II Ọba 9 - Edo Bible (E Baibol Ẹdo) Version 1996

A Ma Jehu Ọba Izrẹl

¹ Vbe uwu eghẹ na, ọ re Elaisia na tie akhasẹ igbama ọkpa, ọ tama rẹn wẹẹ, “Mu egbe ne u do gha rrie Ramọt ne Giliad, u ghi rhie ẹluba ori oliv na mwẹ gha khian,

² gualọ Jehu ne ovbi e Jehosiafat ne ọ vbe re eyẹ Nimsi. U ghi rhie ẹre ke uwu ẹbu ihua ẹre ladian la ughugha ọkpa.

³ U ghi tue ori ye ọre uhunmwu ne u kha wẹẹ, ‘E Nọyaẹnmwa ta ẹe i ghẹ rẹn ya a rriọba Izrẹl.’ U ghi zegiẹgiẹ ladian hin evba rre.”

⁴ Ẹre akhasẹ igbama nii na gha rrie Ramọt,

⁵ ọ keghi vba avbe ọkaokuo vbe iko. Ọ keghi kha wẹẹ, “Enọwanrẹn, a gie mwẹ uhunmwu guẹ.” E Jehu keghi nọ rẹn wẹẹ, “Gha u kha vbe uwu ima yi?” Ọ na wanniẹn wẹẹ, “Wẹ nọ enọwanrẹn.”

⁶ Ẹre iran eveva na gba la uwu owa, ẹre akhasẹ igbama nii na sa ori oliv yan e Jehu uhunmwu, ọ na kha ma rẹn wẹẹ, “E Nọyaẹnmwa ne Osanobua Izrẹl khare wẹẹ, ‘I ya a rriọba yan ivbi Izrẹl ne emwa mwẹ.

⁷ U ghi ya gbe ẹe rua ighẹ arowa a, rẹn ighẹ ọba ne ovbi Ehab nii, ne I miẹn ehe na rria e Jezibẹl ikhi ye ẹmwẹ avbe akhasẹ kevbe eguọmwadia mwẹ ọvbehe ne ọ gbele ua hia.

⁸ Ẹgbẹe Ehab hia kevbe ivbi iran, te ehia khian wulo, te I ra wa fuẹn emọ ikpia hin uniẹn ọnrẹn rre, ibiẹka kevbe eniwanrẹn.

⁹ Vbene I ru ẹgbẹe e Jeroboam ne ọba Izrẹl, kevbe Basia ọghe Izrẹl, erriọ I ra vbe ru ẹgbẹe ọre.

¹⁰ A i khian re Jezibẹl, avbe ekita ọ re ọ ra rri ikun ẹnrẹn vbe abewe Jezrẹl?’ ” Ọ ghi talọ avbe ẹmwẹ na nẹ, akhasẹ igbama nii keghi ladian vbe ughugha nii, ọ na lẹ fua.

¹¹ E Jehu keghi bu avbe ọkaokuo ne ihua ẹre gha khian, iran nọ rẹn wẹẹ, “Deghẹ ọ ye ẹse? Vbe ọmwẹmwẹ nii ya a ru yi?” E Jehu keghi wanniẹn wẹẹ, “Wa rẹn emwi ne ọ ho.”

¹² Iran wanniẹn wẹẹ, “Ẹn o, ma ma rẹn, tama ima vbene ọ kha hẹ.” Ọ tama mwẹ wẹẹ, “E Nọyaẹnmwa kha re wẹẹ, ‘I ya a rriọba ọghe Izrẹl!’ ”

¹³ Vbe ọwarọkpa nii, avbe ọkaokuo ne ihua e Jehu keghi wa ẹwu iran ye ikpawẹ ne ọ ke ukhunmwu, iran keghi kha wẹẹ, “E Jehu rriọba!”

A Gbe Joram Ne Ọba Izrẹl

^14-15 Ẹre Jehu na wa sọtẹ e Joram ne ọba ne ọ rre Jezrẹl ne ọ na ya sinmwi egbe rhunmwuda emwi ne ọ vba ẹre vbe Ramọt ne Giliad, vbe ehe ne ọ na gu Hazaẹl ne ọba e Siria khọn. Ẹre Jehu na tama avbe ekaokuo ne ihua ẹre wẹẹ, “A deghẹ wa yaba mwẹ, wa gia miẹn wẹ ọmwarhọkpa ma rẹnrẹn ladian vbe Ramọt ya khama emwa vbe Jezrẹl wẹ ghe emwi ne ọ sunu.”

