II Krọnikol 28 - Edo Bible (E Baibol Ẹdo) Version 1996

Ehaz Ne Ọba E Juda

¹ Ehaz ghi rre ọmọ ukpo ugie, ọ keghi rriọba. Ọ keghi ya ukpo enẹirrọvbugie vbe ẹkete vbe Jerusalẹm. Ọ ma lele igiemwi esi ọghe e Devid ne Ọba ne erha ẹe odede, sokpan, ọ kegha ru emwi ne ẹ i yẹ e Nọyaẹnmwa.

² Ọ keghi lele igiemwi avbe ọba Izrẹl, ọ na wẹ ne iran ma amazẹ ematọn ọghe Baal,

³ ọ kegha giẹn eturari vbe Iya Hinọm, uhin ighẹ te ọ ya ovbi ẹre ne okpia zọ ese ghe amazẹ, ọ kegha ya egbe ta uyinmwẹ ẹwia ọghe emwa ne Nọyaẹnmwa khulo kua vbe otọe nii vbe ivbi Izrẹl dee.

⁴ Ehaz kegha zọ ese ọ na vbe gha giẹn eturari vbe aro ẹbọ ne iran ni ga ẹbọ mu ye uhunmwu oke hia kevbe ototọ erhan ni mwẹ irhu hia.

Okuo Ne A Gu E Siria Kevbe Izrẹl Khọn

^5-6 Rhunmwuda ne Ehaz ne ọba na ru orukhọ, e Nọyaẹnmwa keghi gie obọ e Siria ke ukhunmwu ne ẹẹn vbe okuọ, ọ keghi vbe viọ ni bun vbe ivbi e Juda oghunmwu gha rrie Damaskọs. E Nọyaẹnmwa keghi vbe gie Pẹka ne ovbi e Remalaia ne ọba Izrẹl khọn miẹn Ehaz otọ ọ na gbele arriaisẹn iyehan (120,000) vbe uwu ivbiyokuo e Juda ni din sẹ vbe ẹdẹ ọkpa kẹkan. E Nọyaẹnmwa ne Osanobua avbe erha iran odede kue yọ ne emwi na sunu rhunmwuda ighẹ ivbi e Juda fi iyeke gbe irẹn.

⁷ Ovbiyokuo ọkpa ne ọ re ovbi Izrẹl, ne a tie eni ẹnrẹn Zikri keghi gbele ovbi Ehaz ne ọba ne a tie ẹre e Maaseia kevbe Azrikam ne ọ gbearoghe ẹguae kevbe Ẹlkana ne ọ gha re ne ọ zẹ diake ọba.

⁸ Egbe ne a rhe ya miẹn wẹ ivbi ẹvbo ọkpa iran hia khin, ivbiyokuo Izrẹl keghi ye munọ ikhuo kevbe ibiẹka arriaisẹn uri (200,000) vbe Juda oghunmwu hẹ gha rrie Sameria, deba emwi ọrhẹnrhẹn ne iran fu hẹ gha rrie.

Odẹd Ne Akhasẹ

⁹ Okpia ọkpa ne a tie eni ẹnrẹn Odẹd, ne ọ vbe re akhasẹ kegha rre Sameria. Ọ keghi dekun ivbiyokuo Izrẹl ni ke okuọ dee, deba ivbi e Juda ne iran munọ ẹre oghunmwu vbe iran ghi ra wa la ore ẹvbo, ọ na kha wẹẹ, “E Nọyaẹnmwa ne Osanobua avbe erha uwa odede keghi mu ohu ivbi e Juda, ọ na gie obọ uwa ke ukhunmwu ne iran, wanwanna nian, ọ họn ugbe mwẹ ọghe ekhọe dan ne uwa gbele iran re.

¹⁰ Banbanna nian, wa vbe ho ne uwa ya ikpia kevbe ikhuo ne ivbi Juda kevbe Jerusalẹm ru eviẹn uwa. Wa ma rẹn nian ighẹ te uwa ghi vbe sẹmwẹ e Nọyaẹnmwa ne Osanobua uwa?

¹¹ Wa danmwehọ mwẹ! Avbe oghunmwu na, etẹn uwa ni ikpia kevbe ni ikhuo ọre iran khin. Wa gie iran gha rrie ne Nọyaẹnmwa ghẹ ya ye ohu rri uwa oya.”

¹² Enẹ vbe uwu avbe ọkaolotu Otọe Okuọ, Azaraia ne ovbi e Jehohanan, Berakia ne ovbi Mesilemot, Jehizkaia ne ovbi e Sialọm kevbe Amasa ne ovbi e Hadlai kevbe gbe odan ye uyinmwẹ ivbiyokuo na.

¹³ Iran keghi kha wẹẹ, “Wa ghẹ viọ avbe oghunmwu ni rri edinran. Ma rukhọ ghe Nọyaẹnmwa nẹ, ma keghi ya ohu mu ẹẹn sẹ vbene ọ gha na rri ima oya. Banbanna nian wa ra vbe ru emwi ne ọ gha ya orukhọ ima kpọlọ sẹ ayọ.”

