II Ọba 18 - Edo Bible (E Baibol Ẹdo) Version 1996

E Hẹzekaia Ne Ọba E Juda

¹ Ọ ghi rre ukpo ne ogieha ne Hosia ne ovbi Ela rriọba vbe Izrẹl, e Hẹzekaia ne ovbi Ehaz keghi rri ọba e Juda,

² vbe ọ rre ọmọ ukpo isẹnyan ugie, ọ keghi ya ukpo ọkpa irrọ vbe ọgban vbe ẹkete vbe Jerusalẹm. Iye ẹe kegha re Abija ne ovbi e Zẹkaraia.

³ Ọ keghi ru emwi ne ọ yẹ e Nọyaẹnmwa zẹ vbene e Devid ne erha ẹe odede ru.

⁴ Ọ keghi guọghọ avbe ehe ne iran ni ga ẹbọ na gho ẹbọ iran, ọ keghi guọghọ orre okuta ni rrọọ ọ na vbe dunmwu amazẹ Asiẹrra ne ẹbọ ne okhuo sẹ otọ. Ọ kevbe guọghọe rua ighẹ ẹyẹn ne Mosis ya oze ru, ne iran gha tie ẹre Nehustan. Do sẹ ẹghẹ ne a kha na, te ivbi Izrẹl ye gha giẹn eturari vbe ya ya ọghọ ne ẹẹn.

⁵ E Hẹzekaia mu ẹtin yan e Nọyaẹnmwa ne Osanobua Izrẹl. E Juda ma miẹn ọba ọvbehe ne ọ yevbe ọre, vbe uwu iran ni karo ne ẹẹn nọ, ra ni kiekie.

⁶ Rẹn keghi wa rhie ekhọe ye ẹmwẹ e Nọyaẹnmwa, ọ ma vbe rra uhi ẹre, sokpan, ọ keghi hẹko rhie uhi ẹre hia mwẹ, avbe uhi hia ne Nọyaẹnmwa rhie ne Mosis.

⁷ Ẹre Nọyaẹnmwa na yaba ẹre, emwi hia ne ọ ru kegha dinna odẹ. Ọ keghi sọtẹ ọba nọkhua ọghe Asiria, ọ na wẹ rẹn I ga gie ẹe.

⁸ Obọ ẹre ke ukhunmwu ne ivbi e Filistin, ọ na mu okuo ifuemwi gha rrie ehe ne iran ye kevbe igue ne ọ kpọlọ sẹẹ ya sẹ egbe ne ọ kanmwa sẹẹ. Ke Gaza kevbe otọe ni lẹga ẹre hia.

⁹ Ọ ghi rre ukpo ne ogienẹ ne Hẹzekaia rriọba, ọnii ọ vbe re ukpo ne ogihinrọn ne Hosia rriọba Izrẹl, e Siamanẹsẹ ne ọgbaisi ọghe Asiria keghi mu okuo la Izrẹl ọna dekun e Sameria.

¹⁰ Ọ ghi rre ukpo eha ne ọ dekun ẹnrẹn, ọ keghi mu Sameria, ọna kegha re ukpo ne ogiehan ọghe Hẹzekaia vbe ẹkete, kevbe ukpo ne ogihinrin ọghe Hosia.

¹¹ Ọgbaisi ọghe Asiria keghi viọ ivbi Izrẹl gha rrie Asiria zẹ vbe oghunmwu, ọ keghi ya viọ iran ye ẹvbo ne a tie ẹre Hala, eso kegha rre ọkpẹn ẹzẹ ne a tie ẹre Habọ vbe otọe Gozan, eso kevbe gha rre otọe Medis.

¹² E Sameria keghi de guọghọ rhunmwuda ivbi Izrẹl ma họn ẹmwẹ e Nọyaẹnmwa ne Osanobua iran, sokpan, iran rra ile ne ọ gu iran ta, iran kevbe rra uhi hia ne ọ yi ne Mosis ne ọguọmwadia e Nọyaẹnmwa. Iran ma danmwehọ, iran ma vbe ya ẹe ru emwi.