¹⁶ Ẹre irẹn na deyan ikẹkẹ okuo ẹre ọ na rhie uhunmwu da e Jezrẹl. Egbe ma he ye rran Joram, Ahazaia ne ọba, Izrẹl ne ọ do rhuanrẹn ghe kevbe rre evba.

¹⁷ Abodẹ ne ọ khẹ odẹ vbe uhunmwu ogogoro e Jezrẹl, keghi bẹghe vbe Jehu kevbe emwa rẹn dee. Ọ keghi kha wẹẹ, “I bẹghe emwa eso ni hin ẹsin dee.” E Joram keghi wanniẹn wẹẹ, “Gie ọmwa ne ọ hin ẹsin ọkpa ne ọ ya ghe ẹre gha adeghẹ ọse iran khin ra eghian.”

¹⁸ Ọmwa ne a gie ẹre uhunmwu nii keghi hin ẹsin vba e Jehu, ọ tama rẹn wẹẹ, “Ọba ho ne ọ rẹn adeghẹ te u dee vbe ọse ra oghian.” E Jehu wanniẹn tama rẹn wẹẹ, “Ọnii ma zẹdẹ kan ruẹn, gberra ghe iyeke mwẹ ne u deba usun.” Abodẹ nii ke kha wẹẹ, “Ọmwa ne a gie ẹre uhunmwu sẹ ehe ne iran ye, sokpan ọ ma ghi werriegbe gha dee.”

¹⁹ Iran kevbe gie ọmwa ọvbehe, onii na vbe nọ e Jehu ọta ọkpa nii. E Jehu kevbe dọlegbe wanniẹn wẹẹ, “Ọnii ma zẹdẹ kan ruẹn, gberra ghe iyeke mwẹ ne u deba usun.”

²⁰ Abodẹ nii kevbe dọlegbe kha wẹ ọmwa ne a gie ẹre uhunmwu sẹ otu nii, sokpan ẹ i ghi dọlegbe dee. Ọ keghi rhie te ẹe wẹẹ, “Ọmwa ne ọ ke odaro wa fi ikẹkẹ okuo ẹre dee vbe ọmwẹmwẹ, ọ khọ ọghe Jehu!”

²¹ Ẹre Joram ne ọba na kha wẹẹ, “Wa mu ikẹkẹ okuo mwẹ ladian mẹ.” Iran keghi gele mu ẹẹn ladian, rẹn vbe Ahazaia ne ọba keghi gba hin ikẹkẹ ladian, dọmwadẹ ọghe ọe vbe ọghe ọe, iran na gha khian bu e Jehu khian. Iran keghi vba ẹre vbe ogba ne ọ te ka re ọghe Nabot.

²² E Joram keghi nọ rẹn wẹẹ, “Deghẹ okhian maa?” E Jehu keghi wanniẹn wẹẹ, “Vbe ọ ghi ragha maa hẹ vbe avbe azẹn kevbe ẹbọ ne a ga ne iye uẹ ya rre hia ye rre evba.”

²³ E Joram keghi fian ẹyaẹn ikẹkẹ ọre ne ọ lẹ, ọ na datu wẹẹ, “Isọtẹ nọ, Ahazaia!”

²⁴ E Jehu na si uhanbọ ẹre, ọ na ya ẹtin ẹnrẹn guọn mwẹ ifẹnmwẹ, ọ na sa e Joram vbe iyeke, ọ na ya ha ẹre ẹkoko udu ladian. E Joram keghi de ye uwu ikẹkẹ okuo ẹre ọ na wu.

