II Krọnikol 31 - Edo Bible (E Baibol Ẹdo) Version 1996

E Hẹzekaia Dọlọ Uyinmwẹ Ugamwẹ Iran Yi

¹ Iran ghi ru emwiukpo na nẹ, ivbi Izrẹl hia keghi khian lele ore ẹvbo ni rre Juda hia, iran keghi ya guọghọ orre okuta ni rrọ kua, iran keghi siẹn ama Asiẹrra ne ẹbọ ne okhuo sẹ otọ, iran keghi dunmwu avbe Ogiukpo kevbe aro ẹbọ iran ni ga ẹbọ hia a. Iran keghi vbe ru ẹe vberriọ vbe ehe ni dekẹe vbe Juda, kevbe otọe Bẹnjamin, Ifreim kevbe Manasẹ, iyeke ọnii, iran hia kegha die owa.

² E Hẹzekaia ne ọba keghi dọlegbe gbe ẹre igie ighẹ otu avbe ohẹn kevbe Livai, edọmwadẹ ọghọe kegha mwẹ iwinna ne a wa ne ẹẹn. Usun ena kegha re ne a zọ ese na giẹn uan kevbe isara, ne iran mwẹ obọ vbe ugamwẹ Ọgua Osa kevbe ne iran gha rhie urhomwẹ kevbe ekpọnmwẹ rre vbe ehe hia vbe Ọgua Osa.

³ Owiẹ owiẹ kevbe ota hia ọ ghi mu aranmwẹ kevbe oghẹn emwirri ẹre rre ne a ya gha zọ ese na giẹn uan, kevbe ne a ya zọ ese vbe Ẹdẹ Ikẹtin, Emwiukpo Uki Ọgbọn kevbe avbe emwiukpo ọvbehe ne uhi e Nọyaẹnmwa wẹ ne a gha ru.

⁴ Ye vbe deba ọnii, ọba keghi wẹ ne avbe emwa gha viọ emwi ihaoko ne ọ khẹke avbe ohẹn kevbe Livai rre, ne iran miẹn ehe na wa rhie egbe ye ẹmwẹ emwi ne Uhi e Nọyaẹnmwa wẹ ne a gha ru.

⁵ Ọ ghi wa ta ẹmwẹ na ne ọwarọkpa, ivbi Izrẹl kegha viọ emwi ihaoko iran rre emwiokọ ni mose sẹẹ, ayọn, ẹvbi oliv, owọn, kevbe avbe emwi ọvbehe ne a rhọ vbe ugbo, iran kevbe gha viọ a ghae ye igbe ọghe emwi ne iran mwẹ hia rre.

⁶ Avbe emwa ni rre ore nekhua ni rre Juda kegha viọ a ghae ye igbe ọghe ẹmila kevbe ohuan iran rre, iran kevbe viọ emwi izẹ ọhẹ ọrhẹnrhẹn rre ne iran ya fi ohan ne Nọyaẹnmwa ne Osanobua.

⁷ Uki ne ogieha, ọre emwi ihaoko ni ya suẹn gha sẹ obọ, ọ keghi ye ma ite khian vbe uwu uki enẹ ni lele ẹe.

⁸ Ugbẹn vbe Hẹzekaia ne ọba kevbe ekhaẹmwẹ ọnrẹn ghi miẹn emwi ne iran viọ rre iran keghi rho Nọyaẹnmwa, iran keghi vbe tian ivbi Izrẹl.

⁹ Ọba keghi gu avbe ohẹn kevbe Livai guan vbe ekpa emwi ihaoko na.

¹⁰ Ẹre Azaraia ne Ogie Ohẹn, ne ovbi uniẹn e Zadọk na tama rẹn wẹẹ, “Ke ne emwa nii ghi ya suẹn gha viọ emwi ihaoko iran rrie Ọgua Osa gha dee, te ima ghi miẹn re zẹ kọ ẹsẹsẹmwẹse, ma mwẹ ena hia rhunmwuda, e Nọyaẹnmwa fiangbe emwa rẹn.”

