II Samuẹl 2 - Edo Bible (E Baibol Ẹdo) Version 1996

A Ma E Devid Ọba Ọghe Juda

¹ Vbe iyeke ọna, e Devid keghi nọ e Nọyaẹnmwa wẹẹ, “Ne I gha khian ya mu ọkpa vbe ẹvbo ni rre Juda ne I gha khaemwisẹ yan rẹn ra?” E Nọyaẹnmwa keghi wanniẹn wẹẹ, “Gha khian.” E Devid keghi nọ wẹẹ, “De ne ọ khin vbọ yi?” E Nọyaẹnmwa tama rẹn wẹẹ, “E Hibrọn.”

² Ẹre Devid na viọ amwẹ ọnrẹn eva, Ahinoam ne ovbi e Jezrẹl, kevbe Abigẹl, ne ọ de ẹgbẹe vbe obọ Nabal ne ovbi Kamẹl, ba egbe, ọ na gha die Hibrọn.

³ Ọ keghi vbe viọ ikpia ni lele ẹe khian, kevbe ẹgbẹe iran, gha khian, iran keghi yin ẹvbo ni lẹga Hibrọn.

⁴ Ẹre ivbie Juda na gha die Hibrọn, iran na ma Devid ọba ọghe Juda. Ugbẹn vbe Devid ghi họn ighẹ ivbi ẹvbo Jabẹs ne Giliad re orinmwi e Sọl nẹ,

⁵ Ọ keghi gie emwa eso uhunmwu gha khian ya tama iran wẹẹ, “Te Nọyaẹnmwa gha fiangbe uwa, ne uwa na rhie maa ighẹ uwa i re eghian ọba uwa vbene uwa na re ẹre.

⁶ Wanwanna nian, te Nọyaẹnmwa gha tohan uwa ne ọ gie ue khian oghian uwa. Mẹ tobọ mwẹ gha vbe ya obọ esi mu uwa rhunmwuda uyinmwẹ ne uwa yinrin na.

⁷ Wa ghi wegbe ne uwa vbe din. E Sọl ne ọba uwa wu nẹ nian, ivbi e Juda vbe ma mwẹ ọba iran.”

A Ma Isbosiẹt Ọba Izrẹl

⁸ Abna ne ovbi e Niẹ, ne ọkaokuo ne ọ gbearoghe ivbiyokuo e Sọl, lẹ lele Isbosiẹt ne ovbi e Sọl fian Jọdan rra gha rrie Mahanem.

⁹ Ọ keghi ma ẹre ọba ọghe otọ Giliad, Asia, Jezrẹl, Ifreim kevbe Bẹnjamin, ne a wa kha wẹ, ọghe otọ Izrẹl hia.

¹⁰ Ukpo iyeva ọre Isbosiẹt gha ye vbe a ma ẹre ọba Izrẹl, ọ keghi ya ukpo eva vbe ọba. Sokpan otọe Juda kegha ga gie Devid.

¹¹ Rẹn keghi vbe ya ukpo ihinrọn vbe ukhiọnmwẹ gha khaemwisẹ yan iran vbe Hibrọn.

Okuo Ne Izrẹl Kevbe Juda Gu Egbe Khọn

¹² Abna kevbe iran ni rre asẹ vbe ototọ Isbosiẹt keghi ke Mahanem gha rrie Gibiọn.

¹³ E Joab ne ovbi Zeruaia kevbe emwa ni rre asẹ vbe ototọ e Devid keghi gha khian ya vba iran vbe uhẹnhẹn amẹ ne ọ rre evba, otu ọkpa vbe obọ na ọghe nene amẹ kevbe otu nọkpa vbe obọ nọkpa ọghe nene amẹ.

¹⁴ Abna keghi khama e Joab wẹẹ, “Wa gie igbama eso ke dọmwadẹ otu rre ne iran do ya umozo viọ aro da egbe.” E Joab keghi wanniẹn wẹẹ, “Ọ wa maa.”

¹⁵ Ẹre iran na viọ arhin iweva vbe ivbi ẹwae e Bẹnjamin ni rre ọghe Isbosiẹt ne iran gu arhin iweva ni rre ọghe Devid gbinna.

¹⁶ Dọmwadẹ ọghe ọe vbe uwu iran na mu ogieva ẹre uhunmwu, ọ na bi umozo ye ọre efẹn, iran enẹ yan ugie ni keghi koko dele gbe otọ, iran na wulo. Ọnii ọ si ẹe ne a na tie oha ni vbe Gibiọn, “Oha Umozo.”

