II Tẹsalonaika 2 - Edo Bible (E Baibol Ẹdo) Version 1996

Ọmwa Dan Nii

¹ Vbe ekpa urremwẹ Nọyaẹnmwa Jesu Kristi, kevbe wẹ, a gha si ima koko ba irẹn ne a gu ẹe gha rrọọ, I rinmwian uwa etẹn mwẹ,

² wa ghẹ gie vbene uwa roro ẹe gha rherhe lighi ye uwa aro, ra ne uwa gi ẹe gbe uwa orhiọn, ighẹ ne iran na ta ẹe khian wẹ, rẹn rre nẹ. Ọ gha kẹe, ọmwa ne ọ guan ye otọ vbe akhasẹ ra ọmwa ne ọ kpe orhu, ọre ọ ta ẹmwẹ na. Ra emwa sẹtin wa tae wẹ, ma ọre ọ gbẹn ọẹn ye ebe rre.

³ Wa ghẹ gie ọmwa rhọkpa la odẹikodẹ do uwa ọzuọ. Rhunmwuda Ẹdẹ ni i khian rre vbe ẹ i re te Isọtẹ ne okiekie sunu nẹ, ne Ọmwa Dan nii ya egbe ladian, ọmwa ne a khare ighẹ ẹrinmwi erhẹn ọrọre ọghọe.

⁴ Rẹn gha ghe odan ye emwi hia ne emwa ghi gho nẹ, kevbe emwi hia ne emwa ghi tie ẹre ne ọ huanrẹn. Rẹn ghi tọn egbe ẹre mu sẹ ehia fẹẹrẹ, uhin ọ ghi ya tota ye Ọgua Osa ọghe Osanobua, ọ ghi wẹ rẹn ọre ọ ghi re Osanobua!

⁵ Wa ma ghi ye rre ra? I ta emwi na hia ma uwa ẹghẹ ne I na gha rre ehe ne uwa ye.

⁶ Sokpan, emwi ọkpa rrọ ne ọ ma he gie emwi na sunu vbe ẹghẹ na ye na, wa vbe rẹn emwi ne ọ khin. Rhunmwuda ọnii, ọ gha wa sẹ ẹghẹ ne ọ kei yọ, Ọmwa Dan ni gha ye egbe ladian.

⁷ Uyinmwẹ dan ne Ọkpaodin nii, wa zẹ edunna nẹ nian, sokpan, emwi ne ọ gha sunu i khian he sunu, rhinrin emwi ne ọ da ẹe yi ni te ladian odẹ rre.

⁸ Ẹghẹ nii Ọmwa Dan ni ghi ya egbe ladian, e Nọyaẹnmwa Jesu Kristi ghi ya ẹhoho unu ẹnrẹn gbe ẹe ua, ọ ghi vbe ya urremwẹ ọnrẹn ne ọ mwẹ uyi fuẹn ọnrẹn uan, vbe ẹghẹ ne irẹn gha na rre.

⁹ Ẹtin e Setan ọre Ọmwa Dan nii gha ya rre, ọ ghi winna iwinna ọyunnuan ughughan, kevbe orhiemaa ohoghe, kevbe ọyunnuan.

¹⁰ Ọ ghi vbe lo erẹrẹ dan ughughan vbe egbe iran ni ra fuẹn uan, iran gha fuẹn uan rhunmwuda, iran ma rhan obọ miẹn, ra ne iran vbe ho ẹmwẹ ẹmwata, ne iran miẹn ehe na fe.

¹¹ Rhunmwuda ọna, Osanobua keghi gie ẹtin idodẹ, ne ọ ya gha winna vbe uwu iran, iran na ghi gha ya emwi ohoghe yi.

¹² Emwi ne ọ ghi ke ẹre ikian ọrọre wẹ, iran hia ni ma ya ẹmwata yi sokpan iran kegha mwẹ ẹko ne ọ rhiẹnrhiẹn ye orukhọ, a gha bu abe gbe iran.

Te A Hannọ Uwa Zẹ Ye Imiẹnfan

¹³ Ẹ i mwẹ ma ma gha kpọnmwẹ Osanobua ne uwa vbe ẹghẹ hia, etẹn mwẹ, wa ne Nọyaẹnmwa ho ẹmwẹ ọnrẹn. Rhunmwuda, te Osanobua hannọ uwa zẹ, zẹ vbe emwa ne okaro ne a gha ya ẹtin nene Orhiọn miẹnfan, ne a miẹn ehe na ya uwa khian emwa ni re ọghe Osanobua tobọ ẹre, kevbe rhunmwuda iyayi ne uwa mwẹ ye ẹmwata.

¹⁴ Iyẹn Ne ọ maa ne ima kpe orhu ẹre ma uwa, ọre Osanobua ya tie uwa ye ọna, ọ keghi tie uwa do rhie oghae uwa vbe uyi Nọyaẹnmwa Jesu Kristi.

¹⁵ Rhunmwuda ọnii nian etẹn mwẹ, wa mudia gbangbaangban, ne uwa gba ẹe mwẹ ighẹ avbe ẹmwata ne ima ye ikporhu mwa, kevbe ebe ne ima gbẹnnẹ, ma uwa ẹre.

¹⁶ Te Nọyaẹnmwa Jesu Kristi tobọ ẹre, kevbe Osanobua ne Erha mwa ne ọ ho ẹmwẹ mwa, ọ keghi vbe ke uwu ẹsọhẹ ọre rhie igiẹdu etẹbitẹ ne ima, deba idaehọ ne ọ maa.

¹⁷ Gha ye ẹtin ne ọ la ọmwa iwu, vuọn ekhọe uwa, ne ọ vbe gie uwa wo vbe egbe ne uwa sẹtin gha ta kevbe ne uwa vbe gha ru emwi ne ọ maa.