II Ọba 4 - Edo Bible (E Baibol Ẹdo) Version 1996

Elaisia Yi Okhuo Ẹgbẹe Ne Ovbiogue Obọ

¹ Okhuo ne ọ dẹgbẹ ne ọ te re amwẹ ọkpa vbe uwu avbe otu ivbi akhasẹ keghi bu Elaisia gha khian, ọ wẹẹ, “Enọwanrẹn, ọdafẹn mwẹ wu nẹ! Wẹ rẹnrẹn wẹ ọmwa ne ọ mu ohan Osanobua rẹn gha hin, sokpan, banbanna nian, ọmwa ne irẹn rri ọre osa do viọ ivbi mwẹ ne ikpia eva ya ru ọviẹn ne ọ ya ha osa ne ọdafẹn mwẹ rri ọre re.”

² Rẹn keghi nọ rẹn wẹẹ, “Vbe u a ho ne I ru nuẹn? Tama mwẹ, de emwi ne u mwẹ vbe owa.” Okhuo nii keghi wanniẹn wẹẹ, “Emwi rhọkpa i rrọọ gberra ovbi ẹluba ofigbọn oliv.”

³ Elaisia keghi tama rẹn wẹẹ, “Bu avbe esiọ ne u ya mọmọ inu ẹluba ohogha ne u ghi miẹn mọmọ hia.

⁴ Iyeke ọnii, wẹ vbe ivbi uẹ la owa ne uwa khui urho, wa ghi balọ ofigbọn oliv ye uwu avbe ẹluba ni hia. Ne ọ ghi vuọn vbọ, u ghi mu ẹẹn ye efẹn ọkpa.”

⁵ Ẹre okhuo nii na viọ ivbi ẹre gha rrie owa ẹre, ọ keghi khui urho, ọ na ruẹn ofigbọn ye avbe uru nii zẹ vbene ivbi ẹre vbe ya viọ iran gie ẹe.

⁶ Iran ghi ruẹn avbe uru nii hia vuọn nẹ, ọ keghi nọ iran a deghẹ ọ ye de kẹrre. Ọkpa vbe ivbi ẹre keghi tama rẹn wẹẹ, “Ne okiekie ne ọ rrọọ ọre onii khin.” Ofigbọn ni keghi wa dobọ ulẹmwẹ yi.

⁷ Okhuo ni keghi werriegbe bu Elaisia, akhasẹ na khama rẹn wẹẹ, “Ya khiẹn avbe ofigbọn oliv nii ne u ya ha osa, igho ne ọ kẹrre gha sẹ uwẹ vbe ivbi uẹ gha re.”

Elaisia Kevbe Okhuo Ne Ọ Fe Ne Ọ Rre Siunẹm

⁸ Ọ ghi sẹ ẹdẹ ọkpa, Elaisia kegha rrie Siunẹm, ehe ne okhuo ne ọ fee ọkpa ye. Okhuo nii keghi tie ẹre sẹ owa ne ọ do rri evbare, ke ẹghẹ nii kpao, eghẹ ne ọ rhirhi ya yo e Siunẹm owa ẹre ọre ọ na rri evbare.

⁹ Okhuo nii keghi tama ọdọ ẹre wẹẹ, “Mẹ yayi wẹ okpia na ne ọ rri emwa vbe ẹghẹ hia na; ọmwa ne ọ huanrẹn ẹre nọ.

¹⁰ Gie ima bọ ughugha kherhe ye odukhunmwu ne a mu ukpo ne a ya vbiẹ, eteburu kevbe aga ye evba, ne a vbe mu ukpa yọ ne ọ gha di evba ya ẹghẹ ne ọ rhirhi do ya tuẹ ima.”

¹¹ Ọ ghi sẹ ẹdẹ ọkpa, Elaisia kegha rrie Siunẹm, ọ na la uwu ughugha ẹre ne ọ ya hẹwẹ.

¹² Ọ keghi tie Gehazi ne ọguọmwadia ẹre wẹ ne ọ ti okhuo nii rre. Okhuo nii ghi rre,

¹³ Elaisia na tama Gehazi wẹẹ, “Nọ okhuo na emwi ne I gha ru ne ẹẹn ye ẹse ne ọ ru ne ọ na koko ima na. U gha ghe, ọ gha wẹ ne I ya ta ẹmwẹ ọnrẹn ne ọ maa ma ọba ra ọkaokuo,” Okhuo nii keghi wanniẹn wẹẹ, “Emwi ne I ho hia gue mwẹ vbe uwu ẹbu etẹn mwẹ na.”

¹⁴ Elaisia keghi nọ e Gehazi wẹẹ, “De emwi ne I ghẹ ghi ru ne ẹẹn khekherriọ.” Rẹn keghi wanniẹn wẹẹ, “Okhuo na i mwẹ ọmọ okpia, ọdafẹn ọnrẹn, ọmaẹn vbe nọ.”