¹⁷ Vbe iyek ọnii, okuo ukpọba keghi saa. Emwa e Devid keghi khọn Abna kevbe ivbi Izrẹl miotọ.

¹⁸ Ivbi e Zeruaia eha ighẹ Joab, Abisiai kevbe Asahẹl, kegha rre evba. Asahẹl ne a rẹnrẹn wẹ te ọ rhulẹ vbe ẹrhuẹ,

¹⁹ keghi zẹ Abna khu, ọ na wa rhie uhunmwu da ẹre.

²⁰ Abna keghi gbe aro ghe odieke, ọ wẹẹ, “Wẹ ọnii khin ra Asahẹl?” Ọ keghi wanniẹn wẹẹ, “Mẹ nọ.”

²¹ Abna keghi wanniẹn tama rẹn wẹẹ, “Werriegbe, ne u ghẹ ghi khu mwẹ, khu ovbiyokuo ọkpa ne u viọ emwi ne ọ mwẹ.” Sokpan, Asahẹl keghi ye gha khu ẹe khian.

²² Abna keghi dọlegbe tama rẹn wẹẹ, “Ghẹ ghi khu mwẹ. Te u ho ne I gbe uẹ ua ra? Vbe a ra na ọnii ighẹ iyẹn ma e Joab ne ọtuẹn hẹẹ?”

²³ Sokpan, Asahẹl ma ye werriegbe. Ọre Abna ghi na fi asoro odieke, ọ na hae la ẹre ẹko, asoro ni na ladian vbe odieke ẹre. Asahẹl keghi defi otọ, ọ na wu, ọmwa ne ọ rhirhi ghi sẹ ehe ne ọ de yi ghi mudia ye evba.

²⁴ Sokpan, e Joab kevbe Abisiai keghi zẹ Abna khu, ẹghẹ ota iran na do sẹ oke Ama ne ọ rre odẹ ahọ ọghe Gia vbe odẹ ne a la sẹ ẹgbo Gibiọn.

²⁵ Emwa ni ke ẹwae Bẹnjamin rre keghi mudia ye egbe gba ogba lẹga Abna, iran na rhie fi vbe odukhunmwu oke ni.

²⁶ Abna keghi datie Joab wẹẹ, “Igbinna ọre a ghi wa gha gbinna khian ẹdẹ ra? Wẹ ma rẹn wẹ ọ ma ọkpa ne a ra miẹn gberra a khọ ẹko egbe i rrọọ? Ivbi ẹvbo ọkpa ma gba khin. Vbe ọ khian kpẹe sẹ hẹ u ke tama emwa ruẹn ne iran ghẹ ghi khu ima?”

²⁷ E Joab keghi wanniẹn wẹẹ, “Eni Osanobua ne ọ rrọọ ọ re I ya vẹn ihẹn na wẹ akpawẹ ẹ i re ẹmwẹ ne u tae na, te emwa mwẹ gha ye gha zẹ uwa khu khian ya sẹ owiẹ ne akhuẹ.”

²⁸ Ẹre Joab ghi na kpe okpe, emwa rẹn hia keghi hẹwẹ vbe ukhumwẹ ne iran khu ivbi e Izrẹl khian, iran na da obọ igbinna yi.

²⁹ Abna kevbe emwa rẹn keghi ya owẹ khian la Iya Jọdan vbe asọn ni hia. Iran keghi fian Ẹzẹ Jọdan rra. Iran ghi ya owiẹ ẹdẹ ne ọ lelẹe hia khian nẹ, iran na do sẹ Mahanem.

³⁰ Ugbẹn vbe Joab ghi dobọ ukhumwẹ ne ọ khu iran re khian yi nẹ, ọ keghi do si emwa rẹn koko, ọ na miẹn wẹ arhin ọkpa irrọvbugie, i ghi rrọọ, ne usun ọre Asahẹl ye.

³¹ Emwa e Devid keghi gbele arhin iyerẹnrẹn yan uri (360) vbe ivbi ẹwae Bẹnjamin ne emwa Abna.

³² E Joab kevbe emwa rẹn keghi mu ikun Asahẹl, iran na ya re ẹre ye idin ẹgbẹe ne ọ rre Bẹtlẹhẹm. Iyeke ọnii, iran keghi wa ye asọn hia khian, iran na do sẹ Hibrọn vbe ẹdẹ ghi da wan.