II Krọnikol 3 - Edo Bible (E Baibol Ẹdo) Version 1996

¹ Erha e Solomọn ne ọba mwamwa ehe ne a gha bọ Ọgua Osa ni yi, ye otọ nẹ. Uhunmwu Oke e Moraia ne ọ rre Jerusalẹm nọ, ehe ne Arauna ne ovbi ẹvbo e Jebus ya ru ehe ne a na wiẹn ọka, e Solomọn ne ọba keghi suẹn ọnrẹn ne a bọ,

² vbe uki ne ogieva ọghe ukpo ne ogienẹ ne ọ ya gha re ọba.

³ Ọgua Osa ne Solomọn bọe gha re ibata igbe yan iyenẹ vbe utanmwẹ kevbe ibata ọgban vbe uvbẹmwẹ.

⁴ Ugha ne a la larọ kevbe gha re uvbẹmwẹ Ọgua Osa ni, ibata ọgban, uyomwẹ ọnrẹn kegha re ibata iyihinrin (180). Uwu ugha na a keghi wa ya igoru ne a ma gua rhu ẹe.

⁵ Ọgua nọkhua ne ọ rrọ, a keghi ye ekpatako sida gue ẹre, a keghi ya igoru nọ mose rhu ẹe, a na gbẹnnẹ ona ọghe udin kevbe ọgiọrọ lele ẹe.

⁶ Ọba keghi ya ikpẹrọnmwọ ni mose kevbe igoru ne a viọ ke Pavam rre te nene Ọgua Osa.

⁷ Ọ keghi ya igoru nii rhu egbekẹn Ọgua Osa kevbe erhan edọnmwẹ, onurho kevbe ẹkhu. Avbe iran ni winna keghi gbẹnnẹ ama aranmwẹ ifuẹn lele egbekẹn ọnrẹn.

⁸ Ọgua ne ọ ke uwu ẹre, ne a tie ẹre Ehe Ne ọ Huan Sẹe Ehia, kegha re ibata ọgban vbe utanmwẹ kevbe ibata ọgban vbe uvbẹmwẹ, ne ọ wa vbe re uvbẹmwẹ nene Ọgua Osa. Etọni igoru isẹn yan ugie ọ re a ya rhu egbekẹn ọnrẹn ighẹ Ehe Ne ọ Huan Sẹe Ehia.

⁹ A keghi ya uwan nekherhe igoru ugie ru ise, a kevbe ya igoru rhu egbekẹn ugha ne ọ ke uwu ẹre.

¹⁰ Ọba keghi vbe tama emwa rẹn wẹ ne iran ya ẹrọnmwọ sa aranmwẹ ifuẹn eva, ne iran ya igoru rhu ẹe kevbe ne iran vbe viọ ẹre ye uwu Ehe Ne ọ Huan Sẹe Ehia,

^11-13 ehe ne iran na mudia ke egbe viọ aro da onurho. Ọkpọkpa vbọ kegha mwẹ ifuẹn eva. Ifuẹn ọkpọkpa kegha re ibata ihinrọn vbe ukhiọnmwẹ vbe utanmwẹ. Iran keghi rhan ifuẹn nii ne ọ ya dekan egbe vbe adesẹneva ughugha nii, ọ keghi vbe sẹ egbekẹn vbe obọ eveva ọghe ugha ni. Ehe ne ọ ghi wa niẹn sẹ vbe otọ kegha re ibata ọgban ne ọ wa vbe re uvbẹmwẹ ughugha ni.

¹⁴ A keghi ya eto ovbiohuẹ deba emwi ọvbehe e eso do ukpọn onurho ọghe Ehe Ne ọ Huan Sẹe Ehia nii, a keghi ya ẹmu ne raghoragho, ododo, kevbe ne ọ baa muẹn, vbe ne a na vbe gbẹnnẹ ama ọghe avbe aranmwẹ ifuẹn nii lele.

Orre Oze Ne Eva

¹⁵ Ọba keghi ma orrẹ eva ye odaro Ọgua Osa, ọkpọkpa kegha re ibata evayan ekigbe siyeha vbe uyomwẹ, ẹzi ne ọ kpọlọ ne ọ re ibata ihinrọn vbe ukhiọnmwẹ vbe uyomwẹ kegha rre eveva.

¹⁶ A keghi ya eghan ọgiọrọ ne a rhie ẹre owẹ la owẹ mu ona ye odukhunmwu orrẹ ni, kevbe ikpẹrọnmwọ oze iyisẹn ba ẹre.

¹⁷ Avbe orrẹ na, ọkpẹn onurho ne a la la Ọgua Osa ọre a mannọ iran yi, a kegha tie ne ọ rre odẹ ekẹn vbọ Jakin, a kegha tie ne ọ rre odẹ okuọ vbọ Boaz.