II Ọba 20 - Edo Bible (E Baibol Ẹdo) Version 1996

E Hẹzekaia Ne Ọba Khuọnmwi Fe

¹ Ọ ghi sẹ ẹghẹ ne a kha na, e Hẹzekaia kegha khuọnmwi, ọ kẹ ekherhe ne ọ wu. Aizaia ne akhasẹ ne ovbi Amọz keghi ya miẹn ọẹn, ọ tama rẹn wẹẹ, “E Nọyaẹnmwa wẹ ne u dọlọ emwi hia yi rhunmwuda u i ra fe. Mu egbe ne u gha ya wu.”

² E Hẹzekaia keghi mu aro da ekẹn, ọ na erhunmwu wẹẹ,

³ “E Nọyaẹnmwa, yerre, ekhọekekhọe mwẹ ọ re I ya ye ẹkoata gha gaa kevbe wẹ, ẹghẹ hia ọ re I ya gha hia ne I ru emwi ne u rhirhi a wẹ ne I ru.” Ọ keghi suẹn gha viẹ eve orriara.

⁴ Aizaia keghi kpao sẹ ọba rae, sokpan, vbe ọ ghi te sẹ ikun ne adesẹ vbe ẹguae, e Nọyaẹnmwa keghi tama rẹn

⁵ wẹ ne ọ werriegbe bu e Hẹzekaia gha khian ya khama rẹn wẹẹ, “Mẹ ne Nọyaẹnmwa, Osanobua ọghe Devid ne erha a odede họn erhunmwu ruẹn, I vbe miẹn ameve ruẹ. I gha mu uẹn egbe rran, u gha yo Ọgua Osa irakhuẹ.

⁶ I gha rhie ukpo ekesugie ba ẹdẹ agbọn ruẹn. I gha miẹn uwẹ kevbe ẹvbo na fan vbe obọ ọha nọkhua ọghe Asiria rhunmwuda ekpẹn ne egbe mwẹ kevbe rhunmwuda eyan ne I yan ne Devid ne ọguọmwadia mwẹ.”

⁷ Ẹre Aizaia na wẹ ne eguọmwadia ọba ne iran wiẹn ebe ohọ mama ye uruvba ne ọ mu ẹẹn, ne egbe do rran rẹn.

⁸ E Hẹzekaia ne ọba keghi nọ wẹẹ, “De ama ne I gha ya rẹn wẹ e Nọyaẹnmwa gha gele mu mwẹ egbe rran kevbe wẹ I gha ye Ọgua Osa vbe ẹdẹ ne irakhuẹ?”

⁹ Aizaia keghi wanniẹn wẹẹ, “E Nọyaẹnmwa gha rhie ama ne uẹn ne ọ ya rhie ma ruẹn wẹ rẹn gha mu eyan irẹn sẹ. De ne u ho vbọ, ne aghọnghọn ne ọ rre ikpawẹ na ya ibata igbe tan sayọ ra ne ọ ye ibata igbe kanmwa sayọ?”

¹⁰ E Hẹzekaia keghi wanniẹn wẹẹ, “Ẹ i lọghọ ne aghọnghọn ye ibata igbe tan sayọ, wẹ ne ọ ye ibata igbe kanmwa sayọ.”

¹¹ Aizaia keghi na erhunmwu ghe Nọyaẹnmwa, rẹn keghi ruẹe ne aghọnghọn ni ye ibata igbe kanmwa sẹ ayọ vbe ikpawẹ Ehaz ne ọba.

Uhunmwu Ne A Gie Ke Babilọn Rre

¹² Vbe uwu ẹghẹ ne a kha na, e Merodak Baladan ne ovbi e Baladan keghi họn wẹ egbe ma rran e Hẹzekaia, ọ keghi gbẹn ebe, ọ na vbe ha oko gie ẹe.

¹³ E Hẹzekaia keghi miẹn iran yi, ọ na vbe ma iran ẹfe irẹn hia, esiliva ẹre, igoru ẹre oziza kevbe ori ni winhin ne ọ mwẹ, kevbe emwi ne ivbi iyokuo ẹre ya gbinna. Emwi ọkpa i vbe rre aza ẹre ra otọe arriọba ẹre ne ọ ma ma iran ẹre.

¹⁴ Ẹre Aizaia ne akhasẹ na bu e Hẹzekaia ne ọba gha khian, ọ nọ rẹn wẹẹ, “De ehe ne avbe emwa na ke rre, vbe iran tama ruẹn?” E Hẹzekaia keghi wanniẹn “Ehe ne ọ rrei ẹsẹse ọ re iran ke rre, e Babilọn ọ re iran kegha dee.”

¹⁵ “De emwi ne iran miẹn vbe ẹguae?” Iran wa miẹn emwi hia, emwi ọkpa i vbe rre aza ne I ma rhie ma iran.

¹⁶ Aizaia keghi tama ọba wẹẹ, “E Nọyaẹnmwa ne Osanobua khare wẹ,

¹⁷ ẹghẹ dee ne a gha na miẹn ruẹn emwi hia ni rre ẹguae ruẹ, okhuan ne avbe erha a odede he khuan ye otọ do sẹ ẹdẹnẹrẹ na, iran gha viọ ehia gha rrie Babilọn. Emwi ọkpa ivbe ke ẹe.

¹⁸ A gha munọ eso vbe uwu emọ iwu ruẹ kpao, a ghi ya ya iran khian ọghẹrriẹnoguan ne iran ya gha taemwi vbe ẹguae ọba e Babilọn.”

¹⁹ Vbene Hẹzekaia rẹn otọ ẹmwẹ na yi keghi re wẹ ọfumwegbe kevbe ẹkun sẹ otọ gha rrọọ vbe ẹghẹ irẹn, ọ keghi wanniẹn wẹẹ, “Uhunmwu ne Nọyaẹnmwa gie do khama mwẹ wa maa.”

Ufomwẹ Arriọba E Hẹzekaia

²⁰ Avbe emwi ọvbehe hia ne Hẹzekaia ru, iwinna udinmwẹ ọnrẹn, iyẹn vbene ọ bọ owa amẹ hẹ, kevbe ne ọ fian uroramẹ ne ọ miẹn ehe na si amẹ sẹ ore ẹvbo hẹ, a gbẹnnẹ ehia ye Ebe Okha Avbe Ọba Juda.

²¹ E Hẹzekaia keghi wu, ovbi ẹre ighẹ Manasẹ keghi rriọba lele ẹe.