Ivbi Asiria Mu E Jerusalẹm Rueghe

¹³ Ọ ghi rre ukpo ne ogiwenẹ ne Hẹzekaia ne ọba la ukpo, e Senakẹrib ne Ọgbaisi ọghe Asiria keghi mu okuo la ẹvbo ne a gbe ekẹn gaa ni rre Juda, ọ na khọn ehia muotọ.

¹⁴ E Hẹzekaia keghi gie uhunmwu gie Senakẹrib vbe ọ rre Lakis wẹẹ: “I ru emwi khọ nẹ, lahọ dobọ okuo na yi, I gha ha emwi ne u rhirhi fian mwẹ re.” Vbe ewanniẹn, Ọgbaisi wẹ ne Hẹzekaia viọ uwan esiliva arriaisẹn igbe (10,000) gie irẹn kevbe uwan igoru arriaisẹn ọkpa (1,000).

¹⁵ E Hẹzekaia keghi viọ esiliva ni rre Ọgua Osa hia gie ẹe kevbe ni rre aza ẹguae.

¹⁶ Ọ keghi bannọ igoru ni rre ẹkhu Ọgua Osa kevbe igoru ne irẹn tobọ ẹre te ya rhu ikpawẹ ẹkhu, ọ na viọ ehia gie Senakẹrib.

¹⁷ Ọgbaisi e Siria keghi gie ivbi iyokuo ọrhẹnrhẹn ke Lakis gha dee ne iran do gu a Hẹzekaia gbinna vbe Jerusalẹm, iran keghi ya mu odẹ ne iran ni ru ukpọn na winna mwẹ, evba nii ọ re uvun ne amẹ lẹ la ke uhae ne ọ ke uwu ẹre rre ye.

¹⁸ Iran gie wẹ ne a tie Hẹzekaia ne ọba rre, ọ re eha vbe uwu avbe ekhaẹmwẹ ọnrẹn na bu iran gha khian, iran na kegha re Eliaikim ne ovbi Hilkaia, ne ọka ẹguae, e Siebna, ne ọgbenbe ẹvbo kevbe Joa ne ovbi Asaf nọ sin emwi ẹro.

¹⁹ Ọkpa vbe uwu iran ne ivbi Asiria keghi nọ iran wẹ iran ho ne iran rẹn emwi ne e Hẹzekaia ne ọba mu ẹtin yan ne ohan i na mu ẹẹn.

²⁰ Ọ keghi nọ wẹẹ, “Wa yayi wẹ unu ọ re ẹwaẹn kevbe ẹtin ne a ya khọn okuo ye ra? De ọmwa ne uwẹ yayi wẹ ọ gha yi uẹ obọ ya sọtẹ ghe Asiria yi?

²¹ Te u mu ẹtin yan Igipt ne ọ ru iyobọ ne uẹn, sokpan te ọ yevbe ne ọmwa ya ovbi erhan ru ọkpọ ne ọ ya tua otọ khian, te ọ bun fua, ọ ghi so e nọyan rẹn obọ, erriọ Igipt ye vbe ọmwaikọmwa a mu ẹtin yan rẹn.”

²² Avbe ekaokuo Asiria keghi ye rhie te ẹe wẹẹ, “Ra te u ghi ra tama ima ighẹ e Nọyaẹnmwa ne Osanobua uwa ọ re u mu ẹtin yan? Te Hẹzekaia dunmwu ehe ne a na gho e Nọyaẹnmwa hia a, kevbe aka ẹre hia, ọ na tama ivbi e Juda kevbe Jerusalẹm wẹ e Jerusalẹm ọkpa ọ re iran hia gha na gha ga.

²³ I gha ye eni Ọgbaisi ta ẹe, I gha viọ ẹsin arriaisẹn eva ne uwa a deghẹ uwa gha miẹn ẹvbo ne ọ bun sẹrriọ ne ọ gha hin ẹnrẹn.

²⁴ Wa ma vba ne ọ ghi kanmwa sẹ vbe avbe ekaokuo ivbi Asiria, la evba Sevba, wa na rhie aro yọ wẹ ne Igipt viọ ikẹkẹ okuo kevbe emwa ni hin ẹsin gie uwa.

