II Krọnikol 30 - Edo Bible (E Baibol Ẹdo) Version 1996

Imuegbeyotọ Ọghe Alagberra

^1-3 Emwa ni ma sẹtin ru emwiukpo Alagberra ye ẹghẹ vbe uki ne okaro rhunmwuda, avbe ohẹn ne awua ighi gue ma bun sẹ, kevbe wẹ emwa ni hia ma he wa vbe si koko vbe Jerusalẹm. Rhunmwuda ọnii, e Hẹzekaia ne ọba, ekhaẹmwẹ ọnrẹn kevbe avbe emwa nii keghi tae kugbe wẹ uki ne ogieva ọ re iran gha na ru emwiukpo nii, ẹre ọba na gie uhunmwu gie emwa Izrẹl kevbe Juda hia. Ọ keghi miẹn wẹ a gbẹnnẹ ebe gie ẹwae Ifreim kevbe Manasẹ ne ọ ya tie iran wẹ ne iran gha die Ọgua Osa ne ọ rre Jerusalẹm ne iran do ru emwiukpo Alagberra ya ya ọghọ ne Nọyaẹnmwa ne Osanobua Izrẹl.

⁴ Emwamwa iran na keghi yẹ ọba kevbe emwa ni rhunmwuda ọnii,

⁵ iran keghi gie ne a tie ivbi Izrẹl hia kevbe Dan ne ọ rre odẹ ahọ kpao ya sẹ Biẹsiẹba ne ọ rre odẹ ekẹn, ne iran gha die Jerusalẹm ne iran do ru emwiukpo Alagberra zẹ vbene Uhi khare, ne emwa bun sẹ vbene ọ he ka ye de ẹdẹ.

⁶ Ọba kevbe ọkhaẹmwẹ na gie emwa uhunmwu la otọ Juda kevbe Izrẹl ne iran ya tama emwa wẹẹ: “Ivbi Izrẹl, wa miẹn uhunmwu nẹ vbe okuọ ne Asiria do khọn otọ na re, banbanna nian, wa werriegbe bu e Nọyaẹnmwa ne Osanobua Ebraham, Aizik kevbe Jekọb gha dee, rẹn gha bu uwa rre.

⁷ Wa ghẹ ye vbe avbe erha uwa odede kevbe ivbi Izrẹl ni ma mudia ẹse vbe ehe ne Nọyaẹnmwa Osanobua iran ye. Wa tobọ uwa miẹn ọẹn nian wẹ ọ rri iran oya yọ ẹsẹse.

⁸ Wa ghẹ ze vbe udu vbene iran ye, sokpan, wa họn ẹmwẹ ne Nọyaẹnmwa. Wa gha die Ọgua Osa ne ọ rre Jerusalẹm, ehe ne Nọyaẹnmwa ya khian ne ọ huanrẹn nẹ ẹdẹdẹmwẹdẹ, ne uwa do ga ẹe, ne ọ ghẹ ghi mu ohu ghe uwa.

⁹ A dẹghe wa werriegbe bu e Nọyaẹnmwa gha dee, ẹghẹ nii, iran ni viọ etẹn uwa oghunmwu gha rrie gha tohan iran, iran ghi gie iran werriegbe gha die owa. E Nọyaẹnmwa ne Osanobua uwa, ọmwa ne ọ fu ẹko kevbe ne ọ tohan ọmwa nọ, ọ gha rhan obọ miẹn uwa.”

¹⁰ Iran na gie ẹre uhunmwu keghi wa la ẹvbo ni rre otọ Ifreim kevbe Manasẹ fo, kevbe ya sẹ Zẹbulọn vbe odẹ Okuọ, sokpan emwa nii kegha giẹ iran, iran na gha ya iran gbogiẹ.

¹¹ Sokpan, a keghi ye miẹn eso vbe ẹwae Asiẹ, e Manasẹ kevbe Zẹbulọn ni gha ho ne iran rrie Jerusalẹm.

¹² Osanobua keghi wa gha winna vbe Juda, ọ keghi ku emwa nii kugbe vbe uwu ne iran na yan tae wẹ iran gha họn ẹmwẹ ne ẹẹn vbe emwi ne ọ ho, vbe ekpa ne iran gha na gha ru vbene ọba kevbe ekhaẹmwẹ ọnrẹn khare.

A Ru Emwiukpo Alagberra

¹³ Emwa ni bun keghi si egbe koko ye Jerusalẹm vbe uki ne ogieva ne iran do ru Emwiukpo Ebrẹd Ne ọma hue.

