II Ọba 14 - Edo Bible (E Baibol Ẹdo) Version 1996

Amazaia Ne Ọba E Juda

¹ Ọ ghi rre ukpo ne ogieva ne Jehoas ne ovbi Jehoahaz ne ọba Izrẹl ya ẹe vbe ẹkete Izrẹl, Amazaia ne ovbi e Joas keghi rriọba vbe Juda,

² ukpo isẹn yan ugie ọ re ọ gha ye, ọ keghi ya ukpo ọkpa irrọvbọgban vbe ẹkete vbe Jerusalẹm.

³ Ọ ru emwi ne ọ yẹ e Nọyaẹnmwa sokpan ọ ma wa ye vbe e Devid ne ọba ne erha ẹe odede; sokpan ọ keghi ru avbe emwi ne Joas ne erha ẹe vbe gha ru.

⁴ Ọ ma dunmwu ehe ne iran ni ga ẹbọ na gho ẹbọ, emwa keghi ye gha zọ ese, iran na gha giẹn eturari vbe evba.

⁵ Vbe ọwarọkpa vbe ẹkun ghi sẹ Amazaia otọ nẹ, wẹ te ọ ghi mwẹ ẹtin, ọ keghi gbele avbe emwa ni gbe erha ẹe rua ighẹ ọba.

⁶ Sokpan, ọ ma gbele ivbi iran an, ọ keghi lele zẹ vbene Nọyaẹnmwa ta ẹe vbe uhi e Mosis wẹẹ, “A ghẹ gbele evbibiẹ emọ ye orukhọ ne ivbi iran ru, erriọ, a ghẹ vbe gbele emọ ye orukhọ ne evbibiẹ iran ru. Orukhọ ne ọmwa tobọ ẹre ru, ọre a gha gbe ẹe rua baa.”

⁷ Amazaia keghi gbele ivbi iyokuo Idọm arriaisẹn igbe (10,000) vbe Iya Umwẹ ọ te khọn mu ẹvbo ne a tie ẹre Sẹla, ọ na gha tie ẹre Joktil ne a ye tie ẹre re do sẹ ẹdẹnẹrẹ na.

⁸ Ẹre Amazaia na gie emwa hu Jehoas ne ọba Izrẹl wẹ ne ọ gie iran do gbinna.

⁹ Sokpan e Jehoas ke rhie ewanniẹn na gie ẹe wẹẹ, “Ẹrrierrie ne ọ rre Oke Lebanọn keghi gie uhunmwu gie sida wẹẹ, ‘Rhie ovbi uẹ ne okhuo ne ovbi mwẹ rhie rọnmwẹ.’ Aranmwẹ oha ọkpa ghi la evba gberra, ọ na ya owẹ guọghọ ẹrrierrie ye otọ.

¹⁰ U ghe Amazaia, u khọn Idọm miẹn ẹre otọ nẹ, te u ghi gha gha na. Gbe ọghọ otiti ruẹ yegbe, ne u di owa ya, vbe u a ghi na ye obọ si emwi ne ọ gha miẹn uwẹ vbe emwa ruẹn uhunmwu hẹ?”

¹¹ Sokpan, Amazaia ma zẹ yọ. Ẹre Jehoas ne ọba na viọ emwa rẹn ladian, ọ na ya gu ẹe gbinna vbe Bẹt Siemẹs ne Juda.

¹² A keghi khọn iyokuo Amazaia muotọ ivbi iyokuo ẹre hia keghi lẹ gha rrie owa iran.

¹³ E Jehoas keghi mu Amazaia oghunmwu, ọ na gha rrie Jerusalẹm, ọ na guọghọ ekẹn ọlẹga ẹvbo nii kevbe Onurho Ifreim ya sẹ Onurho Igọgọ, ehe ne ọ wa sẹ omwa ibata uri vbe utanmwẹ.

¹⁴ Ọ keghi viọ esiliva kevbe igoru ne obọ ẹre vbare, avbe emwi ne a ya ru emwi vbe Ọgua Osa hia kevbe ẹfe ni rre ẹguae, ọ na hẹ gha rrie Sameria, ọ kevbe viọ oghunmwu eso ba egbe gha khian.

