II Krọnikol 26 - Edo Bible (E Baibol Ẹdo) Version 1996

Uzaia Ne Ọba E Juda

¹ Ivbi e Juda hia keghi zẹ Uzaia ne ọ re ọmọ ukpo enẹ irrọvbe ugie ne ọ rriọba lele erha ẹe.

² (Amezaia wu nẹ Uzaia keghi khọn mu Ẹlat, ọ na dọlegbe bọe.)

³ Ọmọ ukpo enẹirrọvbugie ọre Uzaia ye vbe ọ rriọba. Ọ keghi ya ukpoevayan-ekigbesiyeha vbe ẹkete vbe Jerusalẹm. Iye ẹe kegha re Jekolia ne ovbi e Jerusalẹm.

⁴ Ọ keghi wa rhie obọ erha ẹe, ọ na gha ru emwi esi vbe aro e Nọyaẹnmwa.

⁵ Ẹghẹ ne Zẹkaraia ne ọ gu ẹe ziro ẹmwẹ ugamwẹ ya ẹe vbe agbọn hia, ọ keghi ya ekhọe ẹmwata ga e Nọyaẹnmwa, Osanobua keghi fiangbe ẹe.

⁶ Uzaia keghi mu okuọ gie ivbi e Filistia. Ọ keghi dunmwu ekẹn ne a gbe lẹga e Gat, e Jamnia, kevbe Asdọd sotọ, ọ keghi vbe gba odin gaa ore ẹvbo eso vbe ọkpẹn Asdọd kevbe Filistia.

⁷ Osanobua keghi rhie iyobọ ne ẹẹn ne ọ ya khọnmiotọ vbe uhunmwu ivbi Filistia, kevbe avbe Arab ni rre Gubaal kevbe ivbi e Meunit.

⁸ Ivbi Amọn kegha ga gie Uzaia, ọ keghi mwẹ ẹtin sẹrriọ wẹ okhekhe ẹre keghi ya gha sẹ otọ Igipt.

⁹ Uzaia keghi dọlegbe dọlọ odin ne a gbe lẹga e Jerusalẹm yi vbe ne ọ na bọ owa ọkhẹ ne gelete ye Urho Igọgọ, Urho ọkpẹn Iya kevbe ehe ne ekẹn ni ke mu uhunmwu da ehe ọvbehe.

¹⁰ Ọ keghi vbe bọlọ owa ọkhẹ uhae amẹ ni bun rhunmwuda, rẹn wa mwẹ oghẹn ẹmila ni bun vbe ototọ oke kevbe ehe ne ọ rriẹe ni rre odẹ orrie. Rhunmwuda ne irẹn na wa ho ẹmwẹ ugbo ne a gbe, ọ keghi wẹ ne emwa ni bun gha mu ugbo azara vbe otọe ni rre uhunmwu oke kevbe ne iran gha ya avbe otọe ni maa emwiokọ ni rrọ gbe ugbo.

¹¹ Ọ kegha mwẹ ivbiyokuo ni bun ni wa rhie vbẹ khẹ okuọ. Ọmwa ne ọ gbẹnnẹ emwi ẹmwẹ iran ye otọ kegha re avbe Jeiẹl kevbe Maaseia ne ọgbenbe vbe ne Hananaia ne ọkpa vbe uwu iran ni lele ọba winna na gha gbe aro ghe iran.

¹² Avbe ọka okuọ ni gbearoghe ivbiyokuo ẹre kegha re arriaeha yan arriaisẹn eva (2,600).

¹³ Ivbiyokuo ne iran gbearoghe hia kegha re iyisẹn isẹn yan arriaisẹn ihinrọn yan iyisẹn eha (307,500) emwa nii wa sẹtin khọn avbe eghian ọba ne ẹẹn ẹsẹse.

¹⁴ Uzaia keghi viọ avbe emwi igbinna vbenian ne ivbiyokuo ẹre avbe asa, asoro, ẹrhu ẹgere, ẹwu ematọn, uhanbọ kevbe ifẹnmwẹ kevbe ikpẹ okuta ne a ya filo umọvọn.

¹⁵ Avbe ayemwirre ọghe ọe ni rre Jerusalẹm keghi kun emadogua ne a ya fi ifẹnmwẹ kevbe avbe okuta ni kọnkọn ke uhunmwu owa ọkhẹ kevbe igọgọ ekẹn ne a gbe lẹga ẹvbo rre. Okhekhe ẹre keghi gba ehe hia, ọ kegha mwẹ ẹtin rhunmwuda iyobọ ne ọ miẹn vbe obọ Osanobua.

A Rria Uzaia Ikhi Ye Uhiomwẹ Ọnrẹn

¹⁶ Sokpan, ugbẹn vbe Uzaia ne ọba ghi re ọmwa ne ọ wegbe nẹ, ọ keghi do gha hio, ọnii ọ re ọ si udemwẹ ọnrẹn. Ọ keghi yagha e Nọyaẹnmwa ne Osanobua ẹre vbene ọ na gha rrie Ọgua Osa ya gha giẹn eturari vbe Ogiukpo eturari.

¹⁷ Avbe ohẹn ni wegbe kevbe ni din iyenẹ keghi deba Azaraia ne ohẹn iran na lele ọba.

¹⁸ Ne iran ya da ẹre obọ ẹre yi. Iran tama rẹn wẹẹ, “Uzaia, u i mwẹ asẹ ne u ya giẹn eturari ghe Nọyaẹnmwa. Avbe ohẹn ni re uniẹn Errọn, emwa ne avbe ma re ohẹn yọ, ọ re ọ ru ẹe. Kpa vbe ehe ne ọ huanrẹn na rre, u sẹmwẹ e Nọyaẹnmwa Osanobua, ẹ i ghi fiangbuẹ ọvbehe.”

¹⁹ Uzaia keghi mudia ye evba vbe uwu Ọgua Osa, vbe ọkpẹn Ogiukpo ne a na giẹn eturari, ọ keghi mu ọkpan ne a ya giẹn eturari mwẹ obọ. Ohu avbe ohẹn nii keghi mu ẹẹn, vbe ọwarọkpa nii, alalọ na wa ladian vbe uharo ẹre.

²⁰ Azaraia kevbe avbe ohẹn nekpa keghi wa tanro ye ọba uharo vbene ohan na gha mu iran. Iran keghi ya ẹtin mu ẹẹn hin uwu Ọgua Osa rre. Rẹn keghi rhulẹ ladian, rhunmwuda te Nọyaẹnmwa rri ẹre oya.

²¹ Vbe ẹdẹ agbọn rẹn ni dekẹe, te Uzaia ghi gha re ọmwa ne awua gue rhunmwuda emianmwẹ nii. Ugbẹn vbe a ghi miẹn wẹ Ọgua Osa ẹ i ghi giee lao, Uzaia kegha rre owa obọ ẹre, a keghi miẹn ẹre iwinna ukpo ne ọ te ye hia. E Jotan ne ovbi ẹre kegha kha yan ẹvbo nii.

²² Aizaia ne akhasẹ ne ovbi Amọz gbẹnnẹ avbe emwi nekpa hia ne Uzaia ru vbe ẹghẹ ẹre ye otọ.

²³ Uzaia keghi wu, a na re ẹre ye itẹ avbe ọba, sokpan rhunmwuda emianmwẹ ne ọ gha khuọnmwi, a ma re ẹre ye idin avbe ọba. E Jotan ne ovbi ẹre keghi rriọba lele ẹe.