Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

II Krọnikol 29 - Edo Bible (E Baibol Ẹdo) Version 1996


E Hẹzekaia Ne Ọba E Juda
( II Ọba 18:1-3 )

1 Ukpo ekesọgban ọre Hẹzekaia ye vbe ọ rriọba e Juda ọ keghi ya ukpo ọkpairrọvbọgban vbe ẹkete vbe Jerusalẹm. Iye ẹe kegha re Abija ne ovbi e Zẹkaraia.

2 O keghi lele ukpowẹ e Devid ne ọba ne ọ re erha ẹe odede, ọ na ru emwi ne ọ kere vbe aro e Nọyaẹnmwa.


Kpe Ọgua Osa Huan

3 Vbe uki ne okaro ọghe ukpo ne Hẹzekaia rriọba, ọ keghi kie urho Ọgua Osa, ọ na dọlọ ẹe yi.

4 Ọ keghi viọ avbe ohẹn kevbe Livai eso ye Ọgua Osa vbe odẹ ahọ Ọgua Osa,

5 ọ na gu iran guan vbe evba, ọ wẹẹ, “Wa na avbe Livai, wa ye egbe uwa fi ohan, ne uwa vbe kpe Ọgua Osa ọghe Nọyaẹnmwa ne Osanobua avbe erha uwa odede huan. Wa viọ avbe emwi ne ọ ghi mu awua la Ọgua Osa hin rre.

6 Avbe erha ima odede ma rhie ekhọe ye ẹmwẹ e Nọyaẹnmwa, iran kegha ru emwi ne ọ ma yẹ ọre. Iran hee ẹe ye otọ, iran keghi fi iyeke gbe ehe ne ọ ye.

7 Iran khui urho Ọgua Osa, iran gie ukpa dọyọ, iran ma ghi giẹn eturari ra ne iran zọ ese ne a tọn ẹn vbe Ọgua Osa ọghe Osanobua Izrẹl.

8 Rhunmwuda ọnọna, e Nọyaẹnmwa keghi mu ohu ghe Juda kevbe Jerusalẹm, emwi ne ọ he ru iran ẹre kegha re ne ọ mu ohan kevbe ne ọ kpan emwa hia udu. Wa rẹn ọna ẹsẹse.

9 Agbele avbe erha imaa vbe okuọ, a kevbe viọ avbe ivbi ima kevbe amwẹ ima oghunmwu gha rrie.

10 “Te imẹ ghi tae nian wẹ I ra gu e Nọyaẹnmwa ne Osanobua Izrẹl ta ile ne ọ ghe ghi mu ohu ghe ima ọvbehe.

11 Ivbi mwẹ, wa ghẹ ya ẹe rhọ eghẹrẹ hiehiere. Wa ọrọre emwa ne Nọyaẹnmwa zẹe ne ọ gha giẹn eturari ghe irẹn kevbe ne ọ gha ya avbe emwa ni ru ugamwẹ irẹn.”

12-14 Avbe Livai ni gha rre evba ọ re ena khin: Iran ni ke uniẹn Kohat rre, e Mahat ne ovbi Amasai kevbe Joẹl ne ovbi Azaraia Iran ni ke uniẹn Merari rre, e Kis ne ovbi Abdi kevbe Azaraia ne ovbi Jehalelel Iran ni ke uniẹn Gẹsiọn rre, e Joa ne ovbi e Zimna kevbe Edẹn ne ovbi e Joa Iran ni ke uniẹn Elizafan rre, Simri kevbe Jeuẹl Iran ni ke uniẹn Asaf rre, Zẹkaraia kevbe Matanaia Iran ni ke uniẹn Heman rre, e Jehud kevbe Simẹi Iran ni ke uniẹn Jedutun rre, e Siemaia kevbe Uziẹl

15 Avbe emwa na keghi si avbe Livai ne ihua iran koko, iran hia na do họnmwe egbe. Vbe iyeke ọnii, iran na suẹn gha họnmwẹ Ọgua Osa zẹ vbene Ọba tama iran zẹ vbe Uhi ọghe Nọyaẹnmwa.

16 Avbe ohẹn keghi la uwu Ọgua Osa ne iran ya họnmwẹ ọẹn, iran keghi viọ emwi hia ne a wua ye ladian ore Ọgua Osa, avbe e Livai keghi ke evba viọ ehia ladian, vbe ore ẹvbo gha rrie Iya e Kidrọn.

17 Ikpẹdẹ ne okaro vbe uki ọ re a na suẹn nene iwinna, vbe ọ te sẹ ikpẹdẹ erẹnrẹn, iran winna ehia fo nẹ, ya sẹ egbe ugha ne onurho Ọgua Osa ye, iran keghi vbe ya ikpẹdẹ erẹnrẹn ni lele ẹe winna, ya sẹ ikpẹdẹ enẹirrọvbugie ọghe uki nii, iran na gha mwamwa Ọgua Osa ye otọ khẹ ugamwẹ.


A Dọlegbe Ya Ọgua Osa Fi Ohan

18 Avbe Livai keghi ya na iyẹn ma e Hẹzekaia ne Ọba vbenian wẹẹ, “Ma họnmwẹ Ọgua Osa hia fo nẹ, deba Ogiukpo ne a na giẹn ese, eteburu ne a viọ ebrẹd ne a ya ruemwi yi kevbe avbe emwi ne a lo vbọ hia.

19 Ma vbe viọ avbe emwi ne a ya ru emwi ne Ehaz ne Ọba viọ hin evba rre vbe ẹghẹ ne ọ ma na mudia ẹse vbe ehe ne Osanobua ye werriegbe rre, a vbe dọlegbe họnmwẹ ọẹn, ehia wa rre odaro Ogiukpo e Nọyaẹnmwa.”

