II Krọnikol 24 - Edo Bible (E Baibol Ẹdo) Version 1996

E Joas Ne Ọba E Juda

¹ Ukpo ihinrọn ọ re Joas ye vbe ọ rriọba e Juda ọ na ya ukpo iyeva vbe ẹkete vbe Jerusalẹm, iye ẹe kegha re Zibia ne ovbi ẹvbo ne a tie ẹre Biẹsiẹba.

² Vbe ẹghẹ ne Jehoiada ya gha rre agbọn hia, e Joas kegha ru emwi ne ọ yẹ e Nọyaẹnmwa.

³ E Jehoiada keghi viọ ikhuo eva ne Joas ne ọba, iran na biẹlẹ emọ ikpia kevbe emọ ikhuo ne ẹẹn.

⁴ E Joas ghi ya ẹghẹ eso nẹ vbe ẹkete, ọ na wẹ rẹn ra dọlọ Ọgua Osa yi.

⁵ Ọ na khama avbe ohẹn kevbe Livai wẹ ne iran ya la ẹvbo ni rre Juda hia, ne iran koko igho ne ọ gha gba Ọgua Osa ne a dọlọyi ukpukpo, vbe obọ iran. Ọ keghi tama iran ne iran ru ẹe ẹgiẹgiẹ sokpan, avbe Livai keghi si ẹe vbe otọ.

⁶ Rhunmwuda ọnii, ọ keghi tie Jehoiada ne ọkaolotu iran, ọ nọ rẹn wẹẹ, “Vbọzẹ ne u ma na we ne avbe Livai koko igho ne Mosis ne ọguọmwadia e Nọyaẹnmwa fian yọ wẹ ne emwa ni rre Juda kevbe Jerusalẹm gha hae ne a ya gha winna vbe Owa Ukpọn ne a ya rẹn ighẹ e Nọyaẹnmwa rre evba?”

⁷ (Igbesa Atalaia ne okhuo oya nii keghi rhia Ọgua Osa a, iran keghi ya eni bun vbe avbe ọkpan iruemwi gha ru ugamwẹ e Baal.)

⁸ Ọba keghi tama avbe Livai ne iran ka ẹkpẹti ne a ya koko igho mu ye onurho Ọgua Osa.

⁹ Iran keghi gie ne a khama emwa ni rre Jerusalẹm kevbe Juda hia wẹ ne iran do hae igho ne Mosis ne ọguọmwadia e Nọyaẹnmwa koko vbe otọ ẹgbo vbe ẹghẹ nii.

¹⁰ Ẹmwẹ na keghi yẹ emwa nii kevbe avbe olotu iran, iran keghi viọ igho ne a fian ne iran rre, ẹkpẹti ni keghi vuọn.

¹¹ Avbe Livai keghi mu ẹkpẹti gie ọmwa ne ọba zẹ yọ ne ọ gha gbearoghe ẹre. Ẹghẹ ke ẹghẹ ne ọ ya vuọn, ọgbẹn ebe ọba ke ẹe kevbe ọmwa ne ọ mudia ne Ogie Ohẹn ghi rhurhẹ igho ni ladian, iran ghi ya mu ẹkpẹti ni ye ihẹ ẹre. Erriọ a na miẹn wẹ iran keghi koko igho nọkpọlọ ẹsẹse.

¹² Ọba kevbe Jehoiada keghi ha osa ne iran ni dọlọ Ọgua Osa yi iran keghi vbe viọ avbe iran ni gbe okuta, owinna kevbe ogun ematọn vbe iwinna, ne iran dọlọ ẹe yi.

¹³ Iran ni winna keghi kakabọ winna ẹsẹse, iran keghi ru Ọgua Osa vbene ọ ka ye vbe omuhẹn, ọ keghi vbe wegbe ẹsẹse.

¹⁴ Iwinna ghi fo nẹ, iran keghi viọ avbe igoru kevbe esiliva ni dekẹe ne ọba kevbe Jehoiada, iran keghi ya ẹe dọlọ avbe ọkpan kevbe avbe emwi ne a ya le evbare ọvbehe ye Ọgua Osa. Vbe ẹghẹ ne Jehoiada ya gha rre agbọn, te a gha zọ ese ye ẹghẹ vbe ne ọ kei yi vbe Ọgua Osa,

A Fi Emwi Ne Jehoiada Ru Werriẹ

¹⁵ ọ ghi wa khian ọmaẹn nẹ vbe ọ rre ukpo igbe irrọvbe ikiọkhọe, ọ keghi fi ya.

