II Ọba 17 - Edo Bible (E Baibol Ẹdo) Version 1996

E Hosia Ne Ọba Izrẹl

¹ Ọ ghi rre ukpo iweva ne Ehaz ne ọba e Juda la ẹkete, e Hosia ne ovbi Ela keghi rriọba Izrẹl. Ọ keghi ya ukpo ihinrin rriọba vbe Sameria,

² Ọ rukhọ ghe e Nọyaẹnmwa, sokpan, ọ ma vba ọghe iran ne ọba ni karo ne irẹn vbe Izrẹl.

³ E Siamanẹsẹ ne ọba Asiria keghi mu okuo gie ẹe. E Hosia keghi de iguẹ ne Siamanẹsẹ, ọ na gha ha igho uhunmwu gie ẹe ukpukpo.

⁴ Sokpan ọ ghi sẹ ukpo ọkpa, e Hosia keghi gie emwa bu e So ne ọba Igipt wẹ ne ọ rrọ irẹn rre, ọ na ghi dobọ igho ne ọ te zẹ gie Asiria ukpukpo yi. E Siamanẹsẹ ghi họn ẹmwẹ na, ọ na ya mu Hosia ọ na khui ẹre ye ẹwẹdọ.

Udemwẹ E Sameria

⁵ Ẹre Siamanẹsẹ na mu okuo gha rrie Izrẹl, ọ na dekun e Sameria, ọ ghi rre ukpo ne ogieha ne igbinna suẹn rẹn,

⁶ ne ọ vbe re ukpo ogihinrin ne Hosia la ẹkete, ọba Asiria keghi khọn e Sameria muotọ, ọ keghi hẹ ivbi Izrẹl oghunmwu gha rrie Asiria, ọ keghi viọ eso gha rrie ẹvbo e Hala ne iran yin evba, eso kegha rre ọkpẹn Ẹzẹ Habọ vbe otọ e Gozan, eso kegha rre ẹvbo e Midia.

⁷ E Sameria keghi de guọghọ ua, rhunmwuda ivbi Izrẹl sẹ ẹmwẹ e Nọyaẹnmwa ne Osanobua iran, ọmwa ne ọ wọlọ iran hin obọ ọba Igipt rre, ọ na viọ iran ladian vbe Igipt. Iran keghi ya gha ga ẹbọ ọvbehe.

⁸ Iran kegha yin uyinmwẹ emotọ ọghe emwa ne Nọyaẹnmwa khulo hin vbe emwa nii dee, iran kevbe ye obọ ye uyinmwẹ ọmotọ ne avbe ọba Izrẹl ya rre.

⁹ Ivbi Izrẹl kegha ru avbe emwi ne Nọyaẹnmwa ne Osanobua iran ma ho. Iran keghi bọlọ aro ẹbọ lele ẹvbo iran hia, kevbe igue ne ọ ghi kanmwa sẹẹ ya sẹẹ ore ẹvbo ne ọ ghi vbe kpọlọ sẹẹ.

¹⁰ Iran keghi viọ amazẹ Asiẹrra kevbe orre ọre ne a ye okuta ru lele uhunmwu oke kevbe ototọ erhan ni mwẹ irhu hia.

¹¹ Iran kegha giẹn eturari vbe uhunmwu avbe aka iran ni ga ẹbọ hia, zẹ vbene avbe emwa ne Nọyaẹnmwa khulo hin otọe nii rre vbe gha ru. Iran keghi ya uyinmwẹ dan ne iran yin hia ya ohu mu e Nọyaẹnmwa,

¹² iran ma vbe họn ẹmwẹ ne Nọyaẹnmwa khare wẹ ne iran ghẹ ga ẹbọ.

¹³ E Nọyaẹnmwa gie avbe odibo ẹre kevbe avbe akhasẹ ne a tama Izrẹl kevbe Juda wẹẹ, “Wa la hin odẹ dan ne uwa la khian rre, ne uwa gha ru vbene I khare zẹ vbene ọ rre uwu uhi ne I rhie ne avbe erha uwa odede, ne I vbe rhie ne avbe akhasẹ ne eguọmwadia mwẹ rhie ye uwa obọ.”