¹⁵ Elaisia keghi tama Gehazi wẹẹ, “Tie ẹre rre.” Okhuo nii keghi do mudia ye onurho.

¹⁶ Elaisia na tama okhuo nii wẹẹ, “Vbe ẹghẹ na ukpo ne ọ dee, u gha mu ọmọ okpia mwẹ obọ.” Okhuo nii keghi datu wẹẹ, “A a, ghẹ ta ohoghe ma mwẹ, ọmwa Osanobua ọre u khin!”

¹⁷ Sokpan zẹ vbene Elaisia khare, ọ ghi rre ẹghẹ nii vbe ukpo ne ọ lele ẹe, ọ keghi biẹ ọmọ okpia.

¹⁸ Ukpo eso ghi gberra nẹ, ọ ghi sẹ ẹghẹ emwiorhọ, ọvbokhan nii ke bu erha ẹe gha rrie ugbo vbe owiẹwiẹmwọkpa ne ọ ya vba erha ẹe ne ọ viọ ẹvbo gha rrie ugbo ya gu ẹe rhọ emwiokọ.

¹⁹ Vbe udomwurri, ọ keghi wa tu bu erha ẹe gha dee wẹẹ, “Uhunmwu kpe mwẹ! Uhunmwu kpe mwẹ.” Erha ẹe keghi tama ọguọmwadia ọkpa wẹẹ, “Mu ọvbokhan na bu iye ẹe.”

²⁰ Ẹre ọguọmwadia nii na mu ẹẹn bu iye ẹe, iye ẹe keghi mu ẹẹn ye ekuawẹ ọre, ọ ghi sẹ ẹghẹ ogiavan, ọmọ nii keghi wu.

²¹ Okhuo nii keghi mu ẹẹn gha rrie ughugha Elaisia, ọ keghi mu ẹẹn lovbiẹ ye ukpo, ọ na sẹ ọe rae ye evba, ọna khui urho.

²² Ọ keghi tie ọdafọn ọnrẹn, ọ tama rẹn wẹẹ, “Gie ọvbokhan ọkpa ne ọ mu ekẹtẹkẹtẹ bu mwẹ gha dee. I khian bu Elaisia ne akhasẹ, I gha dọlegbe rre banbanna.”

²³ Ọdafẹn ọnrẹn keghi nọ rẹn wẹẹ, “Vbọzẹ ne u na ho ne u gha khian ẹrẹna yi, ẹ i re ẹdẹ ikẹtin ra Emwiukpo Uki Ọgbọn.” Okhuo nii keghi kha wẹẹ, “Ọnii wa maa.”

²⁴ Ọ na wẹ ne iran gbalọ ekẹtẹkẹtẹ egbe, ọ na khama ọguọmwadia ọkpa wẹẹ, “Wa ye ekẹtẹkẹtẹ rhulẹ vbene ọ gha sẹtin rhulẹ sẹ sokpan a ma wẹ te I wẹ ne u hẹko gha khian.”

²⁵ Okhuo nii na ladian, ọ na zodẹ Oke Kamẹl, ehe ne Elaisia ye. Urria ọ re ọ he ye vbe Elaisia bẹghe ẹre ighẹ ọ dee, ọ keghi tama Gehazi ne ọguọmwadia ẹre wẹẹ, “Ya ghe vbe okhuo ne ọ rre Siunẹm nii dee.

²⁶ Rhulẹ ya vba ẹre ne u nọ rẹn deghẹ ọ ye ẹe ẹse, ke ọdọ ẹre kevbe ovbi ẹre.” Okhuo nii keghi tama Gehazi wẹ emwi hia wa maa,

²⁷ sokpan ọ ghi sẹ ehe ne Elaisia ye, ọ keghi vbokho egbe rriotọ ne ẹẹn, ọ na da ẹre owẹ yi. E Gehazi tera sua okhuo nii fua, sokpan, Elaisia keghi tama rẹn wẹẹ, “Sẹ ọe rae. Wẹ ma miẹn wẹ uwu obalọ ekhọe nọkhua ọre ọ ye na? E Nọyaẹnmwa ma vbe zẹdẹ ya ẹmwẹ ha mwẹ ehọ vbe ekpa ẹre hiehiere.”

²⁸ Okhuo nii keghi tama rẹn wẹẹ, “Enọwanrẹn, mẹ nọ ruẹn ọmọ ra? I ma tama ruẹn ne u ghẹ ya mwẹ aro ye odẹ?”

²⁹ Elaisia keghi mu aro da Gehazi ọ wẹẹ, “Ẹgiẹgiẹ! Rhie ọkpọ mwẹ ne u gha khian. Ghẹ mudia tuẹ ọmwa ne u vba vbe odẹ, a deghẹ emwa vbe tuọ, ghẹ mudia miẹn ẹre otuẹ. Wa la uwu owa nii gha khian ne u ya da ọkpọ mwẹ yi yan ọmọ okpia nii.”

