II Krọnikol 34 - Edo Bible (E Baibol Ẹdo) Version 1996

E Josaia Ne Ọba E Juda

¹ Ukpo erẹnrẹn ọre Josaia ye vbe ọ rriọba vbe Juda, ọ keghi ya ukpo ọkpayanọgban vbe ẹkete vbe Jerusalẹm.

² Ọ keghi ru emwi ne ọ yẹ e Nọyaẹnmwa, ọ na lele igiemwi e Devid ne erha ẹe odede, ọ na wa gha lele uhi Osanobua vbe ẹghẹ hia.

E Josaia Mu Aro Igbinna Da Ẹbọ Ne Aga

³ Ọ ghi rre ukpo erẹnrẹn ne Josaia rriọba, vbe ọ he wa rre ọvbokhan, ọ keghi suẹn gha ga Osanobua ọghe Devid ne ọba ne erha ẹe odede. Ọ ghi rre ukpo ne ogienẹ, ọ keghi suẹn gha guọghọ aro ẹbọ kua, amazẹ Asiẹrra ne ẹbọ ne okhuo kevbe avbe amazẹ nekpa hia fẹẹrẹ.

⁴ Zẹ vbene ọ gie iran, avbe emwa rẹn keghi guọghọ aro e Baal, iran dunmwu Ogiukpo ne a na giẹn eturari ni dekẹe hia a. Iran keghi lọkọ amazẹ Asiẹrra kevbe avbe amazẹ nekpa hia rẹnkhẹn rẹnkhẹn iran na bọnmwẹ ọẹn lele idin iran ni vbe gha gho iran.

⁵ Ọ keghi giẹn ugboloko avbe ohẹn ẹbọ nii vbe Ogiukpo avbe ẹbọ nii vbe ehe ne iran na gha gho iran. Vbene ọ ru ẹe na nian, ọ keghi kpe awua hin e Juda kevbe Jerusalẹm rre.

⁶ Erriọ ọ re ọ vbe ru ẹe vbe avbe ore ẹvbo, kevbe avbe ehe ne a rẹnkhuan an vbe Manasẹ, Ifreim kevbe Simiọn kevbe yasẹ Naftali vbe odẹ okuọ.

⁷ Ọ keghi guọghọ Ogiukpo kevbe ama ọghe Asiẹrra kua vbe ehe ne otọ Arriọba Okuo la ẹe, ehe ne ọ rhanmwẹ, ọ keghi lọ amazẹ ọre rẹnkhẹn rẹnkhẹn, ọ keghi guọghọ Ogiukpo ne a na giẹn eturari ni rrọọ hia, ọ na dọlegbe gha die Jerusalẹm.

A Miẹn Ebe Uhi

⁸ Ọ ghi rre ukpo evairrọvbugie ne ọ rriọba, iyeke vbe ọ ghi kpolo emwi dan hia ni rre otọe nii kevbe Ọgua Osa hin rre nẹ, vbe ekpa ne ọ na kie avbe ẹbọ ne a ga ukpẹ, Josaia keghi gie arhin eha ne iran ya dọlọ Ọgua Osa ọghe Nọyaẹnmwa Osanobua yi, iran na ọ re Siafan ne ovbi Azalaia, e Maaseia ne ọ kha yan e Jerusalẹm kevbe Joa ne ovbi e Joahaz ne ọ vbe rre ukpo ne ọ yọ.

⁹ A keghi viọ igho ne avbe Livai koko vbe Ọgua Osa ne Hilkaia ne Ogie Ohẹn. (Obọ ivbi Ifreim kevbe Manasẹ kevbe avbe ẹwae ni rre odẹ Okuọ hia, kevbe ivbi e Juda, Bẹnjamin kevbe Jerusalẹm ọ re iran na koko ẹe.)

¹⁰ A keghi viọ igho na ne iran eha ne a wẹ ne ọ dọlọ Ọgua Osa yi, eni keghi vbe viọ iran ne,

¹¹ avbe owinna kevbe iran ni bọ owa, ne iran ya dọlọ okuta kevbe erhan, ne iran ya dọlọ owa ni ne avbe ọga e Juda ziengbe ne ẹẹn kẹkẹ ua yi.

¹² Emwa ni winna iwinna na kegha re emwa ne ẹko ẹre rri ẹe. Avbe Livai enẹ ọ re ọ gha gbe aro ghe iran, ena ọ re Jahat kevbe Obedaia ne ivbi ẹwae e Merari, kevbe Zẹkaraia kevbe Mẹsiulam ne ivbi ẹwae e Kohat. (Avbe livai na hia kegha re emwa ni rẹn emaba ne a kpe ẹsẹse.)

¹³ Avbe Livai ọvbehe kegha gbe aro ghe emwi ne a la gie iran, kevbe ne a gha gbe aro ghe avbe iwinna ughughan ne iran winna, iran nekpa kegha gbẹnnẹ avbe emwi ne a loro ye otọ ra ne iran gha khẹ odẹ.

¹⁴ Ugbẹn vbe iran ghi viọ igho ke uwu aza ladian, e Hilkaia keghi miẹn ebe uhi ọghe Nọyaẹnmwa, Uhi ne Osanobua viọ ne Mosis.

¹⁵ Rẹn keghi tama Siafan wẹẹ, “I miẹn ebe uhi vbe uwu Ọgua Osa vbe emwa na.” Ọ keghi mu ebe ne ne Siafan,

¹⁶ ọ re Siafan na mu gie ọba, ọ tama rẹn wẹẹ, “Ma winna iwinna hia ne uwẹ ne ima winna nẹ.