²⁵ Te uwa ro ighẹ e Nọyaẹnmwa i mwẹ iyobọ vbọ ra vbe I mu okuo la otọ uwa ne I na vbe khọn rẹn? E Nọyaẹnmwa tobọ ẹre ọre ọ tama mwẹ ne I dekun ẹnrẹn kevbe ne I guọghọ ẹe rua.”

²⁶ Ẹre Eliaikim, Siebna kevbe Joa na kha wẹẹ, “Zẹ Aremia ya gha gu ima guan enọwanrẹn ighẹ ma họn, ghẹ ghi zẹ e Hibru, iran hia ni tẹn lele egbekẹn gha danmwehọ.”

²⁷ Rẹn keghi wanniẹn wẹẹ, “Te uwẹ ro ighẹ wẹ vbe ọba ọkpa ọre Ọgbaisi gie uhunmwu gie ra, hiehiere, iran ni tota lele ekẹn na rre usun ne I vbe gu guan, emwa ni gha rri isan iran, iran ghi vbe wọn ahiọ iran vbene uwa gha vbe ru ẹe.”

²⁸ Avbe ọkaokuo nii, ke ghi guakpao, iran na zẹ e Hibru ya kakabọ ta ẹe wẹẹ, “Wa danmwehọ ẹmwẹ ne Ọgbaisi ọghe Asiria wẹ ne a tama uwa.

²⁹ Ọ wẹ ne uwa ghẹ gie Hẹzekaia rẹrẹ uwa. E Hẹzekaia i sẹtin miẹn uwa fan.

³⁰ Wa ghẹ gie ẹe vbe kpikpi uwa wẹ ne uwa mu ẹtin yan e Nọyaẹnmwa. Wa ghẹ gha ro ighẹ e Nọyaẹnmwa gha miẹn uwa fan kevbe wẹ ẹ i ra gie ivbi iyokuo ima ne Asiria khọn ẹvbo uwa muotọ.

³¹ Wa ghẹ danmwehọ e Hẹzekaia, Ọgbaisi ọghe Asiria wẹ ne uwa ladian ke ore ẹvbo uwa gha dee ne uwa viọ egbe uwa ye irẹn obọ, a gha gie uwa rhọ emwiokọ uwa, ne uwa gha re ne uwa gha da, ne uwa vbe gha samẹ wọn vbe uhae uwa,

³² ọ te do sẹ ẹghẹ ne Ọgbaisi gha na viọ uwa ne uwa ya yin ẹvbo ọvbehe ne ọ vbe yevbe ọghe uwa, ehe ne uwa gha na miẹn gha re wa ghi vbe miẹn gha da, otọe emwiokọ esiesi kevbe ọghe owọn ọre otọe nii khin. Deghẹ wa ru vbene ọ khare, wa ira wulo, wa gha miẹn uhunmwu. Wa ghẹ gie Hẹzekaia do uwa ọzuọ ne ọ tama uwa wẹ e Nọyaẹnmwa gha miẹn uwa fan.

³³ A he miẹn ẹbọ ẹvbo ke ẹvbo ne ọ he miẹn ẹvbo ọkpa fan vbe obọ Ọgbaisi ọghe Asiria ra.

³⁴ Iran ghi vbo nian ighẹ avbe ẹbọ e Hamat kevbe Apad? Ẹbọ iran vbo ighẹ Sefavim, Hena kevbe Iva? A miẹn ọmwa ne ọ miẹn e Sameria fan ra?

³⁵ De ẹghẹ ne ẹbọ avbe ehe ne a kha na hia na miẹn iran fan vbe obọ Ọgbaisi ima? Vbe uwa ghi na ro hẹ ighẹ e Nọyaẹnmwa gha miẹn e Jerusalẹm fan?”

³⁶ Emwa nii keghi wa hunwan zẹ vbene Hẹzekaia ne ọba wẹ ne iran ru, iran ma tu asẹn ye otọ.

³⁷ Ẹre Eliaikim, Siebna kevbe Joa na sọ ukpọn iran an vbe akhiẹ, iran na ya na iyẹn ẹmwẹ ne ekaokuo Asiria do ta ma rẹn.