II Ọba 1 - Edo Bible (E Baibol Ẹdo) Version 1996

Elaija Kevbe Ahazaia Ne Ọba

¹ Ehab ne ọba Izrẹl ghi wu nẹ, otọe ẹvbo Moab keghi sọtẹ Izrẹl.

² Ahazaia ne ọba Izrẹl keghi ke uhunmwu egedege ne ọ rre ẹguae ẹre vbe Sameria de gbe otọ, obọ keghi da ẹe ẹsẹse. Rẹn na rhunmwuda onii gie emwa ne iran ya nọ e Baal ne ẹbọ ivbi e Filistia vbe Ẹkrọn, ne ọ miẹn ehe na rẹn a deghẹ rẹn gha fe ra rẹn i ra fe.

³ Sokpan odibo e Nọyaẹnmwa keghi tama Elaija, akhasẹ ne ovbi Tisbi ne ọ ya vba avbe emwa ne a giẹ ẹre uhunmwu nii, ne ọ nọ iran wẹẹ, “Vbọzẹ ne uwa ra na ya nọ e Baal ne ẹbọ Ẹkrọn yi? Te uwa ya ọ nii kha ighẹ Osa irre otọ e Izrẹl ra?

⁴ Tama ọba wẹ e Nọyaẹnmwa wẹẹ, ‘U i ra fe vbe ẹwẹn udemwẹ ruẹn nii, te u ra wu yọ.’ ” Elaija keghi ru vbene Nọyaẹnmwa tama rẹn.

⁵ Ẹre avbe emwa ne a gie ẹre uhunmwu nii na werriegbe bu ọba gha dee. Rẹn nọ iran wẹẹ, “Vbọzẹ ne uwa na werriegbe gha dee yi?”

⁶ Iran keghi wanniẹn wẹẹ, “Ma miẹn okpia ne ọ wẹ ne ima werriegbe gha dee, ne a do tama ruẹn wẹ e Nọyaẹnmwa khare wẹẹ, ‘Vbọzẹ ne u na gie emwa ne iran ya nọ e Baal ne ẹbọ Ẹkrọn yi? Te uwẹ ro ra ighẹ ẹbọ i rre Izrẹl? U i ra fe vbe ẹwẹn ruẹn, te u ra wu.’ ”

⁷ Ọba keghi nọọn wẹẹ, “Vbe ọmwa nii ye hẹ?”

⁸ Iran keghi wanniẹn wẹẹ, “Ọ mu agbada ne a ya ohian aranmwẹ se yọ, ọ keghi ya ugbẹkun ohian gba ẹe.” Ọba keghi kha wẹẹ, “Elaija nọ.”

⁹ Ẹre ọ na viọ arhin ekigbesiyeha ne ọkaokuo ọkpa ne ọ ya mu Elaija rre. Ọkaokuo nii keghi do vba ẹre vbe ọ tota ye uhunmwu oke ọ keghi tama rẹn wẹẹ, “Ọmwa Osanobua, ọba wẹ ne u gha dee.”

¹⁰ Elaija keghi wanniẹn wẹẹ, “A deghẹ ọmwa Osanobua ọ re I gele khin, wẹ ne erhẹn ke iso tuorre ne ọ gbe uẹ gbele emwa ruẹn hia a!” Vbe ọwarọkpa nii, erhẹn keghi tuorre, ọ na gbe ọkaokuo nii kevbe emwa rẹn hia a.

¹¹ Ọba keghi vbe gie ọkaokuo ọvbehe deba arhin ekigbesiyeha ọvbehe, iran na gha khian ya tama Elaija wẹẹ, “Ọmwa Osanobua, ọba wẹ ne u gha dee ẹgiẹgiẹ.”

¹² Elaija keghi wanniẹn wẹẹ, “A deghẹ ọmwa Osanobua ọre I gele khin, wẹ ne erhẹn ke iso tuorre ne ọ gbe uẹ gbele emwa ruẹn hia a.” Vbe ọwarọkpa, erhẹn na tuorre, ke iso rre, ọ na gbe ọkaokuo nii kevbe emwa rẹn hia a.

¹³ Ọba keghi gie ọkaokuo kevbe arhin ekigbesiyeha, ọvbehe gha rrie oke nii, rẹn keghi hin oke nii ọ keghi diguẹ ye Elaija odaro, ọ rinmwian ẹẹn wẹẹ, “Ọmwa Osanobua, tohan mwẹ tohan emwa mwẹ. Gie ima gha rre agbọn.

¹⁴ Erhẹn ke iso rre do gbe avbe ọkaokuo ne eva kevbe emwa iran; sokpan tohan mwẹ!”

¹⁵ Odibo e Nọyaẹnmwa keghi tama Elaija wẹẹ, “Lele ẹe gha khian, ghẹ gie ohan mu ẹẹn.” Ẹre Elaija na lele ọkaokuo nii bu ọba gha khian.

¹⁶ Ọ na khama rẹn wẹẹ, “Vbenian ọ re Nọyaẹnmwa kha re: ‘Rhunmwuda ne u na gie emwa ya nọ e Baal ne ẹbọ Ẹkrọn vbene a miẹn wẹ ẹbọ i rre otọ Izrẹl ne a gha nọ, u i ra fe, te u gha wu!’ ”

¹⁷ Ahazaia keghi wu zẹ vbene e Nọyaẹnmwa la unu Elaija ta ẹe. Ahazaia i mwẹ ọmọ okpia, ẹre Joram ne ọtiọnrẹn na rri ọba lele ẹe vbe ukpo ne ogieva ne Jehosiafat ne ọba e Juda ya vbe ẹkete.

¹⁸ Emwi ọvbehe hia fẹẹrẹ ne ọba Ahazaia ghi ru, a gbẹnnẹ ọẹn ye Ebe Okha Avbe Ọba Izrẹl.