II Ọba 3 - Edo Bible (E Baibol Ẹdo) Version 1996

Okuo Ne Izrẹl Kevbe Moab Khọnrẹn

¹ Ọ ghi rre ukpo evairrọvbugie ne Jehosiafat ne ọba e Juda rriọba, e Joram ne ovbi Ehab keghi rriọba Izrẹl, ọ na ya ukpo iweva vbe ẹkete vbe Sameria.

² Ọ keghi rukhọ ghe Nọyaẹnmwa, sokpan ọ ma rhia vba erha ẹe ra e Jezibẹl ne iye ẹe. Amazẹ ne erha ẹe mannọẹn ne a na gha ru e Bal, ọ keghi guọghọ ehia kua.

³ Sokpan, ọ keghi si ivbi Izrẹl obọ la orukhọ zẹ vbene Jeroboam ne ovbi e Nebat ru, ọ ma vbe dobọ yi.

⁴ E Mesia ne ọba Moab, ohuan ọ re ọ rri, ukpukpo ọ re ọ ya ye ivbi ohuan arriaisẹn iyisẹn (100,000) kevbe eto ohuan arriaisẹn iyisẹn (100,000) mu ohan gie ọba Izrẹl.

⁵ Sokpan, ugbẹn vbe Ehab ne ọba Izrẹl ghi wu nẹ, e Mesia keghi sọtẹ Izrẹl.

⁶ Vbe ọwarọkpa nii, e Joram ne ọba keghi kpao vbe Sameria, ọ na ya si ivbi iyokuo ẹre si koko.

⁷ Ọ keghi gie ne a khama e Jehosiafat ne ọba e Juda wẹẹ, “Ọba e Moab sọtẹ mwẹ, u gha lele mwẹ yo ya gu ẹe gbinna ra?” E Jehosiafat ne ọba keghi wanniẹn tama rẹn wẹẹ, “I gha yo, I mu egbe ye otọ khẹ ruẹ, mẹ kevbe emwa mwẹ kevbe avbe ẹsin mwẹ.

⁸ De odẹ ne a gha la ya gbinna igbinna na?” E Joram keghi wanniẹn wẹẹ, “Odẹ ne ọ rrei ne ọ rrọọ ma ra la, a ghi ya la ẹgbo Idọm.”

⁹ Ẹre Joram ne ọba, deba ọba ọghe Juda kevbe Idọm na ladian. Iran ghi khian okhian ikpẹdẹ ihinrọn nẹ, amẹ ne a wọn na fo, emwa ne agbọn, kevbe avbe aranmwẹ ni bun ni hẹ ihẹ khian, ne ọ ghi miẹn wọn, ẹ i rrọọ.

¹⁰ E Joram keghi datu wẹẹ, “Ma wiri, e Nọyaẹnmwa wa gbalọ ima ọba eha hẹ ku ọba e Moab obọ!”

¹¹ E Jehosiafat ne ọba keghi nọ wẹẹ, “A gha miẹn akhasẹ ne a gha la obọ ẹre gualọ otọ ẹre vbe obọ e Nọyaẹnmwa vbe emwa na ra?” Ọkaokuo ọkpa vbe ẹghẹ ọghe Joram ne ọba keghi kha wẹẹ, “Elaisia ne ovbi e Siafat rre emwa, ewasẹ Elaija rẹn te gha khin.”

¹² E Jehosiafat ne ọba keghi kha wẹẹ, “Akhasẹ ẹmwata nọ.” Ẹre avbe ọba eha nii na bu Elaisia gha khian.

¹³ Elaisia keghi wanniẹn ọba Izrẹl wẹẹ, “Vbe I a ghi yi uwa obọ hẹ yi? Wa ya nọ avbe akhasẹ ne avbe erha uwa kevbe iye uwa gha nọọn.” E Joram keghi wanniẹn wẹẹ, “Ẹ i re erriọ, e Nọyaẹnmwa ọ re ọ gbalọ ima ne avbe ọba eha na hẹ ku ọba e Moab obọ.”

¹⁴ Elaisia keghi wanniẹn wẹẹ, “Ne I ya e Nọyaẹnmwa ne ọ rrọọ vẹn ihẹn wẹ akpawẹ ẹ i re ọghọ ne I rhie ne Jehosiafat ne ọba e Juda, I i ghẹ zẹ ye uwa ẹre.

