II Ọba 7 - Edo Bible (E Baibol Ẹdo) Version 1996

¹ Elaisia keghi wanniẹn wẹẹ, “Danmwehọ vbene e Nọyaẹnmwa kha hẹ: ‘Vbe odẹ ẹghẹ na akhuẹ, a gha dẹ adanna eha ọghe ọka ne ọ maa sẹ ra adanna ehan ọghe ọka irhuarhua vbe agiẹghẹ esiliva ọkpa.’ ”

² Ovbi ọkpọmwa ọghe ọba keghi wanniẹn tama Elaisia wẹẹ, “Ọnii i sẹtin sunu vberriọ, ọ gha khọnrẹn wẹ ne Nọyaẹnmwa tue ọka amẹ rre wanwanna.” Elaisia keghi wanniẹn wẹẹ, “Aro ruẹ gha sẹ ọe vbe ọ gha sunu sokpan u i ra re vbe evbare ni.”

Ivbi Iyokuo E Siria Kpao

³ Ikpia enẹ ni khuọnmwi emianmwẹ ikpakpa dan kegha rre vbe a ladian ore e Sameria nẹ, iran keghi gu egbe guan wẹẹ, “Vbọzẹ ne ima gha na mudia vbe emwana yi a te do wulo?

⁴ A i zẹdẹ vbe la adesẹ ore ẹvbo rhunmwuda te ohanmwẹ gbele ima an vbe evba. Sokpan ma gha vbe mudia vbe emwa, te ima ra ye vbe wulo. Rhunmwuda ọnii, wa gie ima la agọ ivbi e Siria, ọmarugbe iran gbele ima an, u gha ghe, iran ghi sẹ ima rae.”

⁵ Rhunmwuda ọnii ẹdẹ ghi hẹko gue nẹ, iran na gha rrie agọ ivbi e Siria, sokpan, iran ghi sẹ evba, ọmwa rhọkpa i rrọọ.

⁶ E Nọyaẹnmwa keghi gie ivbi e Siria họn emwi ne ọ yevbe ne ivbi iyokuo ni bun khọn dee ke iran kevbe ikẹkẹ okuo kevbe ẹsin, ivbi e Siria keghi te gha ro ighẹ ivbi Izrẹl ya vbu ivbi e Hiti kevbe avbe ọba Igipt kevbe ivbi iyokuo iran ba egbe gha dee do gu iran gbinna.

⁷ Ẹre ivbi e Siria na lẹ kua vbe asọn nii, iran keghi sẹ owa ukpọn iran rae ke ẹsin kevbe ekẹtẹkẹtẹ, iran keghi wa sẹ agọ nii rae vbene ọ wa ye.

⁸ Ikpia enẹ na ghi sẹ ọkpẹn agọ nii, iran keghi la uwu owa ukpọn ọkpa, iran na re iran na da emwi ne ọ rre evba, iran na fu esiliva igoru, kevbe ukpọn ne iran miẹn vbọ, iran na ya viọ lẹre, iran na dọlegbe gha dee iran na vbe la ọvbehe, iran na vbe ru ẹe vberriọ.

⁹ Iyeke ọnii, iran keghi gu egbe guan wẹẹ, “Ọ ma ke ne ima gha ru emwi vbenian. Ma mwẹ iyẹn oghọghọ, ọ ma kei ne a khui ẹre ye unu. Ma gha kha wẹ ne ima mudia ne ẹdẹgbe nẹ ma ke ya kha, a gha rri ima oya ba ẹre. Wa gia ima wa gha khian ya khama avbe ọkaokuo ọba ọwarọkpa!”

¹⁰ Rhunmwuda ọnii, iran na kpao hin agọ ivbi e Siria rre, iran na gha die Sameria, iran keghi datie avbe abodẹ ni rre onurho wẹẹ: “Ma ye agọ ivbi e Siria, ma ma miẹn ọmwa rhọkpa, a ma vbe họn ẹmwẹ ọmwa rhọkpa. A de avbe ẹsin ke ekẹtẹkẹtẹ ni rrọọ. Te avbe owa ukpọn he wa ye ye vbene ivbi e Siria ya sẹ ọe rae.”

¹¹ Avbe abodẹ keghi ya kha. A keghi vbe ya ta ẹe sẹ ẹguae.

¹² Asọn he ye nọ, sokpan, ọba keghi guakpao vbe ukpo, ọ tama avbe ọkaokuo ẹre wẹẹ, “I gha tama uwa ehe ne ivbi e Siria ghae yi! Iran họn vbene ohanmwẹ fi hẹ vbe edinran, iran na rhunmwuda ọnii kpao vbe agọ rre ya lẹre ye oha. Iran ro wẹ ma gha kpa nian vbe ẹvbo ya gualọ evbare, ẹghẹ nii, iran ghi munọ ima vbe ẹmwẹ ne unu, iran ghi vbe khọn mu ẹvbo mwa.”

¹³ Ọkpa vbe uwu avbe ọkaokuo ẹre keghi kha wẹẹ, “Ọ ghe iran ni rre adesẹ ore ẹvbo na fo nẹ zẹ vbene emwi ghi ye na zẹ vbe ne ọghe emwa ni wulo nẹ ye. Rhunmwuda ọnii, gi ima ye ẹsin isẹn vbe ni ghi dekẹe gie emwa eso, ne a miẹn ehe na rẹn otọ emwi nọ ọ sunu.”

¹⁴ Iran keghi zẹ ikpia eso, ọba keghi ye ikẹkẹ okuo eva gie iran, ọ tama iran ne iran ya gualọ otọ emwi ne ọ sunu vbe egbe ivbi iyokuo e Siria.

¹⁵ Ikpia nii keghi khian sẹ Jọdan, iran keghi miẹn avbe ukpọn kevbe emwi ne a lo ọvbehe hia ne ivbi e Siria hẹkua lele odẹ vbe iran lẹ khian. Ẹre iran na dọlegbe rre do na iyẹn ma ọba.

¹⁶ Emwa e Sameria keghi vẹ ladian, iran na ya fu emwi hẹ vbe agọ e Siria zẹ vbene Nọyaẹnmwa ta ẹe, a kegha khiẹn adanna ọka ne ọ maa ẹsẹse eha ra adanna ọghe ọka irhuarhua agiẹghẹ esiliva ọkpa.

¹⁷ A na miẹn wẹ ọba Izrẹl na wẹ ne ọkaokuo ne ọre ọkpọmwa rẹn gha gbearoghe onurho ẹvbo nii. Emwa nii keghi ya igiawẹ gbe ẹe rua ye evba, ọ na wu zẹ vbene Elaisia ta ẹe ye otọ vbe ọba miẹn ọẹn.

¹⁸ Elaisia ta ẹe ma ọba wẹ vbe ẹghẹ nii vbe ẹdẹ ne ọ lele ẹe, a gha khiẹn adanna eha ọghe ọka ne ọ maa sẹ ra adanna ehan ọghe ọka irhuarhua agiẹghẹ esiliva ọkpa.

¹⁹ Ne ọkaokuo nii na wanniẹn wẹẹ, “Ọnii i gba, ọ gha khọnrẹn ne e Nọyaẹnmwa tobọ ẹre tue ọka rre vbe ọwarọkpa!” Ọre Elaisia na vbe wanniẹn wẹẹ, “Ọ gha sirra ruẹ sunu, sokpan, u i ra danmwẹ vbe evbare nii.”

²⁰ Ọnii ọ re ọ wa sunu vbe egbe ẹre zẹẹ, rẹn keghi wu, emwa na ya igiawẹ rrilo ẹe gbe ua vbe onurho ẹvbo nii.