II Ọba 10 - Edo Bible (E Baibol Ẹdo) Version 1996

A Gbele Ivbi Uniẹn Ehab

¹ Wi Ivbi uniẹn Ehab ekigbesiyenẹ ọ re ọ gha rre Sameria. E Jehu keghi gbẹn ebe gie emwa ni rre ore ẹvbo nii, iran ne ekamakodin ẹvbo, kevbe iran ne ivbi Ehab gue. Enian ọ re ọ gbẹn ọẹn:

² “Wa ọ re ivbi ọba gue, wa vbe mwẹ ikẹkẹ okuo kevbe avbe ẹsin, emwi ne a ya khọn okuo kevbe avbe ẹvbo ne a gbe odin gaa.

³ Rhunmwuda ọnii, ebe na ghẹ ghi sẹ uwa obọ, wa ghi hannọ ne ọ khẹke vbe ivbi ọba, wa ghi ya e ma ọba, vbe iyeke ọnii, wa ghi mu egbe ne uwa ya gbinna ne ẹẹn.”

⁴ Ohan keghi mu iran ni kha yan e Sameria, iran keghi kha wẹẹ, “Vbe ima ra sẹtin viọ aro da e Jehu hẹ ugbẹn vbe Ahazaia ne ọba kevbe Joram, ma sẹtin?”

⁵ Rhunmwuda ọnii, iran ni gbe aro ghe ẹguae, kevbe iran ni gbearoghe ore ẹvbo kevbe avbe ekamakodin ẹvbo nii, kevbe iran ni gbe aro ghe iran, keghi gie ne a tama e Jehu wẹẹ, “Eguọmwadia ruẹ ma khin, ma vbe mu egbe ne ima ya ru emwi ne u a rhirhi wẹ ne ima ru. Sokpan, ma i ma ọmwaikọmwa ọba; ru emwi ne uwẹ ghi rẹn ighẹ ọ ke sẹẹ.”

⁶ E Jehu kevbe gbẹn ebe ọvbehe gie iran wẹẹ, “A deghẹ otu mwẹ wa ye, a deghẹ wa gha ru emwi ne I rhirhi tama uwa, wa viọ uhunmwu ivbi Ehab ne ọba bu mwẹ gha die Jezrẹl vbe ọ te sẹ ẹghẹ na akhuẹ.” Avbe ekamakodin ekigbesiyenẹ ni rre Sameria, ọ re avbe ivbi Ehab ne ọba ekigbesiyenẹ gue, iran ọ re ọ koko iran, ma iran emwi.

⁷ Ugbẹn vbe ebe Jehu ghi sẹ iran obọ, avbe ekamakodin ni rre Sameria nii, keghi gbele ivbi Ehab ekigbesiyenẹ nii, iran na kun uhunmwu iran ye okhuae hẹ gie Jehu vbe Jezrẹl.

⁸ Iran ghi tama e Jehu ighẹ iran viọ uhunmwu ivbi Ehab rre nẹ, ọ na wẹ ne iran silo ẹe gbo ye ihe eva vbe onurho ẹvbo nii, ne iran sẹ iran rae ye evba ya sẹ owiẹ ne ọ lele ẹe.

⁹ Ọ ghi sẹ owiẹ, ọ keghi ladian, ọ kegha rrie onurho ẹvbo nii, ọ keghi tama emwa ni rre evba wẹẹ, “Mẹ ọ re ọ khuan khẹ e Joram ne ọba, I na gbe ẹe rua, wa imwẹ obọ vbe ọnii. Sokpan gha ọ gbele enena hia?

¹⁰ Ọna rhie maa wẹ emwi ne Nọyaẹnmwa ta ẹe vbe ekpa ivbi Ehab hia, gha gele sẹ. Emwi ne Nọyaẹnmwa la unu Elaija ne akhasẹ yan ọ re ọ ru na.”

¹¹ Ẹre Jehu na gbele etẹn Ehab ni ghi rre Jezrẹl hia, kevbe ivbi iyokuo ẹre, kevbe avbe ọse nii sikẹ ọre, kevbe avbe ohẹn, ọkpa ne a sẹ rae ye agbọn ẹ i rrọọ.