¹⁵ Wa tie ọkpakpata gun mwẹ.” Ugbẹn vbe ọkpakpata ghi kpe akpata ẹre, ẹtin e Nọyaẹnmwa keghi rhuẹ yan Elaisia,

¹⁶ ọ keghi kha wẹẹ, “Enian e Nọyaẹnmwa kha re: ‘Wa ya fian uvun lele otọ ẹzẹ ni kae nii.

¹⁷ A gha rhe miẹn wẹ amẹ i ra rhọ ra ne ẹhoho hoho, amẹ gha vuọn otọ ẹzẹ na, wa, ẹmila kevbe avbe aranmwẹ ihẹ uwa hia gha miẹn amẹ wọn ẹsẹse.’ ”

¹⁸ Elaisia keghi rhie te ẹe wẹẹ, “Sokpan ena i zẹdẹ lọghọ e Nọyaẹnmwa urumwẹ, ọ gha vbe gie uwa khọn e Moab miotọ ba ẹre.

¹⁹ Wa khọn ẹvbo iran ni bun ne mose mose ne a gbe ekẹn gaa, wa gha tọnnọ erhan iran ni mọ ọmọ kua, wa ghi khiọ unu ẹzẹ iran, wa ghi rhia otọ iran ni te ma emwiokọ rua vbene uwa gha na viọ okuta vuọn ehia.”

²⁰ Vbe owiẹ ne ọ lele ẹe, ọ ghi sẹ ẹghẹ ne a ya zọ ese owiẹ, amẹ keghi ke odẹ Idọm gha dee, ọ keghi gba otọe nii hia.

²¹ Ugbẹn vbe emwa e Moab ghi họn ighẹ avbe ọba eha nii dee do gu iran gbinna, ikpia hia ne obọ ẹre ghi guẹ emwi igbinna nẹ, ke egbe ne ọ khian ọmaẹn sẹẹ, yasẹ egbe ne ọ ghi ru ọvbokhan sẹẹ, a keghi wa tie iran ladian ya mudia ye ehe ne otọ iran lae.

²² Iran ghi kpaegbe vbe owiẹ ne ọ lele ẹe, ovẹn kegha yunmwu yan amẹ nii, ọ na ya ẹe gha baa zẹ vbe esagiẹn.

²³ Iran hia keghi datu wẹẹ, “Esagiẹn nọ, ọ yevbe ne avbe ọba eha ne eghian ima nii, gu egbe gbinna, iran na gbele egbe ua. Wa gie ima ya fu iran emwi viọ vbe agọ iran.”

²⁴ Sokpan iran ghi sẹ agọ nii, ivbi Izrẹl keghi dekun iran, iran na khulo iran werriegbe. Ivbi Izrẹl kegha khu iran khian, iran na gha gbele ivbi e Moab.

²⁵ Iran na guọghọ ẹvbo iran an. Iran gha la otọ ne ọ maa emwiokọ gberra, ivbi Izrẹl hia ghi gha filo okuta yọ a te do miẹn wẹ okuta vuọn ehia fẹẹrẹ. Iran keghi khiọ uvun ẹzẹ, iran na tọnnọ avbe erhan ni mọ ọmọ kua. Okiekie, a keghi miẹn wẹ igiogbẹ ẹvbo nii ne a tie ẹre Harẹsiẹt ọkpa, ẹre ọ ghi ke ẹe. Ivbi Izrẹl keghi ghae ga ẹre, iran na dekun ẹnrẹn.

²⁶ Ọba e Moab ghi miẹn wẹ ẹmwẹ okuo nii i ra de ẹse, ọ keghi viọ iyisẹn ihinrọn (700) vbe uwu iran ni fi umozo ba egbe, ọ na te wẹ ne irẹn ya uhunmwu zẹ ẹbu eghian gberra bu ọba e Siria gha khian, sokpan ọ ma sẹtin.

²⁷ Ọ keghi rhunmwuda onii mu ovbi ẹre ne ọdiọn ne ọ gha rriọba lele ẹe, ọ keghi gbe ẹe ye uhunmwu ekẹn ne a gbe lẹga ẹvbo nii ya zọ ese ghe ẹbọ e Moab. Ohan keghi mu ivbi Izrẹl, iran na werriegbe, iran lahin ẹvbo nii rre, iran na gha rrie ẹvbo iran.