II Ọba 8 - Edo Bible (E Baibol Ẹdo) Version 1996

Okhuo Ne Ovbi Ẹvbo Siunẹm Werriegbe Rre

¹ Elaisia keghi tama okhuo nii ne ọ rre Siunẹm, ne irẹn huẹn ovbi ẹre kpaegbe vbe ẹrinmwi wẹ e Nọyaẹnmwa ra ru ẹe ne ohanmwẹ fi la ukpo ihinrọn, kevbe wẹ ne ọ kpao ya di ẹvbo ọvbehe ya la ukpo ihinrọn ke ẹe kevbe ẹgbẹe ẹre.

² Okhuo nii keghi ru vbene ọ tama rẹn ọ na kpao gha rrie e Filistia ke ẹe kevbe ẹgbẹe ọre, ya di odọ ya la ukpo ihinrọn.

³ Ukpo ihinrọn ghi gberra nẹ, rẹn keghi dọlegbe gha die Izrẹl, ọ keghi bu ọba gha khian ya nọ rẹn wẹ ne a mu owa irẹn kevbe otọe irẹn dọlegbe ne irẹn.

⁴ Okhuo nii keghi do vba vbe ọba gu e Gehazi ne ọguọmwadia Elaisia guan. Ọba keghi ho ne ọ họn eso vbe uwu iwinna ọyunnuan ne Elaisia winnaẹn.

⁵ E Gehazi ghi wa tama ọba vbene Elaisia huẹn ọmwa kpao vbe orinmwi rre hẹ, okhuo nii keghi wa rre do rinmwian ọba. E Gehazi keghi tama rẹn wẹẹ, “Umogun, nene okhuo nii ọna khin, nene ovbi ẹre ne Elaisia huẹn kpaegbe ọ re ọna vbe khin!”

⁶ Ọba ghi nọ rẹn ọta, okhuo nii keghi kha wẹ, ẹmwata ọ re Gehazi ta ẹe, ọre ọba na tie olotu ọkpa, ọ na wẹ ne a viọ emwi hia ni re ọghe okhuo nii dọlegbe ne ẹẹn, ke ẹe kevbe igho ne a miẹn vbe emwiokọ ne a rhọre vbe ugbo ẹre la ukpo ihinrọn nii, ne ẹ i ya rre owa.

Elaisia Kevbe Benhadad Ne Ọba

⁷ Elaisia kegha rrie Damaskọs vbe ẹghẹ ne egbe ma na rran e Benhadad ne ọba e Siria. A ghi tama ọba ighẹ Elaisia rre evba,

⁸ ọ keghi tama Hazaẹl, ọkpa vbe uwu ọkaolotu ẹre wẹẹ, “Rhie emwi izọhẹ gie akhasẹ, nọ rẹn wẹ ne ọ gualọ otọ ẹre vbe obọ e Nọyaẹnmwa a deghẹ I gha fe ra I i khian fe.”

⁹ Ẹre Hazaẹl na kun emwi nii ghi maa sẹ vbe Damaskọs yan ekẹtẹkẹtẹ, ọ na bu Elaisia gha khian. E Hazaẹl ghi sẹ ehe ne ọ ye, ọ tama rẹn wẹẹ, “Ọguọmwadia ruẹ ighẹ Benhadad ọ re ọ gie mwẹ ne I do nọ ruẹn a deghẹ rẹn gha fe ra rẹn i ra fe vbe emianmwẹ ne irẹn khuọnmwi.”

¹⁰ Elaisia na wanniẹn wẹẹ, “E Nọyaẹnmwa rhie ma mwẹ nẹ wẹ ọ gha wu, sokpan bu ẹre gha khian, ya khama rẹn ighẹ ọ gha fe.”

¹¹ Elaisia keghi ziẹn aro ye ọre egbe vbe ọmwa ne ohan rẹn wa kakabọ mu ọmwa, sẹrriọ ne Hazaẹl ghi na runran. Vbe udomwurri. Elaisia keghi wa gha viẹ.

¹² E Hazaẹl keghi nọ rẹn wẹẹ, “Vbọzẹ ne u na viẹ yi enọwanrẹn?” Elaisia keghi wanniẹn wẹẹ, “Rhunmwuda, I miẹn emwi ne ọ wegbe ne u ra ru ivbi Izrẹl re. U gha rhu erhẹn ye owa ọkhẹ iran, u ghi rẹnkhẹn nii maa sẹẹ vbe igbama iran, u ghi dunmwu ivbi iran an, u ghi vbe wọlọ akpa hin ẹko ikhuohanmwẹ rre.”