¹⁴ Sokpan, iran ma họn ẹmwẹ ne ọ tama iran, iran na vbe gha yin uyinmwẹ dan ne erha iran vbe yin ne iran ma na ya e Nọyaẹnmwa ne Osanobua iran yi.

¹⁵ Iran na vbe yangbe obọ ne ọ ya sẹ ekhae, iran na ya gha gho ẹbọ ni kẹkẹ ua, iran tobọ iran kevbe khian emwa ni kẹkẹ ua, iran keghi ru emwi uyinmwẹ ọmotọ ọghe ẹvbo ni lẹga iran, vbene iran ma na zẹ ye ẹmwẹ ne Nọyaẹnmwa khare wẹ ne iran ghẹ ye egbe ta iran.

¹⁶ Iran keghi rra uhi e Nọyaẹnmwa ne Osanobua iran hia, iran na ya ematọn ru ẹkhuia ẹmila eva ne iran gha ghoo. Iran kevbe ma amazẹ Asiẹrra ne ẹbọ ne okhuo, iran kegha gho avbe orhọnmwẹ, iran na gha ga avbe ẹbọ e Bal.

¹⁷ Iran keghi ya ivbi iran ne ikpia kevbe ne ikhuo gha zọ ese ne a giẹn uan ne ẹbọ iran ne ni ga ẹbọ, iran keghi ya gha bọ vbe ọghe ọbiro kevbe ọfiakpẹlẹ, iran keghi mu egbe iran yọ wẹ emwi pe ọ ma gba iran khian gha ru vbe odaro e Nọyaẹnmwa, rhunmwuda ọnii, iran keghi ya ẹe mu ohu.

¹⁸ Ohu ivbi Izrẹl keghi mu e Nọyaẹnmwa, ọre ọ na khulo iran hin odaro irẹn rre, ọ na sẹ arriọba e Juda ọkpa rae.

¹⁹ Uhin ighẹ emwa e Juda tobọ iran ma vbe họn ẹmwẹ ne Nọyaẹnmwa ne Osanobua iran. Iran keghi vbe gha ya egbe ta uyinmwẹ ivbi Izrẹl.

²⁰ E Nọyaẹnmwa keghi he ivbi Izrẹl hia ye otọ, ọ na rri iran oya, ọ na vbe hẹ iran ne eghian iran ne ekhọe ẹre wegbe, a te do miẹn wẹ, vbe okiekie, a keghi wa ho iran bẹkun vbe odaro ẹre.

²¹ Ugbẹn vbe Nọyaẹnmwa ghi wannọ ivbi Izrẹl hin e Juda rre nẹ, ivbi Izrẹl keghi ye Jeroboam ne ovbi e Nebat rriọba ọghe iran. E Jeroboam keghi ya iran fi iyeke gbe Nọyaẹnmwa, ọ na si iran obọ la orukhọ ne ọ wegbe.

²² Iran keghi lele Jeroboam, iran na vbe gha ru avbe orukhọ ne irẹn ru hia.

²³ Rhinrin a te do miẹn vbe okiekie wẹ, e Nọyaẹnmwa wẹ ne a ho iran bẹkun vbe odaro irẹn, zẹ vbene ọ la unu avbe akhasẹ ne eguọmwadia ẹre ya obọ sẹ ekhae ne iran wẹ rẹn gha ru ẹe vberriọ. Ẹre a na miẹn wẹ a viọ ivbi Izrẹl gha rrie iwe vbe Asiria, ehe ne iran ye ye do sẹ ẹdẹnẹrẹ na.

Ivbi Asiria Do Yin Izrẹl

²⁴ Ọba Asiria keghi viọ emwa ke Babilọn gha dee kevbe Kut, Iva, Hamat kevbe Sefavim, ọ na do wẹ ne iran yin avbe ẹvbo e Sameria, ne iran do rhie ihe ivbi Izrẹl ne a hẹ gha rrie iwe. Iran keghi munọ avbe otọe na, iran na yin ẹnrẹn.

²⁵ Ẹghẹ ne iran na sẹ evba vbe okaro, iran ma ga e Nọyaẹnmwa, rẹn keghi rhunmwuda ọnii gie oduma gha khian, ọ na gbele eso vbe uwu iran.

²⁶ Iran keghi khama ọgbaisi ọghe Asiria wẹ emwa ne ọ ya viọ ye ẹvbo e Sameria ma rẹn uhi ẹbọ ne emwa nii gho, rhunmwuda ọnii nian, te ẹbọ nii ghi gie oduma ne ọ ya gha gbele iran re.

