II Ọba 13 - Edo Bible (E Baibol Ẹdo) Version 1996

E Jehoahaz Ne Ọba Izrẹl

¹ Ọ ghi rre ukpo ehayanugie ne Joas ne ovbi Ahazaia rriọba vbe Juda, e Jehoahaz ne ovbi e Jehu keghi rriọba Izrẹl, ọ keghi ya ukpo eha irrọvbugie vbe ẹkete vbe Sameria.

² Ọ keghi ru orukhọ ghe Nọyaẹnmwa, ọ keghi vbe si Izrẹl ohọ fi orukhọ zẹ vbene Jeroboam ka vbe ru, ọ ma kie werriegbe vbe emwi dan ne ọ ru.

³ Ẹre ohu Izrẹl na mu e Nọyaẹnmwa, ọ na gie Hazaẹl ne ọba e Siria kevbe Benhadad ne ovbi ẹre gha khọn miẹn Izrẹl otọ yan egbe.

⁴ Ẹre Jehoahaz na na erhunmwu ghe Nọyaẹnmwa, ugbẹn vbe Nọyaẹnmwa ghi miẹn obọ dan ne ọba e Siria ya mu ivbi Izrẹl, ọ keghi họn erhunmwu ẹnrẹn.

⁵ E Nọyaẹnmwa keghi gie ọkaolotu gie Izrẹl ọ na do miẹn iran fan hin obọ ivbi e Siria rre. Izrẹl keghi vbe do gha rrọ vbe ọfumwegbe vbene iran ka ye de yi.

⁶ Sokpan, iran ma ye zobọ vbe orukhọ ne Jeroboam ne ọba viọ ivbi Izrẹl lao, iran keghi ye gha ru ẹe khian. Amazẹ ọghe Asiẹrra ne ẹbọ ne okhuo keghi ye gha rre Sameria.

⁷ E Jehoahaz ma ghi gha mwẹ emwi igbinna gberra arhin ekigbesiyeha ni hin ẹsin, ikẹkẹ okuo igbe, kevbe arhin arriaisẹn igbe (10,000) ni ye owẹ khian, rhunmwuda, ọba e Siria dunmwu enekpa a, ọ na gha ya owẹ rrilo iran ginna otọ zẹ vbe ekẹn.

⁸ Emwi ọvbehe hia ne Jehoahaz ru, kevbe avbe uyinmwẹ udinmwẹ ọnrẹn, a gbẹnnẹ ọẹn ye Ebe Okha Avbe Ọba Izrẹl.

⁹ Rẹn keghi wu, a na re ẹre ye Sameria, ovbi ẹre ne okpia ighẹ Jehoas keghi rriọba lele ẹe.

E Jehoas Ne Ọba Izrẹl

¹⁰ Ọ ghi rre ukpo enẹirrọvbe iyeva ne Joas rriọba vbe Juda, e Jehoas ne ovbi e Jehoahaz keghi rriọba Izrẹl, ọ keghi ya ukpo ẹneirrọvbugie vbe ẹkete vbe Sameria.

¹¹ Rẹn keghi vbe rukhọ ghe Nọyaẹnmwa, ọ keghi lele igiemwi dan ọghe Jeroboam ne ọba ne ọ si ivbi Izrẹl la orukhọ.

¹² Emwi ọvbehe hia ne Jehoas ghi ru, ya sẹ egbe udinmwẹ ọnrẹn vbe okuo ne ọ gu Amazaia ne ọha e Juda khọn, a gbẹnnẹ ọẹn ye Ebe Okha Avbe Ọba Izrẹl.

¹³ E Jehoas keghi wu, a na re ẹre ye idin avbe ọba vbe Sameria, ẹre ovbi ẹre ighẹ Jeroboam ne ukpogieva na rriọba lele ẹe.

Uwu Elaisia

¹⁴ Elaisia ne akhasẹ kegha khuọnmwi obọ kegha da ẹe ẹsẹse, ọ ghi lovbiẹ vbe ọ ghi ra kpan udu, e Jehoas ne ọba Izrẹl kegha khian ya tuẹ ọe. Ugbẹn vbe ọ ghi viẹ ọ keghi kha wẹẹ, “Erha mwẹ ne erha, wẹ ọrọre ọwegbe ne ọ tan obọ gue Izrẹl.”

¹⁵ Elaisia keghi tama rẹn wẹẹ, “Mu uhanbọ kevbe ifẹnmwẹ rre.” Jehoas keghi ya viọ rre,

¹⁶ Elaisia na wẹ ne ọ mu egbe ne ọ ya fi ẹe.

¹⁷ Ọba keghi kie ewindo ne ọ mu aro da odẹ e Siria zẹ vbene Elaisia tama rẹn. Elaisia keghi tama rẹn wẹẹ, “Fi ifẹnmwẹ nii.” Ọba ghi wa fi ifẹnmwẹ nii nẹ, akhasẹ ni keghi kha wẹẹ, “Wẹ ọrọre ifẹnmwẹ e Nọyaẹnmwa ne ọ gha ya khọn e Siria muotọ, u ghi gu e Siria khọn vbe Afẹk rhinrin u te do khọn miẹn iran otọ.”

¹⁸ Ẹre Elaisia na wẹ ne ọba rhie ifẹnmwẹ nekpa ne ọ ya ẹe kinmwi otọ. Ọba keghi ya ẹe kinmwi otọ igba eha, ọ keghi dobọyi.

¹⁹ Ọna keghi ya ohu mu Elaisia, ọ keghi tama ọba wẹẹ, “Igba isẹn ra ehan ọre ọ te kei ne u kinmwi ẹẹn, erriọ obọ ruẹ gha na wa ke ukhunmwu ne ivbi e Siria fo fẹẹrẹ, sokpan, vbene ọ ghi ye na nian, igba eha kẹkan ọre obọ ruẹ ra ke ukhunmwu ne iran.”

²⁰ Elaisia keghi wu, a na re ẹre. Ukpukpo ọ re otu ivbi e Moab do ya gha mu okuo gie ivbi Izrẹl.

²¹ Iran ghi re orinmwi ẹdẹ ọkpa, iran ghi ghe otu ọkpa vberriọ dee. Emwa nii keghi fi ikun orinmwi nii fi idin Elaisia, iran na lẹ. Egbe ọmwa nii ghi wa dekan ọghe Elaisia, ọmwa nii keghi rhiọrre, ọ na kpaegbe mudia.

Okuo Ne Izrẹl Kevbe Siria Khọnrẹn

²² E Hazaẹl ne ọba e Siria kegha mu Izrẹl rueghe vbe ẹghẹ ne ọba Jehoahaz yae vbe ẹkete hia,

²³ sokpan e Nọyaẹnmwa keghi mwẹ itohan kevbe ẹnina ghe iran, ọ ma gie a wa fuẹn iran an, sokpan, ọ keghi yi iran obọ rhunmwuda ile ne ọ gu Ebraham, Aizik kevbe Jekọb ta. Ọ ma he mianmian emwa rẹn ẹdẹ.

²⁴ E Hazaẹl ne ọba Siria ghi wu, e Benhadad ne ovbi ẹre keghi rriọba.

²⁵ Jehoas ne ọba Izrẹl na khọn miẹn ẹre otọ igba eha, ọ na munọ avbe ẹvbo ne Benhadad te khọn miẹn iran re vbe ẹghẹ Jehoahaz ne ọba ne erha Jehoas werriegbe.