Itan 9 - Edo Bible (E Baibol Ẹdo) Version 1996

Ẹwaẹn Kevbe Ukọnmwẹ

¹ Ẹwaẹn bọ owa ẹre nẹ, ọ keghi ru orre ihinrọn yọ.

² Ọ keghi gbe aranmwẹ ne a ya rri evbare, ọ keghi ya emwi ne ọ winhin gua ayọn, ọ keghi mwamwa emwi ye eteburu.

³ Ọ gie avbe eguọmwadia ẹre nikhuo ladian ne iran ya tie ẹvbo ke ehe ne ọ ghi rrei sẹ vbe ẹvbo nii rre:

⁴ “Wa larre vbe uwu owa, wa ni ma rẹn ne a ye!” Ọ kevbe khama akpa wẹẹ,

⁵ “Larre do rri evbare mwẹ ne u vbe da ayọn ne i guare.

⁶ Ladian vbe uwu ẹbu emwa ni ma rẹn ne a ye, ne u gha rre agbọn. Wẹ lele odẹ irẹnmwi.”

⁷ U gha tama ọmwa ne ọ khare ighe rẹn wa rẹn emwi hia, wẹ ọ ba emwi eso ku ru, ihẹn ọ re ọ ra tie nuẹn. U gha gu ọmwa dan gui ye ọkhọ, te ọ ra kuan ruẹn.

⁸ Ghẹ tama ọmwa ne ọ wẹ rẹn wa rẹn fo ighe ọ ba emwi ku ru, te ọ ra gha mu ohu ruẹ yọ. Sokpan, u gha tama umẹwaẹn ighe ọ ba emwi ku ru, ọ ghi gha ya ọghọ ne uẹn.

⁹ Emwi ne u a rhirhi tama umẹwaẹn, te ọ yae wan yọ. Emwi ne u a rhirhi tama ọmwa esi, te ọ rhie ba ẹre irẹnmwi.

¹⁰ A deghẹ u ho ne u gha wan, u ghi ka gha ya ọghọ ne Nọyaẹnmwa nẹ. A dẹghe wẹ rẹn Ọmwa Nọhuanrẹn nii, wẹ mwẹ irẹnmwi.

¹¹ Te ẹwaẹn fian ba ọmwa utọmwẹ. U gha wan, ere ne ọ rrọ, ọwuẹ nọ.

¹² A dẹghe u ghi vbe fi iyeke gbe ẹe, wẹ ọ re ọ ra rrioya.

¹³ Ukọnmwẹ yevbe okhuo ne ọ talọ, ne ọ ma rẹn ne a ye, kevbe ne awa lala ẹre aro.

¹⁴ Ọ ghi tota ye onurho owa ẹre, ra ye aga vbe ehe ne emwa ghi na bun sẹ vbe ẹvbo nii,

¹⁵ ọ ghi gha datie emwa ni gberra khian, emwa ni hẹko ru ọghe iran khin wẹẹ:

¹⁶ “Wa larre vbe uwu owa, wa ni ma rẹn ne a ye.” Ọ ghi vbe tama akpa wẹẹ,

¹⁷ “Amẹ ne a do sa, ọ re ọ rhiẹnrhiẹn sẹ, Ebrẹd ne a do rhie, ọ re ọ maa sẹ vbe unu.”

¹⁸ Iran ne obọ ẹre vbare, ma vbe rẹn wẹ, emwa ni la owa ẹre, uhunmwu ọ re iran ya khiẹ ọre kevbe wẹ iran ni ka la owa ẹre yi, wa rre ehe ni dinmwi nian vbe ẹvbo emwa ni wulo nẹ.