¹⁴ Iran keghi munọ avbe Ogiukpo ẹbọ ne a na zọ ese kevbe ne a na giẹn eturari, vbe Jerusalẹm, iran keghi ya hẹ iran ku Iya Kidrọn.

¹⁵ Ọ ghi sẹ ikpẹdẹ ne ogiwenẹ vbe uki ni, iran keghi gbele avbe oteghe ohuan ne a ya zọ ese Alagberra. Ekhue keghi mu avbe ohẹn kevbe Livai ne awua gue sẹrriọ ne iran ghi na yo ulamwẹ ne Nọyaẹnmwa, ne iran ghi na sẹtin gha zọ ese ne a giẹn uan ghe Nọyaẹnmwa vbe Ọgua Osa.

¹⁶ Iran keghi lao ehe ne ọ khẹ ke kevbe iran vbe uwu Ọgua Osa zẹ vbene a mwa ye uwu Uhi e Mosis ne ọmwa Osanobua. Avbe Livai kegha mu esagiẹn emwi ne a ya zọ ese ne avbe ohẹn, avbe ohẹn kegha sanmwẹ ọẹn yan Ogiukpo.

¹⁷ Rhunmwuda ne ni bun vbe emwa ni na gha mwẹ awua, iran ma gie iran gbe oteghe ohuan Alagberra, avbe Livai keghi gbele ẹe ne iran, iran na yae fi ohan ne Nọyaẹnmwa.

¹⁸ Vbe deba ọnii, ni bun vbe iran ni kevbe ẹwae Ifreim, Manasẹ, Isaka kevbe Zẹbulọn rre, ma họnmwegbe, rhunmwuda ọnii, iran kegha ru emwiukpo Alagberra vbe odẹ ne ọ ma gba. E Hẹzekaia ne ọba keghi na erhunmwu na ne iran:

¹⁹ “E Nọyaẹnmwa ne Osanobua avbe erha mwa odede vbe ẹko ne ọ maa ruẹn yabọ iran ni ye ekhọekekhọe ga, a gha rhe miẹn wẹ awua rre iran egbe.”

²⁰ E Nọyaẹnmwa, keghi họn erhunmwu e Hẹzekaia, ọ yabọ emwa nii, ọ ma vbe ru iran emwirhọkpa.

²¹ Iran ni si koko ye Jerusalẹm keghi ya ikpẹdẹ ihinrọn ru Emwiukpo Ebrẹd Ne ọma hue ke iran kevbe ẹko nọ rhiẹnrhiẹn ẹsẹse, avbe Livai kevbe avbe ohẹn kegha ya ẹtin iran hia rho e Nọyaẹnmwa ẹdẹgbegbe.

²² E Hẹzekaia ne Ọba keghi tian avbe Livai ye iguemwi ne iran ya ru ugamwẹ e Nọyaẹnmwa.

Emwiukpo Ne Ogieva

²³ A ghi tie ẹre ikpẹdẹ ihinrọn ne iran ghi ke zọ ese ya gha rho e Nọyaẹnmwa ne Osanobua avbe erha iran odede, iran hia keghi wa kha wẹ iran gha dọlegbe ru emwiukpo na la ikpẹdẹ ihinrọn. Iran keghi rhunmwuda ọnii ya oghogho gha ru emwiukpo na.

²⁴ E Hẹzekaia ne ọba keghi viọ ẹkhuia ẹmila arriaisẹn (1,000) kevbe ohuan arriaisẹn ihinrọn (7,000) ladian ne emwa ni gbele ne iran gha re; avbe ekhaẹmwẹ kevbe viọ ẹkhuia ẹmila arriaisẹn ọvbehe (1,000) kevbe ohuan arriaisẹn igbe (10,000) ne emwa nii. Avbe ohẹn ni bun keghi yo ulamwẹ akpehuan.

²⁵ Ẹko emwa keghi gha rhiẹnrhiẹn, avbe ivbi e Juda, avbe ohẹn avbe Livai, iran ni ke odẹ okuọ rre deba avbe orhunmwuyẹn ni wa yin Izrẹl kevbe Juda.

²⁶ Oghọghọ nọkhua kegha rre ore Jerusalẹm rhunmwuda, emwi ne ọ khọe vberriọ ma he ka sunu ke ẹghẹ e Solomọn ne ovbi e Devid gha dee.

²⁷ Avbe ohẹn kevbe avbe Livai keghi na erhunmwu afiangbe e Nọyaẹnmwa ne emwa nii. Osanobua keghi họn erhunmwu iran vbe owa ẹre vbe ẹrinmwi, ọ keghi rhan obọ miẹn rẹn.