A Gbele Etẹn Ahazaia Ne Ọba

¹² E Jehu keghi kpa vbe Jezrẹl rre, ọ na gha rrie Sameria, ọ ghi sẹ ihe ọkpa ne a tie ẹre “Ẹko Ọsuohuan” vbe odẹ.

¹³ Ọ keghi khian dekun etẹn Ahazaia ne ọba e Juda ne ọ ghi wu, ọ keghi nọ iran wẹẹ, “Vbe uwa ke rre.” Iran wanniẹn wẹẹ, “Etẹn Ahazaia ma khin, te ima rrie Jezrẹl ne a ya tuẹ ivbi e Jezibẹl ne Oloi kevbe ẹgbẹe ọba nekpa.”

¹⁴ E Jehu keghi tama emwa rẹn, “Wa munọ iran munọ ẹmwẹ ne unu.” Iran keghi munọ iran hia, ọ keghi gbele iran vbe ọkpẹn uye ọkpa vbe evba. Iran evayan iyeva nọ, ọ ma vbe sẹ ọkpa rae ye agbọn vbọ.

A Gbele Ni Ghi Kẹ Vbe Ẹgbẹe Ehab Hia

¹⁵ E Jehu keghi deyan okhian, ọ ghi sẹ odẹ, e Jonadab ne ovbi e Rekab keghi vba ẹre. E Jehu keghi tuẹ ọe, ọ tama rẹn wẹẹ, “Iro ọkpa ọ re ọ rre ima ekhọe. U gha deba mwẹ ra?” E Jonadab keghi kha wẹẹ, “I gha deba ruẹ.” Iran keghi rhie egbe obọ, ọ re Jehu na kpa ẹre la uwu ikẹkẹ okuo.

¹⁶ Ọ tama rẹn wẹẹ, “Lele mwẹ gha dee ne u do tobọọ ye aro miẹn ọẹn vbene I ga e Nọyaẹnmwa hẹ.” Iran keghi gba hin gha rrie Sameria.

¹⁷ Iran ghi sẹ evba, e Jehu keghi gbele etẹn Ehab hia fẹẹrẹ, ọ ma vbe sẹ ọkpa rae vbọ. Emwi ne Nọyaẹnmwa tama Elaija ighẹ ọ gha sunu ọ re ọ na khin.

A Gbele Iran Ni Gho E Bal

¹⁸ E Jehu keghi tie ivbi e Sameria hia si koko, ọ tama iran wẹẹ, “Ehab ne ọba gho e Bal kherhe, sokpan mẹ gha kakabọ gho ẹre sẹ ọnii.

¹⁹ Wa tie avbe akhasẹ e Bal hia rre, kevbe emwa hia ni gho ẹre kevbe avbe ohẹn ọnrẹn hia. A ghẹ gie ẹe kẹ orhiọnkpa. I ra do zọ ese nọkhua ghe Bal, ọmwaikọmwa ne ọ ma rre, a gha gbe ẹe rua.” (Erẹrẹ ọre ọ na wa khin, te Jehu ru ẹe vberriọ rhunmwuda ọ ho ne ọ gbele iran ni gho e Bal hia a.)

²⁰ Ẹre Jehu na kha wẹẹ, “Wa bu ẹdẹ ugamwẹ ne a ya ya ọghọ ne Bal!” Iran keghi bu ẹdẹ ọre.

²¹ E Jehu keghi gie uhunmwu na ne a wewe ẹe la otọ Izrẹl hia. Iran ni gho e Bal hia keghi rre. A ma vbe miẹn ọkpa ne ọ ma rre vbọ. Ehia keghi la aro e Bal, iran na vuọn rẹn sẹ otọ sẹ ukhunmwu.

²² Ẹre Jehu na tama ohẹn ne ọ gbe aro ghe avbe ẹwu ne ọ viọ ẹwu ladian ne ọ viọ ne iran ni ni ga vbe evba.