¹¹ Iran keghi bọlọ aza ne a viọ emwi yi ye odẹ ne Ọgua Osa ye zẹ vbene ọba we ne iran ru ẹe.

¹² Iran keghi dọlọ avbe emwi izọhẹ kevbe a gha ye igbe ye evba. Iran keghi rhie Livai ọkpa ne a tie ẹre Konanaia yọ ne ọ gha gbe aro ghe ẹre, iran keghi vbe rhie ọtiọnrẹn ne okpia ighẹ Simẹi ne ọ ogha ye ọ re obọ.

¹³ Iran keghi viọ e Livai igbe yọ ne iran gha winna vbe ototọ iran, ena ọ re Jẹhiẹl, Azazaia, e Nahat, Asahẹl, e Jerimot, e Jozabad, Eliẹl, Ismakaia, e Mahat, kevbe Benaia. Ẹghẹ asẹ e Hẹzekaia ne Ọba kevbe Azaraia ne Ogie Ohẹn ọ re a na ru avbe emwi na hia.

¹⁴ E Kore ne ovbi Imna ne ọ vbe re Livai ne ọ re ọkaolotu iran ni khẹ Onurho Odẹ Ahọ vbe Ọgua Osa, ẹre iran rhie yọ ne ọ gha koko emwi ne a ya zẹ ọhẹ gie Nọyaẹnmwa kevbe ne ọ vbe gha gha ẹre.

¹⁵ Vbe ore ẹvbo ọvbehe ne avbe ohẹn ye, avbe Livai ọvbehe eso keghi ya ẹkoata gha ye ọ re obọ vbe iwinna na, usun iran na kegha re Edẹn, e Miniami, e Jesua, e Siemaia, Amaraia kevbe Siekenaia. Iran kegha gha avbe evbare na umwọmwẹ gie avbe Livai ne ihua iran zẹ vbene iwinna edọmwadẹ ọghọe khare,

¹⁶ ighẹ ẹ i re zẹ vbe ẹwae ne ọ khin. Iran keghi vbe gha ghae ne ikpia ni ghi sẹ ọmọ ukpo ọgban nẹ vbe iran ni winna vbe uwu Ọgua Osa zẹ vbene ihẹ ne edọmwadẹ ọghe ọe vbe ye.

¹⁷ Dọmwadẹ ẹwae ọ re a ya ghae iwinna ne avbe ohẹn, avbe Livai ni ghi sẹ ọmọ ukpo ugie nẹ, ra ne ọ wan sẹ ọnii, otu iwinna ne a gha iran yi, ọ re a ya rhie iwinna ne iran.

¹⁸ A keghi gbẹnnẹ eni iran hia ye ebe ba ọghe amwẹ iran kevbe ivbi iran kevbe emwa ọvbehe ni gue iran rhunmwuda iwinna iran nọ wẹ ne iran mu egbe ne iran gha ya winna iwinna ugamwẹ iran vbe ẹghẹ.

¹⁹ Vbe uwu avbe ohẹn ni rre adesẹ ore ẹvbo, ne a vbe ka ba ivbi uniẹn Errọn, emwa ni waan eso kegha rrọọ, iran na ọ re ọ gha ghae evbare ne avbe ikpia ni rre ẹgbẹe avbe ohẹn kevbe emwa hia ne a ghi gbẹnnẹ eni ẹnrẹn ba ọghe ivbi ẹwae e Livai nẹ.

²⁰ E Hẹzekaia ne ọba keghi ru emwi ne ọ kere kevbe ne ọ yẹ e Nọyaẹnmwa ne Osanobua ẹre vbe otọe e Juda hia.

²¹ Emwi kegha dinnodẹ ne ẹẹn rhunmwuda emwi hia ne ọ ru ne Ọgua Osa ne zẹ vbene uhi khare, orhiọn ẹmwata kevbe ekhọe ne ọ mudia ẹse vbe odaro Osanobua ẹre ọ ya gha ru ẹe.