¹⁶ Iran keghi re ẹre ye idin avbe ọba vbe Ẹvbo e Devid ne a ya rhie ma iwinna ne ọ winnaẹn ne ivbi Izrẹl, ne Osanobua kevbe Ọgua Osa.

¹⁷ Sokpan, e Jehoiada ghi wu nẹ, avbe ekaolotu e Juda keghi kpikpi e Joas ne ọba ne a miẹn wẹ iran ọ re ọ ghi rhie ẹmwẹ ọnrẹn.

¹⁸ Rhunmwuda ọnii, emwa ni keghi dobọ ugamwẹ ne a ru vbe Ọgua Osa e Nọyaẹnmwa ne Osanobua avbe erha iran odede yi, iran keghi suẹn gha ga ẹbọ kevbe amazẹ Asiẹrra ne ẹbọ ne okhuo. Orukhọ ne iran ru keghi tie ohu e Nọyaẹnmwa ye Juda kevbe Jerusalẹm uhunmwu.

¹⁹ E Nọyaẹnmwa keghi gie avbe akhasẹ ne iran yan ma iran wẹ ne iran dọlegbe bu irẹn gha dee, sokpan emwa ni ma danmwehọ.

²⁰ Ẹre orhiọn e Nọyaẹnmwa na hin yan e Zẹkaraia ne ovbi e Jehoiada ne ohẹn, Ọ keghi mudia ye ehe ne emwa ni gha na bẹghe irẹn, ọ na kha wẹẹ, “E Nọyaẹnmwa Osanobua nọ uwa emwi ne ọ si ẹe ne uwa na gha rra iyi irẹn ne uwa ghi ra na ya obọ uwa si ọfuan rriegbe! Wa fi iyeke gbe ẹe nẹ, rhunmwuda ọnii, rẹn vbe fi iyeke gbe uwa.”

²¹ E Joas ne ọba keghi deba emwa nii khuan khẹ e Zẹkaraia, emwa nii keghi filo okuta gbe Zẹkaraia a vbe ẹghodo Ọgua Osa zẹ vbene ọba wẹ ne iran ru ẹe.

²² Ọba keghi mianmian ugamwẹ vbene Jehoiada ne erha Zẹkaraia ya ekhọe hia gae hẹ, ọ na gbe Zẹkaraia a. Ugbẹn vbe Zẹkaraia ghi ra wu, ọ keghi datu wẹẹ, “Te Nọyaẹnmwa gha bẹghe emwi ne u ru na ne ọ rria ruẹ ikhi yọ.”

Ufomwẹ Arriọba E Joas

²³ Ọ ghi sẹ ẹghẹ ahọ uyunmwu vbe ukpo nii, ivbi e Siria keghi mu okuọ gha die Juda kevbe Jerusalẹm, iran keghi gbele avbe ekaolotu ni rrọ hia, iran na fu emwi ọrhẹnrhẹn viọ gha rrie Damaskọs.

²⁴ Ivbiyokuo e Siria ma gha bun hiehie, sokpan, e Nọyaẹnmwa keghi gie iran khọn miotọ vbe uhunmwu ivbiyokuo ọkhọngborrie ọghe Juda, rhunmwuda ne iran na fi iyeke gbe irẹn ne Nọyaẹnmwa ne Osanobua avbe erha iran odede. Odẹ vberriọ ọ re ọ ya rri e Joas ne ọba oya.

²⁵ Obọ keghi daa ẹe ẹsẹse vbe emwi vba re, ugbẹn vbe avbe eghian ghi kpao nẹ, eva vbe uwu avbe ọkaokuo ẹre keghi khuan khẹ ọre, iran na gbẹe rua ye ukpo ne ọ lovbiẹ yi, ne iran ya rria ikhi ye ovbi e Jehoiada ne ohẹn, ne ọ gbe ua. Iran keghi re ẹre ye ore Ẹvbo e Devid sokpan, ẹ i re ye idin avbe ọba.

²⁶ (Iran ni khuan khẹ ọ re kegha re Zabad ne ovbi okhuo ọkpa ne a tie ẹre Simaet ne ọ ke Amọn re kevbe Jehozabad ne ovbi okhuo ọkpa ne ọ ke Moab rre, a keghi tie eni ẹnrẹn Simiri.)

²⁷ A gbẹnnẹ okha ivbi e Joas, ẹmwẹ ne akhasẹ tae yan rẹn kevbe vbene ọ dọlegbe họ Ọgua Osa hẹ ye ebe ne a gbẹn ya rhan otọ Ebe avbe Ọba. Ovbi ẹre ne a tie ẹre Amezaia keghi rriọba lele ẹe.