II Ọba 2 - Edo Bible (E Baibol Ẹdo) Version 1996

A Tọn Elaija Mu Gha rrie Ẹrinmwi

¹ Ọ keghi do sẹ ẹghẹ ne Nọyaẹnmwa gha ya ye ẹhoho ẹziza tọn Elaija mu gha rrie ẹrinmwi, Elaija kevbe Elaisia keghi gba ke Gilgal dee.

² A ghi sẹ odẹ, Elaija keghi tama Elaisia wẹẹ, “Mudia vbe emwa na; e Nọyaẹnmwa wẹ ne I gha rrie Bẹtẹl.” Sokpan, Elaisia wanniẹn wẹẹ, “I ya ekhọe ne I ya yin uyinmwẹ ẹmwata ghe Nọyaẹnmwa ne ọ rrọọ kevbe uwẹ vẹn ihẹn wẹ mẹ i ra sẹ uẹ rae.” Ẹre Iran na gha rrie Bẹtẹl.

³ Otu akhasẹ ni rre evba na bu Elaisia gha khian, iran nọ rẹn wẹẹ. “U rẹnrẹn ighẹ e Nọyaẹnmwa gha rhie arowa a hin ehe ne u ye rre ẹrẹna ra?” Elaisia keghi wanniẹn wẹẹ, “I rẹnrẹn, wa ghẹ wogho ẹe.”

⁴ Ẹre Elaija na khama Elaisia wẹẹ, “U ghi mudia vbe emwa na nian; e Nọyaẹnmwa wẹ ne I gha rrie Jẹriko.” Sokpan Elaisia keghi wanniẹn wẹẹ, “I ya ekhọe ne I ya yin uyinmwẹ ẹmwata ghe e Nọyaẹnmwa ne ọ rrọọ kevbe uwẹ vẹn ihẹn wẹ mẹ i ra sẹ uẹ rae.” Ẹre iran na gha rrie Jẹriko.

⁵ Otu akhasẹ ni rre evba keghi bu Elaisia gha khian, iran nọ rẹn wẹẹ, “U rẹnrẹn ighẹ e Nọyaẹnmwa gha rhie arowa a hin ehe ne u ye rre ẹre na?” Elaisia na wanniẹn wẹẹ, “I rẹnrẹn, wa ghẹ wogho ẹe.”

⁶ Ẹre Elaija na tama Elaisia wẹẹ, “Mudia vbe emwa na, e Nọyaẹnmwa wẹ ne I gha rrie Ẹzẹ Jọdan.” Sokpan, Elaisia keghi wanniẹn wẹẹ, “I ya ekhọe ne I ya yin uyinmwẹ ẹmwata ghe e Nọyaẹnmwa ne ọ rrọọ kevbe uwẹ vẹn ihẹn wẹ mẹ i ra sẹ uẹ rae.” Ẹre iran na gha khian.

⁷ Ekigbe siyeha vbe uwu avbe akhasẹ keghi lele iran gha rrie Jọdan. Elaija kevbe Elaisia keghi yakọ vbe ọkpẹn ẹzẹ, avbe akhasẹ ekigbesiyeha nii keghi khian rrei kherhe ya mudia.

⁸ Elaija keghi ban agbada ẹwu ẹre, ọ na vbuẹ ọre, ọ keghi mu ẹẹn gbe amẹ, amẹ nii keghi wa egbe ye ihe eva, rẹn vbe Elaisia keghi fian ẹn rra ghe obọ nọkpa zẹ vbe otọ ne amẹ i ye.

⁹ Elaija kevbe khama Elaisia vbe evba wẹẹ, “Tama mwẹ emwi ne u ho ne I ru nuẹn vbe a te mu mwẹ kpao.” Elaisia keghi wanniẹn wẹẹ, “Gie eso vbe ẹtin ruẹn, ne ọ gha sẹ mwẹ ya mudia ye ukpo ọmwa ne ọ rhie ihe ruẹ, sẹ mwẹ obọ.”

¹⁰ Elaija keghi wanniẹn wẹẹ, “Emwi ne ọ lọghọ urumwẹ ọ re u nọ rẹn. Sokpan, a deghẹ u bẹghe mwẹ vbe ẹghẹ ne a gha ya rhie mwẹ hin ehe ne u ye rre, ọ gha sẹ uẹ obọ, sokpan a deghẹ u ma bẹghe mwẹ ẹ i sẹ uẹ obọ.”