²³ Vbe iyeke ọnii, e Jehu tobọ ẹre keghi la owa ke irẹn kevbe Jonadab ne ovbi Rekab, ọ keghi tama emwa nii wẹẹ, “Wa gie aro uwa da ẹe wẹ, emwa ni ga e Bal ọkpa ọ re ọ rre emwa, kevbe wẹ ọmwa ne ọ ga e Nọyaẹnmwa rhọkpa ma la owa.”

²⁴ Ẹre rẹn vbe Jonadab na la owa ne ọ ya ru imuohan ne a giẹn uan kevbe ne ọ vbe ya zọ ese ghe Bal. Rẹn keghi viọ arhin iyenẹ ye orere vbe aro ẹbọ nii, ọ kevbe tama iran wẹẹ, “Wa ghi gbele iran na hia a, ọmwa ne ọ gie ọkpa lẹ fe vbọ, uhunmwu ọ ya khiẹ ọre.”

²⁵ Ọwarọkpa vbe Jehu ghi wa mu emwi imuohan ye evba nẹ, ọ keghi tama avbe ọbodẹ kevbe avbe ọkaokuo wẹẹ, “Wa la owa ne uwa ya gbele iran hia a, wa ghẹ gie ọkpa lẹ fe vbọ!” Iran keghi la owa. Iran na yuo umozo ua, iran na gbele iran hia a, iran na silo ikun iran ladian. Iran keghi la uwu ẹgun ne ọ wa ke uwu aro ẹbọ sẹẹ.

²⁶ Iran keghi mu ukhurhẹ ne ọ rre evba ladian iran na giẹn ọnrẹn uan.

²⁷ Ẹre iran na dunmwu ukhurhẹ kevbe nene aro ẹbọ, iran na ye aro ẹbọ nii khian owa isan, erriọ ọ ye ye do sẹ ẹdẹnẹrẹ na.

²⁸ Erriọ ọ re Jehu ya wabọ e Bal na gho hin otọ Izrẹl rre.

²⁹ Sokpan, ọ keghi ye egbe ta orukhọ ne Jeroboam ru, ọmwa ne ọ si ivbi Izrẹl obọ fi ugamwẹ Ẹmila igoru ne ọ mannọẹn viọ gbọ ye Bẹtẹl kevbe Dan.

³⁰ E Nọyaẹnmwa keghi tama e Jehu wẹẹ, “U ru ivbi Ehab emwi hia ne I ho ne u ru nẹ. Te imẹ ghi yan ma ruẹn nian wẹ ivbi uẹ gha rriọba ya sẹ ogienẹ ne ọ he re vbe Izrẹl.”

³¹ Sokpan, e Jehu ma ye ekhọe lele uhi ne Nọyaẹnmwa ne Osanobua yi ne ẹẹn, sokpan, ọ keghi lele igiemwi e Jeroboam ne ọ si ivbi Izrẹl la orukhọ.

Uwu E Jehu

³² Vbe uwu ẹghẹ na, e Nọyaẹnmwa keghi hẹko gha giagia hin otọ Izrẹl rre. E Hazaẹl ne ọba Siria keghi khọn munọ otọ Izrẹl hia ni rre

³³ odẹ ahọ ọghe Jọdan rhinrin ya sẹ ẹvbo ne a tie ẹre Aroẹ ne ọ rre odẹ ekẹn vbe ọkpẹn Ẹzẹ Anọn, ne usun ọ re otọe Giliad ye kevbe Basian, ehe ne avbe ẹwae Gad, Riubẹn kevbe Manasẹ ne odẹ ahọ ye.

³⁴ Emwi hia ne Jehu ghi ru, avbe iwinna udinmwẹ ọnrẹn, a gbẹnnẹ ehia ye Ebe Okha Avbe Ọba Izrẹl.

³⁵ Ọ keghi wu, a na re ẹre ye Sameria, ẹre ovbi ẹre ighẹ Jehoahaz na rriọba lele ẹe.

³⁶ Ukpo eva irrọvbe ọgban ọre Jehu rriọba Izrẹl la vbe Sameria.