II Ọba 5 - Edo Bible (E Baibol Ẹdo) Version 1996

A Sinmwi E Naaman

¹ E Naaman ne ọkaokuo e Siria kegha re ọmwa ne ọba e Siria daa na kevbe ne ọ vbe ye ọghọ na, rhunmwuda, akhọnmiotọ ni bun ọ re Nọyaẹnmwa he la obọ e Naaman rhie ne Siria. Ovbiyokuo nọkhua wa nọ, sokpan ọ kegha khuọnmwi alalọ.

² Ẹghẹ ọkpa vbe iran ya khọn okuo vbe Izrẹl, emwa e Siria keghi mu ọvbokhan okhuo ọkpa ne ovbi Izrẹl oghunmwu, ọ kegha gue amwẹ e Naaman.

³ Ọ ghi sẹ ẹdẹ okpa, ọmọ okhuo nii tama arowa ẹre wẹẹ, “Vbe ọ rrọọ nian wẹ arowa mwẹ gha sẹtin gha rrie ọghe akhasẹ ne ọ rre Sameria! Ọ gha gbe ẹre emianmwẹ na.”

⁴ E Naaman ghi họn ẹmwẹ na, ọ keghi ya tama ọba vbene ọmọ okhuo nii kha hẹẹ.

⁵ Ọba keghi kha wẹẹ, “Miẹn ebe na rhie gie ọba Izrẹl.” E Naaman keghi deyan okhian, ọ na viọ esiliva arriaisẹn ọgban (30,000) ikpẹ igoru arriaisẹn ehan (6,000) kevbe aro ughughan ukpọn nọ mose igbe.

⁶ Emwi ne ọ rre ebe ne ọ rhie gha khian keghi kha wẹẹ, “Ebe na rre ne u miẹn ehe na rẹn ọkaokuo mwẹ ighẹ e Naaman, I ho ne u gbe ẹre emianmwẹ ne ọ khuọnmwi.”

⁷ Ọba Izrẹl ghi tie ebe nii, ọ keghi sọọ ukpọn rẹn uan rhunmwuda ọ ye egbe wọ ọre, ọ kevbe fian ẹre afianma. Ọ keghi kha wẹẹ, “Vbe ọba e Siria na wẹ ne I sinmwi ọmwa na hẹ yi? Te irẹn ro ighẹ Osanobua ne ọ mwẹ ẹtin vbe uhunmwu arrọọ kevbe uwu mẹ khin ra? U ma miẹn ighẹ ẹmwẹ ọ re ọ ho mwẹ re na.”

⁸ Elaisia ne akhasẹ ghi họn emwi ne ọ sunu, ọ keghi gie ne a khama ọba wẹẹ, “Vbọzẹ ne egbe na wọ ruẹ yi? Gie ọmwa nii bu mwẹ gha dee, mẹ gha rhie maa rẹn wẹ akhasẹ rre Izrẹl!”

⁹ Ẹre Naaman kevbe ẹsin ẹnrẹn kevbe ikẹkẹ okuo ẹre na gha khian, iran na ya yakọ vbe onurho owa Elaisia.

¹⁰ Elaisia keghi gie ọguọmwadia ya tama rẹn wẹ ne ọ ya khuẹ igba ihinrọn vbe ẹzẹ e Jọdan, a gha vbe gbe emianmwẹ ne ọ rre ọre egbe fo fẹẹrẹ.

¹¹ Sokpan, e Naaman keghi guọnmwẹ egbe kpao, ọ wẹẹ, “Mẹ te ro wẹ ọ gha ladian, ọ ghi na erhunmwu ghe Osanobua ẹre, ọ ghi ye obọ kan mwẹ ehe ne ọ ye vbe egbe mwẹ, ọ ghi sinmwi mwẹ.

¹² Yevbe sẹ ọnii, avbe Abana kevbe Fapa ne ẹzẹ nii rre e Damaskọs vbe owa, maa sẹ ẹzẹ ke ẹzẹ vbe Izrẹl, mẹ ghẹ ghi ya khuẹ vbe enii ne egbe rran mwẹ.”

¹³ Avbe eguọmwadia ẹre keghi bu ẹre gha khian, iran wẹẹ, “Akpawẹ te akhasẹ wẹ ne u ru emwi ne ọ lọghọ, ẹ i re te u gha ru ẹe, vbe ọ ghi rrọọ nian, wẹ ghi ya khuẹ kẹkan ne egbe rran ruẹn!”

¹⁴ Ẹre Naaman na gha rrie Jọdan, ọ na dinmwi ye uwu ẹre igba ihinrọn vbene Elaisia wẹ ne ọ ru ẹe, egbe keghi wa rran rẹn giẹnrẹn. Efun egbe ẹre keghi deziẹn, emianmwẹ i ghi rrọọ, ọ kegha ye zẹ vbe ne ọghe ọmobọ ye.