20 Vbe ọwarọkpa nii, e Hẹzekaia ne Ọba keghi viọ emwa ni sẹ ihe ni rre ẹvbo nii hia ba egbe iran kegha rrie Ọgua Osa.

21 Iran keghi viọ ẹkhuia ẹmila ihinrọn ohuan ihinrọn, oteghe ohuan ihinrọn kevbe ẹwe ihinrọn zẹ vbe emwi izọ ese ne a ya kpe orukhọ ẹgbẹe ọba kua. Ọba keghi tama avbe ohẹn ni re ivbi uniẹn Errọn ne iran ya avbe aranmwẹ nii zọ ese vbe Ogiukpo.

22 Avbe ohẹn na ka gbele avbe ẹkhuia ẹmila, avbe ohuan kevbe lelẹe, avbe oteghe ohuan kevbe lele ọnii, iran keghi sanmwẹ esagiẹn dọmwadẹ emwi izọese nii ye Ogiukpo.

23 Vbe okiekie ehia, iran keghi viọ avbe ẹwe ni bu ọba gha khian kevbe avbe emwa ọvbehe ni rre ugamwẹ, iran keghi viọ obọ yan iran.

24 Ẹre avbe ohẹn na gbele avbe ẹwe nii, iran na hihiẹ esagiẹn iran ye Ogiukpo zẹ vbe izọese ne a ya hẹ orukhọ emwa ni gha rrie, rhunmwuda, ọba tae nẹ wẹ ne a zọ ese ne a giẹn uan kevbe ese orukhọ ne Izrẹl hia.

25 Ọba keghi ru zẹ vbene Nọyaẹnmwa gie Gad ne akhasẹ ọba, re gie Devid ne ọba kevbe zẹ vbene ogie Natan, ne a khama Devid ne ọba, ọ keghi ya viọ avbe Livai ye Ọgua Osa, ọ na viọ akpata kevbe ukusẹ ba ẹre, ena kegha re emwi iku kevbe ihuan,

26 egbe ne Devid ne Ọba vbe lo. Avbe ohẹn keghi vbe viọ okpe mwẹ obọ, iran na vbe mudia ye evba.

27 Ẹre Hẹzekaia na wẹ ne a viọ avbe nene ese ne a giẹn uan rre, ese ne a zọ ghi suẹn, avbe emwa nii kegha so ihuan urhomwẹ ghe Nọyaẹnmwa, iran ni kpe emwi ihuan keghi suẹn gha kpe okpe kevbe emwi ihuan ni dekẹe.

28 Emwa hia ni rre keghi deba iran vbe ugamwẹ nii kevbe ihuan ne a so, a kegha kpe emwi iku nii khian a te do giẹn emwi izọese fo, iyeke ọnii,

29 e Hẹzekaia ne ọba kevbe emwa nii hia keghi diguẹ iran na ga Osanobua.

30 Ọba kevbe avbe iran ne ọkaolotu ẹvbo nii keghi tama avbe Livai ne iran so ihuan urhomwẹ ne Devid kevbe Asaf ne akhasẹ gbẹnnẹ, ghe Nọyaẹnmwa. Emwa hia keghi ye ẹko rhiẹnrhiẹn mwẹ gha so ihuan ghe Nọyaẹnmwa vbe ehe ne iran na diguẹ nii, iran na ga Osanobua.

31 E Hẹzekaia keghi tama emwa ni wẹẹ, “Vbe ne a ghi na miẹn nian wẹ awua ighi rre uwa egbe, wa viọ emwi do ya zọ ese ekpọnmwẹ ghe Nọyaẹnmwa.” Iran keghi khuẹnniẹn yọ, eso keghi vbe ya ekhọe obọ iran viọ aranmwẹ rre ne a ya sọ ese na giẹn uan.

32 Iran munọ ẹkhuia ẹmila ekigbesiyenẹ rre (70) ohuan iyisẹn (100) kevbe oteghe ohuan uri (200) zẹ vbe ese ne a giẹn uan ghe Nọyaẹnmwa.

33 Debare iran keghi vbe viọ ẹkhuia ẹmila arriaeha (600) rre, kevbe ohuan arriaisẹn eha (3,000) zẹ vbe emwi ne a ya zọ ese, ne emwa ni rri ọe.

34 Ugbẹn vbe a ghi miẹn wẹ avbe ohẹn ma bun sẹ ni gha gbele avbe emwi na hia, avbe Livai keghi ru iyobọ ne iran, a te do miẹn wẹ iwinna ni hia fo. vbe ọ ghi te sẹ ẹghẹ nii, avbe ohẹn ni họnmwẹ egbe nẹ keghi vbe bun yọ. (Avbe Livai ọ re ọ mu egbe ye ẹmwẹ ne a ghẹ ru awua sẹ avbe ohẹn.)

35 Deba iwinna iran ne iran na gbele avbe emwi ne a giẹn ikun ẹnrẹn uan, avbe ohẹn ọ re ọ vbe giẹn ẹvbi avbe emwi ne a ya zọ ese ne emwa re, iran ọ re ọ vbe tue ayọn ne a mu lele emwi ne a ya zọ ese rre ye otọ. Erriọ ọ re a na miẹn wẹ ugamwẹ dọlegbe suẹn vbe Ọgua Osa.

36 E Hẹzekaia ne Ọba kevbe avbe emwa nii, keghi ghọghọ ua, rhunmwuda Osanobua yi iran obọ ne iran ru avbe emwi na ẹgiẹgiẹ.

@ The Bible Society of Nigeria, 1996

United Bible Societies
ကြှနျုပျတို့နောကျလိုကျပါ:



ကြော်ငြာတွေ