¹⁵ Emwi ọvbehe hia ne Jehoas gha ru, deba udinmwẹ ọnrẹn vbe ọ gu Amazaia ne ọba e Juda khọn okuo, a gbẹnnẹ ọẹn ye Ebe Okha Avbe Ọba Izrẹl.

¹⁶ Ẹ Jehoas keghi wu, a na re ẹre ye idin avbe ọba vbe Sameria, ẹre ovbi ẹre ighẹ Jeroboam Ne Ogieva na rriọba lele ẹe.

Uwu Amazaia Ne Ọba E Juda

¹⁷ Amazaia ne ọba e Juda keghi ye ya ukpo ekesugie vbe ẹkete vbe Jehoas ne ọba Izrẹl wu nẹ.

¹⁸ Emwi ọvbehe hia ne Amazaia ru, a gbẹnnẹ ọẹn ye Ebe Okha Avbe Ọba Juda.

¹⁹ Iran keghi khuan khẹ Amazaia vbe Jerusalẹm wẹ ne iran gbe ẹe rua, rẹn keghi rhunmwuda ọnii lẹ gha rrie Lakis. Sokpan avbe eghian rẹn keghi khu ẹe ya sẹ odọ, iran na gbe ẹe rua.

²⁰ A keghi ya ẹsin mu ikun ẹnrẹn gha die Jerusalẹm, a na re ẹre ye idin avbe ọba vbe Ẹvbo e Devid.

²¹ Ẹre emwa e Juda na ma Uzaia ne ovbi ẹre ne ọ rre ọmọ ukpo enẹ irrọvbugie ọba.

²² Erha ẹe ghi wu nẹ, Uzaia keghi khọn mu Ẹlat, ọ na dọlegbe họ ẹe.

Jeroboam Ne Ogieva Ne Ọba Izrẹl

²³ Ugbẹn vbe ọ ghi rre ukpo ekesugie ne Amazaia ne ovbi e Joas rriọba vbe Juda, e Jeroboam ne ovbi e Jehoas keghi rriọba vbe Izrẹl, ọ keghi ya ukpo ọkpa yan iyeva vbe ẹkete vbe Sameria.

²⁴ Rẹn keghi sẹ ẹmwẹ e Nọyaẹnmwa, vbe ne ọ na lele uviẹn ọkhọ ne erha ẹe odede ighẹ Jeroboam ne ovbi e Nebat lele, ọmwa ne ọ si Izrẹl obọ fi orukhọ.

²⁵ Ọ keghi dọlegbe khọn munọ avbe ẹvbo hia ni ka re ọghe Izrẹl de ẹdẹ kevbe Hamat Pas vbe odẹ okuọ ya sẹ Okun Nọwu vbe odẹ ekẹn, vbenian ọre Nọyaẹnmwa gie ọguọmwadia ẹre ne akhasẹ, rẹn ighẹ Jona ne ovbi Amatai ne ọ ke Gat rre ne ọ ta ẹe ye otọ.

²⁶ E Nọyaẹnmwa keghi miẹn oya vbe usẹ ne ivbi Izrẹl ye. A ma vbe miẹn ọmwa rhọkpa ne ọ yi iran obọ,

²⁷ sokpan, ẹ i re iho ọghe Nọyaẹnmwa ne ivbi Izrẹl wa gbe ẹro ẹdẹdẹmwẹdẹ, rhunmwuda ọnii, ọ keghi lo e Jeroboam Ne Ogieva ya wọlọ iran ladian vbọ.

²⁸ Emwi ọvbehe hia ne Jeroboam Ne Ogieva ghi ru, avbe okuo ni wegbe ne ọ khọnrẹn, kevbe ne ọ na munọ e Damaskọs kevbe Hamat werriegbe gie Izrẹl, a gbẹnnẹ ehia ye Ebe Okha Avbe Ọba Izrẹl.

²⁹ E Jeroboam keghi wu, a na re ẹre ye idin avbe ọba, ovbi ẹre ighẹ Zẹkaraia keghi rriọba lele ẹe.