³⁰ Okhuo nii keghi tama Elaisia wẹẹ, “I ye ekhọe ne I ya yin uyinmwẹ ẹmwata ghe e Nọyaẹnmwa ne ọ rrọọ kevbe uwẹ vẹn ihẹn wẹ I i ra sẹ uẹ rae.” Ọre iran eveva ghi na deyan okhian dọlegbe gha dee.

³¹ Gehazi keghi ke odaro, ọ keghi ya da ọkpọ nii yi yan ọmọ nii, sokpan a ma họn urhu rhọkpa ra ama ne ọ rhie ma wẹ ọ ye rre agbọn vbe evba. Rhunmwuda ọnii, ọvbokhan nii keghi werriegbe bu Elaisia gha dee, ọ tama rẹn wẹẹ, “Ọmọ ni ma rhiọrre.”

³² Ugbẹn vbe Elaisia ghi rre, rẹn ọkpa kegha rrie ughugha. Ọ na miẹn vbe ọmọ nii lovbiẹ ye ukpo, ọ wu nẹ.

³³ Ọ keghi khui urho, ọ na na erhunmwu ghe Nọyaẹnmwa.

³⁴ Ọ keghi lovbiẹ yan ọmọ okpia nii, ọ na mu unu ye ọre unu, aro ye ẹre aro, obọ ye ọre obọ. Rẹn keghi lovbiẹ niẹn egbe ua lele ọmọ nii, egbe ọmọ nii ke do gha mwẹ ọghae.

³⁵ Elaisia keghi kpaegbe, ọ na khian lẹga ughugha nii, ọ na vbe werriegbe ya niẹn egbe ua yan ọmọ nii. Ọmọ nii ke tinhin igba ihinrọn, ọ na rhan aro ua.

³⁶ Elaisia na tie Gehazi, ọ na wẹ ne ọ tie iye ọmọ okpia nii rre. Okhuo nii ghi la owa, ọ keghi tama rẹn wẹẹ, “Ghe ovbi uẹ.”

³⁷ Ọ keghi diguẹ mu aro rhu otọ vbe owẹ ọre, ọ keghi rhie ovbi ẹre, ọ na kpao.

Iwinna Ọyunnuan Eva Ọvbehe

³⁸ Ọ ghi sẹ ẹghẹ ọkpa vbe ukhunmwu wa gha fi vbe otọe nii hia, Elaisia keghi werriegbe gha die Gilgal. Ọ ghi ma ovbiotu akhasẹ ọkpa emwi, ọ keghi tama ọguọmwadia ẹre ne ọ mu ukodo ye erhẹn ya le uwọnmwẹ ne iran.

³⁹ Ọkpa vbe uwu iran keghi la uwu oha ya rhọ ebe uwọnmwẹ rre. Ọ keghi miẹn irri ne ọ mọẹn eso, ọ na rhọ vbe ọmọ rẹn zẹ vbene ẹtin ẹnrẹn sẹe ya mu. Ọ keghi viọ gha khian, ọ na ya gia ẹre ye uwu uwọnmwẹ nii, ọ ma rẹn emwi ne ọ khin.

⁴⁰ A ke sa uwọnmwẹ nii ne emwa ni re, sokpan, ọwarọkpa vbe iran wa danmwẹ ọẹn, iran datu khama Elaisia wẹẹ, “Eruan nọ.” Iran ma rri ọe.

⁴¹ Elaisia na wẹ ne a rhie evbare eso ne irẹn, ọ keghi rhie ẹre fi uwu ukodo nii, ọ na wẹẹ, “Wa dọlegbe sa uwọnmwẹ ne iran.” Ẹghẹ na nian, ọ na wa gha maa.

⁴² Vbe ẹghẹ ọvbehe, orhiọnkpa keghi viọ ududu ebrẹd ugie ne a ye ọka ne a ka gha rhọ vbe ugbo nii le, ke Bal Sialisia gie Elaisia, deba ọka ne a da fian. Elaisia na wẹ ne ọguọmwadia ẹre viọ ne otu akhasẹ gha re.

⁴³ Sokpan, rẹn keghi wanniẹn wẹẹ, “Wa yayi wẹ ọna gha sẹ arhunmwu iyisẹn re ra?” Elaisia keghi wanniẹn wẹẹ, “Viọ ne iran gha re, rhunmwuda e Nọyaẹnmwa ta ẹe nẹ wẹ iran gha re kẹrre.”

⁴⁴ Ere ọguọmwadia nii na mu evbare nii ye iran otọ, zẹ vbene e Nọyaẹnmwa gele kha, iran hia keghi re, ọ na ye vbe kẹrre.