II Samuẹl 9 - Edo Bible (E Baibol Ẹdo) Version 1996

E Devid Kevbe Mẹfibosiẹt

¹ Ọ ghi sẹ ẹdẹ ọkpa, e Devid keghi nọ wẹẹ, “Ọmwa rhọkpa ye kẹe vbe ẹgbẹe Sọl ra? A deghẹ ọ ye rrọọ, I ho ne I ru ẹre ẹse rhunmwuda e Jonatan.”

² Ọguọmwadia ẹgbẹe Sọl ọkpa ne a tie ẹre Ziba kegha rrọọ, iran na tama rẹn wẹ, ne ọ bu e Devid. Ọba keghi nọ rẹn wẹẹ, “Wẹ ọrọre Ziba ra?” Rẹn keghi wanniẹn wẹẹ, “Ghe ọguọmwadia ruẹ enọwanrẹn.”

³ Ọba keghi nọ rẹn wẹẹ, “Ọmwa rhọkpa ye kẹe vbe ẹgbẹe Sọl ra ne I gha tohan rẹn, ne I vbe ru ẹse ne ẹẹn zẹ vbene I yan ma Osanobua ighẹ I gha ru?” E Ziba keghi wanniẹn wẹẹ, “Ọkpa ye kẹe vbe ivbi e Jonatan, uke nọ.”

⁴ Ọba keghi nọ wẹẹ, “Rẹn vbo nian?” E Ziba keghi wanniẹn wẹẹ, “Ọ rre owa Makiẹ ne ovbi Amiẹl ne ọ rre Lodeba.”

⁵ Ẹre Devid ne ọba na wẹ ne a ya rhie ẹre rre.

⁶ E Mẹfibosiẹt ne ovbi e Jonatan kevbe eyẹ e Sọl ghi rre, ọ keghi ya ọghọ ghughẹ rre vbe odaro e Devid. E Devid keghi kha wẹẹ, “Mẹfibosiẹt!” Rẹn keghi wanniẹn wẹẹ, “Ghe ọguọmwadia ruẹ enọwanrẹn.”

⁷ E Devid keghi wanniẹn wẹẹ, “Ghẹ gie ohan mu ẹẹn, I gha tohan ruẹn rhunmwuda e Jonatan ne erha a. I gha mu otọ e Sọl ne erha odede hia nuẹn, u ghi vbe do gha rrie evbare vbe eteburu mwẹ vbe ẹghẹ hia.”

⁸ Mẹfibosiẹt keghi dọlegbe gbe uhunmwu kotọ, ọ wẹẹ, “Enọwanrẹn, mẹ ma maa vba ekita ne ọ wu: Vbe u a a ghi na ru mwẹ ẹse nọ sẹ vbe nian hẹẹ?”

⁹ Ẹre ọba ghi na tie Ziba ne ọguọmwadia e Sọl, ọ na tama rẹn wẹẹ, “I viọ emwi e Sọl hia ne Mẹfibosiẹt ne eyẹ Sọl ne arowa a, ke ẹe kevbe ẹgbẹe ọre hia.

¹⁰ Wẹ avbe ivbi uẹ ne ikpia kevbe eguọmwadia ruẹ, ghi gba gha gbe ugbo nii ne ẹgbẹe Sọl ne arowa, wa ghi vbe gha viọ emwiorhọ ẹre rrie owa ne iran miẹn evbare gha re. Sokpan, eteburu mwẹ ọ re Mẹfibosiẹt gha na gha rrie evbare vbe ẹghẹ hia.” (E Ziba keghi mwẹ emọ ikpia ekesugie kevbe eguọmwadia ugie.)

¹¹ E Ziba keghi wanniẹn wẹẹ, “I gha ru vbene u khare hia Umogun.” Erriọ a na miẹn wẹ, eteburu ọba ọre Mẹfibosiẹt na gha rri evbare zẹ vbe ọkpa vbe uwu avbe ivbi ọba.

¹² E Mẹfibosiẹt kegha mwẹ ọmọ okpia ọkpa kherhe ne a tie eni ẹnrẹn Mika. Ẹgbẹe Ziba hia keghi khian eguọmwadia e Mẹfibosiẹt.

¹³ E Mẹfibosiẹt ne owẹ ọre eveva luẹluẹe, kegha rre Jerusalẹm, ọ na vbe gha rrie evbare ẹre hia vbe eteburu ọba.