II Ọba 23 - Edo Bible (E Baibol Ẹdo) Version 1996

E Josaia Viọ Ẹbọ Kua

¹ E Josaia keghi tie avbe ekaolotu e Juda kevbe Jerusalẹm hia.

² Iran hia keghi gha rrie Ọgua Osa, vbe ne avbe ohẹn na lele iran kevbe avbe akhasẹ deba emwa nekpa hia fẹẹrẹ kevbe avbe ọdafẹn kevbe ivbiogue. Ọba keghi tie ẹre ye iran hia ehọ ighẹ ebe ile nii ne a miẹn vbe Ọgua Osa.

³ Rẹn keghi mudia ye ọkpẹn orrẹ ọba, ọ na gu e Nọyaẹnmwa ta ile wẹ rẹn gha họn ẹmwẹ ne ẹẹn, kevbe ne ọ ya orhiọn kevbe ekhọe ẹre hia gha rhie uhi kevbe iyi ẹre mwẹ, kevbe ne ọ vbe gha ru zẹ vbe ne a mwamwa emwi ye otọ vbe uwu ile ne a gbẹnnẹ ye ebe ni. Emwa nii hia keghi yan wẹ iran gha rhie ile ni ya gha yin.

⁴ Ẹre Josaia na khama Ogie Ohẹn ighẹ Hilkaia, kevbe avbe ohẹn ni yi ọre obọ, kevbe avbe iran ni khẹ onurho Ọgua Osa, ne iran viọ emwi hia ne a ya gho e Bal ladian vbe uwu Ọgua Osa, ọghe Asiẹrra ne ẹbọ ne okhuo, kevbe ọghe avbe orhọnmwẹ. Ọba keghi viọ avbe emwi na ladian ore ẹvbo ya giẹn ehia a vbe ọkpẹn Iya Kidrọn, ọ na wẹ ne a kpolo emuẹn ọnrẹn gha rrie Bẹtẹl.

⁵ Avbe emwa ne ọba e Juda te ya ma ohẹn ne iran gha zọ ese vbe aka ọghe avbe ẹbọ iran ni ga ẹbọ vbe adesẹ e Juda, kevbe ọkpẹn e Jerusalẹm, ọ keghi viọ iran hin ukpo rre, avbe ohẹn ni zọ ese ghe Bal, owẹn, uki, orhọnmwẹ nekhua, kevbe negiẹrẹ.

⁶ Ọ keghi mu amazẹ Asiẹrra ne ẹbọ ne okhuo hin Ọgua Osa rre, ọ keghi mu ẹẹn ladian ore ẹvbo gha rrie iya e Kidrọn, ọ keghi giẹn ọnrẹn uan, ọ na dunmwu emuẹn ọnrẹn khian ebubẹ, ọ na bọnmwẹ ọẹn lele itẹ ne a mu emwa hia yi.

⁷ Ọ keghi guọghọe rua ighẹ owa ne avbe ebabotu Ọgua Osa te ye vbe Ọgua Osa. (Evba ọ re avbe ikhuo na te do ukpọn ne a ya gho Asiẹrra.)

⁸ Ọ keghi viọ avbe ohẹn ni te rre avbe okpẹvbo e Juda hia, kevbe otọe ẹvbo nii hia gha die Jerusalẹm, ọ rhia ehe ne iran na te zọ ese rua. Ọ kevbe guọghọ ẹe rua ighẹ Ogiukpo ne iran te ya ru ọghe orhiọn dan avbe ẹwe, ne ọ rre ọkpẹn onurho ne Jọsua ne nọ khaemwisẹ ẹvbo nii bọ ẹe, ọ na keghi te rre obọ iye ọmwa onurho ẹvbo nii vbe a gha wa la ore ẹvbo.

⁹ A ma kue ne avbe ohẹn ni gha winna vbe uwu Ọgua Osa, sokpan iran sẹtin gha re vbe ebrẹd ne ọ ma hue ne a viọ gie avbe ohẹn ne ihua iran.

¹⁰ E Josaia ne ọba kevbe rhia e Tofẹt rua, ehe ne iran na te vbe ga ẹbọ vbe Iya e Hinọm, ne ọmwa ikọmwa ghẹ ghi miẹn ehe na giẹn ovbi ẹre ne okpia ra ovbi ẹre ne okhuo rua ya zọ ese ghe e Molẹk ne ẹbọ.

¹¹ Ọ kevbe viọ ẹre hinrre ighẹ avbe ẹsin ne avbe ọba e Juda ya fi ohan ne a ya gha gho owẹn, ọ na giẹn avbe ikẹkẹ okuo ne a te ya gho iran an. (Uwu ogba ọghe Ọgua Osa ọ re a te viọ iran yi vbe ọkpẹn onurho, vbe ehe ne ọ ma vbe khian rrei vbe owa ne ọ ye ighẹ Natan Mẹlẹk ne ukpo ẹre wa vbe yo ẹsẹse.)