¹⁴ Rhunmwuda ọnii, ivbiyokuo keghi viọ avbe oghunmwu nii, kevbe avbe emwi ne iran fu hẹ werriegbe ne emwa nii kevbe avbe olotu iran.

¹⁵ Iran keghi zẹ ikpia enẹ ne iran viọ ukpọn ne avbe oghunmwu nii vbe uwu avbe emwi ne iran te fu hẹ. Iran keghi viọ ukpọn kevbe ibata ne ọ gha gba iran obọ ne iran yọ, iran keghi vbe viọ evbare ne ọ gha sẹ iran re kevbe ne ọ gha sẹ iran da ne iran, iran keghi vbe kpe iran ẹwẹn. A keghi viọ iran ni ma ghi sẹtin khian tota yan ẹsin. Iran keghi viọ avbe oghunmwu ni werriegbe gha rrie otọ e Juda vbe Jẹriko ne ẹvbo udin. Ẹre ivbi Izrẹl na werriegbe gha rrie Sameria.

Ehaz Nọ Asiria Iyobọ

^16-17 Ivbi Idọm keghi dọlegbe gha mu okuọ ye Juda, iran kevbe khọn munọ oghunmwu ni bun, ẹre Ehaz ne ọba na ya nọ iyobọ vbe obọ Tiglat Pailesa ne Ọgbaisi Asiria.

¹⁸ Vbe uwu ẹghẹ ọkpa na, ivbi e Filistia keghi vbe gha mu okuọ yo avbe ẹvbo ni rre ototọ oke vbe odẹ orrie kevbe odẹ ekẹn e Juda iran keghi khọn mu e Bẹt Siemẹs, Aijalọn kevbe Gẹdẹrọt kevbe avbe ore nekhua ighẹ Soko, Timna kevbe Gimzo deba igue ni lẹga iran. Iran keghi wa yin evba ọghe etẹbitẹ.

¹⁹ Rhunmwuda ne Ehaz ne ọba e Juda na rra iyi emwa rẹn, ọ kevbe yagha e Nọyaẹnmwa, e Nọyaẹnmwa keghi fian ọlọghọmwa ye e Juda egbe.

²⁰ Ne Ọgbaisi e Siria gha na te ye Ehaz obọ, ọ kegha gu ẹe khọn, ọ na gha rhie ukpokpo ne ẹẹn.

²¹ Rhunmwuda ọnii, Ehaz keghi ya viọ igoru ni rre Ọgua Osa kevbe ẹguae, kevbe owa avbe olotu emwa nii, ọ na viọ gie Ọgbaisi nii, sokpan, ọna ma mwẹ iyobọ ne ọ ru vbọ.

Orukhọ Ehaz

²² Ọ ghi sẹ ẹghẹ ne emwi hia ya ba su ẹe sẹẹ, ọmwa na ighẹ Ehaz keghi wa dọlegbe sẹmwẹ e Nọyaẹnmwa sẹẹ vbe ne ọ te ka ye yi.

²³ Ọ keghi zọ ese ghe avbe ẹbọ e Siria ni khọn miẹn irẹn otọ, ọ na kha wẹẹ, “Avbe ẹbọ ivbi e Siria ọ re ọ ye Siria obọ, rhunmwuda ọnii, a dẹghe mẹ zọ ese ghe iran, ughaghe iran gha vbe yọ mwẹ obọ.” Ọna keghi si ọfuan ye irẹn kevbe ẹvbo ẹre egbe.

²⁴ Yevbe sẹ ọnii, ọ keghi viọ emwi ne a lo vbe Ọgua Osa hia, ọ na dunmwu ehia a. Ọ keghi khui urho Ọgua Osa, ọ na bọlọ Ogiukpo lele ehe hia vbe Jerusalẹm.

²⁵ Ọ na bọlọ aro ẹbọ iran ni ga ẹbọ lele ehe hia vbe ore nekhua kevbe ẹvbo ni rre Juda hia, ehe ne iran na gha giẹn eturari ghe avbe ẹbọ ẹrrẹe. Egbe emwi vbe nian ọ re ọ ya si ohu e Nọyaẹnmwa ne Osanobua avbe erha ẹe odede gie egbe ẹre.

²⁶ Avbe emwi ọvbehe hia ni sunu vbe ẹghẹ ne ọ na rre ẹkete, ke omuhẹn ya sẹ ufomwẹ ọnrẹn, a gbẹnnẹ ọẹn ye Ebe Okha Ọghe Avbe Ọba e Juda kevbe Izrẹl.

²⁷ Ehaz ne ọba keghi wu, a na re ẹre ye Jerusalẹm, sokpan, a ma re ẹre ye idin avbe ọha, e Hẹzekaia ne ovbi ẹre keghi rriọba lele ẹe.