmwu ọkpa, odibo Osa ni keghi wa sẹ Pita rae vbe udomwurri.

¹¹ Ẹghẹ nii Pita na do rẹn emwi ne ọ sunu vbe egbe irẹn, ọ na wẹẹ, “Banbanna nian, I rẹnrẹn ighẹ ẹmwata gele nọ, Nọyaẹnmwa gie odibo ẹre ne ọ do miẹn mwẹ fan vbe obọ Hẹrọd kevbe hin obọ emwi ne avbe emwa e Ju te rhie aro yi ne iran ru.”

¹² Rẹn ghi ghe vbene emwi hia ye hẹ. ọ kegha rrie owa Meri ne iye Jọn Mak, Emwa ni bun keghi si koko ye evba gha na erhunmwu.

¹³ Pita sobọ vbe ẹkhu ne a la fi ore, ọvbokhan okhuo ọkpa ne a tie ẹre Roda kegha dee do kie ẹre.

¹⁴ Ugbẹn vbe ọ ghi mu urhu e Pita, ẹko keghi rhiẹnrhiẹn ọẹn sẹrriọ wẹ ọ na rhulẹ werriegbe vbe ne ọ ma na kie urho, Ọ keghi ya kha ma iran wẹ, “Pita mudia vbe ore.”

¹⁵ Iran wanniẹn tama rẹn wẹẹ, “Te u mwẹmwẹ.” Sokpan rẹn keghi tua unu muẹn wẹ ẹmwata nọ. Iran na ghi kha wẹ, “Ẹhi ẹre nọ.”

¹⁶ Vbe ẹghẹ ne a kha na, Pita keghi ye gha sobọ. Iran keghi do kie urho vbe okiekie, iran ghi miẹn ọẹn, ọ keghi yan iran hia unu uan.

¹⁷ Ọ keghi ye obọ gbe iran ekhakha wẹ ne iran gie a họn ẹmwẹ ọ keghi do rhan otọ vbene Nọyaẹnmwa ya rhie irẹn ke uwu ẹwẹdọ ladian hẹ ma iran. Ọ keghi tama iran we wa ghi na iyẹn ma Jems kevbe iran ne etẹn nekpa. Rẹn keghi kpao gha rrie ehe ọvbehe.

¹⁸ Ẹdẹ ghi gbe, ẹmwẹ vbene Pita ru hẹ keghi wa si ohawa ye iran ni khẹ odẹ egbe ẹsẹse.

¹⁹ Hẹrọd keghi yi iyi wẹ ne a gualọe, sokpan iran ma miẹn ọẹn, ọ ghi nọ iran ni khẹ odẹ ọta nẹ, ọ na wẹ ne a gbele iran uan. Vbe iyeke ọna Hẹrọd keghi kpao vbe Judia rre ọ na vbe ya gbe ẹghẹ eso vbe Sisaria.

Uwu E Hẹrọd

²⁰ Ohu emwa Saidọn kevbe Taia keghi gha mu Hẹrọd, iran keghi si egbe koko ya miẹn ọẹn. Iran keghi ka de Blastọs ne ọka ẹguae ba egbe. Iran keghi bu Hẹrọd gha khian ya rinmwian ne ọ mu ẹzọ fua rhunmwuda, ẹvbo Ọba na ọre a ke hẹ evbare ne avbe ẹvbo na re rre.

²¹ Vbe ẹdẹ ne iran mwamwaẹn yi, e Hẹrọd keghi hẹ ukpọn ọba ẹre ye egbe, ọ keghi tota ye ẹkete ẹre, ọ na ke evba gha gu emwa rẹn guan.

²² Iran keghi gha kha wẹẹ, “Ẹ i re ọmwa kẹkan ọre ọ guan ẹbọ ọkpa nọ.”

²³ Vbe ọwarọkpa nii, odibo Nọyaẹnmwa keghi wa gbe Hẹrọd fi otọ rhunmwuda ọ ma rhie uyi ne Osanobua, ọkhọe keghi rriọ rua, ọ na wu.

²⁴ Ẹmwẹ Osanobua kegha vẹ yọ, ọ na gha wan yọ.

²⁵ Banabas kevbe Sọl ghi winna iwinna ne a gie iran ẹre fo nẹ, iran keghi werriegbe ke Jerusalẹm gha dee, iran keghi rhie Jọn Mak ba egbe gha dee.