²⁵ E Jehu keghi tama Bidka ne ọkpọmwa rẹn wẹẹ, “Mu ikun ẹnrẹn ne u fi ẹe fi uwu ogba e Nabot. Yerre ẹghẹ ne imẹ vbe ruẹ na gba gha hin ẹsin lele Ehab ne erha e Joram iyeke dee, e Nọyaẹnmwa keghi ta ẹmwẹ na vbekpa Ehab wẹẹ,

²⁶ ‘I miẹn vbene a gbele Nabot kevbe ivbi ẹre hẹẹ nodẹ, ẹre I na yan wẹẹ, I gha rri uwẹ oya vbe emwa na, vbe uwu nene ogba na!’ ” E Jehu keghi tama ọkpọmwa rẹn wẹẹ, “Rhunmwuda ọnii nian, mu ikun e Joram, ne u fi ẹe fi uwu ogba e Nabot, ne u miẹn ehe na mu eyan e Nọyaẹnmwa sẹ.”

A Gbe Ahazaia Ne Ọba E Juda

²⁷ Ahazaia ne ọba ghi miẹn emwi ne ọ sunu, ọ keghi ya ikẹkẹ okuo ẹre lẹ ghe odẹ ẹvbo ne a tie ẹre Bẹt Hagan vbene Jehu na khu ẹe khian. E Jehu keghi tama emwa irẹn wẹẹ, “Wa vbe gbe ẹe rua!” Iran keghi kuan rẹn vbe ehe ne ọ na hin ikẹkẹ okuo ẹre la odẹ nọ rrie Gọ, vbe ọkpẹn ẹvbo ne a tie ẹre Ibleam. Sokpan, ọ keghi ye ziga gha khian ya sẹ ẹvbo ne a tie ẹre Mẹgido, ọ na wu vbe evba.

²⁸ Avbe ivbi iyokuo ẹre keghi mu ẹẹn ye ikẹkẹ okuo gha rrie Jerusalẹm, iran keghi ya re ẹre ye idin avbe ọba vbe Ẹvbo Devid.

²⁹ Ọ rre ukpo owọrọ ne Joram ne ovbi Ehab rriọba vbe Izrẹl, ọre Ahazaia na rriọba e Juda.

A Gbe Jezibẹl Ne Oloi

³⁰ E Jehu keghi sẹ Jezrẹl. E Jezibẹl ghi họn emwi ne ọ sunu, ọ keghi ba itiro, ọ na dọlọ eto ẹre yi ẹse, ọ keghi mudia ye ewindo ẹguae ke evba gha ghe adesẹ ore.

³¹ E Jehu ghi wa la onurho dee, okhuo nii keghi datie ẹre wẹẹ, “Wẹ ne Zimri, wẹ ne ọ de izigha ọyẹvbu! Vbu a do ru vbe emwa?”

³² E Jehu keghi tọn aro mu, ọ keghi davan wẹẹ, “Gha ọ rre otu mwẹ vba yi?” Ọghẹrriẹnoguan eva ra eha na niẹn urhu la ewindo ladian do ghe ẹre.

³³ Ẹre Jehu na tama iran wẹẹ, “Wa rrua ẹre fua!” Iran ke rrua ẹre fi otọ, esagiẹn ọnrẹn keghi gbe ku egbekẹn kevbe ẹsin. E Jehu keghi fi avbe ẹsin ẹnrẹn kevbe ikẹkẹ okuo ẹre nana ikun ẹnrẹn gberra.

³⁴ Ọ ke la uwu ẹguae, ọ na ya rri evbare. Iyeke ọnii, ọ keghi kha wẹẹ, “Wa ya mu ikun okhuo nii ne ẹwobi ọmwa ne uwa ya re ẹre ọ rhe yerriọ, uvbi te nọ.”

³⁵ Sokpan, emwa ni ya re ẹre ma ghi miẹn vbo gberra ugboloko uhunmwu ẹnrẹn, ugboloko obọ ẹre kevbe ugboloko owẹ ọre.

³⁶ Iran ghi ya na iyẹn ma e Jehu, ọ keghi kha wẹẹ, “Erriọ e Nọyaẹnmwa khare ighẹ ọ gha sunu vbe ẹghẹ ne ọ na gie ọguọmwadia ẹre ighẹ Elaija wẹẹ, ‘Ekita gha rri ikun e Jezibẹl vbe iwewe Jezrẹl,

³⁷ a gha zanzan ikun ẹnrẹn ku evba zẹ vbe isan ẹmila sẹrriọ wẹ ọmwa rhọkpa ighi rẹn ehe ne ọ khin vbe egbe!’ ”