¹⁵ Ọ keghi dọlegbe bu Elaisia gha khian ke irẹn kevbe emwa rẹn hia, ọ wẹẹ, “Banbanna nian, mẹ miẹn wẹ Osanobua i rrọ hiehie gberra Osanobua Izrẹl, rhunmwuda ọnii, u ghi miẹn mwẹ emwi ihaoko na.”

¹⁶ Elaisia keghi wanniẹn wẹẹ, “Vbe eni Osanobua ne ọ rrọọ ne imẹ ga, I vẹn ihẹn wẹ mẹ i ra miẹn ruẹn emwi rhọkpa.” E Naaman keghi rhẹrhẹ ọe ne ọ miẹn irẹn ẹre, sokpan, ọ ma miẹn ẹre re.

¹⁷ Ẹre Naaman ghi na kha wẹẹ, “A deghẹ u i miẹn mwẹ emwi ihaoko, gunmwẹ zẹ ekẹn ne ọ gha sẹ ekẹtẹkẹtẹ eva mu gha rrie owa, rhunmwuda, ke ẹghẹ na kpao, mẹ i ghi zọ ese rhọkpa ra ese ne a giẹn uan ghe ẹbọ rhọkpa gberra e Nọyaẹnmwa.

¹⁸ Erriọ ọ re I vbe yayi wẹ e Nọyaẹnmwa gha yabọ mwẹ vbe I gha lele ọba mwẹ gha rrie aro e Rimọn ne ẹbọ e Siria ya gae. Vbe ne a i na gba a awẹawẹ, e Nọyaẹnmwa gha yabọ mwẹ.”

¹⁹ Elaisia keghi kha wẹẹ, “Gha khian vbe ọfumwegbe.” Ọ re Naaman na kpao. Ọ ma he khian rrei hiehie,

²⁰ vbe Gehazi ne ọguọmwadia Elaisia zẹ iro ekhọe ẹre wẹẹ, “Arowa mwẹ wa gie Naaman gha rrie vbene ọ ma na ha emwirhọkpa! Ọ te kei ne ọ viọ emwi ne ovbi e Siria nii hẹ ne ẹẹn. Vbe eni e Nọyaẹnmwa ne ọ rrọọ, I gha rhulẹ lele ẹe ne I ya miẹn ẹre emwi eso.”

²¹ Ọ keghi kpao, ọ na bu e Naaman gha khian. E Naaman ghi ghe ighẹ okpia ọkpa rhulẹ lele irẹn dee, ọ keghi tuorre vbe ikẹkẹ okuo ẹre ne ọ ya khian vba ẹre, ọ keghi nọ ọnrẹn wẹẹ, “Deghẹ okhian maa?”

²² E Gehazi keghi wanniẹn wẹẹ, “Ẹn, sokpan, arowa mwẹ ọ re ọ gie mwẹ ne I do khama ruẹn wẹẹ, ‘Eva vbe uwu ivbi otu akhasẹ ni rre odẹ ekẹn Ifreim rre do tuẹ irẹn, ọ wẹ ne u viọ ikpẹ esiliva arriaisẹn eha kevbe ukpọn nọ mose ughughan eva gie iran.’ ”

²³ E Naaman keghi wanniẹn wẹẹ, “Lahọ viọ ikpẹ esiliva arriaisẹn ehan.” Ọ keghi wa tua unu mu ẹẹn vberriọ ọ keghi gbalọ avbe esiliva nii ye ẹkpo eva, ọ na viọ ukpọn nọ mose ughughan eva ba ẹre viọ ne eguọmwadia ẹre eva ne iran viọ khianmwu ne Gehazi.

²⁴ Iran ghi sẹ eke ne Elaisia ye, e Gehazi keghi viọ ẹkpo eva nii, ọ na viọ la owa, ọ na wẹ ne eguọmwadia e Naaman gha rrie owa.

²⁵ Ọ ghi la uwu owa, Elaisia keghi nọ rẹn wẹẹ, “Vbe u a yo?” Ọ wanniẹn wẹẹ, “Ti! I ma zẹdẹ ye ehe rhọkpa enọwanrẹn.”

²⁶ Sokpan Elaisia tama rẹn wẹẹ, “Orhiọn mwẹ ma gu uwẹ mudia vbe evba ra vbe ẹghẹ ne okpia nii na tuorre vbe ikẹkẹ okuo ẹre ne ọ do khian vba ruẹ? Ọ na i re ẹghẹ ne a ya miẹn emwa igho, ukpọn ofigbọn oliv kevbe ebe ẹre, ogba azara, ohuan kevbe ẹmila kevbe eguọmwadia.

²⁷ Banbanna nian, emianmwẹ e Naaman gha hihiẹ yan ruẹn, ọ ghi gha rre uwẹ kevbe avbe ivbi uniẹn ruẹn egbe ẹdẹdẹmwẹdẹ.” E Gehazi ghi kpao, emianmwẹ nii kegha rre ọre egbe, ikpakpa egbe ẹre ke gha fua zẹ vbe isonorhọ.