²⁷ Ẹre ọgbaisi ni na tama iran wẹẹ, “Wa rhie ọkpa vbe uwu avbe ohẹn ne ima mu ẹre oghunmwu, werriegbe gha khian, wẹ ne ọ werriegbe ne ọ ya gha rre odọ, ne ọ miẹn ehe na gha ma emwa nii uhi ẹbọ ne ọ yan otọe nii.”

²⁸ Iran keghi rhunmwuda ọ na rhie ohẹn ne ovbi Izrẹl ọkpa ne a mu ke Sameria gha dee, gha rrie Bẹtẹl, ne ọ ya gha rre evba, ọ na ma emwa nii re vbene a ga e Nọyaẹnmwa hẹ.

²⁹ Sokpan, emwa ni do yin e Sameria keghi ye gha mannọ amazẹ iran, iran kegha viọ ẹre lele avbe aro ẹbọ ne ivbi Izrẹl bọlọ ẹe. Dọmwadẹ otu ughughan kegha mannọ amazẹ vbe dọmwadẹ ẹvbo ne iran ye.

³⁰ Emwa ni rre Babilọn keghi mannọ amazẹ ọghe ẹbọ ne a tie ẹre Sukọt Benot, iran ni rre Kut, kevbe mannọ ọghe Negal, emwa ni rre Hamat, amazẹ ọghe Asima,

³¹ emwa ni rre Iva, amazẹ ọghe Nibaz kevbe Tatak, emwa ni rre Sefavim, keghi ya ivbi iran zọ ese ne ẹbọ iran ighẹ Adramẹlẹk kevbe Anamẹlẹk.

³² Iran na kevbe ga e Nọyaẹnmwa, iran kevbe zẹlẹ umiẹnmwumiẹn vbe uwu iran ne iran gha re ohẹn vbe avbe aro ẹbọ iran ni ga ẹbọ, ne iran gha zọ ese ne iran vbe odọ. Iran ga e Nọyaẹnmwa,

³³ sokpan, iran kevbe gha gho ẹbọ iran zẹ vbene iran ru ẹe vbe dọmwadẹ ẹvbo ne iran ke rre.

³⁴ Iran kegha ye yin uyinmwẹ arre iran do sẹ ẹdẹnẹrẹ na. Iran i ga e Nọyaẹnmwa, iran i vbe ya ẹe ru emwi ighẹ uhi ne Nọyaẹnmwa rhie ne ivbi uniẹn Jekọb ne irẹn he ẹre Izrẹl.

³⁵ E Nọyaẹnmwa gu iran ta ile ọ keghi tama iran wẹẹ, “Wa ghẹ ga ẹbọ ọvbehe, ghẹ ya uhunmwu rhanmwẹ otọ ne iran, amawẹ ne u gho iran ra ne u zọ ese ya ru iran.

³⁶ Wa ghi gha họn ẹmwẹ mẹ, mẹ ne Nọyaẹnmwa ne ọ viọ uwa ke Igipt ladian vbe iwegbe kevbe ẹtin nọkhua, mẹ ọre uwa gha ya uhunmwu kan otọ na, wa ghi vbe zọ ese ya ru mwẹ.

³⁷ Wa ghi gha ye ilele kevbe uhi ne I gbẹnnẹ ne uwa ru emwi vbe ẹghẹ hia. Wa ghẹ ga ẹbọ ọvbehe.

³⁸ Wa ghẹ vbe mianmian ile ne I gu uwa ta.

³⁹ Mẹ ne Nọyaẹnmwa ne Osanobua uwa ọre uwa gha họn ẹmwẹ na, ẹghẹ nii mẹ gha miẹn uwa fan hin obọ avbe eghian uwa hia rre.”

⁴⁰ Sokpan, emwa nii ma danmwehọ, iran kegha lele uyinmwẹ iran nẹdẹ khian.

⁴¹ Ẹre a na miẹn wẹ, emwa nii ga e Nọyaẹnmwa, sokpan iran kevbe gha gho ẹbọ iran bare. Do sẹ ẹdẹnẹrẹ na, te uniẹn ivbi iran ye ru vberriọ.