¹³ E Hazaẹl keghi wanniẹn wẹẹ, “Vbe I a a ghi ra na miẹn onii ghe ẹtin, mẹ ne ẹ i mwẹ esa ne I ye!” Elaisia keghi wanniẹn wẹẹ, “E Nọyaẹnmwa rhie ma mwẹ nẹ ighẹ u gha rriọba e Siria.”

¹⁴ E Hazaẹl keghi werriegbe bu e Benhadad gha khian, ọ na nọ rẹn wẹẹ, “Vbe Elaisia ghi kha hẹ?” E Hazaẹl keghi wanniẹn wẹẹ, “Ọ tama mwẹ ighẹ u gha wa fe.”

¹⁵ Sokpan, vbe ẹdẹ ne ọ lele ẹe, e Hazaẹl keghi mu ukpọn ne ọ mwẹ imi, ọ keghi fi ẹe ye amẹ, ọ na ya ẹe piẹnpiẹn ọba ihue gbe ẹe rua. E Hazaẹl na ghi rriọba e Siria lele Benhadad.

E Jehoram Ne Ọba E Juda

¹⁶ Ọ ghi rre ukpo isẹn ne Joram ne ovbi Ehab rriọba Izrẹl, e Jehoram ne ovbi e Jehosiafat keghi rriọba e Juda.

¹⁷ Vbe ọ rre ọmọ ukpo evayan ọgban, ọ keghi ya ukpo erẹnrẹn vbe ẹkete vbe Jerusalẹm.

¹⁸ Amwẹ ọnrẹn kegha re ovbi Ehab, zẹ vbene uniẹn Ehab wa ru, rẹn keghi wa vbe lele uviẹn dan ọghe avbe ọba Izrẹl, ọ keghi ru orukhọ ghe e Nọyaẹnmwa.

¹⁹ Sokpan, e Nọyaẹnmwa ma ho ne ọ fuẹn Juda a, rhunmwuda, rẹn yan ma e Devid ne ọguọmwadia ẹre nẹ wẹ, ivbi ẹre gha wa gha rriọba khian.

²⁰ Ẹghẹ ne Jehoram na gha rre ẹkete, Idọm keghi sọtẹ e Juda, iran na gha rre ọdakha egbe iran.

²¹ Ẹre Jehoram na ka viọ ikẹkẹ okuo ẹre hia la odẹ, ọ na gha rrie Zaẹ, ivbi iyokuo Idọm keghi ghae ga iran vbe evba. Asọn ghi rre, ke irẹn kevbe ọkaokuo avbe ikẹkẹ okuo ẹre keghi miẹn ehe na ya uhunmwu ha ẹbu ladian, iran na lẹkua, ivbi iyokuo ẹre keghi tagha, dọmwadẹ ọghọe kegha rrie owa ẹre.

²² Ke ẹghẹ nii gha dee, Idọm ma ghi ga rrie Juda ọvbehe. Ẹghẹ na kha na, ọre ẹvbo Libna na vbe sọtẹ.

²³ Emwi ọvbehe hia ne Joram ghi ru, a gbẹnnẹ ọẹn ye ebe Okha Avbe Ọba Izrẹl.

²⁴ Jehoram keghi wu, a keghi re ẹre ye idin avbe ọba vbe ẹvbo e Devid, ẹre Ahazaia ne ovbi ẹre na, rriọba lele ẹe.

Ahazaia Ne Ọba E Juda

²⁵ Ọ ghi rre ukpo ne ogiwera ne Joram ne ovbi Ehab rriọba Izrẹl, Ahazaia ne ovbi e Jehoram keghi rriọba e Juda,

²⁶ vbe ọ rre ọmọ ukpo evayan ugie. Ọ keghi ya ukpo ọkpa vbe ẹkete vbe Jerusalẹm, a keghi tie iye ẹe Atalia ne ovbi Ehab kevbe eyẹ Ọmri ne ọba Izrẹl.

²⁷ Rhunmwuda ighẹ orruan Ehab ọ re Ahazaia khin, rẹn kevbe ru orukhọ ghe Nọyaẹnmwa zẹ vbene ẹgbẹe Ehab vbe ru.

²⁸ Ahazaia ne ọba keghi deba Joram ne ọba Izrẹl ya gu e Hazaẹl ne ọba e Siria khọn. E Ramọt ọ re avbe ivbi iyokuo na vba egbe vbe Giliad, emwi keghi vba e Joram vbe okuo.

²⁹ Rẹn kegha die Jezrẹl ne ọ do kpe ewẹn ni rrie vbe evba, ẹre Ahazaia na gha khian ya tuẹ ọe vbe evba.