¹¹ Vbene iran khian nii, iran kegha guan khian, vbe udomwurri, ikẹkẹ okuo ne ẹsin erhẹn si khian keghi wa la ẹkpo iran, ẹhoho ẹziza keghi mu Elaija gha rrie ẹrinmwi.

¹² Elaisia bẹghe ẹre, ọ na datu tie Elaija wẹẹ, “Erha mwẹ, erha mwẹ! Ọwogbe ne ọ gbinna ne Izrẹl! U rriei!” Ọ ma ghi dọlegbe miẹn Elaija ọvbehe. Elaisia keghi ye akhiẹ sọ agbada ẹwu ẹre ye ihe eva.

¹³ Ọ keghi mu agbada ẹwu Elaija ne ọ de ke obọ Elaija fi otọ, ọ keghi werriegbe, ọ na ya mudia ye ọkpẹn ẹzẹ Jọdan.

¹⁴ Ọ keghi mu agbada ẹwu Elaija gbe ẹzẹ, rẹn na kha wẹẹ, “E Nọyaẹnmwa ne Osanobua Elaija vboo?” Ọ keghi dọlegbe mu emwi ghe amẹ, ọ na ghae egbe ye eva, rẹn keghi fian ẹn rra ghe obọ nọkpa.

¹⁵ Avbe akhasẹ ekigbesiyeha ni ke Jẹriko rre keghi dẹghe ẹre, iran wẹẹ, “Ẹtin ọghe Elaija rhuẹ yan Elaisia nẹ.” Iran keghi bu ẹre gha khian, iran na vbokho egbe rriotọ ne ẹẹn,

¹⁶ iran tama rẹn wẹẹ, “Ma ekigbesiyeha ẹre ọ rre emwa, ikpia ni wegbe ehia khin. Gie ima gha khian ya gualọ arowa a. Ọ gha ke ẹe, erhẹn e Nọyaẹnmwa mu ẹẹn kpao, ọ na ya mu ẹẹn ye otọ vbe uhunmwu oke eso ra iya eso.” Elaisia keghi wanniẹn wẹẹ, “Ẹn o, wa ghẹ zẹdẹ yo.”

¹⁷ Sokpan, iran keghi tua unu mu ẹẹn wẹ iran gha yo rẹn te do kue yọ ne iran gha khian. Iran ekigbe siyeha nii keghi ye ikpẹdẹ eha gualọ ẹe la oke kevbe ugboghodo, sokpan iran ma miẹn ọẹn.

¹⁸ Ẹre iran na ghi bu Elaisia gha dee vbe ehe ne ọ na diakhẹ iran vbe Jẹriko. Rẹn keghi tama iran wẹẹ, “I ma tama uwa wẹ ne uwa ghẹ yo?”

Iwinna Ọyunnuan Elaisia

¹⁹ Emwa eso keghi ke Jẹriko bu Elaisia gha khian, iran tama rẹn wẹẹ, “Enọwanrẹn, u gha miẹn wẹ ẹvbo na te wa mose, sokpan amẹ ne ọ rrọọ i maa, ọ ya egbe gu ikhuo ru.”

²⁰ Rẹn keghi tama iran wẹẹ, “Wa zẹ umwẹ ye ọkpan mu gun mwẹ.” Iran na mu gie ẹe.

²¹ Rẹn kegha rrie ẹzẹ ẹvbo nii, ọ keghi mu umwẹ nii ku ẹzẹ, ọ keghi kha wẹẹ, “Enian ọ re e Nọyaẹnmwa khare, ‘I ye amẹ na khian ne ọ hianrẹn, ẹ i ghi gbe ọmwa ra ne ọ kpannọ ikhuo ẹko ọvbehe.’ ”

²² Ke ẹghẹ nii gha dee, te amẹ nii ghi maa, zẹ vbene Elaisia khare ighẹ ọ gha ye.

²³ Elaisia keghi kpao vbe Jẹriko rre gha rrie Bẹtẹl. Ọ ghi sẹ ẹvbo ọkpa ibiẹka eso keghi ladian ya ẹe gha gbe ogiẹ. Iran kegha kha wẹẹ, “Agbakpan, ladian mwa!”

²⁴ Elaisia keghi fi egbe werriẹ, ọ ghe iran, ọ keghi ya eni e Nọyaẹnmwa rhovbiẹ iran. Ẹre akpakomiza amwẹ eva na ladian vbe uwu oha, iran na yanghan eva yan iyeva vbe uwu ibiẹka ikpia nii.

²⁵ Elaisia kegha rrie uhunmwu Oke Kamẹl, ọ keghi dọlegbe gha die Sameria.