Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

II Ọba 16 - Edo Bible (E Baibol Ẹdo) Version 1996


Ehaz Ne Oha E Juda
( II Krọnikol 28:1-27 )

1 Ọ ghi rre ukpo eha irrọvbugie ne Pẹka ne ovbi Remalaia rriọba Izrẹl, Ehaz ne ovbi e Jotan keghi rriọba vbe Juda,

2 vbe ọ rre ọmọ ukpo ugie. Ọ keghi ya ukpo enẹirrọvbugie vbe ẹkete vbe Jerusalẹm. Ọ ma lele igiemwi esi ọghe Devid ne ọba ne erha ẹe odede, sokpan ọ keghi sẹ ẹmwẹ e Nọyaẹnmwa ne Osanobua ẹre.

3 Ọ keghi lele igiemwi avbe ọba Izrẹl, uhin ighẹ te ọ mu ovbi ẹre ne okpia ya ru ẹbọ, ọ na gha lele igiemwi osọnnọ ọghe iran ne Nọyaẹnmwa khulo kua vbe otọe nii vbe ẹghẹ ne ivbi Izrẹl na gha dee.

4 Ehaz kegha zọ ese, ọ na vbe gha giẹn eturari vbe ehe ne iran ni ga ẹbọ na ga hia, uhunmwu oke kevbe erhan ne ọ gbe irhu hia.

5 E Rẹzin ne ọba e Siria kevbe Pẹka ne ọba Izrẹl keghi mu okuo gha rrie Jerusalẹm, iran na mu ẹẹn rueghe, sokpan iran ma sẹtin khọn miẹn Ehaz otọ.

6 (Vbe ẹghẹ ọkpa na, ọ re ọha Idọm na dọlegbe mu Ẹlat werriegbe, ọ na khulo ivbi e Juda ni yin evba ladian. Ivbi Idọm keghi yin evba nii. Te iran ye rre evba do sẹ ẹdẹnẹrẹ na.)

7 Ehaz keghi gie emwa bu e Tiglat Pailesa ne ọba Asiria wẹẹ, “Ọguọmwadia ruẹ ne ekhọe esi ọre I khin, gha dee do miẹn mwẹ fan vbe obọ ọba e Siria kevbe Izrẹl ni gun mwẹ gbinna.”

8 Ehaz keghi viọ esiliva kevbe igoru vbe Ọgua Osa kevbe aza ẹguae, ọ na ya ehia haoko gie ọba nọkhua nii.

9 E Tiglat Pailesa keghi khuẹnniẹn ye Ehaz re, ọ na viọ ivbi iyokuo ẹre gha rrie Damaskọs, ọ na khọn ẹnrẹn, ọ na gbe Rẹzin ne ọba a, ọ na viọ emwa nii oghunmwu gha rre Ka.

10 Ehaz ne ọba ghi yo ya miẹn Tiglat Pailesa aro vbe Damaskọs, ọ keghi miẹn Ogiukpo ọkpa vbe evba, ọ keghi wa rhie ama rẹn zẹẹ gie Uraia ne ohẹn, vbe ne ọ na gie egbe ẹre hia fẹẹrẹ ma rẹn.

11 Ẹre Uraia na bọ Ogiukpo ne ọ ye vberriọ zẹẹ, ọ keghi ru ẹe fo zẹ vbene Ehaz te sẹ owa.

12 Ehaz ghi ke Damaskọs sẹ owa, ọ ghi do ghe a bọ Ogiukpo nii fo nẹ.

13 Ọ keghi giẹn aranmwẹ ne a ya zọ ese kevbe avbe ọka ne a ya mu ohan vbọ, ọ kevbe sa ayọn ne a ya mu ohan kevbe esagiẹn emwi ne a ya si isara yan rẹn.

14 Ogiukpo oze ne a ya fi ohan ne Nọyaẹnmwa kegha rre ẹkpo Ogiukpo ọgbọn nii kevbe Ọgua Osa, ọ re Ehaz na silo ẹe sikẹ odẹ okuọ ọghe Ogiukpo ẹre ne ọgbọn.

15 Ọ keghi tama Uraia wẹẹ, “Ogiukpo nọkhua ne ọghomwẹ na ọ re u gha na gha giẹn ese owiẹ kevbe ọta ne ọba, kevbe avbe emwa ni ya zọ ese, kevbe ayọn ne emwa na ya yo imuohan. U ghi hihiẹ esagiẹn aranmwẹ ne a ya zọ ese hia yan rẹn. Sokpan, u ghi sẹ Ogiukpo oze ne ọ rrọ rae mẹ ne I na gha bọ ye emwi.”

16 Uraia keghi ru vbene ọba khare.

17 Uraia keghi wannọ ọẹn ye otọ ighẹ ipapa oze nii ne a ya ru Ọgua Osa, ọ keghi vbe viọ emwi ne a hẹnhẹn ọẹn yan hin rre. Ọ kevbe mu agbii oze hin iyeke avbe ẹmila iweva nii rre. Ọ keghi mu ẹẹn yan ẹyotọ okuta ọgbọn.

18 Ne ọ miẹn ehe na ru emwi ne ọ gha ye ọba Asiria, Ehaz na mu emwi ne a mu ẹkete ọba yan hin Ọgua Osa rre, ọ keghi gbe urho ne ọba ọkpa te la lao Ọgua Osa.

19 Emwi ọvbehe hia ne Ehaz ghi ru, a gbẹnnẹ ọẹn ye Ebe Okha Avbe Ọba e Juda.

20 Ehaz keghi wu, a na re ẹre ye idin avbe ọba vbe Ẹvbo Devid. E Hẹzekaia ne ovbi ẹre keghi rriọba lele ẹe.

@ The Bible Society of Nigeria, 1996

United Bible Societies
ကြှနျုပျတို့နောကျလိုကျပါ:



ကြော်ငြာတွေ