II Ọba 22 - Edo Bible (E Baibol Ẹdo) Version 1996

E Josaia Ne Ọba E Juda

¹ Ukpo erẹnrẹn e Josaia ye vbe ọ rriọba e Juda, ọ keghi ya ukpo ọkpayan ọgban vbe ẹkete vbe Jerusalẹm. A keghi tie iye ẹe e Jedida ne ovbi Adaia ne okhuo, ovbi ẹvbo ne a tie ẹre Bozkat.

² E Josaia keghi ru emwi ne ọ yẹ e Nọyaẹnmwa, ọ keghi lele igiemwi e Devid ne erha ẹe odede, ọ na wa gha lele uhi Osanobua hia ẹsẹsẹmwẹse.

A Miẹn Ebe Uhi

³ Ọ ghi rre ukpo evairrọvbugie ne ọ rriọba, e Josaia keghi gie ne a tie ọgbenbe ẹguae ighẹ Siafan ne ovbi Azalaia kevbe eyẹ Mẹsiulam, gha die Ọgua Osa, ọ tama rẹn wẹẹ,

⁴ “Bu e Hilkaia ne Ogie Ohẹn gha khian ne u nọ rẹn ẹmwẹ igho ne ohẹn ne iwinna sẹ ọre egbe vbe onurho Ọgua Osa ne a mudia yi, he koko vbe obọ emwa nii.

⁵ Wẹ ne ọ viọ igho nii ne iran ni dọlọ Ọgua Osa yi. We ne iran ha osa ne avbe

⁶ owinna, iran ni bọ owa kevbe iran ni sin owa, ne a vbe ya dẹ erhan kevbe okuta ne a ya dọlọ owa nii yi.

⁷ Iran ni winna iwinna na kegha re emwa ni mwẹ ekhọe esi rhunmwuda ọnii, a i vbe zẹdẹ tie iran ne iran do kha vbene iran lo igho hẹ.”

⁸ E Siafan keghi ya tama e Hilkaia vbene ọba gie, ẹre Hilkaia na tama rẹn ighẹ rẹn miẹn ebe uhi vbe uwu Ọgua Osa. E Hilkaia keghi rhie ebe ni ne ẹẹn, ọre Siafan na tie ẹre.

⁹ Rẹn keghi werriegbe bu ọba gha khian, ọ tama rẹn wẹẹ, “Eguọmwadia viọ igho ni rre uwu Ọgua Osa nẹ, iran viọ ne iran ni dọlọ ẹe yi.” Ọ kevbe rhie te ẹe wẹẹ,

¹⁰ “Ghe ebe ọkpa ne Hilkaia mu gun mwẹ.” Ọ keghi tie ẹre ladian ne ọba họn.

¹¹ Ọba ghi họn ebe ne a tie re na, egbe keghi wọ ẹre, ọ na sọ ukpọn rẹn uan.

¹² Ọ keghi tie Hilkaia ne ohẹn, Ahikam ne ovbi e Siafan, Akbọ ne ovbi e Mikaia kevbe Siafan ne akọwe ẹguae, kevbe Asaia ne odibo ọba, ọ tama iran wẹẹ,

¹³ “Wa ya gualọ otọe ẹmwẹ emwi ne a gbẹnnẹ ye ebe na, kevbe emwa e Juda, vbe obọ e Nọyaẹnmwa. Ohu ima mu e Nọyaẹnmwa rhunmwuda, avbe erha mwa odede ma ru vbene ẹmwẹ ni rre ebe na wẹ ne a ru.”

¹⁴ Ẹre Hilkaia, Ahikam, Akbọ, Siafan kevbe Asaia na ya gualọ otọ ẹmwẹ na vbe obọ okhuo ọkpa ne a tie ẹre Hulda, akhasẹ nọ, ọ kegha rre vbe a la Jerusalẹm fo. (Ọdafẹn ọnrẹn ighẹ Sialọm ne ovbi e Tikva kevbe eyẹ Hahas, ọ re ọ gha gbearoghe ehe ne a viọ ukpọn ne a ya mu egbe vbe Ọgua Osa yi.) Iran keghi na iyẹn emwi ne ọ sunu ma rẹn.

¹⁵ Ọ keghi tama iran ne iran werriegbe bu ọba gha khian.

¹⁶ Ne iran tama rẹn wẹ uhunmwu ne Nọyaẹnmwa gie ọ re ọna khin wẹẹ, “I gha rria e Jerusalẹm kevbe emwa hia ni rrọọ ikhi zẹ vbene a gbẹn ye ebe nii ne ọba tiere.

¹⁷ Iran fi iyeke gbe mwẹ, iran keghi ya gha zọ ese ghe avbe ẹbọ ọvbehe, iran keghi rhunmwuda ọnii ya emwi ne iran ru hia gha ya ohu mu mwẹ. Ohu e Jerusalẹm mu mwẹ nẹ, ẹ i ghi dọyọ.

¹⁸ Vbene ọ dekan ọba tobọ ẹre vbọ, ẹmwẹ ne imẹ ne Nọyaẹnmwa ne Osanobua Izrẹl ta ẹe ọ re ọna khin: ‘U họn ẹmwẹ ne a gbẹn ye ebe nii.

¹⁹ U na roiro fi uyinmwẹ werriẹ, u na mu egbe rriotọ vbe odaro mwẹ, u keghi sọ ukpọn ruẹn uan, u na gha viọ vbe u họn vbene I wẹ I gha rri e Jerusalẹm kevbe emwa ni rrọ oya hẹ. I gha ru ọ yan aro ua ye evba, ehe ne eni ẹnrẹn gha na khian ne a ya tie ihẹn. Sokpan, I họn erhunmwu ruẹn nẹ.

²⁰ Oya ne I khian rri e Jerusalẹm re i ra sunu vbe ẹ i re te uwu nẹ. I gha gie uwẹ wu vbe ọfumwegbe.’ ” Emwa ni keghi ya na iyẹn ma e Josaia ne ọba.