II Ọba 11 - Edo Bible (E Baibol Ẹdo) Version 1996

Atalia Ne Ọba Nokhuo E Juda

¹ Ọwarọkpa vbe Atalia ne iye Ahazaia ne ọba ghi wa họn ighẹ iran de ovbi ẹre izigha, ọ na wẹ ne iran gbele emwa ni ghi re ẹgbẹe ọba hia fẹẹrẹ ua.

² E Joas, ne ovbi Ahazaia ne okpia ọkpa ọ re ọ sẹtin lẹfe. Iran te ra wa vbe gbe ẹe rua zẹ vbe nekpa, sokpan e Jehosiaba ne ọtẹn erha ẹe ne okhuo ọ re ọ ghi wọlọ ẹe ladian, okhuo na keghi re ovbi e Jehoram kevbe ọtẹn Ahazaia, ne okhuo ọvbehe biẹ ne erha ẹe. Okhuo na keghi rhie ẹre kevbe ọmwa ne ọ kokẹe ye ughugha ọkpa vbe uwu Ọgua Osa, ọ na ya rhie ẹre lẹre ne Atalia, a na miẹn wẹ a ma gbẹe rua.

³ Ukpo ehan ọre Jehosiaba ya gha gbe aro ghe ọmọ okpia na, ọ keghi rhie ẹre lẹre ye uwu Ọgua Osa vbe Atalia rre ẹkete zẹ vbe ọba ne okhuo.

⁴ Sokpan, ọ ghi sẹ ukpo ne ogihinrọn, e Jehoiada keghi gie na tie avbe ọkaokuo ni re arowa iran ne ọba ya khẹ egbe, kevbe avbe ukọ ẹguae, ọ na wẹ ne iran gha die Ọgua Osa, ọ na ya iran vẹn ihẹn wẹ ne iran ye obọ ye emwi ne irẹn mwamwaẹn ne iran ru, ọ keghi rhie Joas ne ovbi Ahazaia ne ọha ma iran.

⁵ Ọ na tama iran emwi ne iran gha ru wẹẹ: “Wa gha rrie iwinna vbe Ẹdẹ izọla ne kherhe, wa ghi wa egbe ye ihe eha, ne obọ ọkpa vbọ gha khẹ ẹguae,

⁶ obọ ọkpa vbe uwu eha nii ghi vbe gha khẹ Onurho e Suọ, obọ ọkpa vbe uwu eha nọkpa ghi ya gha khẹ onurho ne a la sẹ ehe ne iran ni khẹ odẹ ye.

⁷ Otu eva ni i te rrie iwinna ẹdẹ izọla nekherhe ghi mudia ne iran gha khẹ Ọgua Osa ne iran tan obọ ga ọba.

⁸ Wa ghi yuo umozo mwẹ obọ tan obọ ga e Joas ne ọba, wa ghi lele ẹe la ehe ne ọ rhirhi a yo hia. Ọmwaikọmwa ne ọ rhirhi sikẹ uwa, wa ghi gbe ẹe rua.”

⁹ Avbe ekaokuo keghi ru vbene Jehoiada tama iran, iran na viọ emwa iran bu ẹre gha dee. Iran ni khian te zobọ vbe iwinna Ẹdẹ izọla nekherhe, kevbe iran ni die iwinna.

¹⁰ Ọ keghi viọ avbe asoro kevbe asa ọghe Devid ne ọba ne a viọ ye uwu Ọgua Osa, ne iran ni ra do tan obọ gue ọba,

¹¹ ọ keghi viọ emwa nii mudia ye efẹn ọkpa ke ẹe kevbe umozo vbe obọ lẹga odaro Ọgua Osa ne iran tan obọ ga ọba.

¹² Ẹre Jehoiada na rhie Joas ladian, ọ keghi mu ẹde ye ọre uhunmwu, ọ na rhie ọkpa ne ẹẹn vbe uwu ebe ọghe vbene ọba yin hẹ. Ẹre a na sa ori ye Joas uhunmwu, a na ma ẹre ọba. Emwa hia keghi kpe obọ, iran were tii kha wẹẹ, “Ọba gha tọ, ọ kpẹre!”

¹³ Atalia ne ọba ne okhuo keghi họn vbe avbe iran ni khẹ odẹ kevbe avbe emwa wee, rẹn keghi zegiẹgiẹ gha rrie Ọgua Osa, ehe ne avbe emwa ni si koko gbe ẹbu yi.

¹⁴ Rẹn keghi bẹghe vbe ọba ne ọ da re ni mudia ke orre vbe ehe ne a la la Ọgua Osa zẹ vbene a ru ẹe. Avbe ọkaokuo kevbe iran ni kpe okpe keghi yọyọ lẹga ẹre. Atalia keghi ye akhiẹ sọ ukpọn rẹn uan, ọ na datu wẹẹ, “Ẹtẹ! Ẹtẹ!”

¹⁵ Jehoiada ma ho ne a gbe Atalia a ye uwu Ọgua Osa, ọ keghi rhunmwuda ọnii tama avbe ekaokuo, wẹẹ, “Wa mu ẹẹn la ẹkpo uviẹn ne avbe ọbodẹ tẹn rẹn na, ọmwa ne ọ gha hia ne ọ faẹn, wa gbe ẹe rua.”

¹⁶ Iran keghi mu ẹẹn, iran na rhie ẹre gha rrie ẹguae, iran na ya gbe ẹe rua vbe ọkpẹn Onurho Ẹsin.

Adọlọ E Jehoiada

¹⁷ E Jehoiada ne ohẹn keghi ru ẹe ne Joas ne ọba kevbe emwa nii, gba rhie obọ ye ebe ne Nọyaẹnmwa wẹ, emwa e Nọyaẹnmwa iran ra gha khin, ọ kevbe ru ẹe ne ọba vbe emwa nii gba rhie obọ ye ebe.

¹⁸ Ẹre emwa nii na gha rrie aro e Bal, iran na siẹn ẹnrẹn sẹ otọ, iran na guọghọ Ogiukpo ne ọ rrọọ kevbe avbe ukhurhẹ, iran kevbe gbe Natan ne ohẹn e Bal ye odaro Ogiukpo. E Jehoiada keghi viọ emwa yọ ne iran gha khọ Ọgua Osa.

¹⁹ Ẹre rẹn kevbe avbe ọkaokuo, kevbe otu ne ọba ya khẹ egbe kevbe iran ni khẹ ẹguae na su ọba ke Ọgua Osa gha rrie ẹguae, vbene emwa nii hia na lele ẹe. E Joas keghi la odẹ Onurho Abodẹ la owa ọ na ya tota ye ẹkete.

²⁰ Oghọghọ keghi gba emwa nii hia ẹko, ẹvbo keghi furre vbene iran ghi na gbe Atalia ua vbe ẹguae.

²¹ Ọmọ ukpo ihinrọn ọre Joas gha khin vbe ọ rriọba e Juda.