II Ọba 12 - Edo Bible (E Baibol Ẹdo) Version 1996

Joas Ne Ọba E Juda

¹ Ọ ghi rre ukpo ihinrọn ne I Jehu ne ọba Izrẹl rriọba, e Joas keghi rriọba e Juda, ọ keghi ya ukpo iyeva rriọba vbe Jerusalẹm. A kegha tie iye ẹe Zibia ne ovbi ẹvbo Biẹsiẹba.

² Te ọ wa gha ru emwi ne ọ yẹ e Nọyaẹnmwa vbe ẹdẹ agbọn rẹn hia rhunmwuda e Jehoiada ne ohẹn ọ re ọ gha gie odẹ ma rẹn.

³ Vbene ọ rhirhi gha ye hẹ, ehe ne iran ni gho ẹbọ na ru ẹbọ, a ma guọghọ ẹe kua. Emwa nii kegha zọ ese, iran na vbe gha giẹn eturari vbọ.

⁴ E Joas keghi tie avbe ohẹn, ọ na wẹ ne iran gha si igho ne iran ni zọ ese vbe Ọgua Osa hae koko, kevbe avbe igho ne a hare yọ zẹ vbe ne a mwa ye ese ne a zọ vbe ẹghẹ hia kevbe igho ne emwa ya ekhọe obọ iran viọ rre.

⁵ Dọmwadẹ ohẹn ghi gha da igho iran ne irẹn ru emwi na yi. A ghi gha ya igho nii dọlọ Ọgua Osa yi zẹ vbene a ya ho sẹ ọre egbe.

⁶ Sokpan, vbe ọ ye sẹ ukpo ehayan ugie nẹ ne Joas ghi rriọba, avbe ohẹn ma ye dọlọ ehe rhọkpa yi vbe Ọgua Osa.

⁷ Rhunmwuda ọnii, rẹn keghi tie Jehoiada kevbe avbe ohẹn nekpa, ọ keghi nọ iran wẹẹ, “Vbọzẹ ne uwa i na dọlọ Ọgua Osa yi yi? Ke eban kpao, wa ghẹ ghi da igho ne ọ sẹ uwa obọ yi; wa gha viọ ẹre rre, ne a miẹn ehe na dọlọ Ọgua Osa yi.”

⁸ Avbe ohẹn keghi kue yọ vberriọ, iran kevbe kue yọ wẹ ẹ i re iran ọ gha dọlọ Ọgua Osa yi.

⁹ Ẹre Jehoiada na ru ẹkpẹti ọkpa, ọ na ha uvun ye ugue ẹre, ọ na mu nene ẹkpẹti ye ọkpẹn Ogiukpo, ọ kegha rre obọ erha ọmwa vbe a gha la uwu Ọgua Osa. Ohẹn ne iwinna sẹ ọre egbe vbe onurho ghi gha viọ igho hia ne iran ni do ga viọ rre, ye uwu ẹkpẹti na.

¹⁰ Ẹghẹikẹghẹ ne igho rhirhi ya gha kpọlọ vbe uwu ẹkpẹti nii, ọgbenbe ọba kevbe Ogie Ohẹn ghi rre, iran ghi ranran esiliva nii, iran ghi mwa rẹn vbene ọ khua sẹ hẹ.

¹¹ Iran ghẹ ghi gbẹn inu igho ne ọ wa khin ye otọ nẹ, iran ghi mu ne iran ni gbearoghe iwinna ne a winna vbe Ọgua Osa, iran na ghi ya ha osa ne avbe owinna, iran ni bọ owa,

¹² avbe iran ni bọ owa kevbe ni gbe okuta, iran ghi vbe dẹlẹ igẹdu kevbe avbe okuta ne a ya dọlọ owa yi, a ghi vbe ya ha igho ne a loro vbene ọ khẹke hia.

¹³ Sokpan, a ma rhie vbe igho nii ya dẹ ukpu esiliva, ọkpan, avbe okpe ra avbe emwi ne a ya dọlọ ukpa yi, ra emwikemwi ne a ya igoru ra esiliva ru rhọkpa.

¹⁴ A keghi wa lo ehia ya ha osa ne emwa ni winna kevbe ne avbe ya dẹlẹ emwi ne a ya dọlọ owa yi.

¹⁵ Emwa ni gha dọlọ ẹe yi, keghi wa gha re emwa ni i gbe emwi rhu, rhunmwuda ọnii, a ma ghi vbe gha tie iran ne iran do gha kha vbene iran lo igho hẹ.

¹⁶ Igho ne a hae ye ahaewerriegbe izẹọhẹ, kevbe izẹọhẹ ọghe orukhọ ne a ru, a ma viọ enii ye uwu ẹkpẹti, avbe ohẹn ọ re ọ yan eni.

¹⁷ Vbe ẹghẹ nii, e Hazaẹl ne ọba Siria keghi mu okuo gha rrie Gat, ọ na khọn rẹn, ọ na wẹ rẹn ra wa vbe mu okuo la e Jerusalẹm.

¹⁸ E Joas ne ọba e Juda keghi wa koko emwi izẹọhẹ hia ne avbe ọba nikaro ighẹ avbe Jehosiafat, Jehoram kevbe Ahazaia ya fi ohan ne Nọyaẹnmwa, ọ kevbe viọ ọghe ọe ba ẹre, deba igoru hia ni rre aza Ọgua Osa kevbe ẹguae, ọ na viọ ehia ya ha oko gie Hazaẹl ne ọba, ọ ni na ghi viọ ivbi iyokuo ẹre hin e Jerusalẹm rre.

¹⁹ Emwi ọvbehe hia ne Joas ne ọba ru, a gbẹnnẹ ehia ye Ebe Okha Avbe Ọba Juda.

^20-21 Eguọmwadia Joas ne ọba keghi khuan khẹ ọre, iran eva vbọ ne a tie ẹre Jozaka ne ovbi e Simiat kevbe Jehozabad ne ovbi e Siọma keghi gbe ẹe rua vbe owa ne a bọ ye uvun ne a ran rẹn vbe odẹ ahọ e Jerusalẹm vbe odẹ ne a la ye Silla. A keghi ya re Joas ye idin avbe ọba vbe Ẹvbo e Devid, Amazaia ne ovbi ẹre keghi rriọba lele ẹe.