II Tẹsalonaika 3 - Edo Bible (E Baibol Ẹdo) Version 1996

Na Erhunmwu Ne Ima

¹ Vbe okiekie ehia etẹn mwẹ, wa gha na erhunmwu ne ima, ne ẹmwẹ Nọyaẹnmwa miẹn ehe na sẹtin zẹgiẹ gha vẹ khian, ne ọ vbe gha mwẹ uyi zẹ vbe ne ọ gha ye vbe ehe ne uwa ye.

² Wa vbe na erhunmwu, ne Osanobua miẹn mwẹ fan vbe obọ emwa dan ne ekhọe dan, rhunmwuda, ẹ i re emwa hia ọre ọ ya nene ẹmwẹ yi.

³ Sokpan ọmwa ne ọ gia mu ẹtin yan ọre Nọyaẹnmwa khin, ọ gha ya uwa wo vbe egbe, ọ ghi vbe miẹn uwa fan vbe obọ Ọmwa Dan nii.

⁴ Nọyaẹnmwa ne ọ gie ima ya uwa ye ẹro, aro ima da ẹe ighẹ vbene ima ta ma uwa ọre uwa ru, kevbe wẹ erriọ uwa khian vbe gha ru ẹe khian.

⁵ Nọyaẹnmwa ne ọ lahọ ne ọ su ekhọe uwa lao uwa aho ẹmwẹ Osanobua kevbe izi egbe ne Kristi rhie ne ọmwa.

Te Ọ Khẹke Ne A Gha Winna

⁶ Ma ya eni Nọyaẹnmwa Jesu Kristi yi iyi ma uwa etẹn mwa, wa gha bi egbe ne avbe etẹn ni lo ẹdẹ iran hia ye oroho ne a si, iran ne ẹ i ya ẹmwẹ ne ima tama iran ru emwi.

⁷ Wa tobọ uwa rẹnrẹn wẹ, vbene ima gha ru zẹ, ọre ọ kere ne uwa vbe gha ru. Ma ma mitan vbe ẹghẹ ne ima na gha rre ehe ne uwa ye.

⁸ Ma ma miẹn eghọ ọmwaikọmwa vbe ne ima ma na ha osa yọ, vberriọ te ima gha winna, a na gha miẹn ẹsọn, asọn kevbe avan, ọ re ima ya gha winna, ne a ghẹ do khian osa ye ọmwaikọmwa urhu vbe uwu uwa.

⁹ Ma ru vberriọ, ẹ i re rhunmwuda ighẹ ọ ma khẹ ke mwa ne ima ya gha miẹn eghọ vbe obọ uwa, te ima ru ẹe, ne ima miẹn ehe na gha re igiemwi ne uwa gha lele.

¹⁰ Ẹghẹ ne ima na gha rre ehe ne uwa ye, ma ta ẹe ma uwa wẹ, “Ọmwa ne ọ ma ho ne ọ winna, a ghẹ gi ẹe rri evbare.”

¹¹ Emwi ne ọ ya ima ta ẹmwẹ na ọrọre wẹ, ma họẹn ighẹ emwa eso rre uwu uwa, ne ọ wa lo ẹdẹ iran hia ya si oroho, iran i mwẹ emwi ne iran rhie ru, gberra ne iran ya gha gbe igboo fi ẹmwẹ ẹrrẹe.

¹² Eni Nọyaẹnmwa Jesu Kristi ọre ima ya yi iyi ne iran an, a keghi vbe ya obọ sa ekhae ne iran wẹ, ne iran gha ru emwi uhẹn, kevbe ne iran gha winna khuan ekhuan unu iran.

¹³ Sokpan etẹn mwa, wa ghẹ gie egbe emwi esi ne a ru wọ uwa.

¹⁴ Emwa eso sẹtin gha rre evba ne ẹ i ra zẹ ye ẹmwẹ ne ima gbẹnnẹ ye ebe na. A deghẹ ọ ye rriọ, wa ye ẹre ẹro ne uwa ghẹ gu ẹe mu obọ hiehie, ne ekhue miẹn ehe na muẹn.

¹⁵ Sokpan, wa ghẹ ya eghian so ẹe, wa ghi yan ma rẹn zẹ vbe ọtẹn.

Ẹmwẹ Okiekie

¹⁶ Nọyaẹnmwa tobọ ẹre, ne ọre isi ehe ne ọfumwegbe mwa ke rre, ne ọ rhie ọfumwegbe ne uwa vbe ẹghẹ hia kevbe odẹ hia, Nọyaẹnmwa ne ọ yaba uwa hia.

¹⁷ Obọ mwẹ tobọ mwẹ ya gbẹn ọna, “E Pọl we uwa do.” Erriọ I ya gbẹn eni ye ebe ne I gbẹn hia. Erriọ I ya gbẹn ọẹn.

¹⁸ Te ẹsọhẹ Nọyaẹnmwa Jesu Kristi gha gu uwa hia gha rrọọ.