¹² Ogiukpo ne avbe ọba e Juda te ma ye odukhunmwu owa ẹguae vbe ehe ne Ehaz gha a ye, e Josaia ne ọba keghi guọghọe kua, ke ẹe kevbe Ogiukpo eva ne Manasẹ ne ọba mannọ ye ẹghodo eva ne ọ rre Ọgua Osa, ọ keghi wa rẹnkhẹn avbe Ogiukpo ni uan, ọ na kpolo ẹe ku Iya e Kidrọn.

¹³ E Josaia kevbe rhia rua ighẹ avbe Ogiukpo ne Solomọn mannọẹn ye odẹ ahọ e Jerusalẹm, vbe odẹ ekẹn oke oliv, evba iran na te gho avbe ẹbọ ni zughu ọmwa ẹko nii hia, avbe Astat ne ẹbọ ne okhuo e Saidọn, e Kemọs ne ẹbọ e Moab deba Milkọm ẹbọ Amọn.

¹⁴ E Josaia ne ọba keghi rẹnkhẹn orre okuta ne ọ rrọ, ọ na giagia amazẹ Asiẹrra ne ẹbọ ne okhuo, ọ na he ugboloko ọmwa vuọn ehe ne a te mu iran yi.

¹⁵ E Josaia kevbe guọghọ ẹe sẹ otọ ighẹ ehe ne a na te ga vbe Bẹtẹl, ne Jeroboam ne ọba ne ovbi e Nebat bọe, ọmwa ni ne ọ si ivbi Izrẹl obọ fi orukhọ. E Josaia keghi siẹn Ogiukpo ne ọ rrọ sẹ otọ, ọ na rẹnkhẹn okuta ni rrọọ, ọ na dunmwu ẹẹn ya khian ebubẹ, ọ kevbe giẹn ọnrẹn uan ighẹ amazẹ Asiẹrra.

¹⁶ E Josaia ghi ghe lẹga, ọ na ya deghẹ avbe idin ne a ma ẹẹn eso vbe uhunmwu oke, ọ na wẹ ne iran zọlọ ugboloko ni rrọọ ladian, ọ na giẹn iran vbe Ogiukpo, erriọ ọ na ya Ogiukpo khian ne a ya awua murhia, ọ keghi ru emwi ne akhasẹ ka ta ye otọ nẹ vbe ẹghẹ ne ọ gberra vbe ẹghẹ emwiukpo vbe Jeroboam mudia ye ọkpẹn Ogiukpo, e Josais ne ọba ghi ghe lẹga, ọ keghi ya deghẹ idin akhasẹ ne ọ ta ẹmwẹ na ye otọ.

¹⁷ Ọ keghi nọ wẹẹ, “Gha ọ yan idin na yi?” Emwa ni rre Bẹtẹl keghi wanniẹn wẹẹ, “Ọ ghe akhasẹ ne ọ ke Juda rre do ta emwi ne u ru na ye otọ nọ.”

¹⁸ E Josaia keghi wanniẹn wẹẹ, “Wa sẹ ọe rae, wa ghẹ tọnnọ ugboloko ẹre ladian.” Rhunmwuda ọnii, a ma wọlọ ugboloko ẹre ladian, a ma vbe wọlọ ọghe akhasẹ ne ọ ke Sameria rre ladian.

¹⁹ E Josaia ne ọba keghi guọghọ ehe ne a na ga ẹbọ ne avbe ọba Izrẹl bọlọ lele otọe nii hia sẹ otọ, avbe emwi ne iran ya ye ohu mu e Nọyaẹnmwa. Vbene ọ ru vbe Bẹtẹl, erriọ ọ re ọ vbe ru avbe Ogiukpo nii hia fẹẹrẹ.

²⁰ Ọ keghi gbele avbe ohẹn ẹbọ yan Ogiukpo ne iran na gho ẹbọ, ọ na giẹn ugboloko vbe dọmwadẹ Ogiukpo, ọ keghi werriegbe gha die Jerusalẹm.

E Josaia Ru Emwiukpo Alagberra

²¹ E Josaia ne ọba keghi wẹ ne emwa ru emwiukpo alagberra ya ye ọghọ ne e Nọyaẹnmwa ne Osanobua iran, zẹ vbene a gbẹnnẹ ye ebe ile.

²² A ma he miẹn ọkpa vbe uwu avbe ọba e Juda ra Izrẹl ne ọ he ru emwiukpo Alagberra ne ọ ye vberriọ, ke ẹghẹ ne iran ni bu ohiẹn ya gha kha yan otọe nii gha dee.

²³ A keghi miẹn wẹ, vbe okiekie vbe ọ ghi rre ukpo evairrọvbugie ne Josaia rriọba, a keghi ru emwiukpo Alagberra vbe Jerusalẹm.

