II Krọnikol 27 - Edo Bible (E Baibol Ẹdo) Version 1996

E Jotam Ne Ọba E Juda

¹ Ukpo ekesọgban ọre Jotam ye vbe ọ rriọba, ọ keghi ya ukpo enẹirrọvbugie vbe ẹkete vbe Jerusalẹm. Iye ẹe kegha re Jerusia ne ovbi e Zadọk.

² Rẹn keghi ru emwi ne ọ maa vbe odaro e Nọyaẹnmwa zẹ vbene erha ẹe vbe ru, sokpan, rẹn ma rra iyi zẹ vbene erha ẹe ru ne ọ na ya gha giẹn eturari vbe uwu Ọgua Osa. Sokpan, te avbe emwa ni ye gha ru orukhọ khian.

³ E Jotam ọ re ọ bọ Onurho odẹ Okuo ne ọ rre Ọgua Osa, ọ keghi vbe winna iwinna ọrhẹnrhẹn vbe ekẹn e Jerusalẹm vbe obọ ne ọ laghe Ofẹl.

⁴ Ọ keghi bọlọ avbe ore nekhua ye avbe oke ni rre Juda, ọ na bọlọ avbe owa ne gbain kevbe owa ọkhẹ ne gelete lele uwu ẹgbo.

⁵ Ọ keghi mu okuọ gie ọba Amọn kevbe ivbiyokuo ẹre, obọ ẹre keghi ke uhunmwu ne iran, ọ keghi wẹ ne ivbi Amọn gha ye avbe emwi na mu ohan gie irẹn ukpukpo la ukpo eha, ena ọ re etọni ọghe esiliva, okhuae ọka ẹsin arriaisẹn ekigbe siyeha, (50,000) kevbe okhuae ọka irhuarhua arriaisẹn ekigbesiyeha (50,000).

⁶ Jotam keghi wa gha mwẹ ẹtin yọ rhunmwuda ekhọekekhọe ọ re ọ ya gha họn ẹmwẹ ne Nọyaẹnmwa ne Osanobua ẹre.

⁷ Avbe emwi ọvbehe hia ne Jotam ru vbe ọ rre ẹkete, avbe okuọ ne ọ khọn rẹn kevbe emwamwa iwinna ẹnrẹn, a gbẹnnẹ ehia ye Ebe Okha Avbe Ọba Izrẹl kevbe Juda.

⁸ Ukpo ekesọgban ọre Jotam gha ye vbe ọ rriọba, ọ keghi ya ukpo enẹirrọvbugie vbe ẹkete vbe Jerusalẹm.

⁹ Ọ keghi wu, a na re ẹre ye Ẹvbo e Devid, Ehaz ne ovbi ẹre keghi rriọba lele ẹe.