II Ọba 6 - Edo Bible (E Baibol Ẹdo) Version 1996

Ughanmwa Ne A Gualọ Miẹn

¹ Ọ ghi sẹ ẹdẹ ọkpa, avbe ivbi otu akhasẹ ne Elaisia hẹ khian keghi do tu ma rẹ wẹẹ, “Ehe ne ima ye kanmwa gbe.

² Gie ima gha rrie Jọdan, ne ima ya tọnnọ erhan gbe otọ ne ima ya bọ ehe ne ima gha dia.” Elaisia keghi wanniẹn wẹẹ, “Ọ maa.”

³ Ọkpa vbe uwu iran keghi tama rẹn ne ọ lele iran gha khian, rẹn keghi gele kue yọ.

⁴ Iran na gba gha khian. Iran ghi sẹ Jọdan, iran na suẹn gha winna.

⁵ Ọkpa vbe uwu iran ghi tọn erhan, uhunmwu ughanmwa rẹn keghi kpaẹn fi uwu ẹzẹ, ọ keghi tu bu Elaisia wẹẹ, “Enọwanrẹn, vbe a ra ru ọna hẹ, te I mọmọ ọẹn ighẹ nene ughanmwa.”

⁶ Elaisia keghi nọ wẹẹ, “De ehe ne ọ de fi yi?” Okpia nii keghi ma ẹre ehe ne ọ khin. Elaisia keghi fian erhan, ọ keghi fi ẹe fi amẹ, uhunmwu ughanmwa keghi hu ladian oke.

⁷ Rẹn keghi kha wẹẹ, “Rhie ẹre,” okpia nii na ghughẹrre, ọ na rhie ẹre.

A Khọn Miẹn Ivbi Iyokuo E Siria Otọ

⁸ Ọba e Siria kegha gu Izrẹl khọn, ọ ghi gu avbe ekaokuo ẹre zẹ iro nẹ, ọ keghi mwamwa ehe ne irẹn gha bu agọ yi.

⁹ Sokpan, Elaisia keghi gie ne a khama ọba Izrẹl wẹ ne ọ ghẹ sikẹ evba rhunmwuda ivbi e Siria ghae ye oha vbe evba nii.

¹⁰ Ẹre ọba na gie ne a khama emwa ni rre evba nii, iran ni gha khẹ odẹ. Ẹghẹ ni bun ẹre ọna ya gha sunu.

¹¹ Iro emwi na keghi wa han ọba e Siria, ọ keghi tie avbe ekaokuo ẹre ọ na nọ iran wẹẹ, “De ọmwa ne ọ re ọrhẹ ne ọba Izrẹl vbe uwu uwa yi?”

¹² Ọkpa vbe uwu iran keghi wanniẹn wẹẹ, “Ọmwa ne ọ re ọrhẹ irrọọ Umogun. Elaisia ne akhasẹ ọre ọ talọ emwi hia ma ọba Izrẹl yasẹ egbe iro ne u zẹe vbe ẹkhokho ọghe ughugha ruẹ.”

¹³ Ọba keghi wanniẹn, “Wa gualọ otọ ehe ne ọ ye ne I ya mu ẹẹn.” Iran ghi tama rẹn ighẹ Dotan nọ,

¹⁴ rẹn keghi gie ivbi iyokuo ni bun gha khian ke iran kevbe ikẹkẹ okuo kevbe ẹsin. Iran ghi sẹ ẹvbo nii vbe asọn, iran na ghae ga ẹre.

¹⁵ Vbe owiẹ ikpẹdẹ ne ọ lele ẹe, ọguọmwadia Elaisia keghi kpaegbe, ugbẹn vbe ọ ghi ladian, ọ keghi miẹn ivbi iyokuo e Siria lẹga ẹvbo nii ke iran kevbe avbe ikẹkẹ okuo kevbe ẹsin. Ọ keghi werriegbe bu Elaisia gha khian, ọ tu ma rẹn wẹẹ, “Enọwanrẹn, ma wiri, vbe a ra khian hẹẹ?”

¹⁶ Elaisia keghi wanniẹn wẹẹ, “Ghẹ gie ohan mu ẹẹn emwa ni rre otu ima ọre ọ bun sẹ ni rre otu iran.”

¹⁷ Ẹre irẹn na na erhunmwu wẹẹ, “E Nọyaẹnmwa, rhan ẹre aro ne ọ miẹn ehe na bẹghe!” E Nọyaẹnmwa keghi họn erhunmwu ẹnrẹn, ọguọmwadia Elaisia ghi tọn aro mu, ọ keghi miẹn wẹ avbe ẹsin kevbe ikẹkẹ okuo ọghe erhẹn ọ re ọ wa gba oke nii hia lẹga Elaisia.

¹⁸ Ivbi e Siria ghi suẹn igbinna, Elaisia keghi na erhunmwu wẹẹ, “E Nọyaẹnmwa, gie aro iran na rhu?” E Nọyaẹnmwa keghi họn erhunmwu ẹnrẹn, ọ na rhu iran aro.