¹⁷ Ma viọ igho ni rre Ọgua Osa ne iran ni winna kevbe iran ni gbe aro ghe iran.”

¹⁸ Ọ keghi vbe rhie te ẹe wẹẹ, “Ghe ebe ne Hilkaia mu mẹ vbe emwa.” Ọ keghi tie ẹre ladian ne ọba họn.

¹⁹ Ọba ghi wa họn vbe a tie ebe nii, ọ keghi sọ ukpọn ye egbe ẹre urhu,

²⁰ ọ keghi tama avbe Hilkaia, kevbe Ahikam ne ovbi Siafan, Abdọn ne ovbi e Milkaia, e Siafan ne ọgbenbe ẹguae, kevbe Asaia ne odibo ọba wẹẹ:

²¹ “Wa ya gualọ otọ ẹmwẹ na gun mwẹ kevbe emwa ni ghi ke ẹe vbe otọe Izrẹl kevbe Juda vbe obọ e Nọyaẹnmwa, wa gualọ otọ emwi ne ebe na ma emwa ẹre. E Nọyaẹnmwa mu ohu ima rhunmwuda avbe erha mwa odede ma ya ẹmwẹ e Nọyaẹnmwa ru emwi, iran ma vbe ru vbene ebe na wẹ ne a gha ru.”

²² E Hilkaia kevbe iran nekpa keghi ru vbene ọba khare, iran keghi bu e Hulda ne akhasẹ ne okhuo ọkpa ne ọ rre obọ ne a da bọlọ vbe Jerusalẹm, ya gualọ otọ ẹre. (Ọdafẹn ọnrẹn ighẹ Sialọm ne ovbi e Tikva kevbe eyẹ Hahas, ọ re ọ gbearoghe ehe ne a viọ ukpọn yi vbe Ọgua Osa.) Iran keghi na iyẹn emwi ne ọ sunu ma okhuo nii.

²³ Rẹn keghi tama iran wẹ ne iran werriegbe bu ọba gha khian ya na

²⁴ avbe iyẹn na ma rẹn vbene e Nọyaẹnmwa khare wẹẹ, “Avbe ihẹn ne a gbẹnnẹ ye ebe ne a tie ma ruẹn ni, te I ra ya ehia rri e Jerusalẹm kevbe emwa ni rrọọ oya.

²⁵ Iran fi iyeke gbe mwẹ, iran keghi ya gha gho ẹbọ ẹrrẹe, iran keghi ya emwi ne iran ru na gha ya ohu mu mwẹ. Iran gua izohu mwẹ kpao ghe Jerusalẹm, emwi na a ya rọ ẹre ẹ i rrọọ.

²⁶ Zẹ vbene ọ kan ọba tobọ ẹre, emwi ne imẹ ne Nọyaẹnmwa ne Osanobua Izrẹl tae ọrọre wẹẹ, ‘U họn ẹmwẹ ne a gbẹnnẹ ye ebe ni.

²⁷ U keghi roiro fi uyinmwẹ werriẹ, u na mu egbe rriotọ vbe odaro mwẹ, u na sọ ukpọn ye egbe ruẹ urhu, u na vbe gha viẹ, vbe u họn vbene I wẹ I gha rri e Jerusalẹm kevbe emwa ni rrọọ oya hẹẹ, I họn erhunmwu ruẹn.

²⁸ Oya ne I wẹ I gha rri e Jerusalẹm re, ẹ i ra sunu vbe ẹ i re te uwẹ wu nẹ, I gha gie uwẹ wu vbe ọfumwegbe.’ ” Emwa ni keghi ya ta uhunmwu ne a gie iran re ma Josaia ne ọba.

E Josaia Yanrẹn Ne Ọ Gha Họn Ẹmwẹ Ne Nọyaẹnmwa

²⁹ E Josaia ne ọba keghi tie avbe ekaolotu ni re Jerusalẹm kevbe Juda ba egbe.

³⁰ Iran hia keghi gba gha rrie Ọgua Osa, avbe ohẹn kevbe avbe Livai kevbe emwa nekpa hia keghi lele iran, eni fee kevbe ivbiogue. Ọ keghi tie ebe uhi ne a miẹn vbe uwu Ọgua Osa ma iran hia.

³¹ Ọ keghi mudia ke orrẹ ọghe ọba, ọ keghi yan ma e Nọyaẹnmwa wẹ rẹn gha họn ẹmwẹ ne ẹẹn, rẹn rhie uhi kevbe iyi ẹre mwẹ, vbe ekhọe ẹre hia kevbe orhiọn rẹn hia kevbe ne ọ vbe gha ru vbene a tae ye ebe uhi, zẹ vbene a gbẹnnẹ ọẹn ye ebe.

³² Ọ keghi wẹ ne ivbi e Bẹnjamin kevbe avbe emwa ọvbehe hia ni ghi rre Jerusalẹm yan wẹ iran gha mu avbe eyan nii ne iran yan ma Osanobua avbe erha iran odede sẹ.

³³ E Josaia keghi guọghọ avbe amazẹ osọnnọ ni te rre otọ ivbi Izrẹl. Vbe uwu ẹghẹ ne ọ ya ẹe vbe agbọn hia, ọ keghi ru ẹe ne a miẹn wẹ emwa ni hia ga e Nọyaẹnmwa ne Osanobua avbe erha iran odede.