Afiwerriẹ Ọvbehe Eso Ne Josaia Ru

²⁴ Ne a miẹn ehe na mu uhi e Nọyaẹnmwa ni rre ebe ne Hilkaia ne Ogie Ohẹn miẹn vbe Ọgua Osa sẹ, e Josaia keghi viọ iran hin e Jerusalẹm kevbe otọe e Juda rre ighẹ avbe iran ni miẹn ẹrinmwi, iran ni bọ, kevbe ẹbọ edọmwadẹ owa, amazẹ kevbe emwi ne iran ni ga ẹbọ ghi gho hia.

²⁵ A ma he ka miẹn ọba ne ọ ye vbe ọre, ọmwa ne ọ wa ye ekhọe ẹre hia, ẹko ẹre hia keghi ẹtin ẹnrẹn hia gha lele uhi e Nọyaẹnmwa, ne ọ viọ ne Mosis. A ma ghi vbe miẹn ọvbehe ke ẹghẹ nii gha dee.

²⁶ Sokpan emwi ne Manasẹ ne ọba ru ya ohu e Juda mu e Nọyaẹnmwa ẹsẹse, uhin do sẹ banbanna, ọ ma he ye rriotọ.

²⁷ E Nọyaẹnmwa keghi kha wẹẹ, “I gha ru e Juda emwi ne I vbe ru Izrẹl re: I gha viọ ivbi e Juda hin odaro mwẹ rre I gha he Jerusalẹm ne ẹvbo ne I hannọ zẹ, ke Ọgua Osa, ehe ne Imẹ khare ighẹ a gha na gha ga mwẹ.”

Ufomwẹ Arriọba E Josaia

²⁸ Emwi ọvbehe hia ne Josaia ne ọba ghi ru, a gbẹnnẹ ọẹn ye Ebe Okha Avbe Ọba e Juda.

²⁹ Ẹghẹ ne Josaia na gha re ọba, e Nẹko ne ọba Igipt keghi viọ ivbi iyokuo gha rrie Yufretes ne ọ ya ru iyobọ ne ọba nọkhua ọghe Asiria. E Josaia ne ọba keghi hia ne ọ degbe ivbi iyokuo Igipt odẹ vbe Mẹgido. Iran keghi gbe ẹe rua vbe okuo.

³⁰ Emwa rẹn ni rre ukpo keghi ya ikẹkẹ okuo mu ikun ẹnrẹn werriegbe gha rrie Jerusalẹm, iran na ya re ẹre ye idin avbe ọba vbe evba. Ivbi e Juda keghi zẹ Joahaz ne ovbi e Josaia ne okpia, iran na ma ẹre ọba.

E Joahaz Ne Ọba E Juda

³¹ Ukpo eha yan ugie ọ re Joahaz gha ye vbe ọ rriọba e Juda, ọ keghi ya uki eha vbe ẹkete vbe Jerusalẹm. Iye ẹe kegha re Hamutal ne ovbi e Jerimaia ne ovbi ẹvbo ne a tie ẹre Libna.

³² Ọ kevbe sẹ ẹmwẹ e Nọyaẹnmwa zẹ vbene avbe erha ẹe odede vbe ru.

³³ E Nẹko ne ọba Igipt ghi mu ẹre oghunmwu vbe Ribla ne ọ rre otọ Hamat, arriọba ọghe ọe kevbe sẹ ufomwẹ. E Nẹko kevbe miẹn ivbi e Juda esiliva ne ọ sẹ uwan arriaisẹn ihinrọn kevbe iyisẹn isẹn (7,500) kevbe igoru ne ọ sẹ uwan isẹnirrọvbe iyenẹ (75) zẹ vbe igho uhunmwu.

³⁴ E Nẹko ne ọba ma Eliaikim ne ovbi e Josaia ọba e Juda, ne ọ rriọba lele Josaia, ọ na fi ẹre eni werriẹ gha tie ẹre Jehoiakim. E Nẹko ne ọba keghi mu Joahaz gha rrie Igipt, evba ọre ọ ghi na wu.

E Jehoiakim Ne Ọba E Juda

³⁵ E Jehoiakim keghi koko igho uhunmwu vbe obọ emwa nii, zẹ vbene edọmwadẹ ọghe ọe vbe fe sẹ, ne ọ miẹn ehe na ha igho ni ne ọba Igipt wẹ ne ọ mu rre.

³⁶ Ukpo isẹnyan ugie ọre Jehoiakim gha ye vbe ọ rriọba e Juda. Ọ keghi gbe ukpo owọrọ vbe ẹkete vbe Jerusalẹm. A kegha tie iye ẹe Zebida ne ovbi e Pedaia ne okhuo, ne ọ ke ẹvbo ne a tie ẹre Ruma rre.

³⁷ E Jehoiakim keghi lele ukpowẹ erha ẹe odede, ọ na sẹ ẹmwẹ e Nọyaẹnmwa.