¹⁹ Elaisia keghi bu iran gha khian, ọ tama iran wẹẹ, “Te uwa bibi odẹ na, ọna i re ẹvbo ne uwa rrie, wa lele mwẹ ne I viọ uwa gha rrie ọghe ọmwa ne uwa gualọ.” Ọ keghi viọ iran gha rrie Sameria.

²⁰ Iran ghi wa la adesẹ ore ẹvbo nii, Elaisia keghi na erhunmwu wẹẹ, “E Nọyaẹnmwa, rhan iran aro ne iran miẹn ehe na deghẹ.” E Nọyaẹnmwa keghi họn erhunmwu ẹnrẹn, iran keghi bẹghe iran ghi ghe adesẹ ore Sameria ọ re iran ye.

²¹ Ọba Izrẹl ghi miẹn ivbi e Siria na, ọ ke nọ Elaisia wẹẹ, “Enọwanrẹn, ne I gbele iran an ra? Ne I gbele iran an?”

²² Rẹn keghi wanniẹn wẹẹ, “Ẹn o, a gha mu ovbiyokuo oghunmwu nẹ vbe okuo, a i ghi gbe ẹe rua. Ya ne iran re, ya ne iran da, ne u sẹ iran rae ne iran ya na iyẹn ma ọba iran.”

²³ Ẹre ọba Izrẹl na le evbare ku erhan ku irri ne iran, iran ghi re nẹ, iran da nẹ, ọ na wẹ ne iran bu ọba e Siria. Ke ẹghẹ ni kpao, ivbi e Siria ma ghi mu okuo ifuemwi rrie otọe Izrẹl ọvbehe.

Okhọn Ne A Khọn E Sameria

²⁴ Ọ ghi kpee fua kherhe, e Benhadad ne ọba e Siria keghi wa viọ ivbi iyokuo gha die Izrẹl, ọ na gha khọn ore ẹvbo Sameria.

²⁵ Ọ ghi ye vbe nian, rhunmwuda ne iran na ghae ga ẹvbo nii, evbare keghi do vbee sẹ vberriọ vbe ore ẹvbo nii wẹ, igho esiliva iyenẹ ọ re a ghi ya gha dẹ uhunmwu ekẹtẹkẹtẹ.

²⁶ Ọba Izrẹl ghi lele uhunmwu ekẹn khian gberra, okhuo ọkpa keghi datu ma rẹn wẹẹ, “Umogun, bu rre!”

²⁷ Rẹn keghi wanniẹn wẹẹ, “A deghẹ e Nọyaẹnmwa, ma yọ uẹ obọ, de iyobọ ne imẹ gha sẹtin ru ne uẹn. I mwẹ ọka ra ayọn?

²⁸ De emwi ne ọ ruẹ yi?” Okhuo ni keghi wanniẹn wẹẹ, “Ọ ghi sẹ ẹdẹrriọ, okhuo na ne ọ rre emwa na keghi khama mwẹ wẹ ne ima gbe ovbi mwẹ re, ẹdẹ gha gbe ne a vbe gbe ọghe ọe re.

²⁹ Ẹre ima na gele le ovbi mwẹ ne okpia, ma na rri ọe. Ẹdẹ ghi gbe nian, I na wẹ ne a do le ovbi ẹre re, sokpan rẹn keghi ya rhie ẹre lẹre.”

³⁰ Ọba ghi họn ẹmwẹ na, ọ keghi sọ ukpọn rẹn uan rhunmwuda vbene ọ gbe ẹre egbe sẹ, emwa ni sikẹ ọkpẹn ekẹn keghi bẹghe ẹre wẹ ukpọn akhiẹ ẹre ọ yọ kotọ.

³¹ Ọ keghi datu wẹẹ, “Te Osanobua gha kinmwi mwẹ gbe ua a deghẹ I ma fian Elaisia uhunmwu fua ẹdẹ te mu ẹrẹna.”

³² Ọ keghi gie ya mu Elaisia vbe uwu ẹghẹ na, Elaisia kevbe avbe eniwanrẹn eso ni do tuẹ ọe kegha rre owa ẹre. Ọmwa ne ọba gie ẹre uhunmwu ghi te sẹ evba, Elaisia keghi tama iran wẹẹ, “Izigha ni gie ọmwa wẹ ne ọ do gbe mwẹ uan. Ọ gha sẹ emwa na, wa khui urho, wa ghẹ gie ẹe la owa. Ọba tobọ ẹre wa vbe lele ẹe ẹre iyeke dee.”

³³ Uhin ighẹ te ọ he ye guan vbe ọba rre, ọ keghi kha wẹẹ, “E Nọyaẹnmwa ọ re ọ si ọlọghọmwa na ye ima egbe vbọzẹ ne I gha na ye mudia wẹ ne ọ ru emwi rhọkpa?”